فكرة: سندريلا الهلال

اعداد وتصميم : الهنوووف + عسيريه

لنا من كل عام شهر فضيل ..
أعاده الله علينا وعليكم وجميع المسلمين بالخير واليمن والبركات
وكل عام وانتم بخير

**][يوميات رمضانية 1431 هـ ♥][ **

لقد عدنا اليكم .. تحملنا الاشواق للقياكم .. ونسعد ان نعيش معكم

. في سلسلة تحمل بين طياتها يوميات الأعضاء الرمضانية من كل عام

هذه السلسلة أنتم أهل بيتها ونحن ضيوفا في حضرتكم ،،،

♥

أهلا وسهلا بكم أحبتنا

ودعونا نرحب سوية بالضيف" الثالث عشر مصمم الجلس العام ذآيب
لكي يحكي لنا احداث يومه مع شهر رمضان المبارك

ماهو رمضان بالنسبه لك ..؟
شهر ديني , خاصة وانه الشهر الوحيد اللي الصوم فيه يكون واجب , والحسنات فيه تتضاعف.
ايضًا شهر عائلي , الاقارب دئمًا ما يجتمعون على مائدة الافطار.
شهر فني بعد , وموسم المسلسلات والبرامج.
وشهر مرهق ماديًا , تلقاها من مقاضي رمضان , والا العيد والا متطلبات الشهر الكثيرة !!.

برنامجك اليومي في رمضان ؟
مافيه برنامج محدد , تتحكم فيني الاشياء اللي باسويها لليوم.
يعني اعدل برنامجي لو كان فيه مباراة مثلا , او راح اطلع برى البيت , او فيه عزيمة , او باسيّر على اقربائي.

ماهي اكلتك ومشروبك المفضل في رمضان ؟
الفيمتو استحل قلبي في السنوات الماضية , لكني من رمضان الماضي حولت على التانج , مدري , بس احس ان الفيمتو طعمه تغير وما صار مثل اول , احد يوافقني الراي؟
واذا كان فيه عصير طبيعي او شي غير الفيمتو والتانج , ما فيه مانع اشربه.
الاكل , مافيه شي محدد , بس باقول اللقيمات , لقيمات الوالدة الله يخليها لي حلوة , جدًا حلوة , مدري طرية وكذا مع العسل , صعب اشرحها لكم

متى اول مره صمت فيها .واذا عندك مواقف مع الصيام اذكرها ؟
صمت وانا بالابتدائي , كنا نتحدى بعض انا واخوياي بالمدرسة من يصوم
ولا جينا للمدرسة كل واحد يطلع لسانه , واللي لسانه ابيض معناها انه صايم
لكني من يوم ما ارجع البيت اتغدى ولا علي منهم , ولا بدت العطلة اسسسسسحب على الصيام كل ابوه ;d

موقف لاينسى حصل لك بـ رمضان..؟
اكثر من مرة حصلت لي , اشرب موية ويصير المذن قد اذن وخلص !!
حرااااااااااااااااااااام يضيع علي يوم في رمضان ما صمته
عاد انا اكمل هاليوم ولا اكل شي لين الفطور , ولا كني سويت شي
واقضيه بشوال

كيف نظامكم واجوائكم في رمضان ونظامكم بالفطور والعشاءوالسحور.؟
فطور: تمر وقهوة وموية وشوية فطاير ولقيمات.
عشاء او ما يسمى فطور ثاني: نفس الفطاير حقت الفطور ووجبة رئيسية وحلى.
سحور: غالبًا رز ولبن

هل ترى اختلاف بـ رمضان في السنين الماضيه عن السنوات الاخيرهواذا نعم وش الاشياء الي افتقدتها.؟
طعم الفيمتو ولا غيره

هل تفضل الصلاه في المسجد القريب من بيتكم او تميل للتنويع ومن لقاريء الذي تحرص على الصلاه خلفه في رمضان؟
امام مسجدنا صوته حلو ما شاء الله عليه , اهم شي واحد اصلي وراه والا ما فرق الصوت

أجمل رمضان عشته حتى الآن , متى ولماذا ؟
كللللها والله حلوة , وتبقى بذاكرتي.

رسالة في هذا الشهر المبارك .. لمن تبعث بها وماذا تقول فيها .؟
امي وابوي , واقول لهم الله يخليكم لي



اليوميات الرمضانية
اول شي احب اشكر اصدقائي محمد شكسبير وعبود فيلسوف زمانه.
واحب اقول انهم افضل اصدقاء مرو علي في حياتي كلها
^
سويت اللي علي , زهبوا القروش انت وياه

يومي بدا الساعة 5:21 صباحًا , دخلت المسن , واشوف الاخ محمد شكسبير يحادثني.
واتفقت انا وياه على شغلات , ثم بدينا نتناقش في بعض احوال المسلمين في رمضان.
حدثني محمد عن مشكلته , ويقول اني اعاتب شبكة ام بي سي العلمانية والارهابية يوم انها حطت حليمة على وقت السحور.
وهو فعلا ترى صادق , يعني الواحد ياكل والا يناظر ؟ , ادارة القناة قصدت هالشي عشان الرجل المسلم ما يكمل صومه.
وش الطريقة ما ادري.

خلصت منه ورحت اتصفح الشبكة , وشبكة ثانية بعد , ومنتدى جامعتنا اشوف وش الجديد
الساعة 6:30 سكرت اللابتوب , ثم رحت العب بالاكس بوكس , مباراة احرقت اعصابي صراحة
بالدقيقة 84 كانت النتيجة 4-2 لهم , قبل ان يلهمني الله واسجل ثلاث اهداف في الدقايق الباقية وافوز.
ومن هنا اوجه لإخواني رسالة بأن لا حياة مع اليأس , واستشهد بموقفي في الاكس بوكس
بعدين رحت وحطيت راسي ونمت , قمت الظهر شوي ورجعت نمت , ثم قمت العصر , ويوم جت الساعة 5:30 رحت ولعبت اكس بوكس.
وعلى التلفزيون شوي لين قرب الاذان , ثم اجتمعنا على سفرة الافطار واذن وافطرنا الحمد لله , وبعد المغرب تابعت طاش
عاد والله اني كنت انتظر حلقة سعيدان وعليان من مدة , والحمد لله ما خيبت ظني , دايم طاش مثل ما احب :$.
ثم رحت اخذت اللابتوب , قعدت اكتب يومياتي إلى هالوقت , عشان يعني ما اخذ وقت بالليل وانا اكتب , ويمكن انسى شي والا شي.
تصفحت الشبكة شوي , ثم اذن العشاء.

بعد الصلاة اخذت اتصفح النت شوي , فيه حلقة من طاش فاتتني ورحت اشوفها في شاهد
خلصت الا وباب الحارة بادية , وعين على التلفزيون وعين اللابتوب.
ويوم اني اناظر , شوي الا قروب رابطة مانشستر بالمسن يطلع لي , رحت اشوف وش فيه ؟
واحد اضاف القروب واسمه انجليزي
قلت اييييه هذا اكيد واحد من الشباب قاعد يستهبل وداخل بنك انجليزي !!
قمت انا وضيدان (United Leader) نستهبل عليه
شوي الا نسسسسسب فيه
والولد مسوي ثقيل !!
قاعد يكتب بالانجليزي وكذا
قلت مالي الا واكتب بالانجليزي , وقعدت اسبه بالانجليزي انا وضيدان بعد
شوي الا الرجال نزّل حروف جديدة (اللي تجيك حروف اللغة الانجليزية وفوقها نقاط ومدري ايش)
الولد قام يكتب كلمات غير مفهومة , ماهي انجليزية !!
وانا اللي شكيت , قلت خلني باشوف لا يصير موب من اخويانا

ذآيب: انت من وين؟
الشخص: من تركيا. (طبعًا الكلام كله بالانجليزي بس مترجمه لكم)
ذآيب: لميس ؟ نور ؟
الشخص: ؟؟
ذآيب: انت مسلم ؟
الشخص: ايه مسلم.
ذآيب: وحنا بعد مسلمين ومن السعودية
الشخص: (فيس يضحك زي ذا )
ذآيب: اهلا وسهلا
الشخص: وعليكم السلام
ذآيب: اووه صح نسيت اسلم , ترانا اسفين وكنا نحسبك كافر عشان كذا قمنا نسبك. (اقرب تصريفة)
الشخص: مافيه مشكلة , (من زود الحماس يوم قلت اسلام ونحسبك كافر وكذا قال تبًا لك اسرائيل. <_ ترجمة افلام ترى
جيت بأكتب تبًا لك امريكا , بس ذرقت (يعني خفت) اكتبها وتوديني بستين داهية.
ذآيب: ههههههههههههههههههه , معك خالد من السعودية وعمري 18 سنة.
الشخص: معك كانر من تركيا وعمري 19 سنة.
ذآيب: حياك الله بالقروب نورتنا , انت تدرس؟
كانر: ايه ادرس في الجامعة.
ذآيب: ما شاء الله وش تبي تصير؟
كانر: مهندس كومبيوتر.
ضيدان: ترانا نحب اردوغان <_؟
كانر: اردوغان عميل امريكي
ذآيب: لو انه عميل امريكي ما ساعد المسلمين (أقصد فلسطين بس ما عرفت اكتبها بالانجليزي)
ثم تبادلنا الايميلات , وفتحت محادثة جديدة بيني وبينه وقعدت اكلمه.

ذآيب: اهلا وسهلا , اووه السلام عليكم
كانر: وعليكم السلام.
ذآيب: تصدق ان ايميلي مستانس عشاني اضفتك فيه ؟ (باقول نور الايميل ولا عرفت )
كانر: هههههههه شكرًا.
ذآيب: وش يعني النك نيم اللي حاطه؟ (zZKurabiye Vanavarı)
كانر: معناها كيكو الوحش
ذآيب: وش كيكو الوحش؟
كانر:
ذآيب: ههههههههههههه
ثم قعدنا نتحدث عن الكورة شوي
ومن ضمن سواليفنا ذكر انه متابع للدوري التركي , ويعرف كل الاندية فيه ومدري ايش

ذآيب: اقول كانر , انا راح انزل يومياتي في احد المواقع , تسمح لي اذكر محادثتنا؟
كانر: ممكن الرابط؟
ذآيب: www.vb.alhilal.com
كانر: الهلال؟
ذآيب: ايه هذا اكبر اندية كرة القدم في اسيا
ذآيب: (تذكرت ان طارق التايب قد لعب في الدوري التركي بنادي غاز عنتاب)تعرف طارق التايب اللي قد لعب عندكم في غاز عنتاب؟
كانر: لا ما اعرفه.
ذآيب: (حطيت له صورة طارق وعرفه)
ذآيب: هذا لعب مع الهلال في فترة من الفترات
ذآيب: اقول كانر , ممكن صورتك عشان احطها بيومياتي؟
كانر: ايه ثواني
واعطاني صورته وودعته

صور كانر:






وه بث يا ملحه

وبعدين رحت لخوالي عازميننا على السحور
وما حصل شيء يذكر هناك
ورجعت للبيت قبل الفجر , وهذا انا بعد الفجر اكتب لكم يومياتي البااااااايخة
كنت والله مخطط اسوي اكشن , بس الوالدة فجعتني بخبر السحور

ختاما احب اشكر الاستشاريين على استضافتي
وان شاء الله اكون ضيف خفيف عليكم

واخيرًا .. للصيد

كل الشكر

لـلمميز **][ "ذآيب" "♥][ **

وانتظرونا غداَ

مع المتألق سيناتور هلالي .

أرق التحايا وأطيبها من

مشرفي واستشاري

المجلس العام