فكرة: سندريلا الهلال

اعداد وتصميم : الهنوووف + عسيريه

لنا من كل عام شهر فضيل ..
أعاده الله علينا وعليكم وجميع المسلمين بالخير واليمن والبركات
وكل عام وانتم بخير

**][يوميات رمضانية 1431 هـ ♥][ **

لقد عدنا اليكم .. تحملنا الاشواق للقياكم .. ونسعد ان نعيش معكم

. في سلسلة تحمل بين طياتها يوميات الأعضاء الرمضانية من كل عام

هذه السلسلة أنتم أهل بيتها ونحن ضيوفا في حضرتكم ،،،

♥

أهلا وسهلا بكم أحبتنا

ودعونا نرحب سوية بالضيف" الثاني عشر ام متعب التميمي
لكي تحكي لنا احداث يومها مع شهر رمضان المبارك

ماهو رمضان بالنسبه لك ..؟

من افضل شهور السنه الهجريه ..لما فيه

من الروحانيه.. التماسك... صفاء القلوب ... التمام الاسره ... قرب العبد لربه

راحه فالنفس.. بعد عن المحرمات ... تصفد الشياطين ومنهم عقل الهلال من دخل رمضان ماشفناه

برنامجك اليومي في رمضان ؟

اصحى الساعه 3 – اقرى قران لمدة ساعه – بعدها اخش المطبخ واشمر عن ساعدي تحت لهيب الفرن لاجل تكوين مائده لذيذه –أفطر – اطالع طاش وكم مسلسل – اروح بعدها اتوضاء واذهب للمسجد لصلاه العشاء والتراويح – اروح لبيت اهلي او اهل زوجي – وبعدها ارجع البيت واصلي الفجر ثمن انام

ماهي اكلتك ومشروبك المفضل في رمضان ؟

مشروبي لبن المراعي فقط لا غير اكلتي الفرنتش فرايز

متى اول مره صمت فيها .واذا عندك مواقف مع الصيام اذكرها ؟

انا كنت اصوم من عمري 4 سنوات لكن الكل كان يقول صوم الدجاجه والديك

وانا والله العظيم اني كنت اصوم زي الناس لكن مااصلي

اذكر مره وانا صغيره رحت مع امي واخوي لمكه ناخذ عمره كنت وقتها برابع وكنت صايمه انا وامي واخوي يروح يفطر بالحرم.. واحنا بالشقه الموهم احنا بالرياض لازم نحط القناة الاولى واذا حطو دخل الان وقت صلاه المغرب في مدينة الرياض افطرو اهليJ

الموهم انا وامي حاطين القناة الاولى وجالسين ننتظر اذان الحرم

لكن بدلاخه من محدثتكم يوم حطو دخل الان الوقت بالرياض افطرتJJوامي ماقالت لي شي تقول راحمتس شفايفتس بيضLيعني توتس ترحميني يوم بقى على الحرم 10 دقايقLL

لكن ان شاءالله اني مأجورهJ

موقف لاينسى حصل لك بـ رمضان..؟

الموقف الي ماانساه يوم كنت بثاني متوسط كنت بالمدرسا وطلعنا طلعه ومحد جاء ياخذني ابوي كان متكل على عيال عمي وعيال عمي على انه دور ابوي يجي ياخذني

الموهم الي كانت تراقب ملت مني وراها طبخ وانا عندي اهل ساحبين علي

اتصل ع البيت محد يرد دقيت ع بيت عمي ردت مرت عمي قلتلها قالت خلاص بدق على عبدالعزيز يجي ياخذك

الموهم انطقيت لحد الساعه 4 مادريت الا ينادي التميمي يوم طلعت الا ابوي جا ولد عمي جا اخوي طلع من دوامه وجا وكنت وقتها منهاره وطلعت كني تكرونيه طلعت فالشارع وانواع الصياح والصراخ بغوا يودوني لشيخ يقرا علي وانا الي اوقف بالنص وادعي عليهم قلت في هالشهر الفضيل وانا صايمه جعل سياراتكم تخربJ كانو وقتها يضحكون علي

حسبي الله على من طالني شره واذاه<<للحين محتره^_^

:::::::::::::::::::::::

موقف ثاني كنت بالجامعه الموهم دخل وقت صلاه الظهر وفرشنا الفرشات حق الصلاه في المبنى

يوم هذاك صفو 5بنات شيعيات وحطوا قدامهم مناديل

وتجي محدثتكم مسويه نظيفه.. واقعد اهاوش البنات قله ادب الفرشات للصلاه مهب زباله ماتحترمون احد البنات يصلون ومدري ايش والباقين يطالعون فيني مايدرون وش القصه واجي اضفضف المناديل حقتهم
(مسويه اماطة الاذى عن الاطريق صدقه)

وماأشوف الا صديقاتي ميتين ضحك يوم شافو الشيعيات يجرون عباتي وهم يصلون

جاتني صديقتهم قالت لا لوسمحتي هذي اغراضهم يصلون عليها

كيف نظامكم واجوائكم في رمضان ونظامكم بالفطور والعشاءوالسحور.؟

فطور تمر وقهوه ولبن ومويا وحلا

شوربه بعد الصلاه......
.....بعدين عشاء او سحور كلها واحد بعد التراويح عالساعه 12ويصير فيها كل مالذ وطاب

هل ترى اختلاف بـ رمضان في السنين الماضيه عن السنوات الاخيرهواذا نعم وش الاشياء الي افتقدتها.؟

ايه الحين رمضان تقل معاه بوغاتي طاير

مايمديه يجي الا هو رايح

الله يقبله منا يارب ويزيدنا بطاعته

هل تفضل الصلاه في المسجد القريب من بيتكم او تميل للتنويع ومن لقاريء الذي تحرص على الصلاه خلفه في رمضان؟

لا الي جنب بيتي مرررره صوته رهيب الله يوفقه ويجزاه خير

امم ولد الاحمد الشيخ لكن ماعرف اسمه

أجمل رمضان عشته حتى الآن , متى ولماذا ؟

كل الرمضانات زينه الحمدلله.
.لكن الافضل الرمضانات الي قبل 7سنين لما كنا نروح عند اهل امي بشقراء
ونجتمع كل خالتي وخوالي في بيت واحد

رسالة في هذا الشهر المبارك .. لمن تبعث بها وماذا تقول فيها .؟

ابعثها لكل شخص انا تكلمت فيه انه يسامحني ويحللني

وانا باذن الواحد احد اني ماانام الليل الا وانا محلله كل شخص تكلم فيني او اغتابني

واقول للجميع............احبكـم فالله

نبي صوره تلتقطها لنا من يومك الرمضاني المجال مفتوح لك..؟

هذا انا كل يوم عقب الفجر كذا وضعيـ

اليوميات .الرمضانية.

بسم الله الرحمن الرحيم....السلام عليكم ورحمه الله وبركاته.....العشر عليكم مباركه مقدما..
. هاه عاد شدو حيلكم فالطاعه ترى شياطينكم مربطه اقهروها لا تقهركم.
..لاتخلونها اذا قضى الشهر تدق اصبع لا انتو اخر الشهر اقلبوها اخبيتي اقهروها...

وبها المناسبه بقولكم بشاره في هاليوم المبارك.
.<<لاتحسبوني حامل اشاعهوالي قالكم اني متوظفه كان يبغا يمدح الخدمه المدنيه وقال هالمعجزه ..
يعني السالفه كلها خرطي وخذو البشاره مني

وابشركم خلست لبس العيد ..
. وبها المناسبه بنقيم حفله يوم العيد الي يبي يحضرها لان اول مره ام متعب تخلس بدري
وتحصل جزمه(الله يكرمكم) قبل العشر مدري وش قصه هالحريم يخلسون الجزم فرمضان

نبتدي اليوم بالتفصيل الممل... قمت من االنوم الساعه 3...غسلت وفرشت اسناني<<لزوم البرستيج .. جلست اتعبد ربي الله يقبل منا طاعتنا...صلحت حلى بس لان ناوين نفطر اليوم عند اهلي واذا الفطور عند اهلي اعتبره اجازه مااطبخ يا لبى اهلي بس

رحنا وافطرنا طالعنا طاش وجلسنا نسولف انا واخواتي واخواني

عاد اخوي ندور له مره وجالسين اخواني يتريقون عليه
حكم انه حاط سكسوكه الي تحت ومدبدب نوعاما ومانسميه الا غشمشم

الموهم قبل يأذن رحت تسبحت ولبست خلقتي(عباتي)ورحت انا واختي وامي للمسجد رجليه...

وجالسين نصلي العشاء وبعدها بدينا بالتراويح .. امامنا توه جديد ولسى صغير عمره 18 او 19 بسم الله عليه واحنا نصلي مادرينا الا صوته يروح شوي شوي

ثمن سكت وسمعنا الرجال يتنحنحون وشوي جا واحد كمل عنه وسلم بسرعه..

وسمعنا الرجال اختبو (تعني اختبو من فين اجيب لكم معنى ثاني>_<)).. .....

امه معنا قامت تصيح والحريم صيحوا والله خفنا مرا مرا وراحت امه لرجال وام المذن تطق الحاجز الي بينا وبينهم

الموهم انا واختي خفنا ونفسنا (أي الشهيق والزفير)بغى يوقف قلنا لامي نبي نرجع قالت خلاس بلحقكم
..رحنا ونشرنا الخبر فالبيت<<اصلا مارجعنا خوف رجعنا نشر الخبر قبل لاسمعونه من الغرب

جلسنا بالحوش ننتظر وش القصه وقفوا ماكملو تراويح.. جت امي تقول جو الاسعاف شالوه

الا شوي جا اخوي عبدالرحمن قلنا هاه بشر وش صار قال انه استفرغ علينا وطاح وخذوه الاسعاف

قالنا حي ولا ميت طيب؟؟؟

قال لا حي ان شاءالله .. ابوه يقول انه تعبان من اليوم معاه
( مر- حموضه – غيره.. نزله معويه...الخ مدري شتسمونها)

والله احنا جا فبالنا ان احد صكه بعين بحكم انه صغنون والعين حق لكن ان شاءالله ان الي فيه شي بسيط ويزول والله يرجعه لمكانه ...........

الموهم كنا مواعدين الكوافيرالساعه12 جتنا وقصة شعورنا وصبغنا وطلعنا نيو لوك

عقبها جبنا لنا عشى مدري سحور عالساعه2 كلنا

عقب جا بعلي ورحت لبيتي مرينا السوبرماركت اشترينا لبن وبيض

وجلست ع مصحفي لحد مااذن صليت واستغفرت ربي ودعيت لعمري ان الله يخليني لكم اوسع صدوركم ودعيت لكم بس لاتحسبون خصصت المجلس لا قلت للمؤمنين المؤمن فيكم شملته الدعوه والي مثل ويلي ورادوي لا ماتشملهم الدعوه طبعا كل صبح لازم اشيك ع المجلس وع ايميلي والماسن والفورم

عقب نمت

تصبحون على خير

:::::::::::::::::::::::::::::::::::::::

كل اللشكر

لـلمميز **][ "ام متعب التميمي" "♥][ **

وانتظرونا غداَ

مع مصمم المجلس العام ذآيب .

أرق التحايا وأطيبها من

مشرفي واستشاري

المجلس العام