بـ البدايه .. الي ما يحب الردود الطويله يطمر ردي لأنه طويل حبتين



من هذا اليوم .. أول يوم له كـ مدرب رسمياً لـ ريال مدريد .. اغلبيه المدريديستا اجمعوا ان التغيير راح يجي معه .. التغير مو شرط يكون بس في ارض الملعب .. التغير الصحي لازم يكون في كل شي يخص شؤون فريق كرة القدم .. زي ما فيه كثير توقعوا ان هالشيء بيصير .. في بعد مجموعه كانت متشائمه من التواصل بين مورينيو المتغطرس الدكتاتوري الي ما يخلي احد يتدخل في الفريق .. ولأن الأدارة قويه اصلاً وماتحب تعطي المدرب أكبر من حجمه .. كان الخوف حاصل .. شخصياً كنت متخوف بشيء بسيط من علاقة مورينيو بـ فالدانو .. العلاقة اصلاً كانت متوتره من بعد مبارة تشيلسي و ليفربول في سيمي فاينل دوري أبطال أوروبا .. وقتها طلع فالدانو وكتب مقاله انتقاد لـ طريقة مورينيو و بينتيز .. وانهم يمنعون الكرة الجميله ويتحكمون في اللاعبين كـ انهم قطع شطرنج او رجال آلايين .. الرد كـ العادة من مورينيو مو غريب .. لأنه طلع ورد على فالدانو والأغلبيـــٌه توقعت ان المشكلة هذي راح تأثر في علاقتهم خصوصاً انهم راح يجتمعوا بنـادي واحد .. هذا مدير عام النـادي وهذا الهيد منيجر لـ الفريق !! .. وش الي شفناه للحين طيب ؟! .. هل المشكلة هذي أثرت عليهم وصارت بينهم خلافات أو ان الأمــٌور ماشيه تمام لحد الآن !؟ .. الى هذي اللحظة كل الأمور تمام .. فيه علاقة عمل رائعه بين مورينيو و فالدانو وبارديز .. وعلاقــٌة أفضل مع الرئيس فلورنتينو بيريز .. وانه يقدر يتواصل معه بأي وقت لأن الأبواب مفتوحه .. مو مثل بيللغريني الي طلع بعد الأقــاله وقال انه ما كان يتواصل مع الرئيس بشكل مستمر وهالأمر خلق فجوة بينهم !!.. هنا نوقف ونقارن بين شخصيتين لمدربين مروا علينا في سنتين !؟ .. هل شخصية مورينيو مثل بيللغريني .. بشكل ادق هل شخصية موري زي شخصية اي مدرب في العالم ؟ .. بالتـأكيد لا .. مافيه الا مورينيو واحد بس



القــائمة هذي هي الي كانت مطلوبه قبل وحتى بعد ماجـا مورينيو .. وكنا طول الموسم الي راح كل يوم نسمع اسم جديد .. البدايه كانت مع ديفيد سيلفا .. من النص الأخير بالموسم .. سيلفا بيوقع او لا .. ماركا كانت تتحفنا يومياً بغلاف عنه .. يوم مقابلة ويوم هو شايل تي شيرت ريال مدريد لما كان صغير وبيدخل مدرسة النادي مع ميتشيل المسؤول عنها ذاك الوقت .. الجماهير مسكت رئيس فالنسيا يورنتي وطلبته يطلق سيلفا لمدريد .. لما لعب فالنسيا و مدريد بالبرنابيو الجماهير تصفق له مع كل لمسة عشان تغريه يوقع لـ الريال .. المبلغ المطلوب كم كان ؟! .. فالنسيا أكيد بيطمع في فلورنتينو الي دفع 250 مليون الميركاتو الماضي .. سيلفا خامة رهيبه ويستاهل مبلغ عشان تستفيد كل الأطراف .. الطلب على حسب الذاكرة 35 مليون .. الرد من وش كان ؟! .. وقفوا هالصفقة لأن العرض بعيييد عن الطلب .. انتهينا من أول خيار كان هدف في فترة .. الخيار الثاني جيرارد .. لاعب اسطوري وراح يفرق كثير لو وقع لـ مدريد .. كان فيه مفاوضات واللاعب كان عنده الرغبة يطلع من الأنفيلد رود .. الريدز عندهم مشاكل ماديه .. وعشان يطلع جيرارد بعد لازم يستفيدون .. طلبوا 30 مليــٌون يورو .. هنا وقف المفاوضات .. فرق كبير بعد بين العرض و الطلب .. لاعب عمره 30 سنة وماراح يفيد الفريق اكثر من 4 سنوات ويبون فيه 30 مليــٌون .. روح لنقطة ضعف الفريق .. كولاروف كان المفضل لـ شغل الظهير الأيسر في مدريد .. مورينيو طلبه بالأسم من ايام ما كان في الأنتر .. ولما وصل مدريد طلبه مرة ثانيه .. قدم العرض الي يناسب امكانياته .. 18 مليون وعطونا اللاعب .. لوتيتو بعد ذكي ويبغى يستفيد .. طلب 25 اول مرة .. وطلع بتصريح ثاني أن بوت كولاروف يساوي 18 مليــون يورو .. بردت المفاوضات ومدريد انسحب أدبياً من الصفقة .. بعدها بفترة تمت صفقه كولاروف لـ مانشستر سيتي .. وبـ 18 مليون يورو .. واضح انه هو وبوته قيمة وحدة عند لوتيو .. خيسوس نافاس كان هدف للفريق من الموسم الماضي .. لاعب مميز جداً وخـامة رائعة والي يعطيه افضليه انه اسباني ومع المنتخب .. لكن بنفس السيناريو الي سبق دل نيدو حاول يستغفل مدريد بمبلغ مبـــٌالغ فيه .. الرد ما تغير عن الي قبله .. قفل الموضوع ونطلع البلان B .. ماريو جوميز كان رغبة من مورينيو بعد خروج راؤول .. الأخبار ماكانت صادقه وماكان في مباحثات بصبغه رسميه .. ولأن ادارة البايرن صعبه في التعامل بذكريات صفقة ريبري الموسم الماضي .. انقفل الموضوع قبل لا يبدأ .. الصفقة الأخيرة الي كنا متمسكين فيها لحد اخر رمق .. لكن مماطلات أدارة الأنتر قفلت الموضوع .. مايكــون فضل ريال مدريد كثير وكان يبي يلعب هذا الموسم تحت ادارة مورينيو في ريال مدريد .. بعد ما اتفقوا مع الأدارة اولاً على الصفقة .. بدأت الأدارة واتفقت مع مدير اعمال اللاعب على مزايا العقـٌد الي راح يربطهم .. واللاعب وافق ينزل مطالبه من 7 مليون يورو سنوياً لـ 5.5 مليون يورو سنوياً كـ بادرة انه يبغى الأنتقــال .. في هالوقت رجعت ادارة الأنتر في كلامها ورفعت مطالبها .. وكـ عادة بيريز ما يخضع بسرعة للمبـالغة ومحاولة الأستغلال خصوصاً انهم اتموا اتفق مسبقاً ونقضه برانكـا .. الغيت الصفقة وتوجهوا لـ الخيار الثاني والي حطه مورينيو .



هنـا البـلان B .. وهذا الي كلنا تكلمنا فيه .. مدريد مع مورينيو قويه وماترضخ .. مماطلات الرؤساء ومسؤولين الأندية كانت ممكن تكون فعـالة لو الطلب هذا كان الموسم الماضي .. لأن الفريق مضطر وقتها يشتري ويبغى يجدد الفريق مع رئيس جديد ومجلس ادارة جديد و ادارة فنيه جديدة واكيد لازم يكون فيه لاعبين جدد .. السنة هذي موري غير كثير عقلية ادارة مدريد من ناحية الميركاتو .. ماطلب المستحيل عشان ينجح بالعكس كان خير معون للأدارة وطلب المعقول ولاشيء غيره .. مايكون - كولاروف - جيرارد - سيلفا كلها كانت طلبات لموري و الأدارة .. لكن المبالغة امر غير معقول .. وبهالوقت نروح للخطة الثانيه .. بدل جيرارد مدريد اخذت خضيرة .. لاعب اصغر بكثير بالسن من جيرارد وغير هذا مبلغ انتقاله قليل جداً بالنسبة لأمكانياته .. 12 مليون يورو كانت كفيله انه يوقع .. دي ماريا كان خيار ثاني في حال ما تمت صفقة سيلفا .. ولأن فالنسيا طلب 35 مليون يورو مدريد مورينيو طلب الخيار الثاني والي ما يقل عنه في المهاره ولكن يقل عنه في السعر بـ 10 مليون يورو .. وكان هو الصفقة الأغلى هالموسم .. خيسوس نافاس بنفس الحكاية .. مبالغات دل نيدو خلت مدريد يجيب انخيل توريس للبرنابيو ويوقع مع لاعب كفؤ بيكون له شأن كبير في الأيام القادمة وممكن ياخذ مكان نافاس في المنتخب وبمبلغ 10 مليون يورو .. مـايكون وبعد مبالغات الأنتر مكالمة وحدة من مورينيو ضمنت لنا واحد من افضل سناترة الدفاع في العالم .. وبمبلغ ما يذكر بالنسبة لمدريد .. لكن الأضافة كانت اكبر كثير .. وبتبان للأفضل في قادم الأيـام .. اوزيل كان تعويض لصفقة مهاجم ثالث .. لاعب بهالمستوى والأمكانيات المجنونه ويفضل مدريد ويبي يلعب عندهم ومبلغ انتقاله 15 مليــٌون يورو فقط .. لأن مدريد مورينيو كانت مفتحه وعارفه خبايا السوق .. وعارفه ان صفقة زي اوزيل ما تتفوت خصوصاً ان باقي له موسم واحد فقط وهي الطريق الي ممكن تلوي ذراع فريقه بها .. واللاعب نفسه مايبي يجدد ويبغى الأنتقــال .. الي ابي ابوصله من كل هالحكي .. مدريد مورينيو تغير كثير عن مدريد السابق .. ممكن اقول رجعنا 10 سنين ورا لما كان مدريد يجيب اللاعب يستفيد منه فائدة في الملعب فقط .. مواهب كثيره ولاعبين صغار ومبالغ بسيطة .. وتعمل ميركاتو ممتــاز بمبلغ 75 مليون يورو .. يعني اقل من صفقة كريستيانو رونالدو وهو لاعب واحد .. وبنفس الوقت اعلى من صفقة كاكا بـ 10 مليون يورو .. لاعبين اثنين سعرهم كان اعلى مرتين ونص من الي انصرف العام .. ولو ان الرئيس معذور في السنة الماضية لأنه عمل ميركاتو كبير يعمل في 3 ميركاتو !!



لحظة .. مو بس هذا الي تغير في مدريد مورينيو .. قبل كل شي قلته .. تغير شي واحد ومهم كان سبب المشاكل في سنوات عجاف راحت .. مدريد مورينيو ما عنده اي واسطة او محسوبيه لـ اي لاعب مهما كان اسمه .. سواء راؤول او جوتي او كاسياس او رونالدو .. الي يبذل مجهود يستحق عليه انه يلعب بشكل مستمر راح يلعب .. للتبسيط .. الأفضل فقط يلعب .. وهذي المقولة الي ما اعجبت راؤول و جوتي وعليها طلعوا من الفريق من الباب الصغير لأنهم فضلوا انفسهم ومصلحتهم على مصلحة الفريق ..عن نفسي اقول كثر خيرهم .. عملوا الي كان مفترض ينعمل من سنوات لأنهم بنسبة كبيرة انتهوا غير انهم يعملون مشاكل كثيرة في غرفة الملابس مع اللاعبين .. راؤول عرض عليه مورينيو انه يبقى معه في الدكة مثل دور الماتريكس مع الأنتر في السنتين الي راحت .. هالكلام ما بيعني ان راؤول خلاص ما بيلعب .. بيلعب بس في الأوقات الي تكون فيها المبارة منتهيه او في وقت الضرورة اذا اصيب لاعب او شيء من هذا القبيل .. جوتي قبل ما يجي مورينيو ودع الجماهير على اساس انه راح يطلع .. لما وصل مورينيو بدأ يلمح انه ممكن يقعد .. في وقتها طلع مورينيو ورفض انه يكون معه في الفريق لأنه يشوف الرجل اذا قال كلمة ما يرجع فيها ودام عنده نيه يرجع فيها فهو ما يلزمني .. اكيد مورينيو عرف خبايا النادي واسرار هاللاعبين بالذات .. ولذلك كان الأستغنـــٌاء عن خدماته بطريقه حلوه لأنهم خدموا النادي سنوات كثيرة وحققوا معه بطولات .



لسى ماخلصت تغيرات مدريد مورينيو .. أهم شيء عشان تنجح في مدريد شيء واحد .. تواجه صحافته !! .. شلون تواجه هالصحافة الشرسه .. هذا شي يرجع لـ كاريزما المدرب .. مورينيو عنده كاريزما مش معقولة وتعامل رهيب مع الصحافة .. الشيء الصعب الي ممكن يواجهه مورينيو وهو اساساً ما قد واجهه صحافة مهمه بالنـادي .. نرجع نشوف سجله .. موري مع بورتو .. فريق صغير مقارنة بعملاقة اوروبا وما راح يكون عليه ضغط وصحيفة تنتقده على الطالعه والنـازله .. لذلك موري كان دائماً يواجه الصحافة الخارجيه وكسب الثقة اللازمة الي يقدر من خلالها يوقف اي شيء عند حده .. النادي الثاني تشيلسي .. مبالغ مهوله صرفت على النـادي عشان يتجدد ويكون فريق لايقهر .. مورينيو في انجلترا واجه صحافة الاندية الثانيه .. صحافة المانيو و الليفر وصحافيين محسوبين على الفريقين لكن كـ مسمى لصحافة تشيلسي ما كان فيه .. لأن تشيلسي كان في بدايه حقبته القوية وباقي ما كون الجماهيريه الكبيرة الي عند انديه مثل مدريد - ميلان - مانشستر - ليفربول - يوفنتوس .. لذلك ما واجهه اي ضغط صحفي محسوب على ناديه ومؤيد له ويضغط على لاعبينه .. الكلام يتكرر للمرة الثالثه في تجربته مع انترميلان .. على ان نادي الأنتر كبير ومن كبار ايطاليا الى ان ما عنده اي صحيفة تختص بأخباره بعكس اليوفي و الميلن الي عندهم صحف وفي كل صحيفة محايده عندهم كتاب .. لذلك كانت مواجهة مورينيو مع صحافة الضد زي اي مرة درب فيها فريق .. المرة هذي وش فرق ؟! .. المرة هذي فيه ماركا و اس .. فيه ديفنسا سنترال و فيه كادينا سير .. فيه جهات كثيره تدعم الفريق وفي نفس الوقت تحاربه .. ضغط الصحافة هالمرة ما بيكون ضد .. المرة هذي راح يكون من الصف الي معك .. لأنه راح ينتقدك اذا اخفقت اي اخفاق وراح يرفع بك ترفيع اذا حققت فوز .. اذا كان في اول مبارة لنا في الليغا طلع الفريدو ريلانو وانتقد مورينيو وطريقة لعبه وفي نفس المقاله امتدح لاعبين برشلونة وانهم حققوا الفوز بدون اي مشاكل .. اذا من اول مبارة سلت سيوف النقد على فريق جديد ومن ميين ؟ .. من مدير تحرير ثاني صحيفة تابعه لـ النادي .. ديفنسا سنترال طلعت مقارنه بين مورينيو و بيللغريني وفضلت بيللغريني الي حقق الفوز في اول مبارة له ومعه 8 لاعبين جدد مش مورينيو الي فشل في الفوز ومعه 6 لاعبين جدد بس .. موري حتى الآن قادر يتعامل مع الصحافة .. وبينها اكثر من مقابلته مع الآس لما قال انا ما اقرئ النقد الي يوجه لي لكن يوصلني وبرر اسباب التعادل لما طلب الوقت لأنه في النهاية بششر مش سـاحر يقلب الفريق في ظرف شهرين .. الرجل لخمهم بـ رد انه حتى الآن ما كمل 10 تدريبات مع فريقه وانتوا من الحين تطلبون الفوز ؟! .. الشيء الأكيد ان موري راح يدافع عن لاعبينه زي ما عمل مع كل الفرق الي دربها في فترته الماضيه .. لدرجة انه رفض يحمل اي لاعب مسؤوليه الفوز وحملها للفريق كله بما فيهم هو لأن الفريق واحد سواء في الفوز او الخسارة .. مورينيو بيتحمل الصحافة وممكن تخرب علاقته بهم في فترة قصيرة ويبدأ من خلالها النقد اللاذع عليه .. هل مورينيو بيقدر على هالنقد خصوصاً انه لأول مرة يواجه صحافة تدعم فريقه وفي نفس الوقت راح تكون ضده بأي اخفاق قادم لاسمح الله .

شوية فضفضة من زمان كان ودي اكتبها واجلتها لبعد الميركاتو عشان الصورة تكون واضحة
ان شاء الله ما اكون طولت عليكم بس :$