!!. [ جاني ] وانا في وسط ربعي وناسي ,’ جاني [ نشلني ] مثل ما ينشل الناس .!! - نادي الهلال السعودي - شبكة الزعيم

Blue Sun · #1 14/07/2010, 05:24 PM

.. بسم الله الرحمن الرحيم ..
.. والسلام عليكم ورحمة الله وبركاته ..

بدون مقدمات ورح اخش بالموضوع مباشرة , لان الوضع ما يحتمل التاخير ..

قبل فترة كنت طالع من الدوام يوم الاربعاء , والهم والطفش لاعبن فيني .. طرت على بالي فكرة مثل اي فكرة تطري على بال اي شاب سعودي ..

قلت ورى ما اطلع خميس وجمعة للشرقية , منها ازور اصدقاء المراهقة من زمان عنهم , ومرة وحدة نسير على الحبايب اللي جنبهم ..

شغلت الموتر وحركت للشرقية .. طبعا وصلت العصر وسلمت على الشباب , واخذت معي احد الشباب وواصلنا للبحرين وصلنا المغرب هناك ..

واول ما دخلنا البحرين طحنا في تفتيش , ولزموا علينا الا نروح معهم المخفر , وكانوا ناوين يضيفونا عندهم يومين لانهم ناوين يحولونا على النيابة .. << ما عمري سمعتها الا بالمسلسلات ..

طبعا واحد من الشباب ما قصر , انقذ الموقف , وطلعنا من القسم الساعة 9 ونص ..

للمعلومية وحتى ما يروح تفكيركم بعيد ..

كنا بكامل قوانا العقلية والجسدية , والقضية ما كانت اخلاقية , كانت مرورية بحتة ..

ورجاء لا تسألون عن السبب وقفلوا الموضوع .. واعتبروا انكم ما قريتوا هالسطر ..

وبعدها رحنا للسيف لان محتاجين كم شغلة من هناك , وبعدها رجعنا على الخبر ..

وبحكم ان ما بقى شئ على الفجر جلسنا نسولف ونضيع وقتنا , وانظم لنا محمد اللي ما تحلى السهرة بدونه ..

وما يخفى عليكم ان السوالف كلها كانت عن سالفة المخفر .. بس والله يالكلام والذب جانا حسسنا اننا خريجين سجون ..

بس ما علينا منهم ومثل ما يقول المثل " السجن مصنع الرجال "

<< كلها ساعتين بالقسم حتى التوقيف ما دخلوه ..

كملنا السهرة للفجر وصلينا وافطرنا مع بعض , وكلن طس ينام بعد ما اكد علينا محمد انه رح يصحينا لصلاة الجمعة حتى نلحقها بالمسجد ..

كان يوم الجمعة يوم عادي جدا ولا فيه اي اكشن يذكر .. كان اجتماعنا بعد العصر , وخذ سوالف ودردشة ولعب بلايستيشن الى العشاء ..

طبعا بعد العشاء اللي راح ينام بحكم ان توه جاي من دوام , واللي راح للدوام , وما بقيت الا انا ومحمد .. طلعنا نخلص كم شغلة وجبنا معنا عدة السهرة ..

وتعشينا وطلعنا للشقة وجلسنا نسولف الى الساعة 12 وكانت اغلب سوالفنا عن الزواج وتحضيراته , واللي طراه ان واحد من اللي معنا زواجه في نفس الاسبوع ..

بعدها استاذنت من محمد بروح انام بحكم اني بمشي الصباح , وهو بعد وراه دوام الصباح ..

ونمت الي الساعة 9 ومشيت للرياض .. وصلت الرياض بحفظ الله ورعايته الظهر ..

ونمت الى المغرب , وقمت خلصت شوية اشغال عندي الى الساعة 12 ورجعت , وبعدها تابعت فلم الى 2 وبعدها كعادتي اليومية قبل انام اخذ جوالى اقلب فيه ..

طبعا لقيت فيه رسالتين .. الاولى كانت من محمد , وكانت عن شغله طلبته يرسل لي اياها ..

والثانية كانت من احد اخوياي وكان نصها كالتالي (( اخونا محمد انتقل الى رحمة الله والصلاة عليه غدا العصر )) ...!!!
كان وقع الخبر علي مثل الصاعقة او يمكن اشد .. ووقتها كنت ما بين مكذب ومصدق ..
اتصلت مباشرة بجوال محمد وكان مقفل , واتصلت بشخص ثاني ورد وليته ما رد .. كان صوته كله حزن وسألته قال :
" ان محمد صار عليه حادث وهو طالع من الدوام وتوفي قبل شوي" .. !!
قلت - وانا ما زلت مو مصدق - " ياخي محمد اليوم الصباح وهو جالس يسولف معنا , كيف يموت وبعدين توه شباب كيف يروح بهالسهولة " .. استغفر الله العظيم ..
طبعا في هالوقت كان حالي لا يسر العدو قبل الصديق ..
كيف يموت وهو وعدني انه بعد كم يوم يجي الرياض يحظر زواج خوينا وارجعه على سيارتي .. ؟!
صحيح هو اوفى بوعده وجاء الرياض قبل الموعد لكن من غير رجعه ..
وصل الرياض بس مو مثل كل مرة يوصل فيها , وصل وهو جسد بلا روح .. من كان يتوقع انه ممكن يغادر الدنيا بالسرعة هذي ..
وصل جثمانه الظهر , غسلوه وكفنوه " وللأسف ما قدرت اروح اودعه قبل التكفين لأني ماكنت مستوعب اللي صار ومتأكد اني ما رح استحمل الموقف "
صلينا عليه بعد صلاة العصر .. ما قدرت اوقف للصلاة عليه , لأن عمري ما تخيلت اني ممكن اوقف للصلاة عليه , والحين صار واقع .. !!
ودفناه .. وما اقسى قلوبنا , كيف طاوعتنا وقدرنا نحث عليه التراب .. !! بين ليلة وضحاها صار في قبره .. !!
وبعد الدفن صرخ احد الرجال " ادعوا له بالثبات إنه الان يسئل "
يالله بالامس واحنا نضحك سوا والان هو يسأل ..!! دعيت الله ان يرزقه عند السوال جوابا , وعند الجواب صوابا , وعند الصواب ثباتا .. وتسالت .. لو كنا مكانه وش رح يكون جوابنا .. ؟!
اسأل الله ان يتغمده بواسع رحمته , ويسكنه فسيح جناته , ويلهم اهله وذويه ومحبيه الصبر
والسلوان ..
قال الرسول صلى الله عليه وسلم " من كان اخر كلامه لا اله الا الله دخل الجنة "
عزائنا فيه انه مات وهو يردد الشهادة وذكر الله .. وهذا اللي خفف من وقع المصيبة علينا ..
والله ما عرفنا عنه الا الخير , وحرصه على الصلاة , واخلاقة اللي يشهد بها القاصي قبل الداني ..
قال الرسول صلى الله عليه وسلم : " اقربكم مني مجلسا يوم القيامة احاسنكم اخلاقا "
اسال الله ان بجمعنا به وجميع المسلمين مع الرسول صلى الله عليه وسلم ..
والحمد لله الذي يسر لنا عمرة عنه .. واسال الله ان يتقبلها وان يكتب له اجرها ..
قال الرسول صلى الله عليه وسلم " اذا مات ابن ادم انقطع عمله الا من ثلاث صدقة جارية او علم ينتفع به او ولد صالح يدعو له "
الان نعمل على جمع مبلغ مالي , وعمل به صدقه جارية له , نسال الله ان ييسر لنا الامر , وان يجعلها في موازين اعماله ..
طبعا الهدف من هالموضوع مو حتى انكد جوكم ..
لا والله .. لكن حتى ما نغفل عن الموت ونتناسا انه ممكن يباغتنا في اي لحظة ..
محمد الله يرحمه كان مثل اي واحد فينا يعتقد ان الموت بعيد عنه ولكن جاءه بغتة..
والان مضى له قرابة اسبوعين وهو تحت التراب .. الله وحده سبحانه وتعالى اعلم بحاله ..
نسال الله له الرحمة والمغفرة , و ان يجعل قبره روضة من رياض الجنان ..
كم من محمد بيننا يأمل بطول الحياة والموت اقرب اليه من حبل الوريد ..
والله اننا نعيش في نعم عظيمة , واعظمها اننا الى هاللحظة اللي نقرا فيها هالسطور واحنا على قيد الحياة ..
بامكاننا نذكر الله , ونستغفر لذنوبنا , ونصلح اخطائنا , واهمها الصلاة .. لان من صلحت صلاته صلحت حياته ..
ونعتذر لكل من اخطأئنا بحقه .. واولهم الوالدين .. لان رضا الله من رضا الوالدين ..
اسال الله ان يصلح ديننا ودنيانا , وان يحسن خاتمتنا واياكم وجميع المسلمين ..

[ ومـضـة ].........................
ما أصعب الإنتقال من البصر إلى العمى ، وأصعب منه الضلالة بعد الهدى ، والمعصية بعد التقى،
كم من رجل قارب مركبه ساحل النجاة ، فلما هم أن يرتقي لعب به الموج فغرق ، والخلق كلهم تحت هذا الخطر ،
وقلوب العباد بين أصبعين من أصابع الرحمن يقلبها كيف يشاء ، وليس العجب ممن هلك كيف هلك ، إنما العجب ممن نجا كيف نجا ..!!

شكرا من القلب لـ ابو يوسف ..

واعذروني على على الاطالة , وعلى ركاكة الاسلوب لأنه كتب على عجل ..