السلام عليكم

اخبار الغالين اعضاء احلى شبكة بالوجود الله لايحرمنا منكم

بشروا وش سويتوا بالاختبارات عسى اموركم متيسرة

الله يوفقكم كل ابوكم

الا وشلون كاس العالم معكم
من سوء حظي يوم بدا كاس العالم خرب الدريم بوكس وحقي ياحسافة الشاشة اللي شريتها الله يعين اطلب رصيفر ثاني

المهم

انا طبعا اخر ترم لي بالكولج وجالس اطبق باحد الوزارت لتهيئتي لسوق العمل

المهم

من جد ياناس انا ماتوقعت ان اللي اشوفه بالتلفزيون صددق وموجود علىى ارض الواقع

محد فهم وش اقصد للحين

طبعا اول يوم دخلت الوزارة اسلم اوراقي قالوا لي تجي تجلس في هالمكتب حتى لو ماعندك شغل وماتطلع الا بستئذان وان طلبنا منك عمل تصلحها وترجع

قلنا اوك

صرت لاجلست معهم اسمع كلام قسم بالله مايقوله الا البزران

للحين ماصدقتوني

جااني واحد موظف سربوت بن 66 سربوت قال انا مسؤوال عنك رئيس القسم ماراح ينتبه لك قلنا اوكي

اقعد معه

يانااس قسم بالله يسولف لي عن حرمته وعاااااتي عنده وانا وجهي احمر اخضر زهري
قلنا امشيها له

بس اللي استغربت منه انه يتكلم على حريم الموظفين الثانين قدامهم وهم يضحكون له

ياواااااد ايش الهرجة معقولة كذا

والللي خلاني اغسل ايدي
اغلبية الموظفين معه عاااااتي ومايقولون له شي الا يقومون يتكلمون على حريم بعض قدام بعض وعاااااتي الضحكة شاقة وجيههم

طبعا انا للحين مااستوعبت هالشيء

لين جاا اليوم جاني واحد من اقربائي يشتغل بالوزارة قال لاتسولف معهم تراهم ملاقيف ويمسخونها خلك معهم سطحي قلنا اووكي

جاا يوم من الايام وجاا موظف سابق بالوزارة وقعد يتكلم عن اخطاء الوزارة والاخطاء اللي فيها ونشرت باحد الصحف الالكترونية

والله لايوريكم اليوم الثاني سب فيه ويهددونه بالمرمطة ان جا يستلم باقي مستحقاته

يعني مافي ابد استماع للطرف الاخر لو ابداء راي بس

قلنا اووكي

بس يوووم جاا اليوم وفي تقريبا الايام الجاية عطلة للموظفين تقريبا اسبوع للاغلبية وجاا واحد من الموظفين اللي ماتشمله العطلة

وجااي يسال عن البرامج اللي بالاجهزة عشان يخلص الشغل لاراحوا ويسال عن باسوردات الجهاز
وانا للحين جااالس
هم يعلمونه وهم ماودهم يوم طلع من المكتب الا ويغيرون الباسوردات حقت الاجهزة ويشبون فيه حش

انا بس ابي اسال

هل كل الوزارت والدوائر فيهم زي هالموظفين

وماشفت شئ ..
الله يعينكم يالموظفين بس !

يارجال سلاتيح

انتبه وانا اخوك

اليوم تتكلم عليه وتتهزء وبكره الله يبلاك مثلهم

الله يكون في عونك عساك تطيح مع ناس جيدين

وعليكم السلآآم ورحمة الله وبركاته..

هلا بك يالغالي..

ومافي خفي اعظم واعظم.. وفوق هذا نقول ليه مافي بركه وسعاده بالحياه..

عااااااااااااالم اشوف رواتبهم عال وعال.. وحالهم ما يسر..

اعرف لي كذا واحد عياله اكبر واحد فيهم بين الـ 10 والـ 15 وهو يكلم بنات..

ذاك اليوم واحد دقت عليهم وحده يرد عليها يقول هااااي.. ما يدري انه شايب..

ابي اضحك بالقوه ماسك نفسي.. ولو شافني بتصير علوم وسوالف.. ما قدرت والله مو لايقه عليه قسم..

شوي تدق مرته.. تقول له ابي عشى .. يقول لها خير وش تبين.. انا جنب البيت محد قال لك لا تتكلمين من بدري.. وهو كذااااب ما هو يم البيت ولا شي..

ناس مخفه بشكل.. يالله لك الحمد والشكر.. الله يعافيهم ولا يبلانا يا رب..

والمصيبه لو كانت وظيفته مربي أجياااااال..

الله يوفقك يالغالي.. ويكتب لك كل خير يا رب..

بالتوفيق..

إقتباس اخبار الغالين اعضاء احلى شبكة بالوجود الله لايحرمنا منكم

اي والله
الله لا يحرمكم مني ولا مدري وش بتسون لو غبت
الله يخليني لعين ترجيني

:::::::::

بالنسبه لكلامك حق الوزارات

صدق زوجي كل يوم يجي يقولي سوالف الموظفين

يحلفلي بكلامه وقسم يقول اشياء الحريم مايقولونها لبعض

اجل واحد يقول تصدقون حرمتي للحين يخطبونها الناس <<يعني بيقولهم ان زوجتي حلو

واحد يخق مشاكله كلها ويقول حرمتي.............و...............

يعني شي انصدم وربي

اهم شي انت خلك سطحي لا تقول شي

لانهم ينقلون الحكي بعد

تحياتي

إقتباس الرسالة الأصلية كتبت بواسطة الضحى على رأيي أم متعب كن رسمي (وليس سطحي) يعني أفرض أحترامك عليهم

ياشيخا لا تفشليني

والله وطحتي ياأم متعب بيدين وكيله

سطحي - رسمي اهم شي لاتحتسي كثير

يعطيك العافيه ..
و إلله يوفقك أول شي والله يسعدك بمهنتك
شكلك داخل الوزارة تنتظر سوالف كوره
افرض إحترامك وأسلوبك .. وبيعرفون حدودهم بس لو تعطيهم مره وحده وجه .. انسى مايحشون فيك
مانقول خلك وحداني مثل ابليس .. بس دور ناسن تنحط ع الجرح يبرى < مثلي، وترى ماعندي مانع اجي اتوظف عندكم اذا تبي تتونس .. بس توسّط لي

:P .. موفق بمشوارك المِهني

محب الخرج.. الله يعينك على بثارتي

ماسكة معي سعة صدر على موضوعك رغم انني ثقيل الدم والوزن.. عريض المنكبين ومن الفول قد أكلت صحنين

خلني اشرشح يوزرك شوي

الحين يوم انك تعتبر الخرج جنة.. انت من جدك والا تمزح

يا اخي وش فيها غير المشتل يعني لو قلت ( محب الخرج ) كان تنهضم شوي.. لكن خليتها جنة حته وحدة

تراي امزح الله يخلي لكم الخرج ويخليها لنا... مدينة وسيعة صدر واهلها من أطيب الناس

إقتباس الرسالة الأصلية كتبت بواسطة محب الجنه الخرج بشروا وش سويتوا بالاختبارات عسى اموركم متيسرة الله يوفقكم كل ابوكم

انا ابشرك ان اموري تمام

امس أبدعت في اختبار الفقه ... وباقي اختبار الانجليزي هالغثيث

الله يوفقك ان شالله

انتببه وانا اخوك منهم انا عآارف هالاشكآال

انصحك خلك شديد معهم ولاتعطيهم وجهه ابدد

نصيحتي والله انا اعرف هالاشكآال زين

^
^
الله يعينك ابو صالح على الانجليزي ..عندي ملخص باعطيك اياه ان كانه جاز لك ..
ابشرك انا اختبرته وخلصت .. واليوم على فترة وحدة إملاء ..
امس ابو طلال جاب العيد بالتوحيد .. اجل احد ما يدري من ربه .. !!

هلا والله محب الخرج ..

مدري ليه تذكرت شكلي اول ما دخلت الوظيفة , وانصدمت بالوضع ..
بس يمكن ان الميانة بينهم زايدة شوي ومتعودين على بعض من سنين ..
بس بالبداية خلك رسمي مثل ما قالت ام متعب وصححت لها الضحى ..
حتى تجس نبضهم وتعرف علومهم وتميز الزين من الردي فيهم , وبعهدها فلها معهم وخل البساط احمدي ولا بتتعب نفسيا ..
واهم شئ انتبه لا تسكت عن حقك من البداية , حتى ما تصير ملطشة للرايح والجاي ..
تصدق يامواصل للحين ما عمر احد من الموظفين طلب مني سلف ..
يمكن لان اقل واحد فيهم راتبه فوق الـ 15 , بالله وش يخليه يفكر بالسلف ..

الله يوفقك اخوي , ويرزقك بالوظيفة الكويسة في المكان الكويس مع اشخاص كويسين ..

لاتعطيهم وجه علطول زيي ماقالوا الشباب ........................

زمرة سيئة الله ينتفها عن وزاراتنا