هلآ ابونآصر
منك احلى مآيك ياعسل
الظآهر ان هالبنت موب اول مره تضيـع
شف انا قد ضعت بس تدري وين ؟
رحت لاسكآن البحريه وانا اسمع اغنية ام الشيله لكاظم الساهر
ووصلت مخرج حآير
ولاعرفت ارجع
لو اسال اي احد قالوا هذآ محبب وتوه طآلع من حآير
الله لايوريك من 9 الى 11 وانا مدري ويني فيه والمطر ينزل بغزآره
ومافي مويه بالمسآحات , والمسآحه من جهتي ماتمسح لازم انط يمين وانآظر
فتغير الوضع من اغنيه لقرآن
علشآن اذا صار شي تكون الخآتمه كويسه استغفرالله
يعطيك العآفيه على الموضوع ,
والله يرزقك ببنت ماتضيع ان شآء الله
اذكر مرهـ على ايام الطفوله في السفارات <<يوم كانت برّان
كنا طالعين في تمشيه المهم طلعت افرفر بالسيكل وضعت وانتشروا اهلي يدورون لي بس انا مارحت لمكان بعيد المهم حصلني الوالد ومسكني محطني وشوتني وفقع وجهي لييييييين قلت بس ذاكـ اليوم اجرم بحقي
ومن بعدها صرت مثل الألف اذا طلعنا مكان مااحتركـ منه <<ماعندهـ وسطيه
فعلاً اخوي
نشوف كثير من هالحالات فقد طفل او طفله
ولكــن الغلط لآيقع الا على من كان معه وهو اكبر منه لأن الطفل ماعليه ملامه ابداً
على حسب علمي لو تسال اي وحده مطلقه بزارينها
(مطلقه =تاركتهم يسرحون ويمرحون)
بتقولك الدنيا اماان >هذا اول اما الحين الدنيا مافيها امان
الواحد ينخطف هو قدام بيته
مااطول عليكم اقولكم سالفتي يوم ضعت بالمختصر
اذكر لما كان عمري 4 سنين كنت رايحه مع امي وابوي رحمة الله عليه,,
ودخلنا جوا المحل عاد اختكم في الله ماكانت ملقوفه بس تحب الاستطلاع اخذت فره على المحل
واهلي طلعوا وع بالهم اني وراهم يوم خلصت جولة الاستطلاع وانا اطلع مالقى احد
قلبي خلاااص خفت خوف مو طبيعي وبكييييييييييت وانا امشيء بين المحلات
ثمين تذكرتمكان سياراتنا
ورحت اركض لها ويوم طلعت وامة محمد كلها برا كان ذاك الوقت السوق زحمممه حييل سبحان الله بس على لفتي قبل لااطلع من المجمع بكبره الا واشوف ابوي>الله يرحمه..
واروح ركض لهم والحمد االله ربك ستر ,,
هلآ ومرحبا أبو ناصر موضوع جميل ,, قضية كثيراَ ما أفكر بها ,, أتعجّب من بعض الأباء والأمهات المهملين حتى من أقاربي الله يهديهم دائماً إذا طلعنا أشوفهم يخلّون الصغار يبعدون عنهم بدون مايكوون معهم كبير خاصة إذا كانوا مجمووعة ,, ياكثر مايضيعوون لكن الحمد لله ربّي حافظهم من الإختتطاف لكن ماهو بكل مرّة تسلم الجرّة /: وإن وُجدت معهم الخادمات فلآ أثق بهن صراحة , خاصّة إن مثل هالأماكن تتجمع فيها الخادمات وينشغلن بالسواليف ولا ينتبهن !! نادراً مانطلع لمنتزهات أو مجمعات إلا نلقى طفل ضايع !! أتذكر مرّة في منتزه جتنا بنت صغيره عمرها تقريباً سنتين ,, بسم الله عليها بنت تهبّل ,, تدوور بين العووائل وتبكي فأخذناها وصرنا ندوور بين العوائل نقول " هذي بنتكم ؟!" إلى إن وجدنا أهلها جالسيين يتقهوون مدري يتعشوون ولا إنتبهوا إن بنتهم لافّة المنتزة طوول وعرض تدوّر أمها !!><" عجييييييييييب طبعهم الله لا يبلآنا !! عاد أنا موسوسة مع بزارييننا أكثر من أمهاتهم ياكثر ماصار بيني وبين أمهاتهم نقاااش حادّ عن هالقضية >< يقوولون أماان وأنا ما أشوف بهالوقت أمان !! إذا ماانخطف الطفل أو ضاع وش بيثبتلي إنه ماراح ينصااب أو يضرب بسبّت هالألعاب !! ~> معقّده كما يقولون /: هذا بالنسبة للمنتزهات والكورنيشات "الله يرزقنا ببحرp:" أما بالنسبة للأسواق فلآ أؤيد خروج الطفل لها بتاتاً إلا إذا مافي أحد يجلس عنده , لكن ينزل الأب مع الأم (: أرحم الأمهات تكون جاية تتسوّق ومعها درزَن بزران , ما أقوول إلا الله يعينه ماتدري هي تتسوّق ولا تناظر الصغار !!/: والي يقهر أكثر ويا كثر ماتقع أمامي ,, تكون الأم تمشي وتقطع الشارع والسيارات تمر وعيالها يمشون وراها !!!! ما أدري كيف تسطي !!! بعض الناس فيهم إهمااال وبرووود غير طبيعي !! :@ الله يعافيهم ولا يبلآنا !!
لكن نقوول الحافظ الله سبحانه ,, الأهم تعويذ الأطفال قبل الخرووج وإستوداعهم الله سبحان الله إذا تعوّدت تعوّذ الطفل , بيتعوّد الطفل على ذلك حتى إنه هو بيجي يذكرك ومو لا زم الأم والأب الي يعوذون الأخوان والآخوات أيضاً ,, حتى الصغار الي مانعرفهم ليش مانعوّذهم ؟! ~> وظيفته تمسّك بزارين العالم وتعوّذهم p:
وأيضاً تحفيظ الأطفال أرقاام جوّالات أهاليهم ,, أو كتابة الرقم على أيديهم خاصّة في الحرم أو أي مكان مزدحم على طاري الحرم حنا إلى الآن ومع تواجد الجوّالات نوصّي بعض قبل دخوول الحرم إن الي يضيع يروح بالمكان الفلآني P: :: بالنسبة لسؤال هل سبق وضعت ؟ إي نعم ضعت : (
كان بالحرم وأنا في أول إبتدائي أعتقد , ضعت في الطواف سبقوني أهلي بشوط أو أنا سبقتهم , وبقيت لحالي أصيح بس كمّلت طريقي إلى أن وجودوني الحمد لله موقف ماينسى يازين فرحة اللقاء وإلى الآن أضيع ,, لكن الله يخلّي وسائل الإتصال بس والله رعب الضياع , كل الأشياء المخيفة تجي في بالك ,, وكل الي تشوفهم تحسّهم أعدائك /: الله يحفظنا و يحفظ كل عزيز وغالي
شكراً أبو ناصر , والله يخلّي هالبنيّة الي رجعتك لكتابة المواضيع وعذراً ع الإطالة ..
على قولة واحد من الشباب طمر عليه بزر وهو يسوق بغى يصدمه بس الحمد لله جات عوافي قال شف شلون هادينه بذا الشارع لحاله ولو صدمته لا سمح الله طلع له 100 اب و 100 اخ و 100 عم و 100 خال يطالبون بحقه ..
هلا وغلا فيك ابو ناصر .. واخيراً فكرت تنزل موضوع ..
من ناحية اللي ذكرت والله شئ مؤسف جداً .. انا اتعجب اذا كان الاب مشغول
باله وفكره وعقله وجسمه عن ابناءه والام كذلك لماذا فكر بالانجاب وهو ماهو قد المسؤليه ..
وفي كل مره نطلع فيها اماكن عامه نلاحظ هذا الشي .. ونستغرب ولكن اصبح الامر عادي ..
وبيني وبينك فيه اطفال بثرين تمسكه من هنا يهج من هنا
ابو ناصر .. اشكرك ع الطرح .. ولا تقاطعنا ..
وتقبل احترامي .. دمت بخير
وذكرتني بسالفة خطيرة يبيلها موضوع بسو ولو نسدحها هون
مره كان الاهل في جدة كاشتين قدام البحر طبعا انا ما كنت معهم بس اخوي يقولي السالفة
والا تجي بنتين ويخشون عرض ويدخلون ضمن العائلة
واثرهم في شباب يلاحقهم وهم خايفين ويجي واحد ثور بجيح يقول لاخوي خله تطلع انا خالها
والبنت تصيح وتقول والله موب خالي ولا اعرفه !! وهو مصر انه خالها المهم اخوي اتصل على الشرطة
وجاو اخذو الثور وكلم ابو البنتين والا يجي يدربي راسه ولا هو داري وين الله حاطه !!!
وبعد ما اخذ البنات لقوا الشرطه تراكه الثور ولا سوو له شي !!!!!!!!!!!!!!!!!!!!!!
عاش من شاف لك موضوع ,,
والله بيني وبينك فيه بزارين ودك انهم يضيعون وما يرجعون ابد ..
وبعدين بزارينا ما عليهم خوف اذا ضاعوا , بيرجعون غصب .. لأن ما احد بيتحمل بثارتهم ..
وياكثر ما ضعنا ورجعنا وتصفقنا والوضع عادي جدا .. هي جت على البزارين ..
وعلى طاري الموضوع .. اذكر زمان جدا يعني وانا صغير مرة .. طلعنا من الحرم انا وابوي وامي واخوي الصغير ..
وابوي كان عنده شغله وصلنا الى قريب من الفندق واشر لنا على الفندق وقال لي ودهم وانا بلحقكم شوي ..
وانا اللي ادز فيهم تعديت الفندق ودخلت في حواري وضعت فيهم وبغيت اصيح ,, اشوه اني صحت ..
وما دلنى على الطريق الا اخوي الصغير .. والحمد لله ابوي ما درى ولا كان طحت من عينه ..
وعلى طاري مكة فيه موقف لا يمكن انساه , حرمة كبيرة بالسن كانت ضايعة بمكة وتدور بين الفنادق تدور ولدها ودموعها على عيونها ..
كنت صغير وقتها ولا اعرف اتصرف ولا كان ودي اروح ادور على ولدها واطب في بطنة .. حسبي الله عليه , استغفر الله العظيم وبس ..
بالنسبة للاختطاف ودي اقول لكم قصتي , بس اللي خطفوني حلفوني ما اعلم احد ..
وانا وعدتهم اني ما اعلم احد .. لذلك اسمح لي ما اقدر اخلف وعدي واقولكم القصة ..
بصراحه أنا ما تذكر اني قد ضعت يمكن " أضيع " اما " اضيع " لا لا ماعتقد
و إن " ضعت " ورأ اهلي ماعلموني اني ضعت حتى ازعل عليهم ،
اجل يضيعوني هـ المهملين
أما من ناحية الاختطاف أتمنى بس أن أحد يخطفني
ودي اعيش لحظات ارهابية و اكشن بس للاسف محد وده يخطفني !
داعيه عليه أمه اللي بيخطفني ..