أنا من اللي شفته من المباريات , الفريق تحسن دفاعيا مع باري و جيرارد وأحيان لامبارد ,
وهذ الانضباط التكتيكي اللي أتكلم عنه !
لكن فيه مشكله ما قدر يحلها وسببت للفريق عوائق " تيري - فيرديناند " صراحه ما يقدر
يخلق لانسجام بينهم , أسماء كبيره لكن مب متفاهمه ,
يعني مشكلة الإنجليز الأولى هي قلوب الدفاع ,
أما الحارس فإنجلترا تعاني بأكملها من المشكله ذي , يعني مب كابيلو هو الوحيد اللي محتار أي نكبه يدخل ,
" جيرارد - لامبارد " نعم جاب الحل بأنه يخلي واحد منهم محور والثاني متقدم أكثر منه , وهذا الحل الوحيد
الإثنين يلعبون بنفس المركز , وش تبيه يسوي ! كيف تبيه يدخلهم , ولو أن أحدهم سيء كمحور كان قلت لك
المفروض يتكي احتياط , لكن الإثنين جيدين بالمحور مع باري , لكن ما في أمل الإثنين يلعبون بالأمام ويبدعون ,
إذا كنت تقصد " لامبارد - جيرارد " في مباراة الجزائر , فللأسف الإثنين كانوا محور ,
وكا خطأ من كابيلو !
نقطه مهمه , جاريث باري وبالرغم من موسمه السيء إلا أنه من أهم عناصر الفريق , مهم جدا اللاعب هذا !
أخطاء كابيلو كثير بالمباراة الأولى ,
لكني واثق أنه بيعدلها ضد الجزائر , وإن شاء الله أجي وأباركلك ,
غرين
كول - تيري - كاراغر - جونسون
جيرارد - باري - لامبارد - لينون
هيسكي - روني
أتوقعها كذا , إذا كان باري جاهز , وجيرارد يكون متقدم أكثر ولابارد محور هجومي .
وبالنسبه لأريكسون هو درب الفريق 5 سنوات قبل كأس العالم , كابيلو من 08 فقط !
أعتقد أنها تفرق كثير ,
إقتباس
اخرجت مافي قلبي من كلام
إيييه
فضفض فضفض
والله أسعدني ردك علي كثير ,
وإذا فيه شيء مب واضح نبهني ,
للمترجمين
هذا تصريح جديد من كابيلو " يرد على بيكنباور " هنا , من السكاي
وتكلم فيه عن الكوره ,
اللي يتابعون النقاش يا ليت يشاركون فيه , نستفيد أكثر و يتوسع الموضوع .
بالتوفيق
,
فاهم عليك ,
بس أنا أقصد انضباط تكتيكي في حالة دفاع الفريق , يعني إذا الكوره عند الخصم الفريق يتحرك صح ويتمركز صح ,
يعني تمركز اللاعبين " انضباط تكتيكي " في حالة الدفاع , الزبده أن التوزيع بالملعب جيد ,
اتمنى وصلتك الفكره يا عم ,
الهجوم الإنجليزي مب عاجبني مع كابيلو , مع أنه يملك أقضل رأس حربه بالعالم ,
الفريق دفاعيا , ممتاز .
لكن هجوميا عليه كلام حسب رأيي ,
أبضيف نقطه يمكن توضح شيء بالنسبه لمباراة أمريكا ,
أقدر أقول الفريق تغير 180 درجه بسبب غياب باري , راح التنظيم الدفاعي مع غيابه , واختل النوازن بالوسط ,
باري يعتمر أهم مكون للعمود الفقري بالفريق , و لامبارد وجيرارد ما يقدرون اللعب معا بغياب محور دفاعي , باري أهم عنصر بالمنتخب وغاب عن الفريق , فصار اللي صار !
بانتظار عودة باري ليعود المنتخب لمستواه ,
اررحبوا أنا حاس ان فيه شيء ضايع ما جيته في المنتدى طلع هالملتقى الطيب << يقولون له مصري احياناً
ما قريت الا هالصفحة الاخيرة و من خلالها شفت ان فيه نقاش عن التكتيك الدفاعي و الانضباط و هالكلام .. ودي ادلي بشوي من الدلو حقي مشكلة المنتخب الانجليزي انه ما فيه ثبات أبداً في الاسماء في قلب الدفاع .. شفنا تيري يلعب جنبه كاراجير و كينغ و فيردناند و ليسكوت و ريتشاردز .. كلهم لعبوا بجانب تيري كقلوب دفاع و أغلبهم في مباريات رسمية بسبب اصابة الآخرين !! كيف ينخلق الانسجام بدون ثبات .. مستحيل و هذا ما فيه لوم على أحد لأن المسألة مسألة إصابات
شخصياً أشوف الأفضل لـ اللعب بجانب تيري هو داوسون لكن للآسف يبدو ان كابيللو غير مقتنع فيه لذلك كاراجير هو الأقرب و مدافع ممتاز تغطيته و روحه عالية لكنه بطيء زيه زي ليدلي كينغ !!
عموماً قلب الدفاع ما راح يسبب مشاكل ان شاءالله الأهم ان كابيللو يضبط اموره في الوسط و الهجوم .. دخول باري في التشكيلة الاساسية مهم جداً مثل ما ذكرتوا و يكون الوسط بهالطريقة
باري
جيرارد .. لامبارد
جيرارد و لامبارد بيكون عنده راحة أكبر في الهجوم و مساندة دفاعية مستمرة .. في المباراة اللي راحت اللاعبين قدموا مستوى طيب خاصةً جيرارد اللي اعجبني ادائه كثير .. لكن و لو ما كانوا ماخذين راحتهم لأنهم اثنينهم يتقدمون و يرجعون لكن في حال تواجد محور ثابت بتفرق كثير معهم
هيسكي تواجده مهم في التشكيل و بنفس الادوار اللي قام فيها المباراة الماضية مع تمركزه بشكل اكبر داخل منطقة الجزاء لأن المباراة الماضية كان يطلع برى المنطقة و يجهز الكور لزملائه هذي ممتازة لكن الكرات اللي وصلته داخل المنطقة قليلة
فيلسوف ,
معك عبدالعزيز "بو مبارك" قبل لا أبدأ الرد ,
وما أشتبعد يبدأ بجرين أساسي , كابيلو معروف أن راسه يابس
لك
إقتباس
اخرجت مافي قلبي من كلام
خخخ
أسير الزعيم ,
إقتباس
ه لذلك كاراجير هو الأقرب و مدافع ممتاز تغطيته و روحه عالية لكنه بطيء زيه زي ليدلي كينغ !!
خوفي البطء بقلوب الدفاع يسوي بلاوي زي ما سوا بفرنسا أمس ,
ولو أن وجود تيري بيريح المحبين أكثر ,
باري
جيرارد .. لامبارد
ما ظنتي تركب لامبارد و جيرارد قدام , إلا ماعمرها ركبت أصلا !
الأثنين لهم نفس المركز وهذا كان دايم يسوي مشاكل مع ايركسون , الأفضل أن لامبارد يرجع كمحور هجومي
يساند الأخ باري , وجيرارد ينبسط قدام براحته ,
السلام عليكم جميعا
بصراحة منتخب الجزائر من يوم ما فاز على منتخب الامارات
في مبارة ودية ومنتخب الامارات شارك بالاحتياطي وكان فوزه
بهدف وحيد من ضربة جزاء غير صحيحة رأيت فرحة الجزائريين
بهذا الفوز واطمأنانهم على مستواهم وكانوا قبل ذلك خسروا
جميع المباريات الودية ولم يسجلوا أي هدف أيقنت عندها أن
الجزائر لا يمكن أن تقدم أي شيء في كأس العالم وبالفعل
خسروا أولى مبارة لهم وأسهلها من سلوفينيا .
حقيقة لا أدري كيف يتحدث مدرب الجزائر عن ضعف الهجوم ولديه
مهاجم من أفضل المهاجمين العرب وهو عبدالملك زيايه ولم
يشركه في أي مبارة بالعقل هو أفضل اللاعبين الجزائريين
ويشارك طوال الموسم أساسي مع الاتحاد بخلاف أكثر اللاعبين
الاحتياطيين في انديتهم في أوروبا .
ما لفت نظري أن بعض اللاعبين الجزائريين أصحاب قصات شعر
غريبه والأدهى من ذلك اللي صابغ شعره بالأصفر
أنتظر بقية الآراء
بو مبارك .. يالله حيه .. بس حرام عليك تقول باري موسمه سيء .. انا اشوفه افضل لاعب بعد تيفيز وفي نفس المرتبة مع قيفين ..
بالنسبة لنقطة الدفاع اعتقد الدفاع حاليا ما فيه افضل من تيري وليدلي كينق لكن اثنينهم يلعبون في نفس المركز دخل داوسون مثلا ..
بالنسبة للهجوم المباراة الاخبرة اشوفه تأخر في تدخيلة كراوتش المفروض بعد هجمة هيسكي اللي ضيعها ما نشوف وجهه ثاني مرة في ذيك المباراة .. بعد دخول كراوتش روني نفسه تحرر وقام يتحرك ..
اللقطة الوحيدة اللي كانت خطرة على انجلترا هي لقطة التيدور وكاريقر .. بطئ كاراقر وحصوله على بطاقة صفراء قبل تدلك على حجم الضعف بذا المدافع .. يعني هذي اللقطة هي اللي تستاهل فيها كرت اصفر ..
اول مادخل كان يستاهل كرت اصفر ومشاها له الحكم .. بعدها علطول اخذ كرت اصفر .. وبعدها بانفرادة كان يستاهل احمر لكن الحكم مشاها له ..
على العموم اتوقع بعد مباراة امريكا الفريق يحتاج ثقة تبعد عنهم ضغوط الصحافة .. والثقة تجي من هزيمة انجلترا للجزائر بنتيجة ممتازة .. اذا فزنا هالشي راح يبان في مباراة سلوفينيا ..
استمروا نقاش بطل ..
الملاحظ على ذا البطولة كثرة الكروت الصفراء والحمراء وما فيه لاعب معين برز الى الان .. اللي يبرز مباراة يضيع المباراة اللي بعدها .. يمكن ما فيه الا فورلان و ميسي وحارس نيجيريا ..
برضو الاحظ على ذا البطولة كثرت المفاجات .. من فوز كوريا على اليونان .. الى هزيمة فرنسا .. وفوز سلوفينيا وتصدرها المجموعة وفوز سويسرا ..