طالب تقاعد

ليت منهو وقّع أوراق التقاعد

...................................والإدارة وافقت والهم طاحي

أستلم كامل حقوقه والعوايد

...................................سلّم العهدة وغادر وإستراحي

ما إنتظر حفلاٍ توزع به شهايد

...................................وصور تذكار ما فيها صلاحي

أكتبو له نشكرك خدمتك واجد

....................................ونتمنى لك بدنياك النجاحي

صار من عقب إرتباطه يا بو سعد

...................................حر مثل الطير كفّاخ الجناحي

ما حداه الزام عن بعض المقاصد

..................................لا نوى له ديرةٍ شّغل وراحي

واصلاٍ غاليه ولربعه معايد

................................في اعياد الفطر واعياد الأضاحي

لازمه يقضيه وبكيفه يواعد

...............................ما يراجع ريسه يبغي السماحي

لا اشتهى يرقد تخيّر بالوسايد

..............................وإن سهر ما هوجس بزام الصباحي

والهدف عند العرب ما هو بواحد

..............................كل رجلاً له مرام وله مشاحي

من يبي يقنص عساه يعود فايد

..............................فيه بالمقناص رزقٍ وإنشراحي

لا ِذكر في صحصح نزل وطرايد

...............................قال هيا ما يقول الصيد ناحي

ومن تنيشط حالته جدد بناهد

..............................ما فهق لجازته عقد النكاحي

وإن كان حاله ماش وإلا ما يساعد

...............................ينسدح ويكّثر من الإنسداحي

وإن كان شفه بالسفر ما هو بناشد

..............................في بلاد الله مع السياح ساحي

وخيرهم من كان في دنياه زاهد

..............................يطلب الله بالثبات وبالصلاحي

بين مكة والمدينة والمساجد

..............................دايماً دربه عسى دربه سماحي

قايماً باليل للرحمّن ساجد

............................وكل ما نادى المنادي للفلاحي

قلتها وأنا أعرف رضا الناس كايد

...........................ولاني بفارض على الناس أقتراحي

والوظايف جمعت شتى البدايد

...........................من جميع الناس مجنون وصاحي

فيهم الطيب عزيز النفس راكد

...........................عل يفدونه مشافيحٍ شحاحي

وفيهم الأنذال والرديين تأجد

..............................خمةٍ دايم سوالفهم صياحي

دايماً وجه الردي واللاش بارد

..............................يا عسى يمحاه من دنياه ماحي

والحظيظ اللي يبي يطلع تقاعد

...............................دام به قوة وقبل يقال طاحي

وســــــــــــــــــــــــــــــــــــــــــــــــــــــــــــــــلامتكم ....

صح لسان من قال ..

وخيرهم من كان في دنياه زاهد

..............................يطلب الله بالثبات وبالصلاحي

انا اشهد انه صادق

مشكور اخوي ابو الذهب ...