رحلتي في ميدان تخصصي ورسالة معجبهـ..
السلام عليكم ورحمة الله وبركاتهـ
مدخل):
سقى الله يوم انا طفلة انام ولااحد قدي
ولااحاكي هموم اليوم ولا انطر امل بكره
تلاعب يدي الدميه وعندي هالزمن وردي
همومي لعبتي ضاعت وعندي هم وش كبره
أخباركم؟؟
عساكم بخير.
بدخل بالموضوع على طول..<<عسى الباب مفتوح
طبعا انا الان في مرحلة تدريب ميداني لتخصصي صعوبات تعلم اكيد بعضكم يجهل هالتخصص.. او يسمع عنه.. 
طبعا هالتخصص هو إحدى مسارات التربية الخاصهـ((لذوي الأحتياجات الخاصه)) هو صعوبات اثناء تعلم احدى المواد الثلاثه الأملاء والقراءه والرياضيات قد ترجع لاسباب نمائيه يعني مشكلة عقليه((تذكر انتباه ادراك بصري سمعي)) او اسباب اكاديميه ((طريقة شرح المعلمه الطالبه تحتاج طريقه ثانيه تفهم فيها الدرس وهكذا.. بشرط هالصعوبات مايكون سببها اي اعاقه سواء كانت سمعيه بصريه او عقليه <<احس سمّعت لكم كل اللي درسته.. طبعا الطالبات اللي ندرسهم طالبات ((المرحله الابتدائيه)) عاديات وسليمات مافيهم اي اعاقه
وإحالة الطالبات لنا تكون بعد مانجري لها اختبارات نحدد فيها اسباب صعوباتها وفي اي مجال طبعا بعد ملاحظة معلمتها لها ضعف تحصيلها الدراسي في احدى المواد الثلاث المذكوره اعلاه...
طبعا يتم تدريسهم في غرفة المصادر:
وهي عباره عن فصل خاص يختلف عن الفصل العادي ان لازم ندرس فيه طالبه وحده بس الى طالبتين والافضل طالبه عشان نحدّ من مشكلة تشتت الأنتباه ..
وهذا صورة لغرفة المصادر..
أبد مو خطتي<<ترى سببت صعوبة للطالبه في الرياضيات في هالدرس<<انا معلمة فاشله في الرياضيات
التخصص ممتع وفيه مجال للأبتكار والأبداع في تدريس الدروس
مثال الطالبه عندها صعوبة في الرياضيات درس الجمع مثلا:
نبتكر وسيله او قصه نشرح لها الدرس فيه طبعا هذي لوحه لاحدى الاخوات وودي انزل ابداعي<<تكفين يالابداع.. بس ماينفع انزلها الان حتى ماتسرق افكاري
لكن مجرد ماانتهي من مرحلة التدريب الميداني راح افيد فيها غيري<<ياكثر الكلام هذي طريقة لوحه للجمع..
وفكرتها واضحه المسئله تكون في العجلات..
والطالبه تعد اللي في العجلات وتطلع الناتج..
الى هنا هذا نبذه عن تخصصي.
((إعجاب عابر))
وانا في الميدان واجهت مواقف كثيره
من أهمها في يوم كنت إنتظار على الطالبات
ولما كنت متوجهه لغرفتنا الخاصه الا وطالبه تعطيني ظرف وتقولي من فلانه
اخذت الظرف
وفتحته في غرفتنا
الا والقى رساله طبعا الى اليوم عجزت افك الطلاسم اللي فيها 
صورتها بعد ماحطيتها على حوض السمك.. اللي خبير بهاالامور يفكها لي.. المشكله اسمها في وادي والانجلش في وادي تتوقعون ايميلها؟؟ طبعا انا موقصدي استهزء بمشاعر الطالبه ((حاشا لله))<<واضح
بس اللي خلاني انزل الموضوع ان هالرساله ذكرتني لما كنا بعمرها طبعا ماكنا نسترجي ونرسل رساله للمعلمه ونعبر لها عن حبنا البريء
لانهم ماينحبون اساسا.. اللي اذكره كنت في صف ثاني ابتدائي احب ارسل لصديقتي ومره اذكر كنت اكتب لصديقتي رساله وكان بيدي ريال وحطيت لها الريال<<زمن كان الريال اغلى ماأملك كان له قيمه يجيب بيبسي
كنت في قمة البراءه وبدال لاأوطد العلاقه بينا اثاريني جبت العيد فيها وزعلت البنت علي وقالت انا مو طراره ورجعت الرساله لي ممزعه على الاقل رجعتيها مثل مااعطيتك اياها واهم شي رجع الريال.. وانا كنت اقول وانا شسويت الله يرحم ايامنا..من 14 سنه مااعرف اي خبر عن البنت الله يرحمها ان ماتت والله يوفقها ان كانت على قيد الحياه..
حبيت انكم تشاركوني رحلتي وعقبال ماتعدي هالشهور على خير وأتخرج
دعواتكم لي اتخرج بمعدل حلو واخذ +A ((برايفت)): كم مره قلت كلمة طبعاً؟؟ مخرج):
كبرت وزادت همومي واحس ان الزمن ضدي
كبرت ونظرة الطفلة تعيش بداخلي فطرة
كبرت وعشت هالدنيا كبرت ولاهو بيدي
كبرت بشكلي ورسمي وقلبي باقي بصغره
الوضع الشجري
