السلام عليكم ورحمة الله وبركاته






قصيده للشاعر الكبير / ناصر الفراعنه
وسبق أنه القاها في أمسية حائل




بعد خضبـات الايـدي وقانيـة النقـوش
والله اني لك خطيـر لاطيـر بـدون ريـش
وا عنا روحي ويا حوش قلبي منـك حـوش
حوش ذودٍ حاشه (الجهر) وإلا (أبرق نفيش)
من هنوفٍ ما ملوا عينها أصحاب العـروش
حتى لو هم بدّلوا عرشهـا الفاخـر عريـش
جادلٍ لا مِدْح أبوهـا مـن السكـره تشـوش
لين يضرب عاشق البيض شيشٍ جنب شيش
كنْ بصدري فرخ طيرٍ من الصوت مخـروش
يوم يطرون اسمها لـوّ أنـا مانـي خريـش
أو بصدري كنْ جماهير شعبٍ بإسم (بـوش)
صوّتت وبصـوت واحـد تـردّد : فليعيـش
غادةٍ في الضلع الاحمر تروش الـروح روش
للخوافق من لهـب حبهـا الطاهـر وقيـش
أربعي من وجد حالي عليها اربـع وحـوش
الأوادم في ونَس وآنـا فـي قفـرٍ وحيـش
يا صباح الخير يا ضحكة الوجـه البشـوش
لوّ جرّت ضحكها في الحشـا جـرّة حنيـش
فتنةٍ من سوق (رنية) إلى سوق (الحبـوش)
ومن قصر (برزان شمّر) إلى قصر (الدويش)
حالفٍ لعيونها إني لأمـوش العظـم مـوش
موش ريح الصيف باقي شجـر وادٍ هشيـش
من بهاها صاح (عجران) عند (ابن مخشوش)
في فـؤاده ضمّـر الخيـل غاديـةٍ طشيـش
كلّ شيْ بالمختصر في هذيك البنـت خـوش
خوش زين وخوش عقل ولا في البنت طيش
لو جمعنا الزين زين أرض فارس والحبـوش
زينهم مع زينها ما كـلا يـا نـاس عيـش
كنّ فوق عيونها في هـدب سـود الرمـوش
من جيوش الغرب جيش تقدّم خلـف جيـش
يا سبيب (عبيّةٍ) إسمها الأصلـي (كـروش)
يا جديلٍ فوق الامتـان غـادي لـه وريـش
مثل ساري ليلةٍ بأبيـض الصبـح مغبـوش
وصف مجدولٍ بيدها مـع الغبشـات هيـش
والخدود أصفى من الزبد مـا فيهـا خـدوش
لو توارت ما لهـا إلا قمـر نصـفٍ دقيـش
كنّ عارم صدرها من احمر الثـوب بيطـوش
ليتنـي فوقـه واهدّيـه ملعـون الحريـش
في علوّ الصدر نهديـن غاذيهـا الرشـوش
ليت من صدره عليها وقـف وقفـة شويـش
يـا نهـودٍ غازلتهـا مُذَهَّـبـة الـقـروش
كلّ نهد بوقفته تقـل مـن سـادة (قُرَيـش)
وكنّ عاتر ردفها الضخم يوم اقفـت يهـوش
فيه من عتـرة قطـا مهـرةٍ ماهـي كديـش
ولّ ردفٍ يوم ناشـه حريـر الثـوب نـوش
فـزّ ثـمّ اهتـزّ كنّـه بنـاب الـداب نيـش
يا زعول اردوفها ليه ششت الثـوب شـوش
ما خبرنا ثوب عـذراً قبـل هاليـوم شيـش
ولا اخبر به ردف من ضيّق ثيابـه يكـوش
لا صفق وركٍ بـوركٍ سمعنـا لـه وشيـش
قلبي اللي من عراويه يـا نـاس محشـوش
من هوى غادة (غـداةُ غـدٍ) غيـداً وغيـش
ما ملوا عين الكحيلة من اهل الغوش غـوش
غير ابن قرمٍ إلى قام ما هـوب ابـن تيـش
يا طروشٍ وجّهت صوب نجـدٍ يـا طـروش
بأيش اجازيكم إلى جيتـوا المجمـول بإيـش
عن لساني بلّغوهـا تـرى القلـب مْعـروش
عرش حنّان الدبا في غصون ارضٍ نشيـش
كان نقبي يا جميلـه طلـع علـى فشـوش
عيشتي في تالي الوقت يا حلوه علـى ايـش
في هواك أصبحت كني مع الناس مغشـوش
إثر في غيبويـة الحـبّ غيبوبـة حشيـش
لعنبوك استغفري لي إلـى جـوك الطـروش
عن قصيـدٍ مـا ذكرتـه ولا تقوليـن ليـش
لو تبيّن ما ورا الصدر مـن شـيٍّ يجـوش
كان بأكثرنا بيمـدي جليـد المـاء يجيـش