вĻάc вεŕŕч & زيآره خيرية - نادي الهلال السعودي - شبكة الزعيم

RO7_ALHILAL · #1 02/04/2010, 06:52 AM

السلام عليكم ورحمة الله وبركاته
مسائكم خير بكثر البرود كاسات وكآنه صباح عسآه خير بكثر مصآلتهم

وان كانه ماهو هذا ولا هذا مشكلتكم مالي دخل انكم وسطيين .
وهو اللي بهالوقت هذا وسطي يآويلـه ياسواد ليله من المنفتح ومن المتشدد .

يا يتكفر يايستغلو .
ماعندنا حل وسط ، بس وين المشكلة مدري

لكن عشان ماتقلبون علي خلوني اقولكم بالبدايه

انا ماني معارض ع البلاك بيري لكن ماني مؤيد

< ماله مذهب

لا تصدقون السطر اللي فات يمثل وجهة نظري لا بس انه عشان يفكني من الجهتين.

ع العموم البلاك بيري ، وصلوا اهله لـ حاله مالها مثيل للإدمان ، انا اقولكم شلون
البلاك بيري ايجابياته اكثر من سلبياته
بس ولو سلبياته تطغى على ايجابياته

< للحين خايف من الجهتين

..
نرجع لموضوعنا

:
اهل البلاك بيري صـاروا عايشين وضع بلحالهم ، بالجامعه كلن راسه بالبلاك بيري ، ونزلت مستوياتهم 180 درجه .
بالطلعات شباب طالعين كوفي كل واحد معاه البلاك بيري طيب دام كذا ورى ما كل واحد انثبر ببيته وتسولفون سوى بالبي بي ؟

طلعة الاهل صدقوني تلقونهم طالعين بالبر وكلن معاه البلاك بيري ، وطلعتهم صارت بلا طعم ومـاصخه
أي مكان بالجلسه مع الشباب مع الأهل كلن راسه بالبلاك بيري ، صحيح مبسوطين بمحادثاتهم وعيشتهم ، لكن ماراح يعرفون انهم عايشين اقرف عيشه الا بعد وقت بعد مايملون منه ، ولا لاسحبوا عليهم اللي بالبي بي

ماراح يحسون بتأثير اللي هم فيه الا بعد فترة لاشافوا انفسهم مو قادرين يعيشون بدونه ، ولاهم قادرين يتأقلمون مع الوضع .
طيب هذي شيء من سلبياته لكن خلوني اقولكم شي من ايجابياته عشان الحزب الثاني يرضى علي

ايجابياته :
- محد معطي وجه للدكاتره بالكلاسات الا انا ، وهالشي هذا ماتجهلونه

صرت افضل واطلق طالب عندهم ولافيه سيرة الا سيرتي بالاجتهاد ، والدكتور اساساً يدخل الكلاس وجهه بوجهي ماكأن فيه الا انا

وابشركم اعمال السنه اغلبها بجيبي

الله يكثر خيركم ياراعين البي بيات

- شيباننا

صرت انا الولد البار اكتشفت محد يسولف معهم الا انا بطلعة البر . اقولكم وقت الإجازة اللي فاتت لو طلبتهم يزوجوني

زوجوني
صحيح فيه شي ايجابي عقل الهلال .. تخبرووونه؟

يوم كنا بالبر ماغير ماسكن ولده وناشبن بحلقه ومعه الكام ومره فوق السياره ومره تحت الشمس ومره فوق الخيمه وماكلاها الا ولده يوم رجعنا من كل مكان فلقه ويقول عشان تكون صورة احترافيه

ارحمنا يابو الاحترافيه انت

الحاصل انه من شرى بلاك بيري كسب محل الجوالات اجر ولده افتك من ابوه وغثاه خخخخخخ وخلاه يدمن على هذا الشي وفك ولده من شرّه تقل محد عنده ولد الا هو.

اقولكم : ذاك اليوم دقوا علي العيال وحنا مشتاقين لك ومن زمان عنك من كثر كلامهم حسيت ان هاليوم بيكون احسن يوم بالاستراحه

وبفتك من روتين بلوت بلاستيشن وطفشت من سيرة رئيس نادي النصر من دون ذكر اسماء طبعاً

المهم بعد دوام كئيب مشيت يمهم وكنت مبسوط حسيت ان اليوم بيكون حفله ويالله بعد السلام وكيفك ووش اخبارك وبتجهز لجلسه حش وتمني اليمه

تفاجئت ان المجلس كلن مسك جهازه وطقطقه بالبي بي

انا ياعيال وحدوا الله مايصير هالكلام هذا ولا احد لمّي

المهم مسكت جريدة الرياضية اقلبها واطالع بثاره مصطفى الاغا لبى قلبه ولا الشوتايم اقلب بقنواتهم ولا راح احد ينكب الا امي لا ازعجتها انها ترضى اتزوج مسيار ولا لا :$ ، المهم انتظر تقرير يجي للنصر يمكن يصير فيه حمااس الا وجاء التقرير وكلن لاهي

واحاول احركهم وتلبست اني نصراوي بما انهم للحين ماعرفوا لي ميول

من كثر ما احارشهم وقلت والله يالموسم الجاي انسوا فريقكم الهلال هذا كل البطولات بجيبنا < طبعاً ذيك النوعيه ماتعترف بـ ان شاء الله واثقين ماشاء الله ع طول حلف .

ولامن شاف ولا من دري

وتطق فيني الدنيـا واقول دريتوا رئيس نادي النصر خيطوه 7 غرز بسبت مشجع الوصل ضربه ولا احد درى

وفقدت الامل واطلع من الاستراحه ومايمديني وصلت الباب الا واحد توه خاش واسلم عليه قال مادريت ان رئيس النصر مضروب وفيه ثمان غرز خخخخخخخخخ

واقول بقلبي هذا اللي استفدتوه من البي بي توزيع الاشاعات .

زيـاره خيريـة :

هذا وقد قام النادي المعروف باتجاهات الخيريـه ، بزياره دار المرضى وقد قاموا بتزويع الهدايا والورود للمنومين ، وهذا وقد التقطوا الصور التذكارية مع بعضهم البعض ، وتخللت تلك الزياره كلمة من مدير
الوفد الزائر امتلأت بالدعاء والامنيات للشفاء ، وبعد ذلك جلسوا جلسة وديـه سادها السكوت والملل بعد
التهاء افراد الوفد بأجهزتهم البي بي ، وبعد اخذ انطباع المرضى فور رحيل ذلك الوفد قال م.ص.خ.ع
الله يجزاهم خير جابوا لنا هداايا وورود وطبقوا مقولة ( بارك الله بمن زار وخفف ) .
وقال رفيق المتحدث السابق ب.ق.5.ف < الخمسه مدري وش وضعها

والله مدري على أي اساس جايين بس انهم صحونا من النوم وتعبونا بتجهيز انفسنا ، انا اقول لو هم مرسلين
الهدايا بالـ DHL اهون لهم

وبعد اخذ انطباع الاغلبيه وافقوا على ذلك الرأي بالاجمعيـة .

وهنا صورة من الخبر اعلاه :

متحدثكم R.7 المجلس العام

الخبر كان فبركه ومن عندي لكن كان تعليق بسيط على الصورة اللي فاتت وبشكل هزلي ، انا ما انكر المجهود الخيري بنادينا ، وقليل من يسوي سواتهم ،او انعدم اللي يسوي سواتهم ، لكن تمنيت انهم يظهرون بصورة افضل من هذي واشكرهم كل الشكر .

لكن ياجماعة الخير ماتوصل لهالدرجة اننا مع اهلنا ومع جمعاتنا وبزيارتنا للمرضى نكون كذا .
مانخلي حياتنا بالشكل هذا ، نقلب النعمه لـنقمه .
وضعت لـ فائدتكم ، لا تخربونها بـ فعلكم .
تمنيت اني انصح اكثر لكن خابركم ماتحبون النصح

لكن اتمنى الفكره اهم شي وصلت

بالنهـاية يالبلاك بيريين : وش تنصحوني فيه بولد ولا ميني بوووووووولد؟

الهلالي دائماً · #2 02/04/2010, 01:38 PM

هههههههههههههههههههههههـ
هههههههههههههههههههههههـ

هلا وغلا بك اخوي روح الهلال

والله موضوع في الصميم

من جد والله الواحد صار مشغول ماعاد فيه سواليف واحاديث نقاشية .. كل التقنيات الجديدة تخلي الواحد يعيش في عزله

اذكر اول ما طلع البلتوث صار الواحد يقعد يقلب في جهازه ساعات وهو جالس بمجلس فيه عالم !!
والحين طلع لنا البي بي

بصراحة انا ما شريته وما حطيته بالخطة

عندي ايفون

واحس انه اشغلني عن العالم

يا هووو فيه العاب هع هع هع

بس الصورة بصراحة في الصميم

عاد بغيت اثبت الموضوع بس خفت تجيني شوته ما اصحى منها الا في منتدى العالمي :
شوكون روح

ودمت بحفظ الله ورعايته ,,,

أزرق والقلب أبيض · #3 02/04/2010, 01:49 PM

ههههههههههههههههههههههههههههههه

اي والله صدقت ياشيخ يرفعون الظغط

اخوي معاه واحد 24 ساعه يسولف فيه

يوم تلعب بلاستيشن يعطلك كل شوي موقف

والله رفعت ظغط جعلي ما اشتريه لحست مخ :

ههههههههههههههههههههههههههه

لاتحسبه بعد يسولفون :

ذولي يتبرعون للجمعيه عن طريق رساله جوال :

الظاهر انك تهزر :

في امان الله

شوق الكويت · #4 02/04/2010, 02:19 PM

مساء الخير اخوي روح الهلال

انا مدري ليش الناس مكبره سالفة البلاك بيري بالعكس انا بالنسبه لي ايجابياته اكثر من سلبياته وهو على حسب الشخص والله واستعماله له ..

صح مرات انشغل فيه واسحب عالمحاضره وممكن انطرد

... بس والله بالبيبي قوت علاقتي ببنات اعرفهم من زمان بس مافي وسيلة اتصال تجمعنا مع اشغال الدنيا والحين صرنا نسولف يوميا والله ..

الصووره حلوه

يعطيك العافيه اخووي

اموره تلعب كوره · #5 02/04/2010, 02:27 PM

اهلآ اخ RO7_ALHILAL ,,
مسآء النور خيو ,,

والله انك جبت موووضووع في الصميم

الحمد الله انا مايعجبني نهائيآ

اجل لو تشوووف البنات بالجامعه والله ان تكره كل الجوالات

بالمحاضره برآ المحاضره وهي تمشي الجوال ماسكته يعني زي الصوره تمامآ

ومررره واحد بالأشاره الناس تمشي وهو توهـ ينظر بالبلاك

انا الحمد الله عندي اي فون وe71 والله ياهي جوالات تفتح النفس

يعطيك العافيه على الطرح ,,

تحياتي لك ,,

the king yasser · #6 02/04/2010, 02:35 PM

اما الصوره

في الثمنياااات

شف كلامك صحيح وكنت اقول مثل ما تقول

بس يوم شريته تغير عندي هالمفهوم

وصرت دايم اقول الي ماشراه مايحس بلذته

تحياتي اخوي روح الهلال

MaLik74 · #7 02/04/2010, 05:24 PM

.

.

روح الهلال , موضوعك ع الجرح

.

أنا كنت من المعارضين وبشدة لهالبلاك بيري اللي يخرب الجلسات والطلعات

وأحلى الليالي <<< متعوب عليه هالكلام ههههههههههههه .

تخيل ذاك اليوم دق علي خويي وقال لي اطلع معنا قلت ابشر يوم طلعت نزلوا اخوياي وسلموا علي شوي اللي كان راكب قدام قال لي اركب قدام انت احسن قلت لا لا يابوي أنت أكبر مني قال لا اركب قدام وحلف علي وركبت المهم شوي الرجال اللي ركب ورى ساكت ياولد وش فيك ركبت ورى وسكت قال لي السواق عشان البي بي قلت الله يقطعه من تقنية واناظره حقدت عليه , ليه جاي معنا وتجلس تسولف به وتسحب علينا

.

ودايم أقول للناس لا أحد يشتري البلاك بيري فكونا منه أشغل الأمة الإسلاميه

ههههههههههه , وألحين أنا ناوي اشتريه احس إنه يقضي الوقت اذا صرت بلحالك طبعاً مافيه غنى عن اجهزة الكمبيوتر لها نكهة خاصه هذي , وفوق كذا عندنا دكاترة سامجين نبي نشتري البي بي عشان يقضي وقت محاضراتهم السامجة .

لكن بحاول إني ما أدمن عليه

.

أشكرك ع الموضوع وإعذرني ع المداخلة وإبداء وجهة نظري التي اصبحت بين نارين , والله يعينك وشكراً لك ع الموضوع الأكثر من رائع

.

أخوك / مالك !

.

.

عقـل الهلال · #8 02/04/2010, 05:39 PM

MY BB : HILAL001

اهلين بالقرايا هههههههههههههههه وشلونكم يا أهل حايل بالله ممكن سؤال تعرفون خدمة بلاك بيري << شوف بلاك بيري مو بلاك .....

هين الثاني أكيد تعرفونه

لا جد وصلكم جهاز بلاك بيري

اصلن انتم عندكم جوالات ؟

حسيت بالمقدمه كلام كبير ياخي انت تعجبني والله تعجبني

<< بيجيب له مصيبة

شوف مش مش كل تقنية لها فائدة وع حسب استخدام الشخص لها طبعاً ربعنا كويسين مرة

واستخدامهم مرة بريء لها .

تذكر ياخي ايام العزاء ايه صح اثريك ماجيت!!بس اسأل عزعز الناس جايه تعزي والاشخاص ذولاك اللي خبري خبرك طاييحين بالبي بي وتوزيع ابتسامات !! والله ماهو وقت بي بي يعني لكل مقام مقال مفروض جاي لمكان فيه الحاله هذي ياخي انسى البي بي وخلك مع العالم وخل عندك شوية دم .

اجل صرت انت الولد البار

بار والا ديسكو

بس تبي شوري طق بي بي واتوكل ع الله

فيه قروب يصلح لك

بعدين انت شعرفك بالصور الاحترافيه

اصبر يوم الثلاثاء ان شاء الله بجيب لك البوم الصور بخليك تخق

خلاصة الحتسي ياخيي طق هالجهاز واتوكل ع الله خل نوسع صدورنا وع حسب استخدامك تبي خير بتلقى خير تبي شر بتحصل شر

.

ايه بغيت انسى تبي تطق طق بيبي بولد اطلق ابو شيء . وخل عنك اللي يقول لك اي فون صح متقدم مرة بس ماهو مع كل شخص

غااالي مرة اصبر خله يرخص ونطق انا وانت واحد

صح فليتها بموضوعك ؟

عااادي انا أخوك وأمون غصبٍ عليك

سلم على حايل

يا أنا مشتاق لكم

تصدق عاد أحس فيني كلام لسه ماقلتوه ترا يمكن ارجع

عاشق الازيرق · #9 02/04/2010, 07:42 PM

ههههههههههههههه يعطيك العافيه روح الهلال ..

تسسلم ..

كآن كلامي مثل الكل اقول مآبشتريه وخآف ادمن عليه و و و و ... الخ .

لكن انسحرت وشريته ..

بصرآحه بعد مآشريته مآشفت لا ادمان ولا هالكلآم اببد ..

وبالعكس اذآ صرت الحآلي وطفشآن يوسع صدري عالاقل شوي ..

شكرآ لمجهودك ..

مـوت ومـيـلآد ! · #10 02/04/2010, 07:55 PM

ههههههههههههههههههههههههههههههههه

ششي مووضووعك والله

!

لكن مأأاحب اعلق عالبلاك بيري

وخرابيطه لاني ماعندي خلفيه عنه

وبصرااحه ماادخل مزآآإجي

!

بالنهـاية يالبلاك بيريين : وش تنصحوني فيه بولد ولا ميني بوووووووولد؟

لآآهذآإ ولا هذآآإإ

جب لك أيفوون

! يـآآهو دمـــــــآآآآر

! ششي عجيب والله

!

كــرآآإتـزيه خيوو

!

BaRiO · #11 02/04/2010, 10:21 PM

وعليـكم السلآم ورحمـة الله وبركآته

+

انصحك برهيب 2000

شكله جآآآآآآآآآمد كآنه خشم المشآغب

والله شف يالغالي هالجهآز مرض نفسي اول شي .. يعني تطلع مع العالم وانت منزل راسك على شي مايسوى
ثاني شي انه لو شريته انا في نظري ابكون امعّه اركض ورا العالم .. اذا شروه شريته , واذا باعوه بعته
الشي الثالث( الشغآله , السوآق , الوالده , الوالد , الاخت , الاخ ) عآئله كامله نفس الجوآل .. مثل اللي يقولك عنز بدو طاحت بمريس

المشكله انه من زمان موجود في امريكا .. يعني عيب علينا تونا نطيح فيه

الشي الرابع كله اشاعات .. مافي احد ماذبحوه , مافي احد ماجابوله السرطان
بس بيني وبينك هو ينفع لمشرفينا

( في مخالف بالمكان الفلآني )

وجلعد لاتجلعد

اعذرنآ على الإطآله ,

يعطيك العآفيـه

+

RO7_ALHILAL · #12 03/04/2010, 02:43 PM

هلا ومسهلا باللي خايف انه ينشات

معذور وش دعوه ابو مقبل انا ادرى بهالامور

البلتوث اجل

شف وانا اخوك أي شيء ينزل جديد راح ندمن عليه بشكل مايتصور
لكن اننا ندمن عليه لحد ماتوصل الامور انه يضرنا هنا لا.
ابو مقبل

شرفني ان اول رد يكون انت

لا عدمناك

ازرق والقلب ابيض
ماقلت لي ماشيكت على جهاز اخوك البي بي؟

ترى بعض المرات تصير فيه اشياء طيبه

لا تضحك عليه ربي يبلاك بعدين

بعدين من ناحية الصوره ، مشكلتي دايم افهم غلط متى تزين نيتي بس

شوق الكويت
انا اتفق معاك ان ايجابياته اكثر من سلبياته اوكِ ، لكن انه يوصل للإدمان مايصلح
ومو مسأله مكبرين الموضوع ، بس وجودكم بهالدنيا يقهر انتم واجهزتكم

1
طيب حنا اللي مانحب هالشي وش نسوي نموت مثلاً؟

وهذا انتي قلتيها تنطردين

بسبت بلاك بيري
وبعدين البلا مو بالبي بي انه وطد علاقاتنا لا البلا فيكم

ماتتواصلون مع بعض
وتتعذرون باشغال الدنيا ، لكن علميني لا طفت نار البي بي خلاص ينقطع تواصلكم لبعض؟

اموره تلعب كوره
انتي خليني اشوف البنات بالجامعه

بعدين نشوف سالفه ام البي بي هاللي اشغل العالم

بعدين وش سالفة الواحد مايمشي الا وهو ماسك جواله بيده يعني خايف انه ينسرق ولا موضه بعد؟

ااه يالايفون

انا سمعت ان ابو مقبل بيعطيني جهازه الله يقويه

بس مايوخذ عقبك

The king yasser
علمني بس لذته وين تكون فيه؟
والله البي بي فيه ايجابيات بنت يهود

بس الاشكاليه بـ الادمان

Malik74
هلا والله بالغالي

هو من ناحية يخرب الجلسات هذي قاضين منها

لكن وش السوات هقوتك
بعدين سالفى خويك صراحه ماينفع بهالاشكال الا انك تنزلهم

اجل راكبن معي عشان
تطقطق بالبي بي
والله يامالك عندنا ناس يقرفونك حياتك خلاص توسوس جالس مع شله وكلهم اجهزه وانت ماكل هواء

انا ما اقولك لا تشتريه اقولك اشتره وجب لي واحد معك

بس لا اوصيك انتبه فيه اشياء مفروض ماياخذ وقتنا فيها البي بي
اسعدتني بهالمرور يامالك والف شكر ع تواجدك

عقل الهلال

تصدق من ردك بغيت احذف موضوعي واخلي ردك بداله

الله يعينني برد عليك

اجل تتريق ع اهل حايل انت ووجهك

لا تصير مثل الغراب اللي نسى مشيته ولا عرف
يقلد مشيت الحمامه < صح يالررررد

اشوف ولدك بكرا يجي شلون لهجته وهو طالع ع خواله اجل قمقوم

قمقوم للناطقين باللهجه الحايليه

ذابحتتتكم البرااءة ، ياخي من زود برائتكم ياراعين البي بيات ، انكم بعض الناس كاتبين رقم الـpin ع السياره ياحبه للخير

يبي اللي يضيع يوصف له وكذا

شف برائتهم
فيه ريحة حش يانذل؟ هم ذولاك الناس اللي حنا منا فيذا همى حنا كنا كذا

مايحتاج اكمل خخخخخخ
الله واكبر عاد هالالبوم صاير البوم ابو ساره ع غفله

انتي تدري

وش سبآ عقلي وفؤادي بالآيفون

خخخخ

شف عاد مكان انت فيه لازم اقرى كفارة المجلس خخخخ
لأن لو ماقريتها بتروح علي من كثر ذنوبك

سبْحَانَكَ اللَّهُمَّ وَبِحَمْدِكَ ،أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ

عاشق الازيرق
انا اوصيك انك تضيف الاشخاص اللي عند بعض الناس خخخخخخخ
ماتشوف خشته ولا تسمع له صوت اذا هم موجودين

يعطيك العافيه ع المرور حبيبي قلبي

هلالية ايطاليه
غريبه بنت ماتحب البلاك بيري ، عاد ياحبكم للبربره خخخخخخ يصلح لكم هالجهاز
وللمره الثالثه ااه يالايفون

انتم ناوين انتحر بسبة هالشي هذا

فورزا هلاليه ايطاليا
فورزا روما
فورزا اr.7
فورزا المجلس العام
حسيت اني القي خطاب جماهيري

Bario
لبى ذاك الخشم بس والله له وحشه

البلا تمسك معاه ع المنتدى فتره وفتره يسحب علينا خخخخخ

انا ادري وش بلاه هو يطيح بشيء واذا انمنع منه

جاء يقزرها علينا

هههههههههه يعني هقوتك يصلح للدبابيس؟

طيّب ان ما اشوف فيه مشكلة لو تشتريه بس انك ماتخليه يبعدك عن اشياء اساسية
زي جلسة الاهل والسوالف وحياتك كلها يبقى وقت فراغ للطقطقه والوناسه

والاشاعات محد ماكلها غيرهم خخخخ مدمنين ع البي بي ويطلعون اشاعه انه بينسحب من السوق

لا اطاله ولا هم يحزنون شرفتنا ياباشاا ولا عدمتك

هلالي من ارض اليمن · #13 05/04/2010, 12:28 AM

هلا بالغالي : روح الهلال

الصورة اعلاه مع تعليقك تستحق ان ترسل الى الدائرة الاعلامية بنادي الهلال

فالصورة اظهرت منظر غير جيد ويفترض في المرات القادمة ان يتم تنبيه اللاعبين ومن يرافقهم بالظهور بشكل لائق .. وليس كما هو الحال اعلاه

يعطيك العافية ،،،

هلاليه سنعه · #14 05/04/2010, 12:51 AM

اهلا اخوي موضوعك في الصميم
ماعاد صرنا نشوف احد كلن لاهي بجواله
وش اخر نكته واستعراض صور ومثل ماقلت اشاعات واخبار
حتى صار عندهم روماتيزم في الاصابع وجفاف بالعيون

..
انا صراحه مااحبه وكنت رافضته بس شكلي ابشتريه
عشان اتواصل مع قريباتي اللي بالخارج

..
ابولّم المرهم من الحين

الطنزه تلحق علطلول

وبالنسبه للصورة اللاعبين يتبرعون للجمعيه الله يجزاهم خير ..
يعطيك العافيه على الموضوع الخفيف ..

دمت بخير ..‘‘

ام متعب التميمي · #15 05/04/2010, 01:53 AM

ههههههههههههههههههههههههههههههههه......... فشلـــونااااااااااااااااااا الله يفشل هم احذفو الصوره لايشوفونها الفقراويه...احنا ماسكين عليهم ابو بلوتوث ....لا يمسكون هالخمبدزه علينا................اصحاب البلاك بيري ((عقل الهلال))<<<جعلكم للعمى((امزح كلهم جعلهم للعمى الا انت^^)) الخميس الي طاف تهاوشت مع وحده فالمول معها بلاك بيري وجالسه تمشي وهي تسولف عاد صقعت فيني وانا الي خلقه اكره هالجهاز وجات هذي ومسكينه حطيت حرتي فيها ولعنت سافل سافل بليسها ومشيت^^....................... تحيـاتي