اهلاآآ بريماكس ..

مشآء الله روحتك خيرهـ لك شفت صديقك ثامر ..

يآآي شي حلو تشووف احد من زمان ماشفته الله لايفرق بينكم ..

اذا على المواقف كثيره ..

تحياتي لك

بالفعل رب صدفه خير من الف ميعاد

وخصوصآ إذا كان الشخص غالي

لكن غالبآ يغلب طابع المجامله

وعليــكم السلآم ورحمه الله وبركاته

أهلين بريماكس
يـــازينها من صدفه
سبحـان الله الدنيـا مــره تفرقـنا ومره تجـمعنـا
أذكر أول سنه بالجـامعه قابلت وحده كـانت معي برابع ابتدائي

بس بذاك الوقت حنـا نقلنا ونسيت البنت
وأول ماشفتها بالجامعه حسيت أنها هي ويوم أسمع الآستاذه
تنادي أسمها تأكدت ورحت سلمت عليـها
مع أن عمري ماتوقعت أني بقابلهـا

أسأل الله أن يجمعنا واياكم في جنات النعيم ..

السلام عليكم ورحمة الله وبركاته
وياااااااا سلام على اللقاء بعد هالفترة الطويلة
وعلى اولت اخوانا المصريين
مصير الحي يلتئي
احسبهاااااا مقوله من عرض هالمقولات ولكن لو اقولك موقفي راح تصدق هالمقولة
هذا الله يسلمك انا تعينت بالدمااام عام24 وكان بالمدرسة زملاء من اهل الجنوب غالبية المدرسة
ومن ضمنهم قحاااطين وكان علاقتنا يشهد الله انهاااا علاقاااااات رجال وشهااااااامة
المهم انا عام25 نقلت لحفرالطفش وكااان التواصل بيننا عبر الجوال وطبعا مع مرور الوقت وفي عام29
رحت يم ابها وكنت حاط من ضمن الزيارة مقاااابلة الزملاء القحاطين
هناااك وفعلا اتصلت على الاخ شايع القحطاني كذا مرة ولا رد المهم جلست اسبووع هناك
وطلعت من ابها لجدة علشان العمرة وصلنا للحرم وكنت واقف عند البوابة59 وقال لي السائق اللي وصلنا
روحوا يم بوابة الملك فهد واضنها 69 او89 المهم وانا واقف ابي ادخل الا هذا شااااااايع انا شفته وقلت له ياللقحطااااااااني هو دهش ومن الصدمة
عجزت تسمر بمكاااااااااانة لان انااااااا تغيرت شوووي ولا عرفني
الا ويرد الرويلي قلت له ايه هلا وغلا وموقف مؤثر الساعة وقتها بحدود الثنتين صباااااااحا
سبحان الله جيته بديرته ولا شفته وجيت بوابة وبعدين تحركت للبوابة اخرى
ولقيته من بين هالاف من المسلمين وكااااااان وقتها تو الملك مغسل الكعبة المشرفة

تحياااااااااتي لك
والله يديم المحبة بين الاحبااااااااااب
ولا يفرقهم الا بخير

هو أنا ولا تشابه أسماء ؟


بصراحة أحلى اللحظات هي ذيك اللحظات !!

و الله عجزان أرد و متكيسل !

يلا باي !

إقتباس اعذرني ردي كآن مدري وش يبي , ترآ تعبآن ومسوي حآدث

سلامات خيوووو ماتشوف شر < حزن معك

وعليكم السلام ورحمة الله وبركاته

يسعد مساءك اخي بريماكس .. واخيراً فكرت تنزل موضوع ..

ما اجمل اللقاء بعد الفراق .. خاصه ان كان مجرد صدفه .. وحصلت معي قبل فتره ..
وهي اني التقيت بزميل ايام الابتدائيه .. وللامانه ماعرفته بس قريت اسمه وحسيت الاسم مار علي

بعدها عرفته وجلسنا نتذكر اجمل الايام في الابتدائيه والمتوسطه ..

بريماكس .. تقبل احترامي وتقديري. .
دمت بخير

الله عليك يا بريماكس وكنك حاس فيني

قبل يومين كنت في مسبح النادي واسولف مع واحد من العيال الا اشوف واحد ناصيني ويبتسم !!!!!
صراحة حسيت اني تكهربت والرجال واثق من نفسه بقوة ويوم قرب فصخ نظارة السباحة وقال هلا سيكو ههههه
انا يوم شفته ما صدقت طلع خويي ولنا عشر سنوات ما تقابلنا !!!
طبعاً خذ سواليف في المسبح واخذت رقمه وان شاء الله تصير لنا جمعة في مستقبل الايام

شكرا بريماكس

ما اجمل هذه اللحظات عندما تلتقي بأناس بعد ان فرق بينكم الزمان
انا قبل فترة قابلت واحد آخر عهدي به المرحلة الابتدائية وكان صديقي من أول
الى سادس في المرحلة الابتدائية بعدها انقطعت اخباره عني نهائيا ..

قابلته بعد عشر سنوات وهو الي عرفني والا انا والله ما عرفته ..
والى يومي هذا وانا مستغرب !! كيف عرفني بعد كل هالمدة ؟
وكنت دايم افكر فيه ولا عمره راح عن بالي ..

الموضوع ربما هو ليس بالصوره المحببه عند البعض لكن مايهمني هو تبادل الذكريات والمواقف من خلال الردود وهذا مطلبي وما اريده من انزالي للموضوع . والحمدلله اغلب الردود كلن ذكر له موقف مر فيه لكن لازلت انتظر مواقف الاخرين وذكرياتهم ولقآئتهم( بالصدف ).
الشئ بالشئ يذكر ..ابغى اذكر هالموقف اللي ماتذكرته الا يوم نزلت الموضوع
قبل كم شهر كنت ببودي ماستر ( نادي رياضي ) وكنت اتمرن بالاثقال . وفجأه يجيين شخص
اشوفه جاي يمي قاصدني قلت من يكون ؟
اهم شئ انا قعدت اتمرن قلت ممكن يبي حاجه حولي
الا مباااااشره يبتسم ويمدن يمناه هلا ( اسمي)
انا انلحست سلمت عليه وقعدنا نتجاغف قال وش اخبارك وقعد يسال عني وعن اخواني انا سلكت معه وبيني وبين روحي قلت الرجال مشبه بس لا مو معقوله يعرف اسمي
بعدين سالته قلت يابعدي تراي ماعرفتك الذاكره لك عليها
قال انا ( فلان بن فلان الفلاني )
قلت اووووووووووووووووووووووووووووووووه
هلا والله ومرحبا
وسالته عن احواله واحوال الجماعه و و
من اربع سنوات ماشفته هالولد

الله يعطيكم العافيه على مرورك وردوكم وشرفتوني وافرحتوني احبابي وشكراً لحضوركم وننتظر البقيه اللي مشتاقين لهم .

الله يجمعكم على خيرررررررررررررررررررررررر

حلو ان تلاقي شخص تعرفه صار لك فترة ما شفته
بس قمة الاحراج اذا هو عرفك باسمك ورحب فيك وانت ناسيه
<<<< صارت له كثير

بريماكس
يعطيك ربي العافية وجمعك بمن تحب في الدارين

حصل لي موقف قريب منه قبل شهر واحد من اخويانا تزوج ومن بعد الزواج ماقابلناه وعدنا

يجينا الاستراحه ولما جاء كنت انا خارج الاستراحه واتصلوا علي ورحت لما دخلت شفت خوينا

ومعه شخص ثاني ماعرفته سلمت عليهم ورحبت فيهم ولا عرفوني بالشخص الموجود بعد

ماجلست بدا يسالني خويي ماعرفت هذا قلت لا مااعرفه انا المشكله ذاكرتي ضعيفه للاشياء اللي

قبل سنه فانحرجت اني ماتعرف على الشخص هذا وبعد اشويه تعليق من الشباب لانه علمهم قبل

مااجي انه هو من يصير علموني انه شخص درس معي في الابتدائي يعني قبل 11 سنه اخر مره

شفته وصادفت ان خويي متزوج اخته ولما ذكرو الاسم تذكرته بس الوجه ماتذكرته .

سبحان بعد 11 سنه تقابلنا ورب صدفه خير من الف ميعاد