.

مساء الخير للجميع ،،

ومبروك الفوز وبداية موفقة في البطولة الآسيوية ..

مدخل~

عندما كنا متكين في ملحقنا مع بعض الشبآب طرحنا فكرة السفر لدولة قطرونضرب عصفورين بحجر .. مساندة زعيمنا واخذ كم لفة بالدوحة

وماصمل الا اثنين والثالث انا

طبعاً في البداية رسمنا خطة اعتمدنا فيها على الهجوم في دقائق الصباح الأولى من يوم الأربعاء من شآن مانقابل زحمه ..

علماً بأن حركنا من الرياض الثلاثاء الساعة 10.00ليلاً ونمنا في غرفة استأجرناها في محطة على طريق سلوى قبل الدوحة 160ك تقريباً ...

قمنا الصبح وفللنا السيارة بنزين وشرينا بصل وطماط واغراض الطبخ بحكم لدينا عزبة الطبخ والشاي << رآعين طويله

دخلنا قطرمن بكره صباح الأربعاء شبعانين نوم الحمدلله




وبعد الدخول الى الدوحة فتحت درج السيارة لأستخرج ورقة تكملة الخطة المرسومة التي وضعتها والتي فيها جميع شقق وفنادق الدوحة لكن ماأذا أرى لم أرى الا قرآطيس واستماره ياآإلاهي !! لقد نسيتها في الملحق

..

وبعدها اكملنا الخطة هجوم عشوائي وعلى المرتدات وزين ان عندنا لياقة ..




وبعد اللف والدوران وحده رده وكم آخر وآخر كم..

دخل اخونا في الله اللي معي داخل عمارة وقاعد يكرش لحارس الأمن يقوله في غرفة والمسكين الفلبيني مايعرف عربي وجيت انا على الصياح قلت يالحبيب الله يرحم والديك مشينا ماتشوف اللوحات اللي فوق راسك كل دور في شركة وين معه غرف ..!!
..

وبعدها طحنا في فندق على المقآس قريب عند فندق اللي ساكنين فيه لاعبين الهلال وقريب من ملعب السد ياسلام وهذا وحنا ناسين الورقة ..

..

نزلنا الشناط و وتسدحنا على السراير وطلبنا غدآ اللي كله حار الظاهر اللي معي طالب آكل هندي ومايدري تعرف الأنجليزي لك عليها .. اجل يقول للهندي اللي يشيل الشناط انت ماتعرف عربي شكلك ( ناو ) !؟ على باله ان يعرف انجليزي بيقوله انت جديد ( نيو) ؟!

..

المهم طلعنا على العصر رحنا ملعب السد الخرافي صراحة .. بحكم انه ملعب لنادي وليس معلب حكومي .!؟








..

اكثر شيء عجبني من يوم مادخلنا الدوحة مستوى النظافة ؟! حتى اعزكم الله دورات المياه في المساجد ..!!

طبعاً في صور ملغمطة مانزلتها بحكم ان الكاميرا جيت بشغلها والا هي خربانه الظاهر انها طايحة على السيراميك واختلت قهر والله
ومالك الا جوالك صور فيهـ ..!


..

خرجنا من الملعب ودعيس مع العالم ودوران واحتفالات واستقبلنا اللاعبين في بوابة الفندق اللي ساكنين فيهـ طبعاً زي ماذكرت سابقاً صور ملغمطة عشان الأضاءه في الشارع ؟!

وبعد مانتهينا تعشينا كنتاكي ورحنا الفندق
وفي صبآح الخميس خرجنا وتمشينا على الكورنيش جو جميل
وعالم تفتح النفس تمشيء والجو صآفي والكورنيش نظيف .. ركز على نظيف

..

وبعدها قلنا اقرب كفي يبيلنا كابتشينو على هالصبآح يالله يمديك على السيتي سنتر طلعنا فوق عند اقرب كفي ..




اخذنا شيء يمخمخ الرآس لاتيهـ ..



..


وبينما نحن جالسون نحتسي شيء من الكافي لاتيه اذ بلاعب يمر بجانبنا يتمخطر تمخطرا الا وهو عمر الغامدي

واخذنا كم صورهـ معااهـ




.




.

وبعد الدردشة مع الكابتن عمر الغامدي سألنا وين بآقي الشبآب
قال شوي ويجيكم الشلهووب

قالوا اللي معي يالله نبحث عنهم قلت لا ..أريد ان اكمل الكافيه لحظة قليلاً ..

وااذ بالشلهوب وشراحيلي شاطفين وادعس وراهم واخذنا صور معهم



رجعنا للكافي ..!

وقررنا التمشي لعلنا نلتقي بأحد من اللاعبين واذ بياسر داعس كأنه مستعجل واللي معي يصوتون ياسر ابو سعيد والثآني ابو عبدالعزيز وقف يآسر تعالي يالحبيب نبي صوره ويقول الكابتن بسرعة تكفون مستعجل







بعد ماصورنا مع ابو عبدالعزيز دعس واحنا وراهـ اخرتها نزل يصرف فلوس وجاء هندي يعطيه كيس وطلع
..

والعصر رحنا سوق واقف وماشاءالله كل شوي نشوف مشجع هلالي معه شال هلالي وانواع التمشي




وبعد السوق رحنا السينما في سيتي سنتر



دخلنا على شباك التذاكر قلنا اقرب فلم واخترنا جيكشآن الجديد
ورجعنا للفندق ونمنا ومن صبآح الباكر ليوم الجمعة سبر نت الى الرياض




كانت رحلة ممتعة صراحة والاجمل حضور الجمهور الهلالي بكثافة كأنك في السعوديه والشوراع سيارات لوحات سعوديه وانواع االفلة




وتقبلوا تحياتي محدثكم
AboMshare

وتحيات ابو هزاع وابو فهد اعضآء الرحله



والى لقآء آخر ان شاءالله في مباريات قادمة خارج الدولة يمكن امام ايران مس كرمان والله مالظاهر ايران

خلنا على الامارات ان شاءاللهـ امام الاهلي الاماراتي

سي يو ( ناو )


..

.