السلام عليكم

اخباركم مع العج والحركيت

امس وانا راجع من الشرقية العصر كانوا العيال يكلموني بالشرقية والخرج وكلهم يقولون ان العج لعب فيهم
وانا اضحك ومبتسم بهالنفوذ ومافي اصفى من هالاجواء
والله لايوريكم يوم ماعاد بقى عالخرج الا 100 كيلو الا قلبت الدنيا ويالله اشوف الشاحنات بس الحمدلله ربكم ستر

المهم
من يوم كنت صغييير وكانوا اهلي مربيني على ان مو كل شي اشوفه لي
يعني في اشياء بعيدة عن شنبي الصغنطون
وكم مرررة اشوف العاب او اشياء عند عيال الجيران او عيال خوالي وكنت اقوول الله يخلف علي
حتى اذكر مررة فحطت عند امي تحاول بابوي يشتري لي كمبيوتر بابا سلام لاني شفته عند ولد جارنا الفلسطيني


ولا ابشركم ماشريته

بينما بالخلاف تماما ارى عند غيري اشياء القى الاولاد كلهم عندهم
مثلا الكمبيوتر العايلة


ويصير هالبزر احسن واحد بالدنيا والصديق الصدوق

ولكن يووووم كبررررت

شفت اشياء قسم بالله ليتني بقيت بزر واكبر همي سيكلي

يوم كبرررت شفت اللي عنده فلوس يقعد بصدر المجلس وطلباته اوامر وهو احسن واحد بالدنيا ومجرد وجوده هذا لوحده تشريف للدنيا واهل الدنيا
ولكن اللي مسيكين وعلى قد حاله ياليت اهله ناموا ذيك الليلة

هالنفااااق اللي بالناس وخلت الواحد يهين عمره وهو مستانس وش فوايده

كم مرة قرينا قصايد بصفحة كاملة في الجرايد ومكتوب تحتها خادمكم فلان وحاط صورته وهو شاق الضحكة

انا مثلا من عائلة على قد حالها ومن يوم كنت صغنطون مرررررة وانا متعود على حالنا وعارف عيشتي ولكن الحمدلله القناعة كنز لايفنى اهم شي اني عايش ومستانس عند اميمتي وابيي
والله كافينا المال الحرام
دامي البس وااكل وساكن وراقد امن فهذي لوحدها نعمة
والحمدلله اهلي ماقصروا معي مع ان ابوي ماله راتب لانه مو موظف ولكن لما التفت واشوف نااس غيرنا موظفين والقاهم ساكنين ببيوت شعبية وايجار وكلهم بسيارة وحدة احمد ربي عالنعمة اللي انا فيها
ليهالناس ذولا تلقاهم عند رواتب والله رازقهم وتلقاه من يوم يشووف واحد عنده فلوووس ماناقص الا بس يسجد له

اذكر قبل كم سنة رحت انا واخوي لبيت احد اقربائي وكان عندهم صديقة قريبتي واخوها
جلست انا واخوي العب مع ولد البنت وكان معه 3 ريال وقال بيروح البقالة رحنا للبقالة ويوم رجعنا البيت عطاني باشر علي انا واخووي
ويوم تونا بنفتح البسكوت وبناكله جات قريبتي وعصبت علينا وسحبت البساكيت مني انا واخووي ورجعتهم للولد وقالت لاتعطيهم هذا لك انت
طبعا هالشيء آثر فيني لليوم
سبحان الله البنت كبرت وانا كبرت وصار اخو البنت ضعيف نفس لايودي ولا يجيب
وقامت تدق على جوالي وتقلي تكفى ياعلاوي ابي اروح السوق مرني ماعندي احد يوديني

يعني سبحان الله لما الناس ماتبي منك شيء ومامنك فايدة ياجعلك جهنم وبئس المهاد
ولما تكون الله رازقك وصاحب مال فأنت اهم شخص بالحياة

وعلى فكرة لاتنسون ان اللي على قد حاله تصير المشاكل كلها تحت راسه وهو سبب الحروب في العالم وهو سبب قنط الامطار

صدق علي بن محمد يوم قال :
ياقرب واشنطن ولندن وباريس
حذفة عصا للي رصيده ملايين

وياعز حالي للرجال المفاليس
اللي تضايقهم وجوه الديايين

واللي قضى عمره وهو خالي الكيس
ماشاف من دنيا الورى الا عمى العين

يسير في عين البشر كنه ابليس
ياكثر زلاته وهو ماعمل شين

يارب ياساتر على اهل النواميس
يامسهل ارزاق الضعاف المساكين

تفرج لمن ضيع جميع المقاييس
ياظيقتي والناس ماهم بدارين

طبعا ولايهون عنوان الموضوع

اذكر واحد من العيال ابوه عقيد بالجيش يقول لي
عندهم لاصار الواحد عنده وظيفة ممتازة يحلف لي انه عياله يتوظفون بالمكان اللي يبي وكل اموره متيسرة
بس اللي على قد حاله الله يستر عليه وظيفة بجهدك وان مالقيت بالطقاق اللي يطقكم


عالعموم حبحوبين انا كثرت بربرة عليكم
بس انتو عطوني رايكم بالنفاق
وعطوني رايكم بمحبة اللي معه فلوس
وعطوني رايكم باللي على قد حاله

وتشريفكم وردكم على موضوعي بحد ذاته فخر لي لذلك لاتحرموني من ردودكم
[IMG]file:///C:/Users/NESNAS%7E1/AppData/Local/Temp/moz-screenshot.png[/IMG][IMG]file:///C:/Users/NESNAS%7E1/AppData/Local/Temp/moz-screenshot-1.png[/IMG]

اخي الكريم الغني لم يقعد في صدر المجلس فهو من ابسط حقوقه

اسغل ذكائه ونم ثروته وبدا يفيد مجتمعه فمن حقه انه يكون في صدر المجلس

مثل الطفل لا صار عنده كمبيوتر العائله وصار صديقك الصدوق

=========

الطفوله ذكرياتها ومواقفها نقش في الحجر ورسخ في الذهن

كثير قصص صارت وغيرت من شخصياتنا
ومثل ما يقولون

ولا صار عند حاجه للكلب قله يا سيدي


تشـــــــــــــــــاو

إقتباس بس انتو عطوني رايكم بالنفاق وعطوني رايكم بمحبة اللي معه فلوس

صح كلامك ان التقدير للي معهم فلوس

بس هاذي ثقافه مجتمعنا انا اشوف بدال ماتفكر ليه هذا الاحترام والتقدير لهم

فكـر كيف تصير مثلهم بشهاده او بذكاء لان الحياه صارت البقاء للاقوى

إقتباس يسير في عين البشر كنه ابليس ياكثر زلاته وهو ماعمل شين

^^
اختلف مع الشاعر لاني لو بلتفت لتعليقات الناس ماحققت هدفي

يعطيك العافيه ع الموضوع المميز

هلا والله حبيب قلبي ..

ياخوي ما احد قالك تصير فقير ..
وبعدين ترى الغنى غنى النفس مو غنى المال , والقناعة كنز لايفنى ........ إلخ
احفظ من هالامثال وسلي فيها عمرك ..

وعطوني رايكم بمحبة اللي معه فلوس
ما اتوقع انها محبة هي مجاملة حتى يوصلون للي يبونه ..

وعطوني رايكم باللي على قد حاله
المفروض يجمعونهم كلهم بحوش ويصبون عليهم بنزين ويشبون فيهم ..
طبعا هذا لمصلحتهم حتى يرتاحون من المعاناة اللي هم فيها ..
بس تبي الجد اذا عندك دراهم ما تعرف من صديقك الصدقي من الكذبي ..
اما لو انك طفران ما تلاقي حولك الا صديقك الصدقي اللي يقدرك ويسلفك حبا لشخصك مو لدراهمك ..
بس البلا لا صرت فقير وما حولك احد ابد ..
ايه صح تذكرت قصيدة الامير عبدالرحمن بن مساعد ..



الله يرزقك اخوي غنى النفس وغنى والمال بس لاتنسانا ..
يعطيك ربي الف عافية على الموضوع ,,

صدقت اخوي والغني هو الي يغتني عن صدقات الناس

ومن ناحية النفاق انا ضدة في كل شي وانا افضل اكون قليل الفلوس على ان اشوف ناس ينافقوني وانا اعرف انهم ينافقوني

واذا كنت معي فلوس معاد اعرف منهو الصديق الي ينافقني او الصديق الصدوق

وانا والله اتمنى ماكون غني لكن لا اريد ان اكون فقير والسبب هو لو كنت غني راح ينافقوني العالم وراح كل شي ابيه احصلة وماراح يكون عندي هدف وراح امل من حياتي والفقير معروفة سلبياتة يعني احسن شي الوسط والي يهين نفسة عشان الفلوس هذا ماعندة كرامة

ومن ناحية الي يقول اذا كان لك عند الكلب حاجة قل لة ياسيدي

هذا يعني انك حتى لو كنت غني بتصير بنظر البعض مثل الكلب ينافقونك عشان يحصلون حاجتهم

يعني اكون متوسط الحال افضل من اكون كلب غني

وشكرا

هلا علاوي..

والله موضوعك يعبر عن توجهات مجتمعات بأسرها وليس صديقك أو قريبتك..

فالدنيا الآن قائمة على المصالح..بل حتى الدول تتبنى هذه الفلسفة..

والمال وأنا وأخوك يرفع الحقير وينزل العزيز..
بس الغنى غنى النفس..

خل ثقتك بالله ثم بنفسك كبيرة..وأهم شيئ إنك تعرف قيمتك داخل نفسك لأن الناس - في نظري - لاتقدر من لايحترم نفسه..

كلٍ عينه في السماء..تذكر هالشيئ..

أما عن النفاق..والله مدري شقول ..العالم كله يتجه لهالشيئ هذا..يعني كنت أقرأ كتاب لوزير خارجية أمريكا السابق يقول : العالم الآن انقلب إلى (دنيا المصالح)..
بس هذا مايعني إن مادام العالم كله كذا إنه صحيح..بس حنا ألحين نشوف في كل مكان النفاق الاجتماعي موجود إلا من رحم الله تعالى..
وأعتقد أن جزء منه في هالوقت مطلوب..أقصد الجزء الذي يجعلك تأخذ حقك ..فأحيانا لابد أن تمارس نوعا من النفاق الاجتماعي لتأخذ حقا لك..هذا رأيي..

أما محبة الناس للي عنده فلوس ..هذي أقدر أسميها محبة ذاتية..يعني هم يحبون فلوسه..ومايحبونه هو..لأنه لو يخسر فلوسه أول ناس يكرشونه الي كانوا يقعدون ويروحون معه..

أما الي على قد حاله..كلنا على قد حالنا..بس لازم نعرف إننا نملك أشياء قد مايملكها الكثير من أرباب الثروة..
لايكون كل همنا المال..ترى نتعب والله..
يجب أن نسعى لتوفير مصدر قوتنا..بس مايكون هو همنا الشاغل لأنه لو انقلب إلى أن يكون تحصيل لقمة العيش هو الهم الشاغل فعندها سنصبح مثل مصر..فالكل لاهي بلقمة عيشة ..وتوقف التطور والنماء في البلد..
أنت ذكرت أنك لابس وماكل وشارب ونايم..والله هذي نعم البعض يفقدها..الحمد لله على نعمه الكبرى..

فكروا كيف تعيشون بسلام..ستجدون أن من أركان ذلك:
- المال الذي يغنيك عن سؤال الناس..
- الراحة النفسية..

والمال الذي يغنيك عن سؤال الناس يعني أن تكون مستورا..
فالراحة النفسية أكثر من يفقدها هم التجار والسياسيون..

أرجو أن يكون كلامي واضحا..
آسف ع الإطالة..
تحياتي..

..سيناتور..

الصراحه موضوع مهم
عندي تعقيب واحد فقط الي هو ان الغني يتصدر المجلس عشان فلوسة والفقير ماله قيمة.
انا ممكن اتفق معك فيها ولكن في ناس كثار حالتهم عادية او اقل من عادية ويتصدرون مجالس ليه؟
السبب ان الشخص الي يتصدر المجلس يكون له ميزة وخلته كذا, يعني اذا الواحد عنده شخصية قوية ولسان قوي تلاقية في صدر المجلس وحتى لو ما معه قرش.
شخص اديب مثقف كلامة من ذهب وله حضورة وله مواقفه تلاقيه بصدر المجلس.
شخص عنده من العلم اين كان, علم ديني او غيرة هذا الشخص لما تحطه بصدر المجلس يحترم المكان الي هو فيه ويحترم المكانه الي هو فيها ةيضع للمجس قيمة بوجوده.
في اشياء كثيرة غير هذي تخلي الفقير بتصدر المجلس.
اما تحطلي واحد غني او فقير في صدر المجلس وهو مع احترامي ماله قيمة او تاثير ليش تحطه؟؟
عالعموم انا معاك ان بعض المجالس تشوف واحد غني بصدر المجلس وهو (ما عنده ما عند جدتيي) الا الفلوس.
بالاخير القناعه كنز لا يفنى ومهما ضاقت بك الدنيا او حسيت انك مظلوم بالحياة او اي سبب من هالقيل تذكر ان في رب فوق وان السبب الحقيقي لهذي الحياة "وما خلقت الجن والانس الا ليعبدون"
وسلامتكم

يارب ياساتر على اهل النواميس
يامسهل ارزاق الضعاف المساكين

والغنىآ غنىآ النفس وليس المال ولعلمك الفقاء هم أول من يدخلون الجنة

إقتباس الرسالة الأصلية كتبت بواسطة Blue Sun ايه صح تذكرت قصيدة الامير عبدالرحمن بن مساعد ..

محبه الجنه الخرج

اسمع قصيده عبدالرحمن بن مساعد وبجد هو ماكتبها الا لانه عايشها

وبجد بتحس انك بنعمه

اهم حاجه ترضي ربك لتكسب في اخرتك

الله يرزقنا الغنى بجناته

تحياتي

اخوي حالك من حالي والله يرزقنا وياك الجنة اما الدنيا ما اعتقد ان لنا ذاك المناصب اللي تخلينا في صدر المجلس .. والشباب اللي يقولون اشتغل وصر زيهم احنا عارفين انه اكثر التجار اللي ذكرهم صاحب الموضوع حراميه بعضهم رصيده 5 مليار ويقول بديت بعشر الاف اما ذي قويه اجل افتح مشروع بعشر الاف وبعد ثلاثين سنه يصير معي 5 مليار ؟؟؟؟؟ واللي يقول الغنى غنى النفس وين اصرف ذا الغنى اذا جيت ابي اشتري سيارة زينه ولا بيت ولا اتزوج وكلها ديون .. اللي معاه قروش هو الغني ولا اللي ما معاه شحاث وهذي قناعاتي ...