..( الاحوال .. والمعارض ).. قسسسم اننا طيبين - صفحة رقم 2 - نادي الهلال السعودي - شبكة الزعيم

جرح يشكي · #1 23/02/2010, 11:54 PM

الله محييكم

السلام عليكم ورحمة الله

آآآآآهـ بس آآآآهـ << من حر ما يونس

قبل لا انسى خل اطبع هالمقدمه اللي متعودين عليها .. وصارت يديني تحكني لازم اكتبها

ولو امسك واحد واقول له سمَع مقدمة جرح قال لك .. مشتاق لكم

لا لا جد والله مشتاق لكم

وادري اني مقصر معاكم .. لكن ع ما يقولون التمس لـ اخوك العذر << ع = مثل بس متعيجز امسحها

المهم انا انسان لعبت بي الدنيا .. وابشركم صرت كبير وصار يعتمد علي

<< والله من الوجه الفاهي .. فرحان انت ووجهك

صرت اروح للمعارض وصرت اراجع دوائر حكوميه حتى الكوسه اجيبها جديدهـ وزينه

عاد قلت يا ولد بشر الشباب

وبس

<< تخيلوا هذا اهو الموضوع .. تتوقعون يرجع الفريق من قطر عشان موضوعي

المهم المهم انا بتكلم عن كذا شي .. وفي الحقيقة هي حاجتين .. بس تعرفون الفكرة تسحب الفكره اخاف اوصل للموضوع وانا طاب في بطن الحاجة العاشرة << يا هيك اسلوب والا فلا

الله قردني " ماخوذه من القرادهـ .. بس بلهجتنا .. لا احد يفكر في مصر

" وصرت اروح لمعارض السيارات

تروح تبي تبيع سيارتك .. يلعونوون ابو سعرها

.. يقعد يعذرب لك فيها .. يمكن توصل معه ويقنعك تتبرع بها لـ إسرائيل حتى

.. يا اخي عليهم اسلوب هـ الشريطيه موب صاحي .. لو سلموهم ملف فلسطين كان يفرقون السوم ويجيبونها لنا

ما بين فترة وفترة صرت اروح اما لـ معارض النسيم والا الشفا

.. صحيح ان معارض النسيم اطلق بـ 1000 مره من الشفا من ناحية الترتيب .. لكن سعييد اخو مبارك في هـ الشريطيه ..

تبي تشتري سيارة واعجبتك بس سعرها غالي شوي .. تشتريها مجبور .. وتدري انهم صافقينها ع ظهرك " رافعين سعرها عليك لغير الناطقين بـ اللغه الشوارعيه " والعكس بعد بتبيع يلعب في مخك .. ولو تطول مع هـ الشريطي بيطلع لك عذروب في دقة عود ابو نورة اللي في مسجلك

<< هـ الفقرة لعيون واحد

تروح للوكالات تبي تشتري سيارة جدييييدهـ

مثلاً كابريس يقول لك بـ 84 الف كاش .. وتروح لـ مكتب البنك اللي عندهم يقول لك حول حسابك علينا واخليهم يحسبونها لك بـ 82 الف ..؟؟!! يعني للبنوك اوكي .. والا انت يالمواطن المسكين اللي مضحوك عليك في قريييح اشتريت والا بيجي مسكين مثلك ويشتري

انتهينا من مسألة شراء السيارة ..

بعد فترة خرب عليك شي في السيارة .. تروح لـ واحد من اخواننا العرب اما في صناعية العاصمه والا ام الحمام والا ام الورش " الصناعية القديمه " وخذ لك صلخ

.. يووووهـ كم مره ابي اتعلم اركب السير حق الماكينه واطنش .. مشكلتي ان سير سيارتي كل فترة ينفك .. وكل مره اروح اركبه ـ 20 والا 30 ريال .. وش حللها لهم

والا لا قدر الله صدمت بها .. وقالوا لك بنسويها لك بـ 1200 ريال ونرش لك البويه في الفرن .. ومدري ايش مواصفات المعجون ونلمعها لك .. واخر شي تحصلهم راشينها بويه اي كلام بلا فرن بلا خساير ..

والا قطع الغيار .. نآآآر يا حبيبي نآآآر

وما فيه الا صلخ

نصيحتين اهديها لكم احبائي

1- تبي تشتري سيارة لا يهمك شكلها والا كلام الناس عنها .. انزل لمحلات قطع الغيار وشوف اسعار قطعها .. اذا نار انحش واذا اوكيه اوكيه تعال قول لي عشان السعي لي

.

2- مخصص للشياب

.. اذا تبي تحس انك شباب وانك توك صغييير .. لا تصبغ الشيب .. ولا تلبس ثوب قلابيات وتطق الجزمات البيض .. كل هذا شي وقتي ويروح .. لا يبه روح لـ المعارض واشتر لك سيارة بالسعر الفلاني .. وتعال للمجلس وقول لهم شريتها بـ 70 الف .. شوف الصياح اللي بيجيك .. ليش ضاحكين عليك ووو .. عاد انت تحس انك باقي بزر

.. ومنها تكون استفدت انت ومنها هـ الشريطي استفاد .. وهذي اهي حركة الحياة

.

<< يا شين التفلسف .. وش معنى حركة الحياة ..؟؟!!

.....

آآآهـ ثم آآآهـ

الاحوال المدنيه

والله يا الاحوال المدنيه بالرياض صايرة مثل احوالها الجويه .. كل يومين تقلبات واللي يقهرني اليوم ان صحفي جاي يسوي لقاءات مع المراجعين .. وخذ من هـ التميلح

اللي يقول انسيابيه واللي يقول تنظيم واللي يقول مريحيننا

.. وهو من الساعه 7 الصباح ينتظرهم يفتحون .. ويروح ينطق وياخذ له رقم .. ثم ينتظر هـ الـ 300 اللي قدامك مع انك يوم توقف عند الباب ما معك الا 20 شخص

من وين جوا هـ الـ 280 واحد

بعدها ينطلونك في الباصات اللي تحوم الكبد في وسط هـ الحر ..

.. المشكله تروح مرسم تقول رايح لـ زواج اخوك .. واخرتها تصور وانت فمك مزبد .. والشماغ معدوم والسبب .. جو الرياض

لا فيه ناس قالوا لهم تعالوا بعد 4 ايام تصورون .. ثم كلكم انتظروا 14 يوم وتعال استلم بطاقتك

لا بعد انا من زين هـ الحلايا

رايح وباقي ع انتهاء بطاقتي سنتين

وفاتح كشرتي 10 بوصه .. الا ويطردوني

يقولون روح جيب خطاب يا من الجوازات والا المرور .. انك بتصدر رخصة جديده والا جواز جديد .. والله مير اروح لهم واتلاعب عليهم ويعطوني الخطاب وانا اضحك عليهم

يعني وشو له هـ المشوار .. اذا تعرفون ان دله تعطيك خطاب بدون ما يشييك ع اسمك معاك رخصه والا لا

<< سامحيني يا حكومتي لقد اخذت خطاب من المرور اني بطلع رخصه .. وانا منب مطلع

<< يآآآهـ انا خاين

<< يآآهـ الشعب بيروح يتعشى في برج جسر الملك فهد ويرجع << لا احد يفهم غغلط

ودي اسب بعد

ايه نسينا حق الخضار .. والله يا عامل المسجد صار يتفنن في الطبخ .. تصدقون وزنه زاد 12 كيلوا والسبب انا .. يقولون جيب 2 كيلو باميه اروح اجيب 4 كيلو .. وهييك

وتصدقون اني جوعان وانا اكتب هـ الموضوع << مو كانه واحد يحاول يملى ورقة الاختبار بـ اي شي وهو يعرف ان الدكتور موب قاري شي بس ع الاسم << دقه 2 في 1 اللي يفهمها له مني جائزة

وبس

##

في بعض الاحيان تشوف اشياء تعتبرها انت غلط .. وهي فعلاً غلط .. لكن فيه ناس تستفيد من هـ الاخطاء وتكسب منها .. واقرب مثال شركات الاجره وقرار وقفهم ..؟!

# ظهرت اكثر من حمله اولها كان على شركة الاتصالات .. قالوا منب مكلمين .. بعدها قالوا قاطعوا السيارات .. عاد كيف قامت مقاطعة السيارات ..؟؟ بـ رسايل الجوال وفلان يدق ع فلان .. الا وفـ الاخير الشعب مدبل ارباح الاتصالات

شعبنا حبييييب وما عنده صمله

## اعتذر للي ارسلوا لي وانا ما رديت عليهم لـ ظروف خارجة عن الارادهـ << اوخس يآ

في امان الله