نعن ابو حيّهن واقفات جنب بعض بكل غرور .. يا أرض اتهدّي ماعليكي أدّي

مهب عاقلات باريس هيلتون وكاميرون دياز

والأكيد ان شعبيتهن اكبر من شعبية الهلال والريـال والبرشا والاهلي المصري

اطلع وخذ لك لفة على شارع الثمامة يوم الاربعاء والخميس... وشف بعينك

شف الحشود المحتشدة من الخلق وسياراتهم عند كل مقهى

الظاهر ان كل شباب الرياض يعسّلون.. اللهم ياكافي

كل جلسة فيها ثلاثة او اربعة ماغير يصارخون ( جمر ياصديق )

ومطيّرين عيونهم بالتلفزيون او طاقينها اربعة بلوت

والجمر على الراس صار له ساعة ونص وابوالشباب يشفّط ومايدري من وين هي هابّه

أهم شي ينفخ ويطلع دخان كثييييير .. قلبوووووش والله يدنن

والبعض من زود الخَرمة اذا حط اهله بالسوق صفط الطبلون للمقهى وشفط له راس عالطاير

وفيه شباب يستاجرون استراحة مخصوص علشان المعسل .. شغل معلّمين

مايحبون مطرسة ابو هنّود ويبون يضبطون الراس بأنفسهم علشان يقنّد الدماغ

هذا طبعاً بعد الاستعداد وتجهيز العدة والعتاد

مشوار بسيط لحلة العبيد وطب وتخيّر من اشهى وألذ انواع المعسل

تفاح وفراولة وعنب وفخفخينة وبحريني وابوهيثم وابوسمير وابوعلّوش وابوعرب

وطق لك اطلق شيشة بقزازة كريستال و ( ليّ ) تونسي يغسل بالماء الحار

وأهم شي طبعاً الراس... ملكي فاخر سوبر ديلوكس LS 450

ورح للاستراحة وخذ على طريقك فحم سمر ممتاز واذا وصلت شب المنقل

واقعد نفّخ واشفط من هالفيتامينات ليييين يتفضخ الدم من خدودك

والله العظيم شر البليّة مايضحك ياجماعة الخير

هالعدد المهول من عشاق الشيشة في الرياض صار مضرب المثل في الدول العربية

احد الزملاء اللبنانيين يقول لي هذاك اليوم :

احنا اللبنانيين نشرب الارجيلة شِي عشر دقايق او ربع ساعة.. مع كاسة الشاي

لكن انتو هون شِي مابيدخل العئل... الواحد فيكن ضَلُّه بـ يشيّش اربع ساعات

والله انه يكلمني وانا اتخيّل الموقف واضحك...

لأني بالفعل اعرف واحد يدخل المقهى الساعة 8 ومايطلع الا اذا ذبحه الجوع الساعة 2

طيب وش يكون هالمعسل ؟؟

هذا الله يسلمكم قشور فواكه مع ورق تنباك ( التبغ ) مخمّر ومربّص بجلسرين وسكر

تخلط هالمواد مع بعض في سطل كبير ويغطى فترة حتى تتخمّر القشور وتصير جاهزة

وكل مازادت نسبة الجلسرين بالخلطة ... زادت كمية الدخان في راس المعسل

وهنا مكمن الخطورة في راس المعسل

احتراق الجلسرين من الجمر ودخول دخانه الى صدرك يتسبب في إلتصاقه بالرئتين

ويتسبب في تكون كمية من المياه في الرئتين ايضاً

كما يتسبب في الاصابة بسرطان في المثانة بسبب مادة الأكرولين الناتجة عن احتراق الجلسرين

والمصيبة لو تتكلم مع واحد من الشباب اللي يعسلون... لاحياة لمن تنادي

ويرد عليك ويقول : على الأقل أهوَن من الدخان ومافيه قطران ولانيكوتين !!

وتكتشف ان هالشيشة اغلى عنده من واحد من اخوانه او اهله

ومهما تنصحه وتحاول معه.. كل جهدك يروح على الفاضي

وش سوّت الشيشة بالشباب ؟؟

وش هالعشق القاتل والدفاع المستميت ؟؟

والبعض الآخر يقول لك : المقاهي هي المتنفس الوحيد لنا.. وين نروح ؟؟

ومن قال لك لاتروح ولا تنفس عن نفسك ؟؟

يا اخي رح للمقهي مادامه هو المتنفس الوحيد لك بس لاتطلب شيشة

اطلب شاهي .. اطلب نسكافيه .. إلعب بلوت .. شف التلفزيون

لكن القضية ماهي قضية ( متنفس ) مثل مايقولون

القضيّة ان ( كل ممنوع مرغوب ) والشيشة دامها ضارّة الكل يبي يشربها

والله لو تنصح وتتكلم وتسوّي المستحيل... ماراح يتغير شي

وهذا حنا يالعرب مازلنا ( على طمام المرحوم ) ولايمكن نتغير

.

.


دامها صعبة ( لقمة العيش ) ليش مجمّع ( كل هالجيش )؟؟

قبل ابدأ

اتمنى ما احد يفسر كلامي بأنّه ( دعوة لتحديد النسل )

كلامي لايخرج عن كونه دعوه للـ( ركادة ) وعدم الدرعمة لكل مطفّر

يعني اذا كنت موظف بسيط وراتبك على قد حالك.. يكفي طفلين ( مبدئياً )

ولاتزيد الى ان يفتحها عليك رب العالمين ويرزقك من حيث لاتحتسب

هذيك الساعة ( شف شغلك ) وكمّل باقي الفريق

لكن واحد ( سيكورتي ) راتبه ( 2500 ) وعنده ماشاءالله ( 6 ) بزران

هذولا كيف بيصرف عليهم ؟؟

تراي ادري ان الرزق بيد الله.. وادري ان ماعلى الارض من دابة الا على الله رزقها

وادري ان الرسول صلى الله عليه وسلم يقول (( تكاثروا فإني مباهٍ بكم الأمم يوم القيامة ))

لكن مايعني هالكلام ان الضابط الشرعي عطاك المجال بلا حدود

كل شي وله حده المناسب.. واذا تجاوزته يكون غير مرغوب ابداً

مثال بسيط

الرسول صلى الله عليه وسلم حثّ على اكل ثمرة ( السفرجل ) ووصفها بأنها تريح القلب

هل معنى ذلك انك تجيب لك كرتون سفرجل وتاكله كله لين ينشف حلقك وتطلع روحك ؟؟

لا طبعاً.. كل شيء بمقدار

الشاهد من كلامي هذا كله

واحد من الزملاء.. راتبه ضعيف وأحواله الماديّة صعبة

وماشاء الله تبارك الله زوجته تقل ( مفرخة )... كل سنة مولود

هذاك اليوم جاني يبشرني بمولوده ( السادس )

وبدل من اني ابارك له.. تهاوشت انا وايّاه

وكان محور كلامي ( من وين تبي تصرف على كومة هاللحم اللي عندك ؟؟ )

وكان يزعل ويقول ( الله الرازق... والرسول يقول تكاثروا )

وانا أرد عليه واقول ( الله سبحانه وتعالى لايكلف نفساً الا وسعها )

المهم

جاني بعد شهرين من هالكلام يطلب سلف ( 100 ) ريال علشان يجيب للولد حليب وحفايظ

ومايحتاج اقول لكم وش الكلام اللي قلته له .. خلوها مستوره

موعلشان المبلغ التافه... لا والله العظيم ماقامت عندي الفلوس ولاقعدت

لكن علشانه هو وعلشان الوضع اللي هو عايشه وورّط نفسه وبيته
فيه
السؤال اللي يفرض نفسه :

انت انسان بسيط وعلى قد حالك وراتبك ضعيف جداً... وعندك 6 اطفال

كيف بيكون وضعهم من ناحية تعليمهم واكلهم ولبسهم وتلبية احتياجاتهم.. هم وأمّهم ؟؟

اكيد بالحضيض وفي أدنى مستوى.. وبتعيش كل عمرك وانت تشحذ من معارفك

وبالمقابل كيف لو كانوا 3 اطفال... اكيد بيكون الوضع افضل بكثير للجميع

وجهة نظري الشخصية والمتواضعة :

اذا كنت انسان مقتدر ودخلك الشهري جيد.. طفل كل سنتين مناسب جداً

واذا كنت انسان محدود الدخل وراتبك ضعيف.. طفل كل 3 او 4 سنوات

واذا كنت متزوج وانت توّك طالب.. ابلع العافية لين تتخرج وتتوظف

ياجماعة الخير ترى الاطفال مسؤولية عظيمة وكل اب مسؤول عن تربيتهم يوم القيامة

وأعيد نقطة مهمة علشان ما احد يدرعم :

تحديد النسل يقول ( طفل او طفلين مدى الحياة )

وانا ماقلت هالشيء.. اتمنى يكون كلامي واضح

انا اقول للمحتاج تريّث وتركّد الى ان يفرجها ربك وتكون قادر على ان تصرف عليهم

ومادمت بهالسياق.. فالشيء بالشيء يذكر

نصيحة لكل متزوج جديد

لاتحرص انك تجيب مولود من اول الزواج

اصبر لك كم شهر.. حتى تتأكد ان وضعكم كزوجين مريح والامور ممتازة بينكم

علشان مايكون هالطفل ضحية وينشأ وهو متشتت لاسمح الله

.

.

رومانسيات صخراويات

فديت هالجمال

شفايفك عنب.. وخدودك تفاح احمر.. وخشمك موز الشربتلي