][ (¯`·._) فراشة المنتدى الاستشاري ( الهنوووف ) ..ضيفاً على -: ( يوم في ذاكرتي ) -][ (¯`·._) - نادي الهلال السعودي - شبكة الزعيم

المنتدى الاستشاري · #1 10/02/2010, 08:19 AM

فكرة وتصميم :: القيصر رهيب
تنسيق :: هلالي من ارض اليمن

في حياتنا أيام لا تنسى ..
حملت بين جوانبها أحداث ومواقف شتى ،،
تحكي لنا .. عن ذكريات ماضية
في سطور سوف تبقى خالدة

فـ بكل الحب والمودة نرحب بأعضائنا وزوارنا الكرام في عدد جديد
من

يوم في ذاكرتي

ويسعدنا بأسمكم جميعا أن يشاركنا في هذا العدد

ضيفتنا الإستشارية المتميزة :
«¤¶ الهنوووف ¶¤»

طال اشتياقي لـ مصافحتكم

واعذروا هذا القصور مني واستروا بساطه حروفي فهي مجرد مشاعر احببت ان تشاركوني اياها

قبل ابتدي بيومي احب اخبركم اني اعيش باسره سعوديه ولكن بنظام امريكي بعدد الابناء
فـ ربي انعم علي بـ اخت تكبرني فقط

من حيث الاخوه والاخوات
( عرفتوا ليه اعتبركم اخواني

)
فانا اعتبر البنت الثانيه واخر العنقود وكل شي
( فيه احد مميز مثلي

)
الكثير يستغرب هنا وبحياتي العامه قله عدد اسرتنا
ولكن ربي اراد ذلك والحمد لله على كل حال
فـ السبب لايعود لـ كبر السن .. لا
فلقد فقدت امي كم طفل اثناء ولادته او قبل ولادته اسال الله ان يكونون شفعاء لوالدي وطيور من طيور الجنه

تعودت على رقم 2 في ادق تفاصيل حياتي وتعودت نكون 4 بكل مكان
( امي

- ابوي

- اختي

- انا

)
في سفرنا .. طلعاتنا .. نومنا .. اكلنا .. كل شي

في احد الايام هاتف المنزل ترن ترن ترن ---> ماسوا خير الي علمني اسلوب التشويق ض1

واذا بـ بالمتحدث امراه ارادت خطبة اختي لـ أبنها
فهي لا تعلم انها بطلبها ارادت ان تنتزع
الرقم 4 من منزلنا

والرقم 2 مني شخصيا

تمت الامور على خير وكانت الفتره صعبه نوعا والمشاعر متذبذبه
فـ انا كـ اي اخت مبسوطه ان اختها بتتزوج وستراها بثوب الزفاف

وايضا ستتشرف بحمل لقب اخت العروس وبطلة الحفل

وبالمقابل كـ اي اخت حزينه لانها بتفقد اختها .. كيف وهي وحيدتها

مثل ماذكرت الفتره صعبه نوعا ما خصوصا لانسانه تتصف ببعض صفاتي
اتوقع الي يعرفني لاحظ هالصفات

( كثره التفكير والكتمان والحساسية )
لا اخفيكم ان اشد الامور كرهتها بحياتي الناس الي حولي واسئلتهم الغبيه
فالسؤال هذا تردد كثير علي - وش بتسوين لما تتزوج اختك ..

...!؟
يتوقعون انهم يواسوني وهم يضايقوني اكثر

والي تقول الله يعينك وقت الزواج - والي يقول بشوفك وانت تبكين

..!

في سذاجه اكثر من كذا

حسيت اني مسلسل كلن يبحث عن مشاهدته

طبعا ماكنت اجاوب عليهم لان السؤال مايعجبني

وايضا من الصعب انك تحدد مشاعرك في موقف مستقبلي
طبعا كنت حريصه اني ماوضح لاحد الي بداخلي .. وكان فـي كل ليله تسبق زواج اختي .. كنت اتذكر وادخل دوامه من الضيقه والبكاء

فـ شعور محزن محزن محزن

انك تبقى وحيد في البيت

اتى يوم الزواج بحوسته وتعبه طبعا كنت مرافقه لاختي بتجهيزها
كونك اخت وحده .. هذا يكفي وعنوان ليوم شاق فـ الكل يعرف حوسه الزواج

فكنت مع اختي وقلبي مع امي وابوي بالقاعة

والحمد لله امي كان معاها بعض الخدامات وقريباتي

مرضات ربي يا يمة ثم مرضاتك
هذي علومي فديت دعاءك وعلومك
يا عسى ربي يحقق كل دعواتك
الا دعاتك عسى يومي قبل يومك

ابوي كان يتقطع قلبي لما اشوفه محيوس بين هنا وهناك
لانه من النوع الحريص

ويحب يكون كل شي مثل مايبي وأفضل
ليلتها كنت اتمنى اني نسختين ولد اساعد ابوي وبنت تساعد امي

فـ صعب تشوف اقرب الناس لك مرهق بدون ماتسوي له شي
كنت اتمنى اكون ولد اوقف جنب ابوي لما يستقبل الضيوف
تمنيت وتمنيت ولكن ما كل مايتمناه المرء يدركه
فـ الحمد لله فالخيره فيما اختاره الله

يابوي جعلك ذخر لي دائم الطيب
.. عمــري بدونــــــك يــــالغلا وش ابيبــــه
بنتك لها يابوي حلو التراحيب
.. من طيـــب طيبـــك كل زينـــن تجيبــــه
أشوم نفسي عن هل العيب واغيب
.. ولهل الكـرم والجـود شفنــي قريبــــــه
زيني بذكري وذكري اليوم يهيب
.. وقـدري رفيع الشــاان ماهو غصيبــــه
يالله عسى لرضاك يابوي انا اجيب
.. وليـــا حداك الوقــــــت أنا طبيـبــــــــه

بدا يوم الزواج
ورافق يوم الزواج هواء خفيف فـ كانت عيوني حساسه شوي من ناحيه الهواء والكحل

فـ سرعان ماتنزل الدموع
فـ اغلب الي يشوفني يتوقع اني ابكي

بصراحه وبيني وبينكم مدري عيوني ليه كانت تدمع بدايه الزواج هل الهواء والكحل اثر عليها او اني اوهم نفسي انهم السبب

بس الي اعرفه انه عيوني حساسه من الهواء

طبعا كنت متوهقه مابي احد يشوف عيوني ويتوقع اني ابكي

كل شي تم الحمد لله مثل مانبي ومع حوسه الزواج ما كان في مجال اني افكر او يضيق صدري
مع اني كنت خايفه من هاليوم كثير لاني للاسف فيني خصله اعتبر شينه لانها تحرجني

ان دموعي ببلاش

سوا بموقف فرح او حزن
واتاثر بمشاعر الي حولي كثير

فكنت بزواجات اقاربي اتاثر ومالي دخل

( ادري اني قاطه مع الناس بس لا تفهموني غلط .. خلنا نقول مشاركه وجدانية في غير محلها

)

المهم اني توقعت وغيري توقع اني بسوي مناحه بزواج اختي ولكن ربي لطف

الموقف الي اثر فيني وقت الزفه كنت بجنب اختي لما قربت توصل .. الي اعرفه اني كنت جنبها مادريت الا اني ادور بين الطاولات كاني وحده مضيعه اهلها والدموع حالفه انها تفشلني

اخذت اقرب منديل من اقرب طاولة

وماحسيت بنفسي الا انا بقرب طاوله كانت فيها صديقتي( تداركت الموقف وسويت نفسي جايه بناديها تسلم على اختي

وخذتها ورجعت لاختي )

والله وكبرتي في عيني واليوم صرتي احلى عروسه
مر العمر يالغالية وربي عطاني العمر اشوفك عروسة
يارب يارب تحرسها

طبعا حاولت ماودعها لما تطلع بس غصب علي رحت وهي بتركب السياره وودعتها من بعيد بالاشارات

وشلون أبرجع دام غابت عن البيت
عز الله أن البيت أظلم بلاها
وناظرتها والعين تدمع وهليت
مدامع هلت بسبة غلاها
قالت لي لا تبكين هلي إذا جيت
قلت إن ما بكيت ( الغاليه

) من أبكي عداها
يارب ثبتها على ماتمنيت
وحقق لها كل السعد يارجاها

خلص الزواج على خير
يمكن الاصعب هو رجعتنا للبيت بدون اختي
لاننا تعودنا بعد كل زواج يرجعون معانا بنات عمي ونكون 4 بس اليوم كنا 3 ....!

موقف اخر اثر فيني لما سمعت من عمي ان ابوي بنهايه الزواج كان جالس على درج القاعه ومنزل راسه
يمكن تعب يمكن حزن لزواج اختي
تمنيت اني حاظره هاللحظه وارفع راسه
لان الي مثلك يابوي ماينزل راسه .. الي مثلك دوم راسه مرفوع

طبعا ابوي كتوووم مرررررره يعني صعب تعرف الي بخاطره

في شريط فيديو الزواج كنت حريصه اتابع تحركات ابوي واشوف من ساعده
والله ماخفيكم ان تواجده بالقاعه كان لا يذكر وكان عند البوابه يستقبل ويتابع
المفروض والد العروس يكون مكشخ جنب العريس

بس الظاهر ابوي خاف يغطي على العريس لانه ليلتها كان عريس الله يطول بعمره

الحمد لله ابوي انسان معطي كلن حقه صغير او كبير او شاب او بنت

يحب يحسس كل واحد باهميته ويساله عن اخباره ودراسته والخ
فكان بعض الشباب من اقاربي حريصين على خدمه ابوي بهاليووم ( الله يجزاهم خير )
وكنت اشوفهم واتمنى اني مكانهم
لو بتخلوني اتكلم عن ابوي ماراح اخلص

( فكل فتاه بابيها معجبه .. وانا اعتبروني محبه عاشقه و و و

)
يمكن الي صعبها شوي على ابوي طبيعته ..
معروفه لو يجلس شهر ما نام ولا يطلب من احد شي او مساعدة

يابوي وانت الله عطاك مـن المهابـه والقبـول حتى القصيد ان قيل في حضرة جنابك .. ترفعـه
لا لا تحاتي.. يابعد راسي عسى عمـرك يطـول وانت اللي من خوفك علينا زود حرصك .. تتبعه
من رحمتك فينا تَعَلَّمنـا عـن الرحمـه فصـول من قلبـك الوافـي عرفنـا كـل خيـر ٍ.. ندفعـه
يا ما على الدم والقرابه تصبر وشلـت الحمـول ياما عملـت ومـادروا لجـل القرايـب .. تجمعـه

اليوم الثاني

جات اختي تودعنا قبل السفر .. كنت احاول اكون اكثر قوة بس كل شي ينهد لما شفت امي
الي سهل الامر علي بنات عمي

رجعوا معاي وجلسوا عندنا اسبوعين ضاع الوقت مع بعض وما كان فيه مجال افكر بـ زواج وسفر اختي

واقولهم الله لا يحرمني منكم

ولـ اختي اللة يسعدك ويوفقك يارب ويرزقك الذريه الصالحة

ولـ امي وأبوي

الله يطول باعماركم ولايحرمني منكم ويرزقني بركم ورضاكم

\

/
ومن هالمكان احب اشكر كل عضو او عضوة شاركوني هالفتره سوا برسائلهم او اتصالاتهم
( صحيح ربي مارزقني الا اخت وحده بس رزقني ناس بمكانه اخواني وخواتي
حتى بوقت الزواج كانوا البنات يتصلون يتطمنون .
. تلوموني لاقلت احب المجلس واهله

)

وسارت االايام وتعودت ع البيت بدونها صحيح الوحده شينه

اوقات اسلى واوقات ادور احد اكلمه واسولف له
بس اهم شي ان اهلي بخير وهذي نعمه كبيرة
والحمد لله ان انعم علينا بنعمة النسيان والا كان علوم

يمكن ماقدرت اوصل لكم اليوم بشكل حلو بس حتى انا مدري وش صار لاني كنت بعالم ثاني

يمكن البعض يعتبر زواج الاخت او الاخ شي عادي
ويمكن يتوقع اني بالغت شوي بس اتوقع حالتي تعتبر استثنائيه

والاسلوب لاتدققون فيه .. فضفضه بس

شكــر اكبر من الرياض بشوي

لكل من عطاني جزء من وقته وقرا
شكرا لطارق على التنسيق

أنا احبكم

(وش زود سامي عني )

مخـرج

ياأختي يالغالية عسى الله يهنيك
عسى حياتك كلها خير وافراح
مبروك مني جعل ربي يخليك
ويجعل حياتك كلها حب والقلب مرتاح

جزيل الشكر والتقدير لإستشاريتنا المتميزة :

الهنوووف

ونسأل الله أن يحفظ لها والديها .. وكل الأماني لها وشقيقتها بالسعادة والتوفيق ،،،

الى أن نلقاكم مع عدد ( آخر ) وعضو ( جديد )

\

/

تقبلوا أرق التحايا وأطيبها
من

مشرفي و أستشاريي
المجلس العام