بركاتك ياعم الشيـــخ ( اول موضوع بعد حصولي على اللقب المستحق ) - نادي الهلال السعودي - شبكة الزعيم

ابو طـــــلال · #1 16/02/2010, 09:33 PM

في السابق كان موظف الإتصالات والخطوط السعوديه هم أكثر الأشخاص طلباً للصداقة .. وعلاقتهم فرصة ذهبية .. يعني تعرف موظف بالإتصالات أو بالخطوط كانك تعرف شخصية ( خرافية ) .. يعني كنك تعرف واحد ( قوي ) ..

أممممم .. مدري شلون أشرحها لكم .. بس بإختصرها لكم .. يعني كنه يعرفني

في وقت الأرشفة اليدويه ونص الأوراق ضايعه .. قبل 15 سنة تقريباً كان رقم البيت العادي ينباع بثمانيه إلى 10,000 آلاف ريال ... ونقل الرقم أشبه بنقل ملكيه بيت لورثة

البيجر واللى أنقرض كانوا يبيعونه بثلاثة إلى خمسة .. وآخرتها رنة ورقم تسعات ( 999 ) >> يعني دق علي الموضوع ضروري .. وآخرتها جب معك خبز ... وكانوا إثنين مشتركينفي بيجر واحد

( آآآه واللهي زي مابئلوكم كدا بالزبط )

يعني يدق بيجرك .. تطلعة من مخباتك وترجعة .. وآخرتها يطلع الدقه لشريكك بالبيجر

يمكن بعض الشباب هنا مايتصور الكلام اللى أقوله يمكن مالحق عليها .. بس قريبه .. ايام الواحد كان ( ينزرق ) بالبيجر .. حتى لو مافيه بطارية

عمي .. وعلى وقت الجوال بعشرة آلاف ريال قال .. ماني مطلع جوال إلا بعد مايصير ببلاش .. وفعلا .. بعد عشر سنوات صار ببلاش الشريحة بميه وفيها رصيد بعد

عنده ( حدس )

الخطوط السعودية ... نعتز بخدعتكم .. قصدي خدمتكم .. لو تعرف موظف بالخطوط تحس إنك شخصية وتسولف فيه ورقمه مايضيع .. وقولة إنك تعرقف موظف بالخطوط يعني إنك ( شخص راقي ) ومن طبقة ( أستقراطيه ) حتى لوإنك ماتتعدى الخرج . ولاتسافر بس كون إن رقم هالرجال عندك إنك قوي

الحين هالموظفين اللى في السعوديه والإتصالات أصبح مالهم كرت .. أو كرتهم إحترق .. كل شي تسويه وإنت في بيتك .. يمكن اللى بالخطوط وبالحجز تحديداً مازال بقوته بس مهيب مثل أول ..

نتبارك في موظف إتصالات .. وفي موظف خطوط .. وفي مدير .. وفي امير .. ومرات في حتى مشرف منتدى .. علشان الرزه .. والكشخة .. والأهم الإستفادة والمصلحة .. وبركاتك يامعلم

==

الخوبله هي الربكة أو اللخبطه !

عموما في احدى المناسبات واحد يورينا بنيته الصغيرة بالجوال ( الله يخليها له ).. ونسولف عن دادا .. وبيبي .. ناس تقول دادا وناس تقول بيبي .. وانا مع اللخبطة قلت لولدي فارس ( شف شف ديدي ) لاهي دادا ولابيبي ..

بصراحة إستحيت خصوصا إن معنا مطوع .. شكله يقول وش هالإباحي الخالص

==

قصة يوم العشاق او يوم المحبين هي قصة أكيد الكل يعرفها .. وهو عن قصة الإتحفال بيوم الحب .. او عيد الحب
صحيح مالنا كمسلمين إلا عيدين ..
لكن انا سمعت القصة الحقيقيه للقس وهو ضحية ذاك اليوم واللى قتل .. وهي ليست بالقصة المكتوبه والمشهورة لدينا .. قصته كانت كتابة عقود زواج بالخفيه في وقت حرب وقد أعلنت الدولة بان الزواج مرفوض في هذه الفترة العصيبه من الحرب .. وإن عقاب الزواج هو القتل .. وبعد إكتشاف أمره تم قتل هالقس وصار إسمه ضحية العشّاق او المحبين .. يعني مات من اجل كتابة عقود زواج بين العسكر والفتيات ..!

يعني بصراحة أبرك من عنتر وعبله .. ونمر ووضحى .. وإلخ إلخ .. على الأقل كان زواج مهوب غزل بدون إرتباط شرعي ..

أقول قولي هذا وأستغفر الله لي ولكم .. والله يعيني على واحد في المجلس على هالفقرة ...

وهي فقرة ليست للإثارة بل للنقاش والتحاور ..

==

خدمة راسلني .. جاني فيها هاليومين كم رساله غريبه .. عجيبه .. ؟ واحد زعلان على واحد أو تشوفه بثر ومن هالكلام .. ورى ماتروح تواجهة و ش دخلني فيه .. هو واحد من عيالي ؟!
وهالرسالة مثل الذبانه .. جناح دواء وجناح داء ... شكرا على الدواء اللى فيها يامعجب

وأشكر كل من باركلي باللقب المستحق >>

إن أصبت فهو من الله وإن أخطأت فهو مني ومن مرسال

>> قصدي الشيطان

أخوكم الصغير ابو طلال