انا جيت

بالنسبة للعنوان... الموضوع بسيط

كل مافي الأمر نفذ مايلي بدقّة :

إلبس ثوبك ( للشنبات )... وإلبسي عباتس ( للي موب شنبات )

ورح للمكتبة

خذ لك لوحة فلّين حقت المدارس اللي يعلقونها بجدران الفصل والأسياب

وبدون فرفره زايدة اتجه فوراً لقسم الالوان

وخذ لك علبة الوان زيتية على كم حبة مائية وان حصل بعد بحريّة

ورح للبيت وصك على روحك بغرفتك وشغل طيور الجنة

وإلبس تكميلة رياضة ( حاول تكون الوانها فاقعة لزوم الاثارة )

وعلّق لوح الفلّين على الجدار جنب الدريشة

اخلط الالوان بالوعاء المخصص وامسك الريشة يابيكاسو زمانك وزماني

وانت ماسك الريشة واسترجع ذاكرتك وانت مغمض وخل ايدك تطيش في اللوحة

ابدأ بالحاجات الشينة واللي تضيّق الصدر علشان تطلع اللوحة خقق

وتذكر كل اللي ( استنذلوا عليك ) طوال تاريخك المجيد وشخمط بالاصفر

وتذكر اللي فزعوا معك وشمخط بالاحمر

واللي أساؤوا لك لاتنساهم وعطهم اللون الفستقي

واللي انت متأكد انهم يحبونك عطهم اللون القرمزي

واللي كان عندهم عزيمة وجحدوك وماعزموك عطهم البرتقالي

واللي حاقدين عليك عطهم اللون التركوازي

وتذكر كل موقف حلو سويته بحياتك ولوّن بالعنابي

وخلك على هالحال إلييييين تحس ان كل اللي بصدرك طلع

ثم وقّع تحت على اليمين بشكل احترافي وارسم طيارة زي حقت عبدالسلام الهليل

عندها ستزول الاحمال الثقيلة... وسوف تتذوق طعم الحياة بنكهة الاندومي

.

.

ياكثر مشاكلكم اشغلتونا الله يشغلكم

هو مايدري وش تبي ... وهي ماتدري وش يبي

وكلّن يقول انا المظلوم والحق معي

هو يبي احترام وتقدير واسلوب حلو

وهي تبي احترام وتقدير واسلوب حلو

وكل واحد يتهم الثاني بالتقصير وعدم الاحترام

طيب وين الخلل ؟؟

هو يدخل للبيت راجع من الدوام

وراسم في مخيلته حلم وردي جميل :

بادخل الحين وألقاها مضبطه ذيك الوجبة اللي تفتح النفس

وتنتظرني على نار بوجهها البشوش وهندامها الجذاب وعطرها الفواح

ساعتها انا بانسى كل التعب وهمومي تزول بعد الدوام والغثاء

وتكون الصاعقة لما يدخل ويلقاها منسدحة على الكنب قدام التلفزيون

وجنبها كوب شاهي وصحن مكسرات

ولابسة قميص يفقع القلب ( حق عجايز ) وناكشه الكشه كنها عش غراب

ويقول لها وين الغداء ؟؟

وهي ترد ببرود وتقول رح جب بخاري مالي خلق اطبخ !!

ساعتها انا ما ألومه اذا انفعل وكانت ردة الفعل قاسية

وعلى الطرف الآخر

هي من الساعة 11 في المطبخ

جهزت صينية المكرونة وحمرت الدجاجة بالفرن وضبّطت ذيك السلطة المعتبرة

كل شي جاهز ويا نفس وش تشتهين

ثم راحت واخذت لها دش عالسريع واستشورت شعرها وصارت ( على سِنقة عشرة )

ورجعت حطت الاكل على الطاولة وجلست تنتظر طلته البهية

ثم دخل ( زين الحلايا ) وقد تأبط شراً وفصخ شماغه ورماه على الكنب

وبدون سلام ولا كلام علّق ثوبه واخذ جواله وراح ينام

وهي تناديه وتقول الغداء ؟؟

وهو يرد بعصبية ويقول ما ابغى حطيه بالحافظة... لا قمت اكلت

وعلى المغرب يقوم ويلبس ثوبه وللمقهى ومعه اللاب توب

وهي جالسة تتفرج على حافظاتها وتقول صبر جميل....

كل يوم والثاني يطلعون لنا بقضية من قضايا ( عدم تكافؤ النسب )

مع ان المشكلة الرئيسية في فشل كل زواج هي ( عدم تكافؤ العقليات )

كثير نشوف ونسمع عن واحد ( رخمه ) تزوج وحده ( سنعه )

او واحد ( نشمي ) تزوج وحده ( مطنشه )

او ( رومانسية ) توهقت بواحد ( جفس ) والعكس صحيح

ساعتها كيف نقدر نحل المشاكل والعقليات اصلاً متنافره وغير متوازنة ؟؟

.

.

رومانسيات صخراويات

عندما تتلاطم امواج الحب يمنة ويسرة....

سوف ألطمك مع جبهتك كي تصحصحين وتسمعين ما اقول

انا اعشق كل تفاصيلك.. ومن اجل ذاتك تسمو ذاتي

ولست ببعيد عن الجنون مع هيام روحي بروحك

ولذلك فقد قررت دون استكانة ان اصطحبك الى طبيب الاسنان

لأن ضروسك بشكلها الحالي جابت لي الصمرقع ياظلال رونالدينيو