العنوان كان ( سويت حادث أليم .. صور )
لكن نزولاً عند رغبة الغالين تم تغييره والله يحفظ الجميع والهدف كان وصول الموضوع بالصورة اللتي أريد خاصة وان موضوع التصادم كان حقيقي ..
لاحد يدقق على الإملاء لأنه معدوم بعد الحادث.!!
المهم الموضوع طووووووووووويل شوي لكن اللي يقراه حرف حرف يصير قصير مثل موضوع التقزيم
المهم انا بخير وايضاً قبيلي ( يعني الطرف الآخر ) ___ والحادث على انه [ وجه لوجه ] لكن الحمدلله على السلامة
السالفة ومافيها اني انا طالع وامشي بهداوة ( كالعادة ) والحمدلله كل شي تمام لين وصلت للآخر والأمور بخير هذا يعدي من عندي وهذاك انا اتعداه والوضع سليم , لكن فجأة يوم جيت بلف يسار الا واحد مسرع ولف علي ومامداني اتفاداه وتصادمنا وجه لوجه لكن ابشركم انا سلمت وهو سالم ,, ونصحته قلته يابن الحلال وش هالسرعة اللي مالها داعي قال ياخي طالع من الدوام وتعبان ومستعجل للبيت قلت يالغالي في العجلة الندامة قال معليش ان شاءالله انتبه مرة ثانية , قلت عطني عشرة تعويض وانا مسامحك قال جزاك الله خير وعطاني عشرة يال ( ولو انه ماهي الجديدة المهم انها عشر ريال ) << ماهو طماع .
بعدها أخذت عقالي وجوالي من الأرض .!! وأخذت باقي أغراضي قلم واوراق الشغل وفتحت الباب ودخلت المكتب .!!!وهو نزل مع الدرج ..!! جاني المدير قال معليش دايم تصير حوادث عند هالباب لانه قريب من الدرج واللي طالع ماينتبه للي جاي من برا .. قلت لا عادي ماصار الا الخير ..
طبعاً هالسالفة صارت وانا بالدوام يعني مافي لاسيارة ولا أي شي ,, تطمنتو .. الحمدلله ..وهالسالفة مقدمة لموضوعي ( السالفة صدق ماهي الغذائية )
يوجد أسفل صور لحوادث سيارات اللي مايتحمل الصور لايشوفها لكنها عادية ومافيها لا دم ولا غيره مجرد سيارة مصدومة .
,,,
,,,
,,,
,,,
طيب ليش نص المجتمع يسوق بسرعة .!!! والنص الثاني بطيء .. والنص الثالث .. او صح مافي نص ثالث
والله شي يحز في النفس كل مانمشي بالطريق نلقى زحمة واذا قربنا لقينا حادث وسيارة فوق الرصيف وجثة وفوقها شماغ والا عباية والسبب السرعة الجنونية .!!
والله اني ألوم أكثر شي البلد والاعلام وادارة المرور النااااااااااااايمة
من جد والله حرام اللي يصير ,, شباب البلد طحنهم الحديد والبلد ولاحاس فيهم وأقصى جهد ( اسبوع المرور ) ياخرطيييييي
المشكلة ان السرعة تقتل صاحبها والطرف الآخر ’’ كم حادث صار والسبب شاب مسرع والضحية عايلة صدمها من الخلف والا طلع في وجههم فجأة .. والله لو عندنا إعلام حقيقي وله ضمير كان ترك سوالف ودّع وهنأ وتفرغ لتوجيه الشباب ولو عندنا إعلام حقيقي كان ترك الجدل البايخ والممل عن قيادة المرأة للسيارة والا عن كشف الوجه والا عن الخطر المحدق بالأمة وأزعجونا بنظرية المؤامرة وان الغرب حاقد علينا ,, الله واكبر ياعقولنا اللي خايف منها الغرب ,,
والله هالفوضى اللي تصير بالشوارع ماراح تنتهي الا اذا صار حادث لولد أحد المسؤلين ( طبعاً بشرط انه يكون هو المصدوم وليس الصدام ) لان ولد المسؤول لو صدم عايلة كاملة أكيد يطلع مثل الشعرة من العجين , لكن اذا انصدم وقتها راح تشوف الإعلام يقوم بدوره المهم والكامل ,, ( الله يحفظ الجميع من كل شر )
وترا السبب هو الوالد ,, بعد الله ثم الاعلام وغياب المسؤول ,, وللأسف رقابة الوالد ماهي موجودة أد أبد
ماقول الا الله يرحم ابوي وجميع أموات المسلمين
أذكر زمان طلعت للبر عندي شغل مهم وكنت وقتها بداية السواقة والبر كان واسع << احلف
المهم انا والشيطان صديقي زمان قررنا نفحط ونفلها شوي << شفتو قبل موبايلي لكن وين حفظ الحقوق
المهم فحطت لين داخ راسي ورجعت للبيت وسلمت المفتاح للوالد الله يرحمه ومن بكرا الصباح الله لايوريكم ذاك الصباح , والا الوالد بالعقال يمحّط فيني والوجع احسه في اصبع رجلي الصغير ( الحقيقة كان الضرب على الظهر لكن أثناء محاولة الهروب الكبير من الجلد صدمت طرف الباب بإصبع رجلي الصغير ) المهم وش فيه وش السالفة والا وصله خبر اني مفحط بالبر .!! بعدها عرفت من اللي علمه لانه شافني بالبر وعرف الموتر وقال للوالد موتركم من كان يسوقه في البر قال الوالد حمد قال المخبر تراه كان يفحط طبعاً الوالد ماعنده تحقيق او توكيل محامي للدفاع , مايتعامل الا مع الجلد لين صرنا أوادم ,, وبعدين اعلمكم كيف انتقمت من المخبر اللي وصل السالفة للوالد .
عاد انا من هذاك اليوم وانا اعرف الحق واسوق مثل العالم والناس ,,
لاسرعة ولا بطئ ممل , ممشى الناس الكويسين ..
ماودي أطول أكثر من كذا ورانا منتدى التقييم
والا في جعبتي الكثير ,,<<
الله يحفظ الجميع من كل سوء ,, لكن والله الوضع زاد عن حده
الحمد لله على السلآمـه
عسى واجهتك ما انعدمت بسسس
وبعدين ثاني مره انتبه وانت نازلٍ مع الدرج
..
أما بالنسبهـ للسرعه فـ حنا يالسعوديين ما نستغني عنها .. أصلا الورع الصغير أول ما يتعلم السواقه يسأل أبوه كيف أخلي السياره تمشي 200
..
يعني السرعه بـ السعوديه متربيه معنا منذ الصغر لا مجال للأستغناء عنها
..
اقرا واقرا ويوم وصلت عند (أخذت عقالي وجوالي من الأرض .!! وأخذت باقي أغراضي قلم واوراق الشغل ) قلت يوووه الله يستر شكل الحادث قوي والسيارة معدومه << بعيد الشر ان شاء الله
بالنسبة للسرعة (سرعة السيارات ) ناس مهبل وقسم بالله بعض الاحيان تبعد عنهم تخاف يبلونك بشرهم
ذاك اليوم بطريق الملك فهد 3 سيارات سرررررعه جنونية المشكلة زحمه شوي وهم يتسابقون الظاهر ومن مسار لمسار ابوي انهبل منهم والمشكله سيارة المرور كانت موقفه على جنب عاد وش تسوي الله اعلم اتوقع اخذ له غفوووه اللي بالسيارة
الله يحفظنا والمسلمين اجمعين ويكفينا شر الحديد
يعطيكـ العافية حمد وسير كل يوم مانشوف مواضيعك الا بعد كل مباراة
الله يعطيك العافيه
والله يكفيك شر الحوادث
عموما انا شخصياً احس اني تعقدت من السيارت
لأن اكثر من شخص عزيز علي تعرض لحادث أليم
"الوالد " و"اخوي" .. ولكن الحمدلله جت سليمة ..
وثلاث اشخاص من أقاربي اثنين توفو وهم صغار بسن .."احترقو" في السياره ..
وثالث تعرض لأصابات خطيره وربي يشفية ويعافيه ..
السرعه الجنونية .. والاهمال كان سبب في موتهم الله يرحمهم ويغفرلهم ...
وانا من اليووووم اقرا واقول وش ذا الحبيب اللي انعدمت سيارته ويأخذ عشرة اريل ويمشي خخخخخخخخخخخ
والله وانا اخووووك سالفة هالسرعة اللي ماتشوفها الا بالسعودية توني جاي قبل امس من احد الدول المجاورة قسم بالله احترام كبير للنظام ويوقف للاشارة قبل لاتولع حمراء لاني اوقف انا مع المشاءه فجاة اشوف السيارات تخفف عشان توقف والاشارة مازالت خضراء اتوقع في موزة جنبي واقفة تبي تمر والسيارات وقفت اثر الاشارة قبل لاتولع حمراء تشر ضراء تنتبه السواقين وهم يوقفون قبل لاتولع حمراء
وحنا هنا قطع اشارات وسرعة ويجيكك واحد مسوي فيها ماحد قده وشوي ويحك سيارتك ولا اللي يلحم وراك الا توخر عنه سواء زحمة ولا فاضي
ولا ادري وش سبب هاللعب اللي عندنا ماعندنا نظام عليه الكلام تذبح لك عايلة وتطلع بكفالة
حياك الله والحمد لله عالسلامه وان كان تبي محل سمكره زين اعرف لك واحد لؤطه
والله شف انا من النوووع الي يسرع بسبه الي مهدين زياده يرفعون ظغطك الي هو اصلا مرتفع من الدراسه والقلق ويجيك واحد مبسط الطريق فاضي وماشي 20
او تطيح بزول او شايب بالدائري ماسك اليسار وماشي 90 ولا ملصق بالدركسون
بالله وش تسوي << ياعيني عالبراءه
على كولن اهم شي دعاء السياره الحمد لله كل يوم اذا شطفت جنب مسجدنا كل صبح اذكره مدري ليش والحمد لله
جت ثلاث حوادث لثلاثة من معارفي
الرابط اللي بينهم انهم الحمد لله ماصار لهم شي
والرابط الثاني ان كل سياراتهم راحت للتشليح وانباعت بأقل من ربع قيمتها
لكن نقول حديد × حديد والحمد لله على سلامتهم
لكن السؤال اخوانهم اهلهم كل من يعرفهم ليه مايتعض منهم ؟؟
ولو قال الشخص اني سواق لكن اساسا حادثين من اصل ثلاثة اللي اقولك عليها
الخطا على الطرف الثاني يعني حتى لو كان هالشخص مايكل شوماخر ماراح يقدر يتفادى الحادث على حسب الوصف اللي جاني
وعليكم السلام ,, سالفتك مع صاحبك خخخخخ تحفه اقرأ ومتحمسة وبالنهاية يطلع كذا
** ** ** ** **
السرعة والحوادث مااعرف اش أقول بصراحة:عدم إحساس بالمسؤلية مسؤلية اللي حوله قبل مسؤليته.
** ** ** ** **
مع احترامي لاحضت كمية استهتار ولا مبالاة فضييييييعة بأمور كثير مو بس بالسرعة. لو توزع على شعب اليابان لكفتهم وصار عندهم فائض بعد
** ** ** ** **
ماأنسى بعد تربيت أهله وعلى ايه عودوه ؟؟؟ أوقات أشوف تصرفات من شباب تخوف والاهل عادي عندهم ولا كأنوا صار شيء ليه ؟ عذرهم : والله طيش شباب / يكبر ويتعلم >>للأسف كثير هذه أعذارهم ,,
أنا ماأقول اضربه ولا أقول صرخ عليه ازرع بنفس الطفل:الثقة / المسؤلية / احترامه للغير
^ ^ ^ ماشاء الله كل هذا وماهي عارفة اش تقول مو قلنا من الصباح مع الاختبارات تزيد الردود والزبرقات