|
( حمار القايله ) وخالي أبو الذهب؟؟؟؟
بعيداً عن السياسه وبعيدا عن التعاسه فيه بعضنا كلها كياسه فاهم الهدف من الحرب على الاسلام وبعضنا كلها تياسه يطبل للغرب واهدافه...تجادل تناقش تحاور مافيه فائده مقتنع انه صح وان الباقين على خطأ........تعبنا وتعبتوا بعد (صح.).اقرأ هذا وسع صدرك وانسى السياسه وبلاويها..
القصه :--حمار القايلة ,,, وكومار ,, وأمير منفوحة …….
هذه قصتين لهما علاقة ببعض … ولكم الحرية في الربط بينهما …
القصة الأولى (( حمار القايلة ))
وحتى نكون على بينة , فالحمار هو ذلك الحيوان الصبور …, الذي لا يهش ولا ينش … وقد جاء وصف الحمار في كتاب ( ابو الخرابيط ,) بانه حيوان له ذيل , واربع ارجل ……. ( لعنبو البلاغة في الوصف ) . والقايلة هي ( وقت الظهيرة ) … فنقول ( اخذ فلان قيلولة ) ونعني بها ( رقد , نام , وترك صلاة الظهر والعصر , وعساه يلحق وقت صلاة المغرب ) …
المهم :
وانا صغير , كنت احب اللعب , واللهو … واحب التخريب ايضاً … احب تسلق النخيل , وأحيانا اترك النخلة مضائه ليلاً ونهاراً ( بالنار ) ….واحب الترنج ( للعب الكورة , وليس للأكل ) .. وكان والداي مرتفع ضغطهم مني ( ما ادري ليش؟ ) … وكانوا يربطوني بحبل مع الباب … واحياناً يلقون الحبل ولا يلقونني , واحيانا ما يلقون الباب ……
وفي يوم من الايام ( جاء خالي ابو الذهب) ودرس حالتي النفسية وقرر ان ( خربووووط) لن يستقر في المنزل الا بالتخويف والارهاب ….( خالي احد اعضاء منظمة القاعدة …. خلني اورطه وافتك منه ) ..
اقترح خالي على ابي بأن يتم تخويفي بقصة حمار القايلة … .. وبالفعل …. استدعاني الاثنين وبدأ في اعداد جلسة غسيل مخ وارهاب .... قالوا لي (( انتبه ياخربووووط…. يقولون ان حمار القايلة بدأ يمشي في المزارع … انتبه لا يشوفك )) .. وانا عن حسن نية قلت (( وشو حمار القايلة ؟ )) …… وبعدها خذ من الرخيص (( حمار القايلة ياكل البزران ….حمار القايلة عض ولد (أبو رويشد ) ورماه بالجليب ( البئر ) .... حمار القايلة رفس ولد وطيرة عند القمر ولا قدر يرجع للارض مرة ثانية )) ……… انا بصراحة ما خفت , بس جاتني ام الركب .. وصارت ضروسي تدق طار …
ومر يوم , وبعده يوم , وانا جالس بالبيت اخاف اطلع , ويشوفني حمار القايلة , ثم يرفسني رفسة توديني للقمر, ولا اقدر ارجع للارض ..
بصراحة انفقعت مرارتي .. اسبوع وانا على هالحالة … لا طلعت من البيت , ولا لعبت بالترنج , ولا شبيت نار بالنخل … وتشجعت ذات يوم , وبدأت اراقب المزرعة من السطح ….. (( وين حمار القايلة ؟؟ )) ما له اثر …
وزادت جرئتي فطلعت … وصرت العب , ونفسي تقول لي (( انتبه لا يكون حمار القايلة وراك )) .. رعب شديد عشان ألتفت الى الخلف وأتأكد ( هو وراي, والا لا )) ….
وفي يوم من الايام , اصطحبنا والدي الى البر في نزهة اسرية …… ومن خلال ازهار الربيع , والارض الخضراء …. لهونا انا واخواني , ولعبنا مع بعض الاطفال المتنزهين …… وفجأة شفت حمار يمشي بالبر ……….وأطلقت العنان لقدمي , وبسرعة الريح ((( يباااااه …. يبااااااه …قم قم ..حمار القايلة ….. حمار القايلة جاء …. ))
ابي لم يتمالك نفسه , فسقط من الضحك …… وانا واصلت الصراخ وأقول (( قم يبه ...انحش انحش .. حمار القايلة بيجيك ويرفسك رفسه توديك القمر )) … وازداد ضحك ابي …..(( يبه تراه بيعضك ويرميك بالجليب ( البئر ) )) ……ولكن ابي لا زال يضحك …… اخيراً , حسيت ان في الموضوع إن , واخواتها ( ما شاء الله على ابو الخرابيط…ذهين ))…..
أخبرني ابي بأنه لا وجود لحمار القايلة .. وان هذه القصة مجرد لتخويف الاطفال من الخروج وقت الظهيرة …
حمار القايلة قصة لتخويف الاطفال …..الان نحن نواجه تخويف من شكل ثاني وتتناسب مع العينة المستهدفة والغرض منها ..
فالعينة المستهدفة هم الشباب , والشباب الذي لا يعرف يقول (( سم طال عمرك )) , ولم يقتنع (( بأن الراي رايكم , و الشيوخ ابخص )) …
واما حمار القايلة الحالي , فهو حيوان غير صبور , و منحرف ذهنياً , ولم يراعي الله في شئ … كل ما يعرفه هو (( نفذ ثم فكر )) …. او نفذ ولا تفكر ابداً .
حمار القايلة الحالي ليس له ذنب واربع ارجل …. بل لديه شبكات كبيرة ,, وعناصر عديدة … و له اجهزة متخصصة في التجسس , واختراق الكمبيوترات … وله مشاركين يطبلون ويزمرون ويرقصون , ويلعطون الجزم ايضاً ..
حمار القايلة الحالي لا يعض , ولا يرفس … بل يهدد ويتوعد فقط ..
حمار القايلة الحالي لا يمشي بين المزارع , بل ينظر اين الحقيقة , ويحجبها ..
حمار القايلة الحالي ………مثل حمار القايلة السابق …(( مخصص للتخويف والارهاب فقط )) ……
_________
.....
..
القصة الثانية (( كومار يتكلم في السياسة ))..
..
يوما ما توجهت لأحد الحلاقين كي اجز من الشعر الكثير , فلا يبقى لدي الا الجلد … فقد عانيت كثيرا , ولا زلت اعاني من (( نعومة شعري )) لانه يطزز عيوني …..(( يا حياتي يا أميتاب باتشان )) ..
وعندما دخلت للحلاق قلت (( سلام عليكم صديق )) ,, ولم اكمل سلامي الا والهندي يطمر علي , وبدأ يخممني , ويحببني .. ( سلام خربووووط.. كيف هال خربووووط…مرهبا خربوووووط…. يا سلام … اخيرا انت يجي هنا ) …… انت تعرفني صديق ؟ …. (( انا اعرف انت كتير كتير .. انا كل يوم روه انترنت كافيه , ويقرا مودوع انت ….. انت مودوع دايم حلو )) . <<<< مسوي دعايه !!
وجلست على الكرسي , وبدأ الحلاق ( كومار اكبر خان ) بجز شعري ….
كومار : شوف خربوووووط… انت مودوع دايم صح … هذا شغل هنا حكومة , ما فيه كويس … ما فيه مزبوط …… كلام بس …قرقر وزير , وبعدين ما فيه شغل …… انت يعرف كم نفر سعودي ما فيه شغل ؟ …. كثير كثير …. كل نفر فيه شهادة جامعة , بس ما فيه شغل .. ليه ؟ …عشان هذا حكومة بس يحب قرقر …… حكومة كلام ( ما فيه فلوس ) .. طيب ليش يروه ماربيا ؟ …. طيب ليش مزرعة عاذرية كل يوم كبير كبير ؟
انا بصراحة قرصني قلبي لا يكون كومار ( احد عناصر حمار القايلة ) .. وبديت ارقع ..
خربوووووط : لا يا كومار …. حكومتنا ( ولله الحمد ) عادلة , وحقانية … الحمدلله عندنا شورى … وعندنا مستشفيات كويسه ……وعندنا امن .
كومار : هههههه …انا يعرف انت خايف …. ههههههه … بس ما في مشكلة … انت كلام هنا شورى ؟ ….. شورى يجيب حكومة , خلاص يصير حق حكومة , مو حق مواطن …… هنا مستشفى كويس ؟ …طيب ليش وزير صحة يروح اوروبا عشان علاج ؟ … ليش يروح ( نفر ثاني ) جنيف عشان علاج ..هههههههه …. هنا امن … طيب ليش دايم كرسيدا ياخذ حرامي ؟ …ليش عصابة ويسكي كتير كبير ؟
خربوووووط : كومار … الحمدلله , هنا خير كثير ..والدليل انت جاي من الهند , وتارك امك وابوك وعيالك , وجاي تشتغل هنا …
كومار : ههههههه انا اليوم يجي شغل هنا … انت بكره يجي شغل الهند …. اذا ما فيه حكومة كويس , انت يجي بسرعة … بكرة يشوف ..هههههه
بصراحة احرجني كومار …
ويوم انتهى كومار من الحلاقة …… كان الحساب ( عشرة ريال ) … انا فتحت بوك الدراهم ..ادور يمين , وادور يسار .. ما لقيت الا سبعة ريال .. وقلت لكومار (( كومار هذي سبعة ريال , وخذ رخصتي عشان اجيب لك الباقي )) ..
ضحك كومار ( ههههههههه … لا لا ما عليش , اليوم حساب عندي انا … بس لازم يجي مرة ثانية عشان قرقر سوا مرة ثانية )
طلعت من عند كومار …. ولسان حالي يقول (( من منكم شاف حمار القايلة , يا جبناء ))
تحياتي للجميع |
ازين مافيه صبره وغباءه
اخجلتني ياافدع الشاشه على هاللقب سندريلا الشاشه
الوضع العادي
