بسم الله الرحمن الرحيم
السلام عليكم ورحمه الله وبركاته ..
من زمان عن المواضيع الخفيفه واشوف شباب منزلين مواضيع عن العريفي وعن البلاك بيري والصخره عن
الخرفنه وماجد يناظر من بعيد
جا في بالي موضوع وهو الطفوله وقصص في الطفوله باقول الاولى وهي مالها دخل في الموضوع
ولكن جت في بالي يوم اني صغير رحت الي بيت عيال خالي وكان وقتها رمضان والناس صيام
الا وفي الحاره يلعبون كوره وصيف وحرررررررررر المهم حنا صغار نزلنا نلعب كوره ووقتها
الكوره انرفعت لي وجيت انا ابي اسوي فنان على بالي بثبتها بالصدر واشوت وانا قريب من الباب كان بيني وبين
الباب نص متر او متر المهم بدال ما اثبتها بصدري صقعت الكوره بكتفي واتجهت للباب ودخلت قول
وصرت كاني قاصدها والناس يجوني وانا ما عرفهم يا فنان وشلون سويتها
ويوم رجعت للبيت ,ولد خالي
يقول السالفه لاخوانه وقتها انا كبر راسي
وادري انها صدفه ومن يومها صرت ادرب كيف اجيب اهداف بالكتف
لنفترض ان بدل ما قالو لي يا فنان قالو ان الهدف صدفه وانت ما تعرف تلعب وووو كان ما تدربت اجيب اهداف بالكتف وكانو حطموني
سالفه اخرى مالها دخل في الموضوع لكن نبحر في الاستطراد ليه لا
هذا احد العدائين السعودين كان في سباق جري 400 متر وكان السعودي متحمس وكان في المركز الثاني وهو يحاول باقصى ما عنده انه يكون الاول جاء المدرب بصوت عالي وقال له يا حمار اركض بسرعه عصب العداء وخسر نفسه وصار في المركز السادس ..... لو المدرب وقتها وقال يا بطل اسرع يالله يمديك ايش الي راح يصير ؟؟
نروح للموضوع
والي هو وش اول شي سرقته في حياتك
وانا صغير كان عندي هوايه وهي سرقه الاقلام بعد فتره اختي الله يطول بعمرها لاحظت كل يوم انا راجع بقلب جديد وقلم غير استغربت ودرت اني اسرق الاقلام وقتها كنت في التمهيدي المهم قالت للوالده وهاوشوني
لكن ذا الهوايه ما انطحنت وتولعت فيها بزياده
فصرت اسرق الاقلام واخبيها في الدرج حقي الي في الفصل
حتى اني اذكر واحد من الشباب يقول شفت قلمي وانا اقول له هو كيف شكله
مسوي مالي دخل وهو في الدرج عندي انتهت السنه وتركت الاقلام في الدرج ما كنت اقدر اجيبها للبيت وكانت اختي معي في نفس المدرسه في التمهيدي راحت تاخذ شهادتي ويوم شافت الدرج لقت اقلام الدنيا وجابتهم لي عاد جيت انا اخذتهم بكل برود وما قالت لي شي اختي وقتها قالت لقيت قلم حلو وقامت توصف في شكله وقالت لي انها تركته وما جابته وقتها بغت تجيني الصيحه
بس قالت لي اضحك عليك والحمد لله برد قلبي
(نصيحه مالها دخل في الموضوع ... قائل النصيحه جدي الله يطول بعمره ..يقول اذا عطيت احد قلم في محل او في اي مكان وانت تبي القلم يرجع لك عطه القلم من دون غطى عشان يرجع لك
)
اتمنى من الجميع سرد قصص عن اول سرقه في حياتهم او عن الطفوله بشكل عام
الموضوع كتب عفوي وانا متاكد في اخطاء املائيه بس احلى
بغيت انسى تشـــــاو
تشـــــــــــــــــــــــــــــــــــــــــــــــــــاو