ياناس ياهوووووووه .. شوفوا لي حل .. والآ ترى أبشق هدومي - نادي الهلال السعودي - شبكة الزعيم

جنتلمان · #1 24/09/2002, 03:50 PM

حالتي حاله صرت مثل البيضه الرحاله

قسماً بالله ياشباب أن الموضوع جدي ترى مهوب مزح تخيلوا أحس أن نفسي ملت مني

<-- لاحد يقول لي أشرحها

مشكلتي مع أني أنسى بشكل فضيع

مدري من زاهم النسيان بيجر وقال له تسلط على جنتلمان الضعيف

أبقول لكم بعض المواقف اللي صارت لي في ذا الاسبوع وأنتم دوروا لي حل لأني تفشلت مع خلق الله

الموقف الاول :

اليوم أنا في الجامعه وأشوف ذاك اللي يناظرني من بعيد قلت شكله مشبه وأنا أبمشي الا وهو جاي يسلم ويتحفى وأنا مدري وش الطبخه .. توني أبقول له شكلك مشبه والا وقال لي أنت فلان بن فلان قلت أيه قال ماعرفتني أنا ... ولد جيرانكم أول قسماً بالله أني ماعرفته بس أذكر أن اسم العائله مر علي من قبل بغيت أصرف الموضوع قلت له وش أخبار الوالد وقلّ الصح معه طلع أبوه متوفي من خمس سنين

الموقف الثاني :

مره من المرارير

طلعت مع الشباب للاستراحه أنا آخر واحد جاء وكانوا موصيني على كوره أنا نسيت مثل كل مره

وصلت الاستراحه وفليتها مع الشباب يوم جينا بنلعب كوره وين الكوره ياجنتلمان وجنتلمان يقول ماجبت معي شي انتم ماقلتوا لي شي

قالوا لي أنقلع لابارك الله فيك جب كوره من أقرب محل رياضه وأنا بكل ضعف أنقلعت لمحل الرياضه وأدخل المحل وأحاول أتذكر وش أنهم قايلين لي أجيب

؟؟ أدور جوالي أبسألهم وش يبون مالقيته

رجعت للاستراحه ومن قواية وجهي أشربك عند الباب

وأنزل من الفياقرا حقتي

سألوني وين الكوره ياجنتلمان قلت لهم نسيت وش أنتم قايلين لي أجيب علشان كذا رجعت أسئلكم وش تبون رد علي خويي بقوه الله ياخذ عمرك يالحـو .....

وقالهم ضفوه عن وجهي أبروح أجيب الكوره أنا

الموقف الثالث :

كنت في البنك أنا أبطلع بدل فاقد لبطاقتي عطاني الموظف برنت وقال لي عبي بياناتك وكتبت كل شي الا التاريخ سئلت خويي قلته كم التاريخ اليوم قال لي 1/1/1419 هـ

أنا بغباء كتبته

وأسلم البرنت للموظف قال لي من وين أنت جاي من العصر الحجري قلت ليش يالأخو قال لي شوف التاريخ اللي أنت كاتبه قلت وش فيه أنا كاتب التاريخ الصحيح <-- غبي ويناقش .. فهمني وش الغلط ومن بعدها مالي وجه أروح للفرع ذاك

يالله أبروح أندفس أنام وأنتم دوروا لي على حل وياويلكم لو قمت ومالقيتكم معطيني حلول

سي يو

<--- لزوم البرستيج ;)