قصتي في قسم الشرطة << اقلد بريماكس P= - نادي الهلال السعودي - شبكة الزعيم

ĐЯ.3βǪǪĐ · #1 31/12/2009, 04:07 AM

بسم الله الرحمن الرحيم

برايفت(بريماكس)<<اخوي بريماكس لك خمسين ف المية من ارباح الموضوع انتي اللي جراتني اكتبه

طبعا القصة متشعبة و مدري شكلها طويلة لاني طولت و انا اكتب

حدث انه و من قبل عشرين سنة ابتلاني ربي و سكنوا اهلي حول جامعة الملك سعود للبنات

<< القلوب للملك سعود الله يرحمه

طبعا عدة غثوات انغثيت فيها من يوم انولدت قبل 19 سنة و 20 يوم بالتاريخ الميلادي
اولها احس رئتي مكربنة من دخان الباصات

ثانيها عشان امر صديقي اللي بيتهم يبعد عن بيتنا شارعين يبي لي ربع ساعه

ثالثها حسد جاي بالغلط .. اغلب الشباب من العيال يقولون يا حظكم عند اللحوم

محسسني اني يوميا مقلط 7 بنات ف الملحق

ولو اكمل الحسابة بتحسب

ما علينا

ندخل في صلب القصه

بوابة 4 اكرهك << يا شرير

كنت مع صديقي نتمشى ف الحي ككل و نطمن على الاوضاع

حدود 3 العصر .. طبعا زحمة مرة يوم اني صغير كنت اكرهها بس كبرت و حبيتها

الموهم طلعنا من احد الحارات الى الشارع شبه الرئيسي اللي عليه بوابة 4 قبل لا نطلع بكم ثانية مر قدامنا دورية

دخلنا الشارع الشبه رئيسي لقينا الاخ موقف و متصيد لنا ع اليمين

اول ما تجاوزناه سمعنا الشي اللطيف اللي يقول قاق قاق

دخلنا مع اول حارة يمين نزل الاخ العسكري اثباتات و اجراءات اعتيادية

فجاة قال بافتش السيارة

طبعا اللهم لك الحمد واثقين

قلنا تفضل فتش و فتش و فتش ما لقى شي

قال ياللا الدورية

قلت له خير وش في

يقول ف القسم نتفاهم

يا اخ ..؟

اقول اركب..

وش سوينا طيب؟!!!!!!!!

المهم شكله رحمني

خذا اثباتي انا و صديقي .. خلاه يركب معه ف الدورية .. و قال الحقني انت بموتر خويك

و طبعا نتف الجوالات كلها معه

طيب ابشر ..

طبعا زي ما نعرف الجو فيه حرارة شوي و الاخ صديقي خااااااااااااايس ف الجيب

انا قلت ف نفسي طيب خل اقهره شوي

لبست نظارتي و رجعت لوضعي و اناظره و اضحك و هو منقهرررر << شطحت

ما علينا

وصلنا القسم..

جلس يبي يكتب تقرير اشتباه دوران عند جامعة الملك سعود !!!!!

يقول شكلكم جايين تخطفون بنات

<< طبعا مسوي يستظرف يوم قالها

هيه يالطيب عدل بدل .. ما فيه.. كتب تقريره و اثناء الكتابة دخل واحد مصري :
(( الكهربا عندكو شغاله؟)) العسكري ناظر اللمبات و ناظر له باحتقار شوي يعني يا غبي ناظر

تدرون وش قال له العامل المصري << ما اقولها ازدراء او استنقاص لكن يعني عامل بسيط و اجنبي .. قااال (( انا باكلمك و لما اكلمك ترد علي فاهم و الا لا )) و ربي يا ناس انه ينافخ عليه بشكل لدرجة العسكري و ربي انه وششش منه قال لا شغال كلو تمام شكرا

هنا بدا سلك النرفزة يضرب معاي .. قلت للعسكري بابتسامة ماكرة

قلت له هذولي اللي عارفين لكم موب حنا طال عمرك و تكفى

الواحد يدخل شاكي و كانه ذابح ابو الشرطي من قلة الادب ف التعامل

وصل شخص مدني ما اعرف رتبته صراحتن بس ف الغالب ضابط و اسمه احمد

محترم بس ع الفاضي يعني نشرح له الوضع و هو يسلك يقول اوكي اكلم المدير و نشوف

انا ف البداية مخي شبه واقف افكر من الصبح طالع و الحين داخلين ع المغرب .. اهلي طيب؟.. و جوالاتي مع الشرطة؟!!.. و ممسوك على شي خفت يتلفق لي؟! و خايف قضية .. و بياثر على امور فيزتي للابتعاث و الا لا؟!!

بعدين صحصحت و حسيت انها خاربة خاربه يعني خلاص التقرير انكتب و الضابط دخل صديقي مكتبه و قعد يساله و جا دوري .. و انا مشكلتي اني زي الشاب هذا

<< يعني للاذكياء اللي ما فهموا لسااااني طويل

يعني يوم اتنرفز ما احسبها صح .. بس الحمد لله تكلمت بلباقه اليوم

قلت للضابط .. الحين ممكن اعرف ليه انا هنا؟!

قال اشتباه

قلت اوكي طيب ممكن اقولك شي بدون ما تزعل قال تفضل .. قلت بدون زعل << باين اني خايف

باين انكم فاضين .. قيمة الحبر اللي تكتب فيه اهم من الموضوع التافه هذا .. .. سؤال ... انت ف جوا نفسك راضي ع الوضع كذا ؟!!

قال لي معليش و مدري كيف و هد اعصابك و الموضوع بسيط و بتطلعون

ذكرت ربي و جاوبت اسئلته اللي مدري ليه انسالتها

كلامي انا و صديقي متطابق بالحرف يا ناس ... كنا منزلين صديقنا و راجعين بيوتنا ..

و هو ملزم الا اننا كنا نرقم

بعدها قال افتحوا الجوالات تفتيش لها

انا و صديقي طبعا الاساسي بلاك بيري

توهق الضابط قال ما اعرف له ياخي ودي اعرف كيف تستخدمونه .. هو طبعا يحاول يلطف الجو بس انا من جوا محترق

يوم مسكت جوالي تذكرت اني مكلم صديقي و قايل له تعال المكان الفلاني انا و صديقنا الثالث نستناك

وريته المحادثة .. قال حلو شي جميل

اطلعوا انتظروا برا المكتب

طلعنا .. جا بعدها بدقايق و قال ادخلوا التوقيف و خلوكم عند المكتب الخارجي .. يوم

قالها و انا تمسكني النفاضة بديت ارج من الروعه

تو 3 او 4 داخلين مكلبشة رجولهم و حالتهم تروع الجني

طبعا بما ان موضوعنا تافه ما دخلونا جوا مع الارهابية

حتى العسكري اللي ع المكتب جدا حبيب و محترم نمزح و نسولف و الاهم انه ما يقعد كثير يروح كل شوي

و بديت اتقبل الامر الواقع .. و زي ما تعرفون مع قلة النوم و التعب تبدا فصلة المخ

شوي الا نسمع لجة و صراخ حريم برا العسكري ما كان موجود و احنا عند الباب الخارجي موب مقفل يعني عادي و اناظر الا 3 حريم داخلين و معهم 2 شباب اخوانهم

اول شي حسبت عائلتين بينهم تتش او شي .. بداية الوضع .. العسكري دخل الاثنين الاخوان عندنا .. اسمعهم يسولفون سوا .. :

( اي كنت مرجع اهلي من السوق جاني و قال انا المباحث و وراني ورقة مكتوب فيها اسمك .. قلت له هذا اخوي موب انا .. انا فلان .. لكنه و ربي تلني =(جذبني بقوة مع رقبتي) و كان يبي ياخذني غصب
انا يوم شفت الوضع كذا تطاقيت معه ....جو اخوياه يبون يفزعون معه و اضطريت ادافع عن نفسي

و لعلمك امي تقول انه هو اللي جا خذا ابوي امس من فراشه )) الاخ الثاني طبعا باين انه ملتزم او بداية التزام ..(( الله يعين الله يهديها بس ))

يوم خلصوا كلام انا طلع فوق راسي 120 علامة تعجب و استفهام

شوي دخل ضابط ببدلة عسكرية يقول وين فلان << اللي هو طاق 3 من المباحث لحاله ما شا الله تبارك الله

قال انا .. قال له الضابط .. ليه و ما ليه و يكلمه باحتقار .. مع ان الضابط حقير بس حبيته عشان صوته كانه صوته شبيه الريح .. انا لا شعوريا قلت الشباب فريق محترم و تعادلنا معاه بخطانا .. انا اناظر صديقي << يعني كاني افهمه اني اذب يعني اضحك

شوي الضابط قال لي .. ترا النفس هنا و حط يده بين حواجبه رح ف الزاوية ..

قلت ان شا الله .. الضابط حط الاخ القوي ما شا الله ف التوقيف الجنائي و الاخ الملتزم قاعد معنا .. راح الضابط للمكتب..العسكري سوا فيني خير بشكل خيالي ..سال الولد و قال له انتم وش سالفتكم.. انا نسيت التنكيت و اتحمست مع السالفه ..

و الله يا اخوان قصتهم على ما قالوا يندى لها الجبين .. اخت مطلقة ترفض انها ترجع لبيتها .. مستاجرة شقة قدام شقة اهلها .. تقول عشان اروح و اجي على كيفي ..

حبت واحد و قالت لابوها باتزوجه .. ابوها شايب عمره 80 سنة ... قال فكينا ما ابي مهر و لا ابي شي بس اشرط ان ابوه يجي يخطبك .. ابوه اتصل على ابو البنت قال له .. ما اخطب له و عشان ما اكذب عليك الولد راعي شراب و بنات و سفر ......

البنت على كلام اخوانها من شهرين ما يعرفون عنها شي .. و طبعا البنت حبيبها او يعني خطيبها له معارف ف المباحث .. الولد يقول تخيل .. اببوي شايب عمره 80 سنة و مرقد على سريره ف البيت .. يجون المباحث ياخذونه لان بنته شاكيته؟!!!!!!!

و بدون ما يقولون لاحد .. انا على حسب ما فهمت انهم جو ف فترة الظهر الكل منشغل بدراسة او عمل .. ردوا اهل الشايب قالوا لهم زوار او شي زي كذا ..

لان الولد يقول ما بقى مستشفى .. و لا بقت ثلاجة اموات و لا بقت مغسلة و لا بقى قسم ما سالت عنه فيه

ف الاخير يتصلون و يقولون تعال طلع ابوك من مدري وين << انا نسيت وين حطوه

و بعد ما طلع ابوه .. اتصل على اخته المشكله .. و زي اللي اشتد معها ف الكلام

رجعت و ارسلت له نفس رجال المباحث .. و تتهمه انه يهددها بالقتل .. حاولوا يعتدون على اخوه باستخدام العجرا=( عصا غليظه) دافع عن نفسه و ما شا الله خذاها منهم و طقهم فيها

دخل واحد وجهه يجيب ضيقة الصدر و الهم و معه الضابط اللي صوته فله

و العسكري دخل و طلع الولد السفاح

فاصل بسيط ..

اعتبروا انكم الضابط المسؤول عن القضية هذي .. قبل معرفة الملابسات .. بتميلون لصالح الاخت و الا ابوها و امها اثنين خواتها و اخوانها الاثنين

الضابط الله يستر عليه لعب ف عقله الشيطان زي ما لعب ف عقلي

و ظن ان البنت (( شليخه ))

واقف ف صف البنت ضد اهلها .. تخيلوا يقول للاخو عادي خلها تسوي تعال بلغ هنا ما تمد يدك

انا اناظر اتاكد .. وش السالفه يا الطيب ف السعوديه و لا فامريكا؟!!!

اقول ف نفسي هيه يالطيب يبو الشباب وش الي خلها و بكيفها

الولد الملتزم زي اللي هامه ستر اخته

يقول هي ما سوت شي و الضابط بكل بجاحه يقول اذا خاوت و الا طلعت مع احد تعال بلغ ما تسوي لها شي !!!!

يا ضابط يا دب .. البنت تنمسك متلبسة و هي تديت

=(مقابله صديقها) الله يحفظ اخواتنا المسلمات .. الولد ينسجن 8 شهور .. و البنت يتصلون على ابوها تعال استلمها

كيف تبيه يبلغ و فوق كذا يفضح نفسه !!!

الضابط خلا العسكري يدخل الاخ الملتزم للتوقيف

و قال لنا قبل لا يروح ..(( دورو لكم احد يكفلكم ))

هيه يالطيب انا سعودي يا هوه انا موب متسلف و منحاش انا موب حرامي انا موب مجرم

طلع العسكري من جوا .. قعد يتكلم معنا و الله انه برد حرتي و طلع اللي ف قلبي

قال...

الضابط هذا ****** و *****

اختي لو تسوي كذا موب اهددها بالقتل الا و الله لاذبحها و اشرب دمها ..

و معاه حق .. الله يحفظ اهلنا بس

شوي الا القسم بدا يهتز المكتب الاوراق طاحت من عليه الانوار طاحت

المساجين طلعوا يناظرون

و طبعا اندلع المصارخ و الصريخ يا انتي يا مدري وش

و اناظر و القى وحدة كبييييييييييييييييييييييييييييييييييييييييييييييييييييييييييرة داخلة

انا شفتها قلت سلام قول من رب رحيم قلت شكلها ضابطة جديدة و الا شي

طلعت اختهم الشريرة

الضابط كان يعاملهم قبل وصول اختهم بجفاوة و شده

ف هذي اللحظة جا كفيلنا

و الله على طلعتنا و الضابط يسند عجوزهم و شايل شنطتها و جايب لها موية

<< شكل شيطانه راح

طبعا للمعلومية الاحداث كلها هذي صارت ف حدود ساعة الى ساعتين .. حطوا ف حسابكم اني ف القسم مع صديقي من 3 و نص الى حدود العاشرة

يعني لا تحسبون انه اكشن دايم و فله بالعكس طفش << ينصحكم تراه

حدود الست ساعات قضيته في قسم الشرطة

مسحت كل خيال جميل عن رجال الامن .. مسحت تلك الصورة الخياليه اللتي ارتسمت لنا عبر الصحف و التلفاز .. لا لا .. هي لم تمسحها .. لكنها عرتها لنا على حقيقتها .. درس تلقنته عن كيفية التعامل معهم .. و كيفية تعاملهم مع الغير .. و استغلال لقوانين وضعت لمصلحة الناس ف حولوها لمصلحتهم الشخصية ..

لا اقولها عن الجميع .. نعلم ان الفئة القذرة قلة .. و لكنها القلة الغالبة

لكم و لكل دقيقة قضيتموها ف قراءة ما كتبته .. من واقع عشته ..

برايفت للجميع

<< ما سوينا شي ما راح اخسر لو اعترفت لكم الملف تقفل بس و ربي انا بريء بريء بريييييييييء

نسيت اقول لكم .. اثناء طلوعنا الاخ احمد قال كلمة رنت ف اذاني

لا تفكرون تشتكون ما راح تستفيدون شي

اشرحو معناها رجاء لمن ادركه

+ رايكم في مزاجية تطبيق القوانين على حسب هوا كل عسكري
+ رايكم ف الواساطات التي لعبت في حسبة مجتمعنا و نخرت ام كل شي فيه

+ رايكم فيني

<< امزح

f*y*d · #2 31/12/2009, 05:25 AM

احمد ربك بس ع العافية وترا الدنيا صارت مسكات تمسك مع الواحد وافهمها

حمدالله ع السلامة ,,

بطلة · #3 31/12/2009, 05:30 AM

= والله على قد ماضحكتني بداية الموضوع من أسلوبك وصرقعتك على قد مانكتدت علي بنهاية الموضوع من البنت الله يهديها المعفنة

الحمد لله الذي عافانا مما ابتلى غيرنا وفضلنا على كثير من خلقة استغفر الله بس .

= من سردك للقصة البنت يووووو لو مكان الظابط أوقف مع أهلها حزنت على أبوها مره ,,
المصيبة من زين اللي ذابحه نفسها عشانة وع

= رأي فيك بالبداية تضحك وبالنهاية خخخ>>مازالت متضايقة من البنت ,,

= رأي بمزاجية العساكر كثير اقرأ قصص شباب يشتكوا بصراحة وبدون زعل :
إنتم اللي جبتم البلى لنفسكم كيف ؟؟
لاتعطي الشخص أكبر من حجمة /احترمك احترمه مااحترمك قول زي راعي اللمبات هههه

= الواسطات : الكل يعاني منها , رقابة مافيش ,,
بس صدقني إذا حاولت ماتفكر بالواسطة والمستفيدين منها
وحط ببالك هدف تبى توصله وثق بقدراتك والأهم توكل على الله بترتااااااااااااااح
>>كلامي هذا مو مجرد كم كلمة قلتها وانتهينا هالكلام أقوله لنفسي أقولة لأخوي لما يتضايق من الواسطات ,,

= لا تفكرون تشتكون ما راح تستفيدون شي >>اشرحو معناها رجاء لمن ادركه
قصدة الأنظمة خرطي

بطلة

abo_nasser · #4 31/12/2009, 06:01 AM

موضوعك كوم وتوقيعك كوم ثاني ...اجل يعور؟؟ خخخخخخخخخخخخخ

برب برب الله يرج ابليسك..

___________________________

هلا وغلا بالحزين..

اكثر الدوريات تمسك الشباب الضعوف عشان يتسلون فيهم ويطقطقون عليهم..انا صارت لي اكثر من موقف معاهم...وبما اني بريء وما وراي الا
الدجه..يجلسون دايم يطقطقون علي انا الضعيف..

بالصيفيه اللي راحت كنت رايح للبقاله اخر الليل ووقفتني دوريه نزل منها
شايب شكله طفشان وما حصل غيري يتسلى به..اخذ مني رخصتي والاستماره ..بعدها قال:وين رايح..؟؟
قلت:البقاله..قال:وين انت ساكن..؟؟..قلت:هنا واشر له على حارتنا..

قال:فين تشتغل..؟؟

..(هنا عرفت انه طفشان وجالس يطقطق ع راسي)

قلت: توي متخرج وعاطل الحين..

قال: ثانوي..؟؟..قلت :لا من الكليه..قال:اهااا بالتوفيق واعطاني اثباتاتي..

هنا ربي حظظني اني طحت بواحد ما مرمطني معه للقسم وكمل الطقطقه علي هناك..

الحزين..

قصه حلووه واسلوبك واضح..

<---يقصد سلطان..

واذا للحين ساكنين جنب الجامعه خلني ارسلك رقمي بالخاص..ورقم لي معك..

وان شاءالله يعوره اليوم بعد..

بريموو..حرر ردك وبلا حجز ..خربت شكل الردود ..

سلاااااااااااااااااااااااااااااااااااااااام

Blue Sun · #5 31/12/2009, 06:09 AM

هلا والله بالحزين ..

صراحة قصتك تنفع تصير مسلسل خليجي ..

الحمد لله على برائتك وطلوعك من السجن ..

يعطيك الف عافية ,,

بريماكس · #6 31/12/2009, 06:42 AM

^^^
^^^

ابو ناصر ممنوع الحجز

لي عوده لمووووضعك ياحلوو ...

برررب

الـمـشـاغـب · #7 31/12/2009, 06:56 AM

يخرب بيتك على بيت بريماكس على بيت اللي يعوّر

لعنبوا غيرك خمسين ألف شخصية ومليون طعش ضمير مستتر في القصة؟

قسم بالله يا أنك لحست مخي بهالضمائر المتصلة ما دريت من هي تعود عليه من كثر الشخصيات في القصة .. لخبطتي

بس على العموم الحمد لله فهمت الزبدة

الحمد لله على السلامة يالمغازلجي

وثاني مرة لا عاد تطلع إلا مع ناس خبرة

كان المفروض أنك تطلب من الضابط الإتصال بأهلك وهذا حق من حقوقك ..
لكن وش نقول .. دلخ وخويه الكمخة أكيد بيلعب عليهم هالعسكر الحنوس

أنا قد صارت لي مشكلة مع شرطي .. بس ما راح أقولها عشان ما يقول مستر ريلاكس أني قايلها عشان أهايط

بس اللي بأقوله .. أن هالشرطي اعتذر لي وخلاني أمشي ثم اعتذرت له .. ليه؟
لأنه يعرف النظام ويعرف انه هو اللي بيروح فيها معي ..

المهم .. تشرفنا بقراءة قصتك المثيرة ولو أني كنت جنبك كان دعست بطنك لين تطلّع منه مفرقعات .. كله بسبب الضمائر المتصلة والمستترة اللي أقلق أهلنا بها

Hictar · #8 31/12/2009, 08:19 AM

إقتباس

الرسالة الأصلية كتبت بواسطة الحزين 2008


	له الضابط .. ليه و ما ليه و يكلمه باحتقار .. مع ان الضابط حقير بس حبيته عشان صوته كانه صوته شبيه الريح .. انا لا شعوريا قلت الشباب فريق محترم و تعادلنا معاه بخطانا ..

أنا مندمج مع سالفتك ، وحزين على وضعك
وخطمت بالذبه هذي وإنسدحت من الضحك

على كثر ما أسمع من قصص ومشاكل الناس
يروح بالي لمناظر البيوت
أحيانا تدخل حي راقي وتشوف بيوت كبيرة ومزخرفه
أو إنت ساكن في بيت إيجار وأنهكه إرتفاع الإيجار ، وتغبط راعي هالبيت إن الله رزقه ببيت ملك
لكنك ماتدري وش يصير وراء هالأسوار
فأحمد ربي سبحانه اللي بلاني الإيجار ، ولا يبلاني مثل ما بلى هالناس

الله يستر علينا وعلى بناتنا وكل المسلمين.

الشيهـانه · #9 31/12/2009, 09:16 AM

إقتباس


	حدث انه و من قبل عشرين سنة ابتلاني ربي و سكنوا اهلي حول جامعة الملك سعود للبنات << القلوب للملك سعود الله يرحمه

اول ماشفت عشرين سنة حسبت قصتك لها عشرين سنة
اقول شايب ومشبوه يالللله حسن الخاتمة

إقتباس


	طبعا زي ما نعرف الجو فيه حرارة شوي و الاخ صديقي خااااااااااااايس ف الجيب

هههههههههههههههههههههههههههههههههههههه
قسم تخيلت شكله مت ضحك
اجل ماسوى شي ومرزوز فالجيب هذي لحالها قصة

يكفي انه كل من شافه وهو بالجيب
يتحمد ربه على العافية والسلامة

إقتباس


	يقول شكلكم جايين تخطفون بنات

قوووووووووووو

ووووووووووووية

إقتباس


	انا و صديقي طبعا الاساسي بلاك بيري

لاااااه عند جامعتنا

وبلاك بيري وتحلفون انكم ماترقمون

إقتباس


	له الضابط .. ليه و ما ليه و يكلمه باحتقار .. مع ان الضابط حقير بس حبيته عشان صوته كانه صوته شبيه الريح .. انا لا شعوريا قلت الشباب فريق محترم و تعادلنا معاه بخطانا ..

ههههههههههههههههههههههههههههههههههههههههه

من هنا جاني شعور انك صادق وموبرئ

إقتباس


	و الله يا اخوان قصتهم على ما قالوا يندى لها الجبين .. اخت مطلقة ترفض انها ترجع لبيتها .. مستاجرة شقة قدام شقة اهلها .. تقول عشان اروح و اجي على كيفي ..

لاولو ماشاء الله عليك

مااشغلتك حالتك عن التليقف
على قضايا خلق الله
الحمد لله انك ماتشتغل فهاالاماكن
كان فضايح الناس كلها منتشرة
ساعة وحدة وفضحت الناس
ماخليت شي بتفاصيل قصتهم ماقلته
لوكل يوم شبتسوي

<<دوعابة

********

عموما عموما الله يستر

كل يوم واحد جايب قصته الاكشن مع السلطات

خوفي بكرى تجينا قصه من وراء القضبان

الله يحفظكم واخواني وشباب المسلمين
ويكفيكم شر هالعساكر والجرائم والشبهات
ويستر علينا وعلى كووول بنات المسلمين

الهلالي دائماً · #10 31/12/2009, 10:12 AM

هههههههههههههههههههههههه
هههههههههههههههههههههههه

هلا بك اخوي الحزين 2008

والله يصلح قلبك بصراحة قصة ممتعة

والحمد لله على سلامتك وبراءتك

وما شاء الله اسلوبك حلو وغطيت على بريماكس

بس في مقاطع يبيلها تشفير

وبعد اذنك تم تحرير التوقيع

دمت برعاية الله ,,,

the king yasser · #11 31/12/2009, 10:38 AM

ياحبيبي زين انها وقفت على انهم لطعوكم في الحجز ست ساعات موب زي ولد عمي

الي انسرق منه لابتوبن { 2 لاب توب

} وثلاث جوالات من عريف خذا سياراتهم ونقزهم في الجيب على القسم

و زي حالتك اشتباه وهم والله موب حقين هالحركات

رجال الامن فيهم الصالح وفيهم الطالح

لكن الاكثريه وبشكل كبيرالطالحين

والله الحين مانقول الا الله يكفينا شرهم بعد ماكنا نقول الله يحمينا بهم

parrot · #12 31/12/2009, 11:15 AM

يدوب وصلت لنهايه الموضوع ...........احتجت اقراء الردود

عشان افهم ايش السالفه

ولسع

حمد لله على سلامتك

‏Mr.RęLǻҗ · #13 31/12/2009, 12:03 PM

,,

إقتباس

أنا قد صارت لي مشكلة مع شرطي .. بس ما راح أقولها عشان ما يقول مستر ريلاكس أني قايلها عشان أهايط

والله اني اقوله صادق كل موضوع لازم تجيب فيه سالفه ومافيه سالفه تطلع بها مظلوم

كلهآ يعتذرونلك أو تطقهم آنت وآخويآك الأقوياء

/ ؛

انا مابي احلف اني ارسلت الرابط لكل الي عندي بالمسن عشان نحاول نفهم الموضوع

وحمدلله فهمناه , المواقف ذي دايم تصير حكومتك الرشيده موفره جنود بواسل

ومتعلمين وفاهمين ابد ماهم جايبينهم من قرى نائيه حتى الكتابه يالله يالله يعرفون لها

/ ؛

إقتباس

بس في مقاطع يبيلها تشفير

الحين خلصت تشفير ابو مقبل

إقتباس

و هي تديت

^^

وش موقعها من التشفير

/ ؛

الحزين 2008 مرسسسيآت يآبعد قلب ريلآكس آنت

,,

ابو حرب15 · #14 01/01/2010, 03:07 AM

لا تفكرون تشتكون ما راح تستفيدون شي

أتوقع يقصد تشتكون على الرقم المجاني اللي حاطته وزارة الداخليه للأبلاغ عن العنف من قبل رجال الأمن

مشعل911 · #15 01/01/2010, 01:58 PM

اما شطحت الشباب اوووووووف

هههههههههههههههههه

والله حرام اننا نجحد حقهم

والله فيه ناس منهم تحطهم عالجرح يبرى

وفيه منهم ناس (............................) >>علشان ما يكفشني ماجد

اهم شي سلامتك