الله سبحانه وتعالى انعم على الانسان بنعم لا تعد ولا تحصى ... والواحد دائماً ما يغفل عن شكر الله على هذه النعم .
اذكر موقف حدث لي قبل فترة قصيرة وهي أني كنت في أفطر في أحد المطاعم مع أحد الزملاء وخلال جلستنا شفنا اثنين شباب واحد مشخص بعقال وجاكيت اسود وثياب نظيفة وجزمة سوداء ( بكامل أناقته ) مع زميله اللي كان بدون شماغ أعمارهم تقريبا بين 22- 25 الحاصل ان الشابين لما دخلوا استغربت مشيتهم ولما جلسوا شفتهم يتحسسون الطاولة والأغراض اللي على الطولة بشكل غريب ... الحاصل أنهم صاروا فاقدين لنعمة البصر
وبصراحة المنظر حز في نفسي بشكل قوي جدا ... جا العامل وأخذ طلاباتهم والابتسامة والضحكات معه ما فارقت وجيههم تحس انهم أسعد الناس في الدينا كلها .
المصيبة لما بدوا في الكلام وبصراحة انا خلاص نسيت زميلي ونسيت الفطور وبديت استمع لهم وياليتني ماسمعت
كان الاول يشرح للثاني عن ايش ؟؟؟ عن الانترنت وعن فوايدها ويقول له تقدر تكلم اي واحد في العالم وتقدر تعرف كل شي وفيها معلومات وتقدر تدرس في اي مكان في العالم ... و ... و ... الخ ... الثاني رد عليه بكلمتين بس ...قال له : تنفع للعميان ؟؟ قالها كذا بدون مقدمات ولا شيء ... هذا اهم ماعنده لأنه فاقد لنعمة البصر ولا يبغى يسمع هالكلام عن الانترنت الا ويبي يستفيد ... والله السؤال جلس يرن في راسي ( تنفع للعميان ) وجعني قلبي ساعتها جلست افكر ؟؟ كيف حنا عندنا نعمة البصر ولا عرفنا قدرها ومكانتها ؟؟ يعني تخيلت اني محروم من نعمة البصر مثلا (
) كيف راح تصير الدنيا ؟؟ اصلا مجرد التفكير فيها والله انه يخوف ؟؟ يعني انت مثلا تخيل نفسك محروم من هذه النعمة ؟؟ اكيد حسيت بـنغزة كذا في القلب أثرت عليك ... يعني هالنعمة هذي كيف راح تقلب حياتك من فوق لتحت ؟؟ والله ياشباب حنا مقصرين ... نعم مقصرين في شكر الله على نعمة اللي أنعم بها علينا ؟؟ يمكن الواحد ما يحس فيها لكن لما يشوف غيره يحتاجها راح يحس في أهميتها .
وبصراحة الشابين هذولي غيروا فيني أشياء كثيرة الله يحفظهم ان شاء الله ويرد بصرهم يارب .