بسم الله الرحمن الرحيم

السلام عليكم ورحمة الله وبركاته

كل عام وانتم بخير واعاده الله علينا سنينا مديده






خطاب توجيه معلم جديد

* الأسم: شطيط بن نغيمش بن حنتوش المتشلـّوط !!!
* رقم الاحوال المدنية: **********
* مسمى الوظيفة: معلم تعليم عام
* قرار تعيين: 759/8
* موقع المدرسة الموجّه إليها: الرياض- حي الفيصلية ( الغالـّة)
* المرحلة: الثانوية
* التخصص: لغة عربية
* المرتبة: بند 105

داعبت سطور هذا الخطاب سعادتي وبهجتي فأخذت أجري فرحاً وسروراً في نفود الوشم معانقاً أتربتها وطعوسها الساحرة .. تلك البلدة التي احتضنت طفولتي حتى جعلت مني معلماً مربياً للأجيال و محوراً رئيسياً في بناء المجتمع وقدوةٍ لأبناءه..

ولم تقتصر الفرحة بي فحسب .. بل إن العائلة شاركت ابنها البار هذه المناسبة السعيدة بإقامتها حفلاً إقليمياً في المزرعة شمل تهاني وتبريكات الأقارب والأصدقاء لي متخللاً العبارات الصبيانية: اخس يا شطيط .. نقلوك للرياض وحطوك في الفيصلية مره وحده وغيرك رافسين تعيينهم للخرخير في صحراء الربع الفاضي!! .. تكفى يا شطيط لا تنسى ترقـّم لنا بنات الفيصلية إذا شفتهم !! <<< الشرهه عالحمار اللي عازمهم !!

وفي صباح يوم السبت.. حزمت حقائبي و ارتديت أفضل ملابسي ولبست نظارتي الكبيرة ثم ركبت مع احد (الكداديّن) و اتجهت إلى العاصمة الرياض مبحراً في مخيلتي عن رقي وتحضر هذه المدينة وبالأخص الفيصلية التي لطالما رأيت شموخها و رونقها وإبداع تصميمها في التلفاز .. فكيف بسكانيها ؟؟<<< يا جماعة الخير وضحوا لهالبريء الطاهر تراني رحمته !! ...

وحنا ماشين في الطريق.. شوي الا و نشوف باصات نقل المعلمات متقلّبه والبعارين متمددة جنبها تخرخر دمان .. تأملت في أحد الباصات المنكوبة والقى رجل بعير متفحّمة داخله في فم وحده من المدرسّات اللي ناشبتن في الطبلون .. وجنبها زميلتها متكوّمة في عبايتها ومتعلقه عالباب!!.. ناظرت عالجنب واشوف الباقي طالعين مع الدرايش يلفظون أنفاسهم الأخيرة ..

كمل الكدّاد طريقه بحكم انه متعود على هالمواقف الروتينية اللي يشوفها يومياً !! .. وبعد معاناة السفر وصلت للرياض وجلست عالرصيف ثلاث ساعات احاول أوقف تاكسي و المشكلة كل من قلت له "حي الفيصلية" على طوول يحط بالأول ويكنس عالبنزين.. وش السالفة ؟؟ <<< قسم بالله على نياته هالولد .. تكفون اشرحوا له قبل لا يتقطع قلبي عليه ..

تعددت محاولاتي مع سائقي الأجرة حتى صادفت أحدهم متردداً بين الحاجة للنقود والخوف من المكان المقصود فغلبت عليه الحاجة وأعلن موافقته بصوتٍ ضئيل خالطه التوتر والندم .. ركبت معه وسرنا في طريقنا إلى حي الفيصلية في صمتاً رهيب تشوبه نظرات السائق لي بكل شفقة و رحمة وكأنني سأذهب إلى الجحيم هههههههههههه <<< وتضحك بعد !!

وعند وصولنا لمشارف الحي .. توقف السائق واعتذر عن إكمال الطريق معللاً بذلك خطورة المكان !! .. فأخذت أنظر حولي وإذا بي اسأل السائق : وش ذا المزبلة .. وين الناطحة ؟ .. فأجابني ضاحكاً: ما حطوا برج جوال علشان يحطون لك ناطحة .. اقول بس عطني حسابي 50 ريال وتوكل على الله .. اجل ناطحة سحاب هنا خخخخخخ!!...

قطع حبل تساؤلاتي ذلك الرقم الغريب وقلت مستهجناً: ليش 50 ريال؟؟ .. فأردف مجيباً: انت الظاهر حبيب وما تدري عن البلاوي اللي تصير هنا.. يكون في علمك هالحي من أجرم الأحياء في الرياض ومشهور باللحووج والمخدرات والحشيش والعنف يعني توصيلتي لك هنا تعتبر مجازفة !! .. قاطعته: طيب والناطحة ؟؟ .. صرخ في وجهي مستنكراً : يا خوي ذبحتنا بهالناطحة ... اصحى يا غبي .. تراك منتب في العليا... انت في حي حقير اسمه الفيصلية و مشهور بالغالـّه .. يعني بالعربي اللي جابك هنا لعب عليك يا المخفة !! .. ثم اختتم غاضباً: فهمت يا حمااار !! ..

انطفىء نور سعادتي وانهارت طموحاتي وأمالي عندما هبطت كلمات ذلك السائق كالصاعقة تصفع خدي و تيقظني من حلمٍ كنت قد غرقت فيه ..

نزلت منهاراً من السيارة أبحث عن المدرسة في طرقاً متصدعة وأزقةٍ مظلمة ومنازل موحشة و رديئة .. فاستوقف نظري جلوس أحد داكني البشرة من السكان ( لابس ثوب رمادي يسحب تحته سروال رياضة أصفر مخطط بأحمر) وينظر لي بعينيه الحارقة نظراتٍ مرعبة ومريبة شبيهه بنظرات مصاصي الدماء لفريستهم!! ..

تجاهلته مسرعاً في خطوتي و مرتعداً من نظرات السكان الذين خرجوا من بيوتهم وازدادت كثافتهم لرؤية ذلك الكائن البشري الأبيض الذي اقتحم مسكنهم بكل جرأه وسذاجة .. فأخذت اجري واجري حتى وصلت إلى المدرسة التي لا تقل رداءتها عن رداءة المباني الأخرى في هذا الحي الدنيء ...

دخلت غرفة المدير حاملاً خطاب التوجية فأندهشت من جدرانها المليئة بكتابات طائشة: ( يا روحي يا عتاب ) .. (زمانك لو صفا لك يوم لا تحسب صفت لك كل الأيام) .. (انا فدا عودك يا بو رايش) .. (يا ليتني طير ثم اطير واقب في حصة التعبير) .. (ابو صالح سرى ليله هل الدمع من عينه).. (تحية لطخمات الغالـّه ) .. (استاذ ناصر على تبن) .. (ذكريات شلة الأنس وما وراء الكواليس فصل 3/3 فرع المروجين)<<< كل هذا على جدران غرفة المدير اجل جدران الحمامات وش مكتوب عليها ؟؟ ..

لم تكن تلك التفاهات الطائشة سوى حافزاً لي كي أجعل من هؤلاء الشرذمة طلاب مثاليين و مصلحين في المجتمع بحنكتي التربوية !! ..

دخل علي المدير ( أبو تركي ) وعطيته الخطاب ثمن قام يناظرني بتمعن وقال: ما شاء الله مشخّص و مسكر الياقة وباخ عطر وماسك شنطة .. فعلاً مدرس مثالي .. بس صدقني كلها يومين وتداوم بصروال سنة هذا إذا ما تعرضت لحالة تحرش من عوامل التعرية اللي هنا !! .. قاطعته بغلظة: عفواً وش اللي صروال سنة وتعرية يا استاذي الكريم .. احترم البيئة التعليمية لو سمحت!! .. ضحك ثم أستطرد ساخراًً: هذا كلام كل المستجدين في البداية .. شف وانا اخوك نصيحتي لك اترك هالمدرسة أحسن لك ولا بتشوف شي ما يسرك من هالزومبي اللي هنا !! ..

نفخت صدري بكبرياء وثقة عمياء: بالعكس .. اللي يسوونه الطلاب شي طبيعي وخصوصاً انهم في مرحلة مراهقة .. واحنا كتربويين لازم نبدل سلبياتهم إلى ايجابيات ونكون قد المسؤولية يا استاذي الكريم!! .. ضحك المدير ساخراً للمره الثانية : لا يا شيخ .. اقول لا تنسى اني نصحتك بس !! ..

بعدها أخذ القلم و كتب أسفل الخطاب: نفيدكم علماً بأن المرحوم قد باشر العمل في المدرسة ليوم السبت سائلين المولى عزوجل ان يجعلها أخر الأحزان ويلهمه الصبر والسلوان ويفرج عن كربته ويجمعه بأهله وذويه وهو بصحة وعافية اللهم يا حي يا قيوم فك أسره عاجلأ غير آجل يا سميع الدعاء !! ..

بعد ما وقـّع المدير أسفل الخطاب .. قام يجيب الختم من الدولاب اللي وراه .. وفجأه لمحت ورقة دفتر ابو اربعين على ظهره مكتوب عليها (( حمار للبيع )) !! ... قلت له: يا ابو تركي فيه ورقة وراك مكتوب عليها حــ ..!!.. قاطعني بربكة: ايييه الله يهديهم عيالي دائماً ينسون أوراقهم معي<<< والله من النصب !! ..

ختّم الخطاب ثمن عطاني جدولي وعلى طول رحت أباشر عملي بحماس منقطع النظير .. وانا ماشي في الأسياب اسمع همسات المدرسين وهم يقولون: وصل الضحية 30 وصل !! .. تجاهلت خزعبلاتهم المغرضة و كملت طريقي للفصل بكل جاهزية و همه دءوبة ..

دخلت الفصل وأخذت انظر لأربعين طالب بنظرات ٍ قاسية وصارمة تحتويها الشدة و رباطة الجأش في هدوء وسكون اثبت للجميع جدارتي وجبروتي في السيطرة على الطلاب .. وفجأه وقف طالب يدعى (علص) وهو يشير لنظارتي الجميلة قائلاً: شوفوا شوفوا الدرايش اللي لابسها على عيونه !! .. تلاشى الهدوء شيئاً فشيئاً وتعالت ضحكات الطلاب الهستيرية وبدأت افقد السيطرة على الفصل حتى انقلب رأساً على عقب ..

حاولت اهجّد الفصل واسكـّته ما فيه أمل .. شديت عليهم بحدة نظراتي وبرضو ما حولك أحد .. ضربت عالطاولة ببطش يدي ويا جبل ما يهزك ريح!! .. قاطع (علص) ضحكات الطلاب قائلاً: شوفوا شوفوا شلون شنبه عريض واصل لأذانية وخشمه طويل واصل لرقبته كن وجهه علامة زائد !! .. عقبها الفصل انفجر ضحك وانا اللي تقمط نظراتي الحادة وبدا وجهي يسيح من التحطيم !! ..

كرر الحقير (علص) مصالته: أستاذ فيه خمس طلاب عندهم قصر نظر ممكن نجلـّسهم على حواجبك ويشوفون بنظارتك الكبيرة !! .. تمزّعت بطون الطلاب من الضحك .. وانا اللي عيوني بدت تستسلم لنظرات الأسى و الحزن وبدت ثقتي بنفسي تهتز خصوصاً وانا اشوف براطم الخوال تزبّد وترج يمنتن ويسره من أثر الضحك ..

استجمعت قواي واسترجعت جزء من ثقتي مبتسماً في وجه الطلاب: هههه ماشاء الله دمكم خفيف .. طيب يا شباب .. مزحنا قبل شوي وضحكنا مع بعض.. الآن انتهى وقت المزح و نبي ندخل في الجد!! ..
بعد ما قلت تلك العبارة رفعت رأسي شامخاً بكل فخر واعتزاز قائلاً : معكم أستاذ شطيط بن نغيمش بن حنتوش المتشلـّوط !! .. ما امداني أكمل كلامي الا ويقاطعني الوقح (علص) وهو يقول بعجلة: المطر المطر !! .. سألته: وش اللي المطر ؟؟ !! ..قال بذهانة: هذا حل اللغز اللي قلته قبل شوي !! .. قلت له بكل براءة : عفواً هذا أسمي موب لغز !!.. لم أكد أكمل توضيحي إلا وتعالت ضحكات الطلاب المستميتة فأدركت بأن (علص) يسخر مني للمرة الرابعة ..

رفعت نظارتي بجدية ومشيت بين الصفوف قائلاً: خلاص يا شباب سكوووت .. ترى اللي تسوونه عيب .. يجب علينا أن نتحلى بالأخلاق الحميدة ونقتدي بخُلق السلف الصالح فنحن شباب الأمة وعصبها .. نحن شبــ .. دررردوووب <<< صوت طيحتي عالبلاط بعد ما عكرفلي طالب حيوان اسمه ( جويعد) !!

وقفت وانا انفض الغبار عن ثوبي وسط ضحكات الطلاب على غبائي !! .. عقبها قفلت اخلاقي ميه وثمانين درجة .. و أقول لـ (جويعد) بعصبية صارخه: انت اللي حطيت رجلك قدامي ؟؟ .. حط عينه في عيني وقال: ايه انا .. عندك شي ؟؟.. قلت: لا بس بغيت اتأسف لك على رجلي اللي صقعت في رجلك بدون قصد !! <<< الخوف سلطااان !!

رحت عند السبورة وعطيت الطلاب مقفاي علشان اكتب مقدمة تمهيدية للمادة .. ما دريت الا و يسنتر على ظهري قوطي ببسي فك ست فقرات من عامودي الفقري !! .. التفت بصعوبة بالغة وعطيت الطلاب نظرة يغلب عليها الغضب والقسوة ثمن شلت القوطي وحطيته في الزبالة قائلاً: أخي الطالب اجعل من فصلك نظيفاً ومميزاً برمي العلب والقاذورات في القمامة!! .. شوي ويمحطني على فمي نفس الطالب بقوطي ببسي ثاني فرّق ضروسي عن بعضها وهو يقول: يعني قصدك نرميها هنا خخخخخخخخخخخخ!!

استخدمت أسلوب الترغيب باللين في التعامل والتحفيز على الإنضباط مقابل زيادة الدرجات وتبسيط الإختبارات ولكن دون جدوى .. استخدمت كافة الأساليب والطرق التربوية وأيضاً دون جدوى !! ... وش الحل ؟؟

رن جرس الحصة وتوني بطلع من الفصل الا ويناديني ( جويعد ) : استاذ استاذ !! .. قلت له : نعم !! .. قرب مني وهو يتمحص في وجهي قائلاً: فيه شيب في شعر خشمك !! .. تفاعلت معه بحماس: وين فيه ؟؟ .. قرب أكثر وهو يأأشر بأصبعه على فتحة خشمي الرائع: شف هنا !! .. ما أمداني اتبّع مع اصبعه الا و يصفق خشمي بكتاب رياضيات وهو يردد ضاحكاً: لعبت عليك لعبت عليك !! ..

شلت شماغي و نظارتي اللي طاحوا و مسحت الدم من خشمي ثمن طلعت لغرفة المدرسين وانا مسكر اذني من ضحك الطلاب على سذاجتي !! ..

اول ما دخلت للغرفة حسيت اني داخل قسم العظام في مستشفى الشميسي .. شفت معظم المدرسين مجبسة يديهم ورجليهم وحاطين شاش على وجيهم و انواع الكسور و الرضوخ والتشوهات .. وكل واحد يقول يالله نفسي ..

انعزلت على حده وطلّعت دفتر التحضير أحضّر للدرس الأول .. شوي ويلفت نظري شخص مجبّسة رجوله جايني يزحف على بطنه من أخر الغرفة وهو يقول: هلا والله بالضحية رقم 30 .. هلا بك في مهنة الضغط والسكر والقلب و جميع الأمراض المستعصية .. معك اخوك المرشد الطلابي (صالح) !! .. قلت بريبة: ونعم والله !! .. بعدها سكت وانشغل في عميلة الزحف الليين وصل لي وجلس جنبي وهو يلهث: تصدق اني اشفق عليك .. أحد يدخل التدريس في هالوقت .. من أول المدرس له هيبة وشخصية لدرجة انه إذا مشى في شارع , الطلاب يمشون مع الشارع الثاني من الخوف.. لكن هالحين وزارة التربية صارت في صف الطالب و سحبت كل صلاحيات المدرس وهيبته بحجة التوجية والإرشاد بزعمهم يقلدون التعليم في اليابان .. يعنبوكم وش جاب طلاب اليابان لطلاب الصمّان ؟؟

قلت له : لا لا انا اختلف معك يا أستاذ ( صالح) لأن التوجية والإرشاد هو الطريقة المثلى للتعامل مع الطالب وليس الضرب والعنف .. يمكن تكون الوزارة غلطت انها نشرت خبر منع الضرب في الجرايد و حسست الطلاب انها في صفهم ضد المدرس .. لذلك انا اشوف المفروض على الوزارة انها راسله القرار كتعميم داخلي لمدراء المدارس وفي كل الحالتين القرار بيوصل للمدرس صاحب الشأن <<< تصفيق حار لهالمدرس المثالي تكفون !!

أشار (صالح) بإصبعه على إحدى الزوايا المظلمة قائلاً: شايف المدرس اللي ينتف في شعره و يكلم نفسه هناك !! .. نظرت إلى رجلاً مأساوي مطأطأ رأسه إلى الأرض فقلت بفضول: ايه وش فيه ؟ .. قال: هذا كان من أفضل المعلمين على دفعته .. متمكن من المادة و يشرح بذمه وطبعاً المسؤولين ساحبين عليه وجاحدينه حتى كلمة شكر ما عطوه .. وفي يوم من الأيام تبلى عليه طالب حاقد كان راسب عنده واشتكاه بتهمة التحرش الجنسي .. بعدها عينك ما تشوف الا المسؤولين والمشرفين التربويين جايين ركض من الوزارة وانواع التحقيق والإستقعاد اللين صدر قرار بفصله ولولا الله ثم الطالب اللي رحمه واعترف بالحقيقة والا كان هالمسكين يبيع مساويك عند بوابة الوزارة !!

ترررررررخخخخسس <<< اي صح نسيت اقولكم ان الجرس مكسور !!

اوه رن الجرس.. عن اذنك يا استاذ (صالح) عندي إشراف فسحة !! .. ذهبت إلى المقصف شغوفاً بلقاء الطلاب ومتحمساً لتنظيمهم متجاهلاً ما سمعته ورأيته !!

وصلت للمقصف و أشوف طلاب المدرسة كلهم متكدسين على فتحة وحده وانواع الطقاق والمدافف !! .. حاولت اسيطر عليهم ما قدرت .. صارخت بأعلى صوتي وبرضو ما حولك أحد .. وفجأه جت على بالي فكرة تربوية جهنمية بعد ما لفت نظري طالب طوووويل القامة مفتول العضلات سوداوي البشرة شاحب الوجه هادي الطبع يدعى ( بلال) وهو يخترق الصفوف والطوابير بكل تهميش للأخرين <<< والله يا هو طوويل لدرجة انه حاط لمبة ناطحات السحاب الحمرا على جبهته منعاً لتشميع الطائرات فيه !! ..

تقدمت للزحمة واخترقت براثنها اللييين وقفت قدام ( بلال) وانا رافع راسي مية سنتيمتر عامودي واقول له: باين عليك أعقلهم وأشطرهم لذلك انا قررت أعينك " نظام" تشرف معنا على الطلاب في الفسحة والمصلى وطبعاً ما راح نقصر معك بالمعاملة و الدرجات !! .. نزّل (بلال) راسه ميتين سنتيمتر أفقي وناظرني بنص عين ثمن دعس على وجهي وكمل طريقه ولا كأن فيه مواطن شريف واقف قدامه!! .. بعدها توالت دعسات الطلاب على وجهي اللييين توسمت أرقام مقاسات نعالهم عليه ..

طلعت من الزحمة زحفاً بعد جهداً جهيد ثمن وقفت وانا انفض الغبار عن وجهي .. فجأه حسيت بغصه و اتفل تفله مريرة طلع معها زبيرية واحد من الطلاب ناشبه في حلقي !! ..

لبست شماغي ويجي عندي البثر (جويعد) قائلاً بحماس: استاذ شف فيه شيب في شعر خشمك !! .. قلت بذهانه: علينا يا (جويعد) التسذوب.. لا تتعب نفسك منيب شايف شي!! .. قال: اصلن وشلون تشوف اللي داخل خشمك يالغبي !! .. ويمحطني بطراااق على خشمي للمره الثانية وهو يردد ضاحكاً: لعبت عليك لعبت عليك !! ..

شلت شماغي من الأرض ونظارتي اللي نشبت بين حدايد المقصف ومسحت الدم من خشمي ثمن رجعت لغرفة المدرسين متغلق وضايقن صدري.. توني بجلس الا ويدخل علي المدير: استاذ شطيط عندك حصة إنتظار في فصل 3/3 !! <<< هالحين انا ما صدقت اطلع من هالفصل وافتك من غثاثة ( علص) .. ارجع له وحصة إنتظار بعد !!!

اخذت شنطتي بقوم .. فجأه لمحت ورقة على ظهر المدير وهو طالع مكتوب عليها ( حمار للتقبيل ) .. قلت: يا ابو تركي فيه ورقة وراك مكتوب عليها حـ.. !! .. قاطعني بربكة: ايييه ذا العيال الله يصلحهم ما ودهم يتركون عادة نسيان أوراقهم معي

دخلت لفصل 3/3 و تفاجأت بحادثة لم يسبق لها مثيل في الميدان التعليمي!! .. شفت الطلاب يعمّرون حشيش ويشربون عيني عينك !! .. يشربون حشيش في الفصل !! .. حشيش يا جماعة الخير !! ..

ما قدرت امسك نفسي من العصبية وانفجر عليهم غاضباً: لو سمحتم ممنوع التدخين !! <<< بالله عليك !! ورا ما توزع عليهم منشورات توعويه عن التدخين وتغني لهم" سلامتك سلامتك نود لك سلامتك" بعد ..

الجدير بالذكر .. ان الطلاب فقدوا من الشرب و تمسك معهم يسبحون في بحر ..اللي قاموا يوخرون الطاولات علشان يسبحون !! .. و اللي يطب صاروخ عالبلاط ويشمّع فيه وهو يحرك يديه ورجوله قائلاً: يمديكم عالسباحة !! .. وخويه وراه يلحقه وهو يزحف: عوووو جاك سمك القرش!! .. واللي جالس على الأطراف مسوي بينقذ خويه من القرش وماد له طرف شماغه وهو يقول: اسحب اسحب!! .. واللي يمشي وراهم وهو يقول: وخرر انت وياه عن السفينة !! .. ما امداه يقول "سفينة" الا ويطمر عليهم طالب من فوق الطاولة وهو يقول: تششششش ( يعني اني موج )
بعدها قام طالب اسمه ( صنيتان) يلاحقهم وهو يصارخ : طوووط طوووط خفر السواحل وصل .. وقف على جنب انت واياه !!.. جلس ( صنيتان) يحوس ثمن طلع برا الفصل ويشطف غرفة المدير وهو يردد: طووط طووط !!.. كمل طريقه وطلع من المدرسة وهو ما زال يردد: طووط طووط !! .. ومن بعدها ما عاد رجع !!

ناظرت للزاوية وأشوف ( جويعد ) جالس يدف الجدار .. وخويه جنبه يسأله: وش فيك ؟ .. قال: ببعد الجدار ما ابغاه جنبي!! ... قال: اجل دفـّه بعيد لا يطيح علي!! ..تحمدت ربي على نعمة العقل والتفت للجهة الثانية وأشوف ( علص) واقف قدام المكيف يناظره بعصبية وهو يقول: لا تنفخ !! .. وجنبه ( بلال ) الطويل ماسك له زاوية و جالس بكل هدوء وسكينة يقرا كتاب ( لا تحزن ) للشيخ عايض القرني : !!

جاني ( علص) وهو يشفط الزقارة بعمق وينفث في وجهي قائلاً: خذ اشرب؟ .. قلت: لا معليش انا ما اشرب !! .. ما وعيت الا وهو قاضبني من رقبتي وينشّبني في السبورة: اشرب لا افقـّع وجهك يا حمار !! .. قلت بخوف: سم طال عمرك !! <<< لا تشرهون على سلبيتي لأن الوزارة فارضتها على المدرس بموجب قرارها السامي رقم 3602/31 بتاريخ 13/9/1417: " يمنع منعاً باتاً على المعلم حمل العصا أو ضرب الطالب مالم يبطحه أرضاً "

راعيت رزقي وأكلت تبن بموجب القرار السامي المذكور أعلاه .. وأخذت الزقارة وشربت بالإكراه .. عقبها بديت أفصل وصرت اشوف بحر قدامي وسفينة وسمك قرش وكل الخرابيط اللي فوق صارت واقعية !! .. أخذت الزقاره و أشفط شفطتين و ثلاث شفطات واربع فشطااات وخمس طفشااات وست شطفااات اللييين تمكن مني مفعول الحشيش و حسيت بشد عضلي في مخي وبديت اعيش دور البحر من الفقده... بعدها فصخت كل ملابسي ما عدا صروال السنّه وأرقى على الطاولة وأنا أهز خصري بكل خلاعه يعني اني أحد حسناوات شاطىء ميامي !! .. الطلاب قاموا يصفقون لي ويطبّلون عالطاولات وانا اللي اتحمس وأردح رقص بصروال السنه واسترسل بالغناء مغرداً: ماشربش الشاي اشرب ازوزا انا ... سو يا سو حبيبي حابسو .. بوس الواوا خلي الواوا بح .. فرشي التراب يضمني وهو غطائي !! <<< خروج عن النص !!

دخل علي استاذ ( صالح) ويجرّني من اذني برا الفصل قبل يصير ما لا تحمد عقباه !! .. ركبت معه في السيارة وانا أغني: أمه نعيمة نعمين خلي عليوه يكلمني!! .. غثيته بهالأغنية طول الطريق الليين وصلنا لبيته وانا مازلت مستمر في التغريد!! .. دخلنا البيت واطيح في الصالة من الدوخه!!

قمت من بكره الصبح اتلفت يمين يسار احاول اتذكر وش صار امس .. وش اللي جابني هنا .. وما لقيت جواب!! .. طلع استاذ (صالح) من غرفته وشرح لي كل اللي صار !! ..

استحقرت نفسي بعد اللي سمعته .. ولكن كالعادة تغاضيت عن الأمر ثمن رحت للمغسلة اغسل وجهي استعداداً للدوام !! .. ناظرت في المراية وبديت اتأمل في شخصيتي المسالمة !! .. فجأة اقشعرت المرايه و طلع لي فيها شخصيتي العنفوانية تقول لي : إلى متى بتصير ذرووق و جبان .. إلى متى بتصير زلااابة يا زلاااابة!! ..قاطعتها هائجاً: لااا انا منيب زلابة !! ..

أخذت شخصيتي العنفوانية تردد: يا زلابة يا زلابة!! .. فأثارت جنوني وخرجت من بيت الأستاذ (صالح) أركض غاضباً من تلك الكلمات القاسيه و أنا أصرخ قائلاً: انا منيب زلابه .. انا قوووي .. أنا بات مان .. انا حليب السعوديه <<< لا عاد تمدح نفسك تكفى !!

وصلت للمدرسة ودخلت الحصة الأولى بنفسيه منهاااره .. أول ما دخلت لقيت (علص) والطلاب يناظروني بنظرات مكر ودهاء ذكّرتني بشرفي المهدور أمس !!

فتحت الكتاب بشرح الدرس الاول .. ويقاطعني (علص): كيف صروال السنّه ابو نغيمش ؟ .. بعدها قام يتطنز علي ويرقى فوق الطاولة ويرقص وهو يغني بسخرية: ما اشربش الشاي اشرب ازوزا انا !! .. والطلاب يناظرون فيني ويضحكون ضحكات ماكره حطمت نفسيتي وخلتني البس نظارة شمسية علشان اخفي دموعي الغرّاء !! .. سكت (علص) ثمن قال: الله يهديك يا ابو نغيمش .. شاري نظارة شمسية بعد .. كان ركّبت ستاير لنظاراتك الطبية اوفر لك خخخخخخخ!!

بعدها همست على مسامعي شخصيتي العنفوانية: يذب عليك وتسكت له يا زلابة .. وخرر الله يلعن اللي مقضبك الطاره !! .. فجأه شعرت بشخصيتي العنفوانية تتغلغل في جسدي وتركل براءتي وطيبتي خارجاً !! ..

استفحل جسمي واستنشطت عضلاتي وقلبت عيوني حمر!! .. رميت النظارة والشنطة وفتحت الياقة و رفعت كمومي بكل سربته .. ثمن اتجهت لـ ( علص) بجبروت لا مثيل له !! .. فجأه اعترض طريقي ( جويعد ) : استاذ فيه شيب في شعر خشمك !! .. عطيته نظرة حارقة وامحط خشمه بأقرب كرسي ثمن رفعت رقبته وأشنقه بسلك المكيف !!

دب الذعر والخوف في صفوف الفصل وانا اللي أجرّ (علص) من أذنه لمقدمة الفصل و أفتح فمه قدام الطلاب وأأشر على سنونه قائلاً: وش ذا السوس يا قذر .. كل هذا سوس .. يعنبوك تاكل زفلت انت .. وبعدين وش ذا الثوب الوصخ .. يعنبو بليسك ثوبك ذا لو اصفطه انكسر من الوصاخة يا وووصخ .. رح اغسله بفازلين ولا عاد تجي للمدرسة الا وانت نظيف يا شرذمة !!

جلست اذب على ( علص) الليين طاحت حنوك الطلاب من الضحك عليه!! .. وبعد ما بردت حرتي بالذب عليه , مسكته تصفيييق الليين قال ربي الله .. عقبها قاموا علي ست طلاب بيفزعون لخويهم وانا اللي استسعر عليهم تصفييق وتلكيييج خليتهم عظة وعبرة للمدرسة كلها <<< ست طلاب يا ميتاب !! ..

ومن يومها قررت اني اضرب بقرارات الوزارة عرض الحائط .. وصرت ما ادخل لأي فصل الا بعجرة امغط بها المشاغبين ( المئيوس منهم تربوياً ) اللييين انضبطوا الطلاب و رجعت المسيرة التعليمية للمدرسة وهيبة أعضاء هيئة التدريس واحترامهم .. وصارت المدرسة تشارك في مسابقات الإلقاء والمسرح و دوري مبارايات الكورة مع المدارس الثانية لدرجة انها أخذت المركز الثاني على مستوى جنوب الرياض ..

وبعدها بيومين .. استدعتني الوزارة للتحقيق وأحالتني على لجنة قضايا المعلمين بعد ما ثبت اني احمل العصا واضرب الطلاب.. وبعد إجراءات مريرة طبقوا بحقي عقوبات نظام تأديب الموظفين !! ..

أثناء ذلك همست على مسامعي شخصيتي العنفوانية: يا رجال كل تبن انت وهالوزارة .. والله انت الكسبان على هالعقوبة .. اجل لا شكر ولا حرص ..و صاجينا بالبيئة المدرسية ونص المدارس عندنا فصولها مطبخ ومقلط حريم وغرفة نوم حتى الحوش قالبينه ملعب بدون ما يبعدون الدينمو اللي ما فيه رجل طالب ما شمعّت فيه ..

رحت لمكتب مدير التربية و التعليم وكتبت استقالتي له ثمن قضبت الباب .. فجأه استوقفتني عنفوانيتي قائله: لحظة لحظة نسيت شي مهم !! .. رجعت لمكتب المدير وصفقت جبهته بالدباسه ثمن طلعت راجع لقريتي العزيزة!!

مسكت طريق صلبوخ عائداً لقريتي .. شوي الا واشوف واحد يمشي ويردد " طووط طوووط" .. ويوم دققت فيه الا وهو ( صنيتان) اللي طلع من الفصل وما عاد رجع !!

كملت طريقي .. وأشوف باصات نقل المعلمات متقلّبه عالطريق وانواع الإصابات والضحايا المتوالية واليومية!! .. تبادلت ضحكات السخرية مع شخصيتي العنفوانية على هالوزارة اللي فالحه تراقب دفاتر التحضير وكشوف غياب المعلمين وتاركه أرواحهم تهدر يومياً !! ..

ختاماً .. وصلت لمزرعتنا.. ومن يومها وانا اسقي الزرع والقـّح النخل واقابل هالعنز والخرفان بكرامة محفوظة ابرك لي من مقابل طلاب بدون كرامة!!

برايفت حبيباتي المعلمات :

نصيحة من محب غيور .. ابعدوا عن حي الغالّه .. وانتبهوا على أنفسكم .. تراكم غالين علي !! .. الا ورا ما تتركون التدريس وتجون عندي في المزرعة نلقّح النخل ونحلب الماعز ونقطف من أشجار الزيتون ونلعب لعبة " انا الذيب باكلكم" نراكض ورا بعض في حقول القمح والرز !! <<< يعني حقير ونصاب بعد !!

برايفت وش اسمكم انتم .. ايه ذكرت .. برايفت أخواني المعلمين<<< يقول هالبرايفت بدون نفس

انتم أعمدة هذا الصرح العظيم .. أنتم النور في الظلمة .. انتم أساس بنيان هذا المجتمع .. ثابروا يا أخواني .. خلكم في التدريس مهما تصفقتوا وانداست كرامكتم تراكم تحملون رسالة سامية .. وإذا تبون نصيحتي اطلبوا نقل لحي الغالّه<<< ما يبيهم يجون للمزرعة !!

وش دعوه..
61 ما اعجبهم الموضوع..!

إقتباس الرسالة الأصلية كتبت بواسطة سمني انت * الأسم: شطيط بن نغيمش بن حنتوش المتشلـّوط !!!

و نعم بالمتشلوطين كلهم والله..
اسمك مهوب يفشل أبد..
^
^
^
رحمتك ودي أرفع الموضوع بس عجزن أقراه

^^^^^^^
هههههههه
نورت الموضوع يالغلا...

الا والله اعجبني انا ,,

بصراحة ما احب المواضيع الطويلة لكن موضوعك شدني يالبى قلبك.

كل عام وانت بخير وصحة وسلامة ياراعي المشكلات هههههههههههههه >> امزح.






لكم ودي

سفير الشوق

إقتباس الا والله اعجبني انا ,, بصراحة ما احب المواضيع الطويلة لكن موضوعك شدني يالبى قلبك. كل عام وانت بخير وصحة وسلامة ياراعي المشكلات هههههههههههههه >> امزح. لكم ودي سفير الشوق

تسلم ياقلبي..
نورت الموضوع يالغلا..

إقتباس قرأت القصة كلها << جاني ضحك مو صاحي مع كسر خاطر انت الي كاتب القصة او ناقلها ..!! هل هذا الحي ( الغالة ) موجود فعلا أم انه من نسج الخيال ..!! هل هذه الكائنات حية او هل انت شطيط بن نغيمش بن حنتوش المتشلـّوط !!! والي يقهر صح ان هالطلاب الي بالقصة يشيشون ويحششون ومن نذالتهم كل يوم يجون المدرسة دامكم كذا غيبوا حسبي الله عليكم اعتقد ماراح ينفع معهم الا جيش الصاعقة سمني انت كل عام وانت بخير ، شكراً << على القصة الحزينة الفكاهية

دوووم الضحك يالغلا..
ايه اخوي فعلا هذا الحي موجود على ماعتقد ياشرق الرياض او جنوبها..
نصيحه لاتقربها..
هناك الكبتاجون ينباع كانهم يبيعون الحمضيات..

وانت بخير ياقلبي..وشرفني مروورك

إقتباس الرسالة الأصلية كتبت بواسطة سمني انت دوووم الضحك يالغلا.. ايه اخوي فعلا هذا الحي موجود على ماعتقد ياشرق الرياض او جنوبها.. نصيحه لاتقربها.. هناك الكبتاجون ينباع كانهم يبيعون الحمضيات.. وانت بخير ياقلبي..وشرفني مروورك