بسم الله الرحمن الرحيم
السلام عليكم و رحمة الله و بركاته
بعد معاناة الى ان ضبط النت معي اعود اليكم مرتن اخرى
قعدت حول الاسبوعين و فيها من دون نت ولا سوني و ولا شي غير التلفزيون و المذاكره
و الحمد لله حتى الآن النتائج مبشره
و احب اشكر اثنين على اتصالهم علي و الإطمئنان علي خلال فترة غيابي جزاهم الله خير
فرحوني و قسم بالله و كبر راااااسي ترى يا عيال
مجرد فلسفة ممزوجه بشطحات خفيفه<<احس كلن الحين يقول يا ليل مطولك
و انا تراني اقولكم ردد انت وياه
يا استاذ \ نعم \ خف علينا شوي {نعامتن ترفسك قل آمين }
ياخي ما تلاحظون ان الاستقعاد في المدارس كل ماله و يزيد و يجيك المرشد اول يوم
نفسه في خشمه و ليه متأخر و ليه جاي بهالطريقه ليه وجهك كذا ليه تتكلم بالطريقه ذي
ياخي قسم بالله قلق انا ناقص يكفي اننا كارفين 9 حصص و الخروج الساعه 2 يعني خف علينا شوي
و قسم بالله ياهم كارفينا عيال اللذينه
اجل 3 اختبارات في يوم واحد و الدراسه ما مر عليها شهر اجل لو شهرين وش سويتو 12 اختبار
رياضيات + حاسب + مكتبه + تسليم مقال وصفي + تسليم واجبين كيميا + إكمال واجبات الحاسب
بالله تجي ذي؟!!
يعني يكفي الرياضيات كارفنا كرف و لاعن وجيهنا صفحتين من الدفتر الكبير نكتبها كل يوم
و زودها حاسب عاد الاستاذ عراقي الله يستر منه تصدقون ان اول اختبار محد في الفصل المكون من
20 طالب منتهي محد جاب فوق 7 من 15؟
احس كلن الحين بدا يحش اقوله انطم دقايق بس اشرح الوضع ترانا بريئين<<دايم يكونون بريئين
حنا درسنا من الدفتر و فقرات اذكر و الاسئله لكن هو جاب لنا وضح و علل و بيَن
ما تجي بصراحه لكن عوضنا مره ثانيه يووم الثلوث الي يصادف انه اختبار الرياضيات
قلنا ماشي لكن يجي المصري الثاني يقول اختبار مكتبه كلن قاله زر و هو قال بكيفكم لكن بكره اختبار
ياني بغيت اقوم اسفه بالجوال الي كنت احوس فيه (وجه مسوي ما سوا شي غلط)
و المصري حق الرياضيات يقول كل اسبوع اختبار رياضيات يوم الثلاثاء
في هذه اللحظه بصراحه انا قفلت معي و قلت له ترانا في الرياض عاصمة المملكه
يعني منب في مصر علشان تكرفنا كذا
بعد نقاشات حاااده جداً توصلنا الى اتفاق لا يرضي طرف لكن يرضي المصري
اسبوع اختبار و الاسبوع الثاني ما فيش حاقه
و الكيميا نفس النظام قلنا حنا ملحقين مع المواد الباقيه علشان نلحقك انت بعد
بصراحه كرف كرف هالسنه و مسوي دوشة و حاله و دنيا يا شيخ ان اصبت بإنفلونزا الخنازير
بروح احب خشم المصري حق الرياضيات و الحاسب و الوكيل الي مغترن بضروسه
كل 5 دقايق يشيك عليها يالله و لك الحمد!
ولا اول ما تجي للمدرسه و انت متأخر يجيك المرشد نفسه في خشمه متهاوش مع مرته
و بيحط الحره فيك انت ليه متأخر مره ثانيه ان جيت بهالوقت لا تدخل المدرسه
و الله مره جيت متأخر انا ساكن في حي الرائد و المدرسه بحي الرحمانيه و في نص الطريق
حفريات المهم يوم جيت انا قالي ليه متأخر
ناظرت فيه علشان استوعب السؤال بس قلت ايش؟
قام قالي ليه متأخر قلت تبي نظاره ولا تلسكوب فلكي علشان تشوف الحفريات الي جنب المدرسه؟!
<<اول يوم بداية خير ان شاء الله
و دخلت المدرسه و رحت للفصل و الاستاذ كان غايب و حطيت راسي و مدري شلون نمت وسط الازعاج
ولا جايبين لنا استبيان ذاك اليوم يراعون اهتمامات الطالب
ياني قطعت في الاداره تقطيع
وفيه فقره كانت كالآتي:
ما هو الشيء الذي تلاحظ تكراره في الامتحانات النهائيه؟
جوابي كان سهل جداً الا وهو {خانة اسم الطالب}
ولا وش الوجبه التي تساعد على التركيز اكثر؟
بالله وش يبي هالسؤال يعني بصراحه لا ارى بيت القصيد في هالاستبيان كلش واضح
اجل عصير ربيع ينباع ب3 ريال و هو اصلاً بريال
قعاااطه مثل هالمدرسه ما شفت بصراحه يعني من كل طالب في الثانوي ياخذون 17 الف ريال
من كل طالب واحد و فصلنا حنا لحالنا 20 طالب! و نصهم عندهم اخوان يعني من ولي امر واحد
يمكن تجيهم اكثر من 30 الف ريال فما بالك لو تحسب الابتدائي و المتوسط و الثانوي {بنين+بنات}
و المبنى هو هو من عصر اخوي الاكبر الي هو الحين في العمر 24 و اخوي الثاني 21
الارضيه و المدرسسين و الفصول كلها مثل ما هي بالتمام حتى شفت اخوي موقع على طاولة في احد الفصول
و يجيك مدرس انت اخو فلان ايه انا سلملي عليه بالله و هو ما طق له خبر
يعني قعااااطه بصراحه و الملعب ياخي قسم بالله لو تروح للثمامه تلعب هناك ابرك من الملعب
يخوي مستنقع مهوب ملعب اجل الطشاشات انفقعت المواسير حقتها و هي جديده!
و الملعب كله غرق و الفسحه منحشرين في السيب ياخي حاله قسم بالله حاله
انا بصراحه اذا بغيت انوم صح استمع الى شرح استاذ الاحياء زول سوداني لكن نشيط ما شاء الله
لكن شرحه نايم و يجيب النوم لكن مع ذلك متفوق في الاحياء انا يقول دايم يا رايع
و الاختبارات صدقوني صار لي اكثر من اسبوعين و ما عندي شغل من ارجع البيت الا انوم
و اقوم و اصلي و امسك الكتاب و ان سنحت لي الفرصه لعبت سوني 5 دقايق و تجي الوالده
حفظها الله و تشوتني للمكتب حقي و اقعد اذاكر
الكيميا و الرياضيات و الفيزيا كلن يقولنا تراكم توكم ما بديتو بشي في الماده كل الي درستوه مقدمه
الحين فيه ناس عيت تستوعب {المقدمه} فما بالك الفصل الثاني و الحاسب السنه ذي
داخل في المجموع يعني عليها اختبارات قصيره و اختبار نهائي من قسمين
عملي و نظري و دنيا و حوسه و لحسة مخ
يعني الرياضيات و كنا مسلكين و الكيميا و الفيزيا قلنا ماشي لكن حاسب يعني بالله انا بتخصص حاسب
كل البرامج الي استعملها فاير فوكس و تورنت و ماسنجر و وورد و باور بوينت في اوقات الفراغ
يعني بالله وش بستفيد ان عرفت البيانات الرقميه من التمثيليه؟
ولا النحو ياخي ابي اعرف سيبويه وش كان يحس فيه يوم اتخذ النحو مجال لعلمه
يعني لو انك ماخذ الفيزيا كان اصرف بصراحه اجل اصرف عمري كله
على خبر مرفوع و ضمير مستتر
يعني بالله اللغه و اعرف اتكلمها و بالعاميه و الفصحى يعني اكثر من كذا اروح ادقق و افصل و احلل
ليه؟
يعني مستقبلاً بروح للشارع و بقول لواحد خبر مرفوع مضاف اليه منصوب<<كيف التركيب؟
ولا التعبير و المطالعه ابي اعرف الحين الوزارة وش تبي بالضبط يوم تحط هالمواد في المنهج؟
يعني قراءة و عرفنا و الحمد لله ولا شلون نقرا قرآن في رمضان بالاستماع الى الراديو مثلاً؟
ولا اصلاً شلون وصلنا للثانوي و حنا ما نعرف نقرا يعني شي عجيب و الله
ولا التعبير مدري شفايدته بصراحه لا تعليق و بقوووه
ولا الادب طيب ان عرفت الشعر الجاهلي وش بيصير فيني؟
يعني بروح لشاعر المليون و القي قصيده هالطول و يجيني غسان يقول اجيز النص او لا اجيزه
ياخي عباطه قسم بالله مفروض من المرحلة المتوسطه تحدد تخصصك و تدرس المواد الي قام عليها تخصصك
اجل ادرس 60 كتاب و في الجامعه 4 كتب بس و اتخرج ولا اتوظف و التعب الي راح راح بالهوا
من دون فيتامين واو
ولا انا غلطآن يا جماعة؟
ياخي وزاراتنا مع كل احترامي مدري وش تبي بالضبط
زبدة الموضوع:
1- الا توافقني اخي القارئ على ان الاستقعاد في المدارس من قبل المدرسين صار اشد؟
2- = = = = = ظاهرة التأخر شي عادي خصوصاً ان تأخرت قبل الحصه ان تبدأ بـ5 دقائق؟
و بس
هذا محيكم محبكم في الله هلالي معالي يتمنى لكم اطيب الاوقات و ان تكون خشتكم الآن
مثل خشة البقره الضاحكه من ناحية الابتسامه فقط
يآآآآرب أفرجهآ