على طريقة ( صيد ) و ( قول على قول ) خاصة بأعضاء المجلس - نادي الهلال السعودي - شبكة الزعيم

ابو طـــــلال · #1 09/11/2009, 09:53 PM

المهتني أللّى من البال خـــالي

خالي أخو أمي .. لا

خالي من الكحول .. لا

خالي من الهــــمممممم

الهـــم هم .. اكل .. لا

هم هم .. هذولا .. لا

الهم من الضيــــق

ضيق بالثوب .. لا

ضيق بالمكان .. لا

ضيق بالصـــدر

الصدر حق دجاج ساديا .. لا

الصدر إمام الشيعة بالعراق ... لا

الصدر بالنفـــس

النفس الشهيق والزفير .. لا

النفس حقت العين والحسد .. لا

النفس اللى تعفس حالي

حالي من حلى السكر .. لا

حالي من الحلحله .. لا >> مدري وشي الحلحله

حالي من ( تنشد عن الحال .. حالي كيف ماشفته ) >> هذي هي

^^^

أمحق موضوع

==

وش رايكم بالحرب على الحوثيين .. وإعفاء الصحفية من عقوبة الجلد .. وبيان النصر الجديد

الحوثيين .. ورى تونا ندري إنهم مجرمين ؟؟ ورى ما انكشف المستور إلا بعد مايجينا منهم مصيبه !!

والصحفية ... أتوقع بيكون خطابها في المستقبل ديني وفيه مسحة إيمانيه .. مثل المغازلجي أول ماتمسكه الهيئه بمصيبة ماتدري إلا وهو حاط لحيه !! ومتغير وتقول إنه إهتدى .. وبعد ( الكفشة ) بكم شهر يبداْ يحدد .. وبعدها يخفف .. وبعدها ( يحلقها وينعم ) ويعود أدراجه

إلا من رحم الله ( حجرت للي يبي يحجر لي )

بيان النصر الجديد .. مايصلح هنا لانه رياضي .. بس المفروض اكتبه هنا لأن البيان ( إنساني ) اكثر منه رياضي .. أمحق بيان .. كان بودي اوجه لصاحب البيان بعض الكلمات التربويه ..

(حفاظاً على الذوق العام) .. يازنها من كلمة .. بس تنصدم لاشفت الخدش وصل لحد الجرح العميق للحياء .. تبي ترقع ماتنترقع !!

غداً ... غداً .. غداً تفاصيل غياب العضو البارز ( ..... )
^^^
أخس ياأسلوب التشويق ..؟

لقيت مثل هالكلمه في إحدى الجرايد .. والله ياهي قديمة !! شكله هو نفسه الصحفي اللى كتبها قبل ثلاثين سنة ...

قبل اللابتوبات والبلاك بيري ... كان فيه جوال ..

قبل الجوال ... كان فيه بيجر ..

قبل البيجر ... كانت الرسايل والسلامات بين المحبين تكون بشكل ظريف ..

البنت اللى تحب ولد في السابق .. كانت وهي بطريقها للمدرسة .. تعرف سيارة فتى أحلامها .. وطبعاً السياراة ياتكون ذاك الوقت (جيب شاص) .. أو ( هايلكس غمارة ) وإن طلع كاش الولد تكون سيارته ( كراسيدا ) وحاط لزقة كاتب فيها قراندي

البنت تمر من عند السيارة وتكتب على قزاز السيارة ( احبك ) أو ( معجبه فيك ) ومن هالكلام .. يجي المطفوق يكتب على قزازة سيارته من بكرا ( من أنتي ) ؟؟ وإلا إنتي فلانه ؟؟ وتبدا الرسايل على غبار قزاز السيارة .. عاد لو باع الموتر تنتهي وسيلة الإتصال ..

بعده جاء البيجر .. وهو الإختراع اللى سهل من مهمة المحبين في التعبير .. مثل ماكانت ( الــ 999 ) على البيجر يعني ظروري تكون الــ 444 يعني احبك .. 222 اموت فيك .. ويتفقون على أرقام تعبر عن مشاعرهم

يعني يتفق معها لاأرسلت لك على بيجرك 15469 ... يعني تراني ولهن عليتس

وجاكم الإعصار .. الخبيث المخبث على قولة الشيبان .. الجوال .. وصار التعبير أدق .. يكتب احبتس .. يعني احبتس .. مهيب 1873 ؟؟؟

بس كانت برسايل مكتوبة .. تطور الوضع للرسائل المرئيه او الوسائط .. وأصبح التعبير عن الحب اكبر .. وأشمل .. وأسهل .. ويقدر يقولها صوت وصورة وبنفس الوقت .. وهي ترد عليها على الهوى مباشرة >> مباراة هع هع

وجاء البلاك بيري ... والابتوبات .. عاد وش بلاك بيري .. صارت المواعيد عينك عينك .. عادي ...

الملاحظه .. كل ماسهل الحصول على الشي قل قيمته !!

ماودي اتفلسف واجد .. بس كان الحب ذاك الوقت موجود .. وفيه وفاء .. هاالوقت رغم سهولة وسائل الإتصال والتواصل .. إلا إن الحب ( ركيك ) ( بسكوت هش ) وكل ماصعبت الامور .. زاد الصدق في العلاقة .. يعني على وقت الرسائل بواسطة الحمام الزاجل كان الحب أصدق من الكتابة على قزاز السيارات .. وقزاز السيارات افضل واصدق من البياجر

وحب البياجر أكثر وفاء من حب الجواويل .. وحب الجواويل أبرك من حب البلاكبيراااات

ياليت أخوي سليمان .. والأخ قرقاص .. يكلمونا شوي عن تجاربهم عن تلك المرحلة .. مراحل حب قزاز السيارات .. والبياجر .. ودنا نسمع من الجيل القديم

الموضوع كله ( خمبدزه )

اخوكم الصغير ابو طلال