اللي يبي درب السلامه ( تساهيل ).. واللي يدوّر الشر يسرق مني ( صحن فول ) - نادي الهلال السعودي - شبكة الزعيم

Fahad Al Sudais · #1 22/10/2009, 06:23 PM

حيــــــــاكم

مزبَن

اذا كان خويّك سمين... لاتقول له ( يا دب )

خلك ( حن حن ) وقل ( مجموعة انسان )

انا جيـت

موقف صعب.. صعب جداً.. حزين.. كئيب.. يؤدّي الى الجلطة

اكثر من مره يصير لي هالموقف ومازلت على امل بحياة افضل

اكون بالبيت لحالي.. اهلي معزومين او رايحين منّا او منّاك

اطلع من الخيمه للشارع علشان اروح للبقالة على رجولي.. واترك الباب ( مطرّف )

ارجع والقى الباب مصكوك بسبب موجة هواء عاتيه

واحبرش بمخباتي وما القى المفاتيح

واتذكر اني حالتهن في قاع الخيمة جنب الجوال

وبهالحالة مافيه الا حل واحد

اني انط من فوق جدار السور واطب بالحوش

وهالعملية طبعاً محتاجة ( رشاقة وخفة وزن )

وانا ( بسم الله علي )

ما اعترف بالخرافات هذي... رشاقة وقوام ممشوق ومدري إيش

الأكل.. ثم الأكل.. ثم الأكل.. وهـ بصصص فدييييت الموائد العامرة

الموووهييييم

في مثل هالموقف الصعب

مالي الا عيال الجيران ( العصاقيل )

كل ابو دايم اطق عليهم واتلّ واحد منهم واخليه ينط ويفتح لي الباب

وهم بصراحة مايقصرون ابد... زاهبين تقل ( قرود ) للمطامر وتسلّق طبلون الكهرب

وانا يجين احباط اذا شفت احدهم يقوم بعملية القفز والتسلّق

أحس اني محروم من نعمة الرشاقة غصب عنّي

ياخي مو منطق ابد

إحزم خشّتك تصير رشيق... إفدغ وعب التانكي تصير دب

وبعدين افرضوا ان الجيران هذاك اليوم معزومين وانا توّي ماتورطت صح

وش الحل بهالحالة ؟؟

طيب مافيه حل وسط ؟؟

لايجي احد مسوي فاهم ويقول ( اقعد بخيمتك ولاتطلع واطلب من البقالة توصيل )

انا ابي اصير رشيق لكن بشرط.. ( الرز ) لايوووووووووووقف

صعبه شوي ... صح ؟؟

لكن اللي مهوّن علي انه مو انا الوحيد

ثلاث ارباع الشعب السعودي مايقدرون ينطّون السور بسبب ( الرز )

فورزا ( رز ).. فورزا ( بخاري ).. فورزا ( مثلوثة ).. فورزا ( مندي ومظبي )

.

.

مخيّمات ( كل مقص وله شارب )

قرب الشتاء... والمربعانيه بالطريق

وقرّبت ايام ( السمر ) و ( الارطى ) والفروات والزنجبيل

وطبعاً استعدادات اصحاب المخيمات على قدم وساق ( للنهب )

بعد طعس التحدي حق خزام... على طريق المجمعة القديم

مخيمات للايجار بأسعار فلكية... اسعار تجيب الجلطة والبلهارسيا في قلب الصحراء

أخيَس وأزفت مخيم تلقاه بـ خمسميّة ريال في اليوم

خيمتين ( وحده رجال ووحده حريم ) + خيمة مطبخ + خيمة صغيرة + حمّام تكرمون

يعني تخيّم انت واهلك ثلاث ايام ( اربعاء وخميس وجمعه ) بالف وخمسميّة

قسم بالله حرام... سرقة عيني عينك

والقهر لو بينقص عليك علبة ( كبريت ) ورحت للحارس قال ماعندي !!!

وراح ( تاكل تبن ) وتطق مشوار لمحطة خزام علشان علبة كبريت او حبة بنادول

والدبابات عن يمينك ويسارك رايحة جاية وانت بالمخيّم.. واللي مايشتري يتفرج

واذا تبي دباب للصغار ادفع عشرين ريال حق ربع ساعة او اقل

يعني ثلاث ايام راح تكلف بالكامل مع الحطب والاكل والتجهيزات وآجار المخيم والدبابات حوالي ثلاث الاف ريال

هههههههههههههههههههههههههههه

ياللي ناوي تخيّم... خذها نصيحة من استشاري مفولجي

رح انت واهلك لجزيرة ( حوار ) الواقعة بين البحرين وقطر

واسكن بفندق خمس نجوم ومتّع اطفالك بالالعاب والدبابات وعش حلم جميل بحياتك

يومين من الاربعاء الى الجمعة ماراح تكلفك اكثر من 1800 ريال

.

.

الله لايشفحنا... الله لايشفحنا

هالموقف لكم... انتم علقوا عليه... انا ماعندي شي اقوله :

واحد من الزملاء اسمه ( عبدالله ) عنده كبينة مكالمات هاتفية

وطبعاً هالكباين خسرانة وماعليها سوق... الله يعز الجوالات

لكن هو متحسف يبيعها لأن موقعها حساس بوسط البطحاء

الموهيييم.. خلوني اعطيكم الموقف لايروح موضوعي لقسم الاتصالات مثل بعض الناس

هذاك اليوم كنت عنده.. ودخل واحد ( سعودي ) وكلم بالتليفون

يوم جاء يحاسب كانت الفاتورة تسعة ريال ونص

دفع عشرة... ووقف يحتري عبدالله يرجع له نص ريال !!

قال له عبدالله : ماعندي والله انصاص

قال الرجال : خير ان شاءالله.. وطلع

بعد اسبوع

اتصل بي عبدالله وهو في حالة ذهول

قلت له : وش جاك ؟؟

قال : تذكر الرجال اللي عطاني عشرة ووقف يحتري النص ريال حقه وقلت له مامعي ؟؟

قلت : وش فيه ؟؟

قال : جاني اليوم واستخدم التليفون..

وبعد ماخلص قلت له حسابك خمسة ريال ونص

عطاني خمسة وقال : معك نص ريال لي من هذاك اليوم

.

.

رومانسيات صخراويات

ليه احس اني وانا اشوفك حزين ؟؟

وقلبي الليله بهمي ممتلي

كانها الفرقا.. سألتك حاجتين :

7
7
7
صحن فول.. وصحن زيتون قبل تطسّين... ولاتنسين تصكين الباب وراتس

مدفن
ليس كل من ينظر اليك بتمعن يعتبر معجباً بك

...........قد يكون ( يتحمّد الله على العقل )