..][.. مدخــل ..][..

قبل كٌل شيء .. هو طلب بسيط أطلبه منك !

أن ترفع صوتك قليلاً في هذه اللحظة وتقول :

رحمك الله يامنار وأسكنك فسيح جناته .

فقط هذا الطلب .. أرجوك !

رمضان كريم .. وعيد سعيد .


يقول أحدهم : أن الهروب من المُقدِمة هو مُقدِمة بحد ذاتها .

ويقول أخر : أننا كلما أطلنا الحديث فهذا يعني أننا لا نعرف شيئاٌ .

ويقول قائل : كُل ( الحَشـو ) ينبلع .. إلا حشو المقدمات .

ويأتي رابع ويحكي : مادام أنك تعديت الثلاثة أسطر .. فهي كافية كـ ( مقدمة ) .

ومن هنا أحب أن أشكر جميع من رد على درة الشخابيط (1) أو قرأها .. وصدقوني أني سعيد جداً جداً لتفاعل كل شخص ومرورهـ . بارك الله فيكم ومكانـكم فوق الرأس . وفوق العين .


( اعتبروها مقدمة من شان خاطري )



أهلاً بكم جميعاً في درة الشخابيط (2) وحياكم الله الكل بيوزره !

لمن لايعرف الفكرة.. بإختصار هو موضوع عباره عن مجموعة فقرات بسيطة أرغب كتابتها لكن لا يستحق أن أكتب موضوع كامل ( من أجل فقرة واحدة ) .. لذلك أقوم كل فترة بتجميع تلك الفقرات التي أرغب بكتابتها ووضعها في موضوع واحد ( درة الشخابيط )

فـ ع ـسى أن تعجبكم شخابيطي هذه المرة وهي عدد مختلف نوعاً ما كونه في رمضان وهو أقرب ( للأعضاء ) أكثر .




ولمن يرغب بقراءة ( درة الشخابيط "1") يضغط هنا


قبل البداية يجب أن أشكر بعنف وشده المصممة المحترفة ( عسيرية ) على جهودها المباركة والخيالية في عمل تصاميم الموضوع وبارك الله فيها تحملت ( التعب ) و ( المرض ) اللي أصابها من أجل إنجاز العمل وهالشي ماهو إلا من طيب أصلها .. أصيله يا عسيرية الله يحفظك ويجزاك خير على كل شيء ..

و الشكر لصديقي وحبيبي الذي ساعدني كثيراً بهذا العدد وكان له دور كبير من خارج المنتدى ولعله يقرأ كلماتي الان .. بارك الله فيك !


والأن .. عناوين الفقرات :

1 – عن الصــواريـخ نحــكي !
2- الطــائرة وشــذى .. وصادوهـ ابتـدى .
3- ألف شطحة .. وضحكة .
4- أبو ناصر المغرور .. وسالفته مع القدور .
5- مـا طـاح .. إلا أنبطح .. ( أية صوفيا )
6- صيد اليوتيـــوب .



( نصيحه أخويه : أنزل لأخر الموضوع وقم بتشغيل مقطع اليوتيوب .. ثم اطلع هنا ثاني .. علشان لا وصلت عنده يكون تم تحميله .. فهمتوا شي ؟! )

فهيا بنا سويه





































































.....................................................................







مرحبا !

أعتقد ان هذه الفقرة تحتاج لمقدمة مختلفة .. ومنفصلة . لأن الفكرة مختلفة والضحية أيضا ( غييير ) بمعنى الكلمة .

بإختصار .. هو فكرة مقلب سويته بالإستشارية " شذى " عن طريق الرسائل الخاصة اللي رح أعرضها بهالفقره مع بعض التعليقات .


سأختصر أكثر .. وأعطيء نبذه بسيطة عن الضحية :





أسمحوا لي من جديد أن أتحدث عن فشلي في كتابة المقدمات . سيرد أحدكم : " تراك أزعجتنا "

لكن هذه حقيقة .. ماذا سأكتب عن ضيفتنا .. أو نسميها ضحيتنا .

حينما أقول ( شذى ) ستعرفوا فوراً أني أتحدث عن تلك الإستشارية راقية الحضور . كريمة الأخلاق . المهذبة واللبقة .. والكثير من الصفات الطيبة التي يعرفها كل شخص عن شذى .

قبل أن أفكر بعمل مقلب في شذى . كنت واثق أني سأواجه صعوبة كبيره في استفزازها نظراً لما سمعت عنها من رزانة واحترام من الصعب أنها تتخلى عنهم .

لكن أنا قلت .. خلني أجرب .. إن ظبطت كويس . وإن ماظبطت هذانا خذينا درس .

فكرة المقلب مارح أقولكم عنها الأن . رح تفهموها من الرسالة الأولى اللي كانت مني .

ظبطت أموري .. وجهزت كلامي .. وراسلت للمصممة المبدعة عسيرية علشان تساعدني بالمقلب وكان دورها أنها تسوي ( استماره مفبركة ) علشان شذى لما تشوفها ماتتوقع أبدا أنه مقلب .



والأن مع أول رسالة خاصة منـي .. لشذى /

إقتباس الرسالة الأصلية كتبت بواسطة R D H السلام عليكم ورحمة الله وبركاته كل عام وأنتي بخير أختي الكريمه شذى . أسأل الله انك تكوني بحال طيبه . بصراحه أنا شايل عليك وعلى المشرف النذل اللي قفل موضوع ( التصويت حق الشيف ) بدري ! معقوله انا كنت متحمس جداً للتصويت .. وكنت محضر رد هذا كبره واخرتها يتقفل الموضوع بدون ما أصوت ! عالعموم حصل خير وما اقدر غير اني اشكركم من اعماق قلبي عاللي تقدمونه .. بصراحه جهودكم بهالصيف وبرمضان تكفي عن 10 سنوات .. جهود مباركه وشغل دسم الله يعطيكم العافيه . ماودي أطول عليك يالغاليه وبأقول اللي أبيه بإختصار . كلمني من مده واحد من المعارف وهو مسؤول عن فريق كرة طائرة نسائي بجده ، وأخبرني أن هناك دورة رمضانية نسائيه لكرة الطائره رح تقام بالطبع في رمضان هذا . والحمدلله فريقه مكتمل لكن ينقصهم لاعبات احتياط علشان يقدروا يدخلوا هالبطوله وهالشي بسبب سفر الكثير منهم مع أن الفريق قديم ولهم فتره مع بعض ومنسجمين . فالرجال طلب مني لو أقدر أني أبلغ أي أخت أعرفها لها القدره أن تدخل معهم بالفريق لو كانت ظروفها تسمح ! فقلت أرسل لك وأبلغك لو كان عندك المقدره للمشاركه في البطولة ! مع العلم أن قريبي هذا هو مجرد مسؤول ومنظم للفريق من بعيد من جميع النواحي . وماله أي تدخل باللاعبات .. والترتيب مع اللاعبات ومواعيد التمارين وتنظيم اجتماعاتهم كله مع مدربة الفريق المصريه واسمها سناء مجدي . طبعا أهم شي موافقة ولي الأمر و شهادة الكشف الطبي بالسماح لك بالمشاركه بأي نشاط رياضي وعالعموم الرجال عطاني استمارة المشاركه لو وافقتي وانا دخلتها على السكانر وياريت أنك تطبعيها وتعبي البيانات المطلوبة فيها بالنسبه للكشف الطبي ، الرجال يقولي لازم تحط ختم المركز الطبي عند ( توقيع الطبيب ) ، التوقيع بلحاله مايكفي . والاسئلة اللي تحت بكيفك جاوبي عليها او لا مهب مهمه كثير بس اهم شي الكشف الطبي وموافقة ولي الامر وبياناتك انتي انا ما أدري بصراحه وش اللي خلاني اختارك لكن قلت أنك ثقه و أخت قديره غير أنك من سكان الطائف وأقرب لجده وتذكرة السفر والسكن مع المحرم كلها على حساب الشركه الراعيه للفريق ، فلو رغبتي بالمشاركه بالبطولة ياليت ماتتأخري بالرد علي علشان ارسل لك طريقة اكمال بقية الاجراءات .. كإحضار صورة من هويتك .. وطريقة لقاءك بالمسؤوله عن الفريق وغيرها من الترتيبات . طلب أخير يالغاليه ياليت هالأمر يكون سري بيني وبينك وهذه أمانه .. لو ماترغبي بالمشاركه قولي لي لكن ما يطلع هالأمر لأحد أيا كان خاصة من داخل المنتدى . يعطيك العافيه يا اختي وياليت ما تتأخرين علي لأن الرجال مره مستعجل ومابقى شي على البطولة واصلا يمكن تدخلين مع الفريق بدون ماتلحقي تتمرني لانك بتكوني احتياط . شكرا لك وبارك الله فيك أخوك / ابراهيم

أعتقد أن الرسالة الأولى توضح لكم فكرة المقلب ..

كنت مسوي أني أعرف رجال عزيز علي .. وهالرجال مسؤول من بعيد على فريق كرة طائرة نسائي وطلب فزعتي أجيب للفريق بنات لأن عدد اللاعبات ناقص .

لا أخفيكم أن هالرسالة دققت عليها لين قلت بس . لأن نجاحها يعني نجاح المقلب كله .. وأي خطأ صغير في الأسلوب أو التعبير أو التلقائية بالحديث رح يخلي شذى تشك أنه مقلب .

وكذلك شفتوا الاستماره المفبركة .. طلبت من المميزة عسيرية تصممها وظبطتها الحمدلله .

طبعا الاستماره مجرد منظر . علشان تخلي شذى تصدق المقلب .. ولا أنا عارف أنها بترفض .

أصلا لو وافقت كان بيخرب المقلب وأنا اللي بنحشر خخخخخخخ .

لكن واثق انها بترفض وعلى هذا الأساس بدأت المقلب .

المهم انتظرت يوم .. وجاني رد الأخت شذى ../

إقتباس وعليكم السلام ورحمة الله وبركاته وأنت بألف خير يارب وربي إني محرجة منك ومن كل من لم يستطع التصويت ومدري وش أقول بس بإذن الله تتعوض في الأيام الجاية أول ماشفت موضوع كرة الطائرة قلت ياربي وش عرفه إني كنت ألعب كرة طائرة طبعاً أنا كنت العبها بالمدرسة في المتوسطة والثانوي شكيت إنك عرفت من مجلة اقلام زرقاء رحت اشوف المجلة بالجمهور لقيتها باقي مانزلت الحين قول لي شلون عرفت أو ليش أنا اللي اخترتني والله ياخوي أنا مو من سكان جدة أنا من الطائف ثاني شيء وهو المهم حتى لو كنت من سكانها ما اتوقع إني راح أشارك ولعدة اعتبارات فياليت تقبل اعتذاري وتأكد إنك أخ اكن له كل احترام وتقدير وبخصوص هذا الموضوع الله يشهد وأنا صايمة ماراح أحد يعرف لا قريب ولا بعيد << وجاري حذف الرسالة ولا يهمك وأشكر لك ثقتك فيني واللي بإذن الله راح تكون في محلها دمت بكل الخير

أجل ( لا قريب ولا بعيد رح يعرف ) خخخخخخخ
الشبكة كلها درت !
تدرون وش أحلى مافي هالمقلب .. أن كل الرسايل بيني وبينها كانت وأحنا صايمين .
المشكلة أني أحاول أمسك أي شي وأذب عليه ماني لاقي ..
اهببببب عليها

المهم أنا قرأت رسالتها .. وقلت بس أكلت " الطُعم " :$

إلا صحيح كيف طعمه ياشذى ؟!

وفوراً رديت .. وكان الرد قدر الإمكان عفوي مني ./

إقتباس الرسالة الأصلية كتبت بواسطة R D H السلام عليكم ورحمة الله وبركاته حياك أختي ، يامحاسن الصدف طلعتي تلعبين كرة طائره بعد انا والله ماكان عندي فكره عن هالشي لكن اعرف انك بالطائف والأقرب إلى جده وقد الثقه ان شاء الله لكن ماعندي فكره ان لك خبره بالطائره ايام المدرسه . عالعموم مافي مشكله انا بكلم الرجال وبعتذرله يعطيك العافيه واسفين عالازعاج .

ياخي والله إني فنان .

أرسلت لها هالرسالة وحاولت قدر الإمكان أتكلم بعفوية .. ولا أضغط عليها . وأخليها على راحتها ..

والهدف من هالرسالة أنه لو كان عندها 1 % شك أنه مقلب .. يروح هالشك مع هالرساله .

أنا أعتذرت عن الإزعاج .. وسويت أني بتصل على الرجال وبعتذر منه لأني مالقيت أي بنت تقدر تلعب بالبطولة ..

وفعلاً .. بقيت ساكت لمدة يومين .. وكأن شيئا لم يكن .. علشان هي تنسى .

وبعد يومين رجعت أرسلت لها هالرسالة ( مسوي أن الرجال ضغط علي ) ، وقلت خلاص .. الأن بدأ المقلب الصدقي .

إقتباس الرسالة الأصلية كتبت بواسطة R D H السلام عليكم ورحمة الله وبركاته اول شي كيف حالك عساك بخير ؟! ثاني شي يعطيكم العافيه يالاستشاريين على الجهود اللي تقدمونها ثالثا صدقيني اني محرج منك يالغاليه وللاسف انا في موقف بايخ . انا عارف أني ازعجتك ومصختها لكن تحمليني واللي يرحم والديك . الرجال المسؤول عن الفريق اتصل علي اليوم وأخبرني انه باقيله ( لاعبتين ) فقط يكونوا احتياط قبل لا يدخل البطولة والرجال طلبني واصلا مابقى الا كم يوم وتبدا البطولة وهي مدتها 5 ايام فقط على ما اعتقد . مع العلم أنه قالي اللاعبتين اللي بيجون بس بيكونوا احتياط واحتمال كبير انهم ما يلعبوا لكن بس علشان يكملوا النصاب لكل فريق وايضا الاحتياط رح ياخذ نفس نصيب الاساسيين في حالة الفوز بالبطولة أنا مارح أضغط عليك وهالشي راجعلك وكمان انا محرج ومالي وجه لاني قاعد اكلمك من جديد لكن الرجال متورط وطالبني . استخيري يالغاليه واستشيري الاهل عساها تكون خير ترا الدعوه فيها مكافآت لو فاز الفريق وان شاء الله بيفوز وبالتاكيد المكافأت للوحده مارح تقل عن 500 ريال واكيد اكثر ومنها تغيري جو . فكري يالغاليه وتكفين ردي علي بدري لان الرجال ينتظر مني اتصال مارح ازعل لو رفضتي لكن استخيري وبشريني ومن جديد اسف اسف اسف يالغاليه لاني ازعجتك من جديد . ولو ماوافقتي احذفي الرساله ولا كأنك قريتيها و أنا بإنتظار ردك بأسرع وقت . لشخصك دمتِ بأجمل حال أخوك ابراهيم

من بعد هالرسالة سياستي أصبحت واضحة .. <

بأنشب لها بالمعنى الحقيقي لكـلمة " أنشب " .

أنا سويت أن الرجال اتصل علي مره ثانيه " وطلبني " وقالي " تكفى " وأنه معتمد علي .

وأني أنا متورط .. ومعتمد على شذى انها تنقذني من الورطه وتخليني اساعد الرجال وانها تقدر تشارك في البطولة .

فلاحظوا أني بديت أغريها .. صحيح إغراء كان نااايم بس 500 ريال .. بس حاولت اكون واقعي علشان ماتشك .

فيه شي نسيت أقوله .. قبل ما أسوي المقلب بشذى قلت لنفسي لازم " أحمي ظهري "

ما أضمن شذى انها تبقى هاديه وماتعصب . فخوفاً من أنها تشتكي لأحد المشرفين على " لزقتي "

فأخذت احتياطي وأخبرت ماجد مقبل بالسالفه كلها .. وقلتله : هاليومين الجايات احتمال ترسل لك شذى رساله تشتكيني فيها . فظبط وضعي .

وأبو مقبل ما قصر وتحمس جداً للمقلب .. وكان خير شخص مأمن ظهري ! < أشوى أنك بغيت تتوقف خخخخخخ !

المهم أنتظرت رد ( شذى ) .. وجاني منها هالرد ../

إقتباس هلا فيك اخوي ابراهيم ولا ازعاج ولا شيء والله إني أنا اللي منحرجة منك ولا ودي اخيب املك فيني والله ظروفي ما تسمح لي لأني بالطايف ولا فيه فرصة اروح جدة برمضان وغير كذا ما اتوقع اني اقدر اشارك بطريقة رسمية يعني حدي مدارس ابراهيم يا خوي أتمنى إنك ماتزعل مني دمت بكل خير

قسم بالله درينا أنك أخلاق .. ماودك تعصبين ؟!

أنا هنا ومع استشارتي لأحد الأحبة قررت أني أطلب مساعدة الهنوف . .

لأنه الوضع لو بقى على ماهو عليه .. أنا أنشب لها واقنعها تشارك .. وهي ترد بكل أخلاق .. بهالحاله مارح نخلص ويمكن تطنشني شذى وماترد علي .

وبصراحه دور الهنوف كان أساسي ومهم جداً بالمقلب .. وهي أجادت الدور ببراعة .

كان دور الهنوف أنها تكلم شذى وتخبرها أنه إبراهيم كلمني ويقول انه زعلان ومنحرج من شذى لانه يحس أنها رفضت المشاركة بالبطولة بسبب شخصي ضدي . ومن هالكلام

الهنوف قامت بدورها .. وشذى ردت عليها وأخبرتها أنها رح ترسلي تعتذر لي وتوضح لي سبب رفضها .

انتظرت يوم .. وجتني هالرسالة منها ../

إقتباس الرسالة الأصلية كتبت بواسطة شـــذى صباح الخير كيفك اخوي ابراهيم إن شاء الله يارب تكون بخير والله إني محرجة منك وعلى قول المصريين في نص هدومي وابيك تعذرني ع التأخير لأني والله مشغولة المهم أنا كلمتني الهنوف وما أخفيك إني استغربت وتضايقت بنفس الوقت لأنك فكرت أن رفضي لأن الموضوع من قبلك وإني كرهتك بعد هذا الموضوع لا يا خوي أنا ابسط من كذا بكثير ولا عمري كرهت أحد ورفضي لأي شيء يكون لقناعة مش لأن الموضوع من شخص بعينه فكيف لو كان الشخص هو أنت قلم أحترمه وأخ اكن له كل التقدير والاحترام أنا والله ياخوي مارفضت إلا لقناعة والله يشهد بذلك فأتمنى ما تشيل بخاطرك واقدم لك اعتذاري لو بدر مني أي شيء ضايقك وتأكد ورب البيت انه غير مقصود دمت بأحسن حال << مقتبستها منك

يعني ما أدري ياشذى .. وشلون صدقتي أن الفريق كله ( واقف عليك ) وينتظر جيتك قبل دخوله للبطولة .

وبعدين المقلب استمر أيام .. وكل شوي اقولك : باقي عالبطولة كم يوم وتبدأ .

أبعرف وش هالبطولة اللي بالعشر الأواخر برمضان ! لا ونسائية بعد !

مدري كنتي تسلكي لي .. ولا أنا لهالدرجه اسلوبي مايخرش الميّه ؟!

أنا وقتها ماعجبني الوضع .. قلت لنفسي مسوي مقلب وفكره واستماره مفبركه واخرتها ترد علي بأخلاق ؟!

فقلت حان وقت الهجوم !

وارسلت لها هالرساله /

إقتباس الرسالة الأصلية كتبت بواسطة R D H السلام عليكم ورحمة الله .. بالبدايه شاكر لك أخلاقك العاليه يا أختي واتمنى انك تعذريني .. وابشرك انا بخير والحمدلله واتمنى انك تكوني بكل خير انا احترمك بالمثل والله سواء انتي او غيرك انا احترم الجميع والله واقدرهم كلهم . لكن انا خايف أني أكون أخطأت لما أرسلت لك .. والله كان العشم فيك كبير يا شذى .. أنا ماطلبت منك شي مستحيل . ولا طلبت منك معجزه .. كل اللي طلبته انك تشاركي بالبطولة وتحضري مع محرمك وكامل التكاليف على ادارة الفريق .. وفوق هذا قلت ماتحتاجي تمارين لانك بتكوني احتياط .. وغير كذا فيه مكافأت ماديه محترمه للاساسي والاحتياط .. وبصراحه هالشي فيه منفعه لك .. ومنفعه لي أنا لأني اللي اخترتك.. لكن ماني عارف وش سبب هالرفض وزعلك اني كلمت الهنووف هل انتي تتضايقي منها مثلا وانا ماكلمتها الا لانها تمون عليك بقووه أخت شذى يشهد الله اني احترمك واقدرك لكن ما أقبل هذا النوع من التماطل واللف والدوران . انا طلبتك تساعديني وتشاركي بالبطولة ولو حتى بالاسم منظر بس .. وتفكيني من احراج الرجال اللي كلمني .. انا عطيته كلمه على اساس اني معتمد على اخت ثقه مثلك واكيد مارح تخيبني .. وماتوقعت ابدا أني رح أعامل بهالاسلوب . أعذرك لانك مشغوله لكن رساله صغيره مارح تاخذ منك دقيقتين ما ادري ليه لطعتيني .. لاتستغربي من كلامي لاني من جد مقهور عطيت الرجال كلمه وللأسف انتي خذلتيني بأتمنى أنك تردي علي بسرعه وماتلطعيني كالعاده ، يالغاليه تراها رساله ماتاخذ منك دقيقتين .. اتمنى انك تردي وتوقفي معي وتنقذيني من هالورطه لاني فعلا مهتم جدا بالموضوع وفيه منفعه لي هذا غير اني معطي الرجال كلمه بإنتظار ردك الان لو تكرمتي الله يحفظك يا أختي ويحميك ويخليك لأهلك .. لك كل الاحترام والتقدير بالتوفيق .. فمان الله

لاحظـوا أني قلت فيه منفعه لي من هالموضوع .. مسوي فيها سمسار لاعبات !

وكذلك طول الرسالة وأنا مسوي فيها أخلاق .. يعني كلمتها بإحترام و كنت أقط كلمه غلط كل شوي .

أنا كنت متحمس جداً وقاعد على أعصابي . خفت أنها تشك أنه مقلب لما تشوف أخلاقي التجارية وتقارنها بأخلاقي الأصلية << شعنده الدافور ؟!

انتظرت .. وجتني هالرسالة منها ../

إقتباس هلا اخوي إقتباس أخت شذى يشهد الله اني احترمك واقدرك لكن ما أقبل هذا النوع من التماطل واللف والدوران . لو سمحت .! أي لف ودوران وأنا من البداية اعتذرت وياليت اخوي ابراهيم نحاسب على كل كلمة لأن اللف والدوران ابد مو طبعي ومن اول رسالة كنت واضحة واعتذرت وما اعطيت أي وعد أو أمل في اشتراكي ونفس الرد كان في الثانية والثالثة مدري كيف فسرت هذا على انه لف ودوران بخصوص المماطلة اعتقد ان اول رسالة وصلتني منك ماكملت 24 ساعة ووصلك ردي الثانية طلبت مني استخير وارسلتها 03/09/2009 وردي وصلك 04/09/2009 إقتباس وش سبب هالرفض وزعلك اني كلمت الهنووف هل انتي تتضايقي منها مثلا وانا ماكلمتها الا لانها تمون عليك بقووه سبب رفضي قلته من أول رسالة ظروفي ما تسمح إني اروح جدة وحتى لو سمحت قناعتي ترفض وبشدة اشترك في أي نادي يقوم عليه رجل حتى لو من بعيد لأني وبكل بساطة وفخر أيضاً من أسرة محافظة استحيت اقولها لك في البداية لكني لمحت وانا اقول لك حدي مدارس مدري ليه حاب انك تحرجني وتتهمني باللف والدوران وانا كنت من البداية للنهاية محترمة بكلامي و واضحة من خلال رفضي لا خيو ما زعلت لانك قلت للهنوووف الهنوووف اكثر من صديقة وأخت أنا تضايقت لأن وصلني إنك تعتقد إني رفضي لأن الموضوع منك وأنا مابيني وبينك أي خلاف عشان اخذ منك موقف وارفض وأنا قلتها برسالتي وكانت واضحة وهذا اقتباس لكلامي يمكن ما كان واضح إقتباس أنا كلمتني الهنوف وما أخفيك إني استغربت وتضايقت بنفس الوقت لأنك فكرت أن رفضي لأن الموضوع من قبلك وإني كرهتك بعد هذا الموضوع غير كذا أنا ولله الحمد والمنة في خير ولا احتاج منفعة ولا مكافأة ويقدر قريبك يلقى له بدل الوحدة 1000 جدة مليانة لاعبات ويمكن يكونوا محترفات بعد ويقدر يكلم المدربة أو اللاعبات اللي عنده يوفرون له لكن أنا اعتذر ما اقدر . في امان الله

هههههههههههههههههههههههههههههههههه

بصراحة أول مره أشوف بنت أخلاق وهي معصبه !

تقول لي : لو سمحت خخخخخخخخ

وقال ايش ما احتاج منفعه او مكافأة خخخخخخخخخخخ مسوية بنت نعمه

وترا أدري أن جدة مليانة لاعبات محترفات . بس نصيبك أنك طحتي بين ايدي :$


أنا بعد هذه الرسالة أرتحت .. وقلت خلاص وصلت للي أبيه /
1 – مشت عليها فكرة المقلب تماما .
2- خليتها تعصب .. صحيح أنها تقول : ( لو سمحت ) وهي معصبه خخخخخخ بس نعتبرها عصبت !


المفروض أن المقلب ينتهي عند رسالتها هذه لأني حققت هدفي .. لكن قلت رح أرسل لها رساله ثانية قاسية ..

يا أما تخررررب مرررره .. أو تخرررررب جداً !

فأرسلت لها هالرساله وحاولت أكون محترم قدر الإمكان بس ما قدرت خخخخخخ

إقتباس هلا اختي أول شي ابيك تهدي وما تعصبي علي أو تكلميني بهذا الأسلوب أبيك تحطي في اعتبارك شي مهم جداً .. أنك بهذا الموضوع أو بدونه سيبقى لك كل احترام وتقدير من أخ لك . أنا ولله الحمد علاقتي طيبه مع الجميع واحترم الجميع بلا استثناء وادعي للاستشاريين دايما من بينهم انتي على جهودهم لكن هذا مايعني أنك تكلميني بهذا الاسلوب يا أختي . أذا ترفضين انك تشتركي بالبطولة قولي ما أبي .. أنا مارح أغصبك انك تشاركي لان هذا شي راجع لك وانا مالي حق فيه . والله انه من حقك ومحد قال شي لكن انك تجين وتحطين الحق علي وكأن أسلوبي غلط واني غلطت عليك انا عارف نفسي زين وبنفس الوقت احترمك واقدرك لدرجه ماتتصوريها وماغلطت عليك وما أحب احد يجي يحط الغلط علي وهو اللي بدا يعصب . صدقيني واقولها للمره العاشره . أنا احترمك واقدرك بشكل ماتتصوريه . لكن تفاجأت من أسلوبك ومن اتهامك لي اني احاول احرجك .. وكأني انا انسان همجي ومتخلف بالتفكير وابيك تشاركي غصب . رغم اني كنت اكلمك بكل احترام .. انا ماني جاي نتحاسب او شي من هذا القبيل أنا جاي اقولك انك غلطتي علي وماكان ودي يوصل اسلوبك معي لهذه الطريقه اللي استفزتني . أنا عارف انه مو من طبعك اللف والدوران ولا كان قصدي اقولك شي يجرحك وربي يشهد لكن المستغرب انك تتهميني بأني قاصد هالشي وانا المعروف عني اني عمري ما أذيت انسان سواء بكلمه او غيره استفزني أنك فهمتيني غلط . صدق ماكان العشم فيك ياشذى .. أخطأت لما فكرت بلحظة أنك ممكن توقفي جنبي وتساعديني .. ماودي اقول شي ثاني لاني مازلت احترمك . ما أقول غير .. يا خسارتك يا شذى مدري كيف بتردي على كلامك هذا إذا كان عندك كلام ثاني ممكن تقوليه .. الله يسامحك بس ويجزاك خير على كل حال والسلام ختام

بعد كتابتي لهالرساله ( اكتفت نفسي ) وقلت يا أنها رح ترد علي وتعصب علي !

أو أنها رح تطنشني ومارح ترد .. وبكلا الحالتين أنا ماكنت رح أرسل لها رسالة ثانية .

وكنت ناوي أني ما أقول لها أنه مقلب .. كنت أبيها تبقى حاقده علي خخخخخ إلى يوم ما أنزل موضوع درة الشخابيط 2 وتتفاجئ بالمقلب نازل .


لكن حدث شيء لم يكن بالحسبان . خلاني أغير الخطه .

أرسلت لي الهنوف وخبرتني وهي فاطسة ضحك .. أن شذى اتصلت عليها وهي معصبة مرررررررره .. وانها تبي ترسل تشتكي علي عند الإداره .. أو أحد المشرفين .

أنا وجهي صار كذا .

لكن الهنوف حاولت تهدي بشذى .. وقالتلها برسل لإبراهيم وبقوله شسالفه !

ولذلك وجب علي أني أقولها أنه مقلب .. لا تروح ترسل لـ ( إدارة الموقع ) وألقى نفسي بعدين من غير ( تأشيرة دخول ) للمنتدى
..

رحت أرسلتلها الرساله الأخيره مني ./

إقتباس الرسالة الأصلية كتبت بواسطة R D H السلام عليكم ورحمة الله وبركاته تحيه طيبة لك أختي شذى . وشلونك عساك طيبه ؟! ناظريني زين ؟! هل تتوقعي انه انا العضو البريء . يتكلم معك بهذا الشكل الغلط ؟ أو أني أتجرأ وأخطأ على أختي الكبيره بهذا الشكل ؟! لا مستحيل ، لأنك باقي ماعرفتيني إلى الان . ومستحيل اسويها . أنتي كنتي مستغربه .. والأن زدتي استغراب وقلتي هذا يقول كذا علشان يصرف لاسلوبه الغلط . لا لا .. أحب أقولك :$ أهلاً وسهلاً فيك بإحدى فقرات موضوع درة الشخابيط 2 :$ كل مافات من أوله لأخره .. كان عباره عن مقلب سويته فيك . الفكره جبتها من راسي .. ومافيه لا بطولة رمضانيه ولا رجال ولا سناء مجدي ولا هم يحزنون . وبالنسبة للاستماره اللي أعطيتك ياها بأول رساله .. هذه كانت استماره مفبركه انا كتبتها وارسلتها لعسيريه علشان تصممها . ليس لأنه فيه بطولة .. بل لأني بسوي هالمقلب فيك .. وطلبت منها كذا علشان لما تشوفي انتي الاستماره تصدقي المقلب اكثر .. كل مافات كله كله كله .. كان خراط بخراط .. وكله كلام من أمهات افكاري وحاولت أني استفزك . لكن للأسف ماقدرت .. يمكن بأخر شي هأ حبتين استفزيتك .. لكن من البدايه والله وانتي محجره لي بأخلاقك الطيبه .. لكن أنا قلت مسوي مقلب وتعبان واخرتها كذا ؟ فقلت لازم اكلمك كذا علشان استفزك .. والحمدلله استفزيتك :$ طبعا بالنسبه للهنوف ههههههههههههههه .. تراني طلبت مساعدتها وفزعتها لان دورها كان مهم جداً بالمقلب .. والحمدلله ماقصرت وطبقت كل شي .. لو فيك اي حره فرغيها بالهنوف ياحليلها هههههههههه أما أنا ؟ .. دنااااااااااا غلبان .. صدقيني يالغاليه ، اني اقدرك واحترمك بكل ماتعنيه الكلمه من معنى وأعتبرك كأخت كبيره لي . عمري ماكلمت احد بهالطريقه او كنت " نفسيه بهالشكل ههههههههه لكن للضروره أحكام وكنت مضطر .. لكن انتي والله ماقصرتي . تحملتي بثاااااااااااااارتي بكل احترام . أبيك تعذريني وتقولي : عاذرتك يا إبراهيم . لأنه مقلب خفيف الهدف منه ننسبط ونبسط الاعضاء . المهم ابيك تعذرينا .. واسفين لو خلينا دمك يفور شوي . الله يعطيك العافيه والصحه .. يا أستشاريتنا الغاليه .. بس بالله شرايك بفكرة المقلب :$ عوافي فمان الله أخوك / ابراهيم

والله يا أنا ارتحت بعدها .. ضمنت أني مارح أتوقف خخخخخ وغير كذا حسيت براحة نفسية لما رجعت محترم من جديد !

المهم هي ماخيبت ظني فيها كالعاده .. وتقبلت الموضوع بصدر رحب بهذه الرسالة ../

إقتباس الرسالة الأصلية كتبت بواسطة شـــذى وعليكم السلام ورحمة الله وبركاته أجل غلبان هاهـ والله ماغلبان أحد غيري وربي من أصعب الايام اللي مرت علي هو أمس وتراني كنت ابي استرسل و كتبت رسالة طول بعرض بعدها تعوذت من ابليس وقلت بلاها الحمد لله انه طلع مقلب وما اخفيك إني جلست اضحك وفرحت بنفس الوقت لانك شخص احترمه ومتعشمة فيه كل خير واستغربت كيف تكون وسيط في امر مشبوهـ نادي ومشرف عليه رجل ؟؟؟؟؟ ومدربته بنت مجدي لا والله كدينا خير نجي للجد ابيك تعذرني وتراك مسامح الى يوم الدين امس راسي صدع من كثير الضيق حتى يومياتك حلفت ما ارد عليها << تفكير بزر لكن بعد ما عرفت انها مقلب ارتحت والله يوفقك بموضوعك وبكل شؤونك احترامي

ماخاب ظني .. كنت أعلم أنها على خلق عالي جداً .. وأثبتت لي وللجميع ذلك من طريقة ردودها الراقية .

ياخي يكفيك انها لا جت تهاوش تقول : ( لو سمحت :$ )

فأشكر الغالية شذى على روحها الرائعة وتقبلها للمقلب بصدر رحب .. وهالشي بكل تأكيد يدل على طيب أصلها .. بارك الله فيها .

كما أشكر الغالية الهنوف .. اللي قامت بدورها على أكمل وجه . وتعبت وهي ترسل لي وتنقل رداة فعل شذى .. بارك الله فيك يا أختي .

والشكر موصول عسيرية على تصميمها للاستمارة اللي بأول رسالة .. أنا اصريت انها تكون كذا علشان مقتنع أن شذى انسانه مصحصحة وماينضحك عليها بسهوله .

تصدقون كنا ننوي نصمم خبر مفبرك من جريدة يتكلم عن هالبطولة .. واعطيها صورة الخبر علشان تصدق .. بس الحمدلله صدقت شذى ومشى عليها المقلب ..

وكذلك الشكر موصول لمن كان مأمن ظهري ماجد مقبل .. واشوى أن شذى مابلغت الاداره ولا كان صارت علوم .


وكل الشكر والعرفان .. للشخص الغالي الذي ساعدني من خارج المنتدى .. كل الشكر والتوفيق له يارب وبالتأكيد هو يقرأ كلماتي الان .













الشطحة .. قد تكون موقف .. قد تكون كلمة .. قد تكون عبارة ..

قد تكون أي شي وبأي زمان وفي أي مكان ..

لكن من المؤكد أن بعد كل شطحة .. ضحكة !


هي فقرة أكتب بها بعض المواقف التي مرت بي أو بغيري .. وبالتأكيد تحتوي على شطحات أليمة .

ومعنا اليوم .. شطحتين !




(1)



دق جرس المدرسة معلناً لجميع الطلاب في فصلي بداية الحصة الخامسة ( حصة البدنية ) .


هذا طالب يخلع " شماغه " ويضعها فوق طاولته وينطلق خارج الفصل بإتجاه " الصالة الرياضية " وهو يقول : ( ياعيال أول اختيار أنا )

وهذا طالب أخر سمين ، يحمل كيس صغير به التكميلة الرياضية . ويركض بحماس بإتجاه الفصل وكأنه " ثنيــان زمانه " ، لا يعلم أنه " ينغف " بجوار نهر النيل .. بينما الكرة بالنسبة له توجد في" نهر الميسيسيبي "

وهذا أنا ( عريف الفصل ) أنادي بصوت مرتفع : " استعجلووووا "

ولأن فصلنا متعدد " المزاجات " فلا بد أن ترى أحدهم ينظر لحماس زملاءه وهم يخرجون للصالة الرياضية ولسان حالهم يقول : " وش جوهم ذولي الحين ؟! يازين النوم بس "

كان صديقي المقرب جداً " أحمد " من هذه الفئة .. التي تنظر لحصة الرياضة بأنها ستضيع وقته بلا فائدة .. فإغلاق باب الفصل ، و " التلطم " بالشماغ ثم الشخير بأعلى صوت .. لهو أفضل بكثير من اللعب في الصالة .

كان " يزيد " مرافقاً " لأحمد " في هذه الحصة سواء لغرض النوم أو " السواليف "

فذهب يزيد لصديقي وبعد السلام والتحية .. قام بسؤاله : " الحين أبو إبراهيم وش يشتغل ؟! "

كان " يزيد " يعلم حجم العلاقة التي بيني وبين أحمد ، فبالتأكيد سيجيبه عن سؤاله .

أجاب أحمد : " يشتغل طبيب "

قال يزيد وهو يربت على كرشته : " صدز ؟ "

بدأ أحمد يستوعب أن هذا الشخص سيحرمه من " الشخير " .. فأجابه سريعا : " أيه صدز "

فازداد حماس " يزيد " وقال : " طيب بأي مستشفى ؟ "

أحمد : " بالمستشفى ( الفلاني ) "

قال يزيد بجدية : " تصدق ! أعرف واحد من أخوياي راح تعالج عند أبو ابراهيم "

أحمد وقد تغيرت ملامح وجهه إلى " التتنيح " : " هـا ؟ خويك ؟ "

أجاب صاحبنا : " أيه أيه خويي ، يمدح فيه والله "

هُنا وكأن قنبلة من الضحك قد انفجرت بداخل أحمد .

" متأكد أنت أنه خويك تعالج عند أبو إبراهيم "

يزيد : " ايه يارجال "

أحمد مازال يضحك .. ويضحك .. ويضحك !

ثم قال : " تعرف وش تخصص أبو أبراهيم ؟ "

يزيد : " وشو ؟ "

أحمد وهو " فاطس ضحك " .:" تخصصه أمراض نساء وتوليد "


هُنا فقط .. تمنى صاحبنا أن " تنشق " الأرض .. وتبلعه !

لكنه " صرفها " .. بضحكه على نفسه !


فانتبهوا يا أعزاء من أن تشطحوا يوماً شطحة أليمة كشطحة صديقنا يزيد !

ذكرك الله بالخير يا يزيد أنت و أحمد .



........................................



(2)



شخصان من مدينة الرياض .. ذهبا إلى المدينة المنورة للسلام على الرسول صلى الله عليه و سلم و الصلاة في مسجده ..

و عند عودتهما للرياض بالسيارة .. توقفوا عند إحدى مدن إقليم القصيم .. ليرتاحوا قليلاً ..

و بعدما تناولوا طعام العشاء باكراً .. همّا بأخذ جولة حول المدينة الصغيرة ..

و بينما هم كذلك وجدوا على طريقهم منتزهاً فقررا النزول للمنتزه .. ليرتاحوا فيه ..

نزلوا من السيارة .. ذهبوا لبوابة المنتزه و وجدوها مغلقة .. صرخوا لمناداة الحارس .. و عندما أتاهم .. طلبوا الدخول للمنتزه ..

فأجابهم بأنه مغلق الآن .. و عليهم الإتيان في وقت آخر ..

عندها رفع أحدهم رأسه ليرى اللوحة .. فكاد يغمى عليه من الضحك على ما كتب عليها ..

ثم سأله صاحبه ماذا بك .. أشار على لوحة المنتزه .. فلما رفع صاحبه رأسه ..

قرأ التالي


( الدخول بخمسة ريال .. و الكراث مجاناً )


بالمناسبة .. واحد من هالشخصين .. هو العضو المتعصب للقصمان .. (alhawey ) .

رواها لنا في أحد تجمعات أعضاء المجلس بالإستراحة .



( ماقرأتموه هي مواقف حقيقية )













بسم الله الرحمن الرحيم

عندما تحاول ان يكون لموضوعك قيمة

فلا بد ان تستضيف عضو له مكانه وحقيقة الكل هنا يستحقون الاستضافه فكلهم بالقلب سواء

ولكن ضيفنا ربما يختلف عن غيره فهو ذو حضور مختلف وصاحب دم خفيف واسلوب جذاب يدعي حب الجميع بل ويراهن عليه كما ينفي تهمة الغرور منه ويقول انه واثق بنفسه .

ضيف رغم قلة الاساله التي طرحتها عليه بمساعدة بعض الاعضاء الا انه والله اعلم سيكون حوار الموسم

انه العضو

abo_nasser


- كبداية اي حوار سنسالك من هو ابو ناصر ؟!

انا ابو ناصر واسمي قديما زعيم قحطاني(عنصرية شوي )

عضو متخرج هذا الترم وينتظر الوظيفة ويخاف من العطاله

احب البابا والماما واحب ناصر واحب كل صادق واكره كل كذاب.


- بدايتك مع شبكة الزعيم كيف كانت ؟!


ابد هذا اليوزر اصلن كان لاخوي وانا مسجل بيوزر مافعلوني فيه طلبت اخوي هاليوزر يوم كان زعيم قحطاني وماقصر وسجلت لجل عشقي الهلال ثم صرت اتنقل بين المجلس العام
ومنتدى الجمهور والحمد لله كسبنا معرفة الطيبين شروا الموجودين.


- ابو ناصر/ماهي انديتك المفضله غير الهلال ومن هو لاعبك المفضل.

حقيقة انا متعدد الميول ففي اسبانيا اشجع الفريق الملكي ريال مدريد وفي انجلترا مانشيستر يونايتد وفي ايطاليا اي سي ميلان

غير نادي الهلال طبعا الحب الكبير

ولاعبي المفضل محليا ويليهامسون وسابقا فهد المفرج اكثر لاعب ظلم بالهلال ترا جد اتكلم.

عالميا لايوجد غير كاكا ينسيني زيدان

ثانيا حنا بمجلس عام مو بالجمهور ولا العالمية فكونا من هالاسئله تراني كاره الكوره بعد منتخب النكبه.



ونظرا لطلب الضيف سنتحول لاسئلة الاعضا ء .



عاشقة الزعيم 15


ايش الشي اللي تمنيته وتحقق وايش الي باقي ما تحقق ؟


ايش وايش..


الايش اللي تحققت..فيه اشياء كثيره تمنيتها وتحققت الحمدلله

امثلاً..وانا بالابتدائي تمنيت اشتري بلاستيشن..

وتمنيت اني اشوف الكعبه اللي ما كنت اشوفها الا بالتي في والحمدلله شفتها على الطبيعه..ولكن وقتها حسيت اني بموت..

ابوي مودينا الحرم ليلة 27 من رمضان وعلى المغرب..الناس طالعين بعد الفطور واحنا داخلين..


الايش اللي ما تحقق كثير بس اهم شيء.. تحقيق اغلب امنيات الوالده..



ايش اكثر صفه تكرهها بالشخص ؟ واكثر صفه تجذبك باللي قدامك ؟

برضو ايش ..!
اكثر صفه اكرهها الغرور وشوفة النفس..
واوقات احتقر نفسي لما احس ان الغرور نال مني والمشكله انهم يقولون عني مغرور رغم انها ثقة نفس ..
ودايما احب هالبيت..واردده كثير..مو لانه باغنيه..بس عاجبني
خلي عنك التعالي واتركك منه..ما يفيد الغرور اللي معاه منه



بالنسبه للصفه اللي تجذبني..البساطه والوفاء


متى بتعقل وتبطل سماجه هع ؟


شوفي يا لينا..سابقاً انا انسان ما كان لي اي صله بالسماجه وكانت عندي مناعه من اي شخص يتمتع بهذي الصفه ولله الحمد
ولكن عندما تتعرف على منبع السماجه..فاي مناعه قد تفيد..؟؟
من عرفتك يا بنت الحلال انتي وبعض اخوانا السماجين كالمشاغب وليو ميسي وبلد الوليد وانا مختبص..صاير اوسوس السبب كله من كلامي..احس انه يقوطر سماجه..<
الله يسامحك يا لينا انتي والخرفان...الله يسامحك يا فتاة الكرنتينه ..




الهنووف


أهلين وسهلين بـ ابو ناصر مايحتاج ارحب فيك فقدرك اكبر من الحروف __>اخلصي

وعلشان لانخسر اخوي ابراهيم مساحه طويله بموضوعه
نبدا بالاسئلة ع طوووول
لو طلب منك تغيير معرفك اجباريا من ابوناصر الى .(؟؟؟ ) ماذا ستختار .؟


والله يا هنوو فكرت بسؤالك كثير..وتعبت وانا افكر..لان ما في بالي شيء..

لو كان ببالي شيء كان من الاساس ما حطيت ابوناصر اللي مخليني شايب متزوج لديه خمسه اولاد وثلاث بنات وباقي له سنتين على التقاعد ..

بس معلوميه للجميع.. لازلت شاباً لم اصل للـ 25 حتى الان ..
الزبده...لا يغركم هالاسم النكبه..
والاسم الي وصلت انه يناسبني هو
زعيم الزعماء(ترا مو غرور ثقة )

شي تتمناه بالرغم من كونه قريب ولكن صعب تحقيقه.....!؟


كما ذكرت سابقاً على سؤال منبع السماجه ..امنيتي تحقيق اغلب ما تتمناه الوالده..ولكن بوضعي الحالي..صعب جداً وإن كنت اتمنى حقيقة تغيير مبدأ أن كل مملوح لابد أن يكون ذو جسم رشيق عاد لاتسالوني عن التفاصيل


سؤال مدري وين جا منه بس مر ببالي طويل تراه
@ لو كانت تعاستك وتحطيم حلم لك هي مفتاح وطريق لسعاده شخص قريب لك جدا (اخوك او اختك)هل بتتنازل عنها.؟
(اعطيك مثال حتى تكون بالصوره
لو فرضا حبيت ترتبط بـ فتاه حازت على رضائك ومحبتك وماباقي شي على الزواج
وجالك زوج اختك وطلب منك تتزوج اخته لاي سبب من الاسباب أو بيطلق اختك( وهي أم لطفلين ) - بعيد الشر- ومافي يدك حل ثالث تختاره والوقت قصير علما ان زواجك بعد 3 ايام ) وش بيكون رأيك ....؟؟


لا اختي ام لطفله..<---تاثير لينا..
ما راح اتقيد بالمثال..لانه توضيحي فقط..ولكن بشكل عام ما احب احكم بشكل نظري..لان الواقع يفرق
كثير..وكل موقف له ظروف محيطه به
باختصار..لكل حادث حديث..



حتى ظلالي هلاليا


بو ناصر .. شخص محبوب لدى الجميع .. يتميز بروحهـ المرحهـ مع الكل .. اعضاء وعضوات ,,هل هناكـ سر في هذا ..! والا (الدنيا حظوظ ) ؟



ايه هذي الاسئله الزينه..

ليتك كثرتي من هالترفيع..وقلتي صاحب النكت الظريفه والدم الخفيف (عشان اقهر منبع السماجه )

ومشكورة على كلامك الواقعي والي بمحله وان شاء الله استاهل هالحب الي اشوفه من الاعضاء

رغم انك تعرفين كم عيد جبته بالمجلس..؟؟
وقد يكون معي حق وقد اكون مخطئ ..بس العيد صار وانتهى وانا ما احب اغير كلامي ابد..

على كل حال اتمنى يكون كلامك صحيح..وان حصل فهو امر مُفرح للغايه..ان تكون محبوب من الجميع ..
لانك مهما كنت تستاهل الحب وكفو له الا لابد من ان يكون هنالك شواذ يكرهون كل محبوب وناجح
بالمناسبه..من بداية تواجدي بالمجلس وانا اقول النت يبقى نت ..بمعنى اني اقضي وقتي فيه للوناسه ومأخرا اكتشفت اني استانس واستفيد بنفس الوقت..سبحان الله... فلا يمكن اني احقد او اكره احد..فجميع من صار بيني وبينهم اي تتش الله يسامحهم وان ماسامحوني هم فالله لايردهم راس ماله نت وعالم افتراضي


انضميت بعد التخرج تحت مسمى (عاطل) تخيلكـ للموقف كيف بتعيشهـ بعد نهاية الاجازهـ ..!


نعم نعم..لا حول ولا قوة الا بالله<--يقاله حزين وهو يقرا السؤال..
الحمدلله على كل حال..رزقنا بيد الله ..واذا انتهت الاجازه وشفت ما فيه شيء ...راح اتوظف باطرف شركه لو بـ 2500..



سؤال صريح .. سبب كرهـ فلاح لـ طارق التايب حتى قبل رحيلهـ عن الهلال ..!




الغرور وشوفة النفس..




leo messi

سؤال المشاغب


فلاح بحكم انك لك تجربه سابقه في محل والدك للملابس الرجاليه ممكن تشرح لنا وش سالفتك مع سروال السنه؟؟


سلطان انت ويسلم شكلكم متفقين علي
ياخوي السالفه ملفقة
ولفقها هوبا الله يسامحه
ابد بيوم دقيت عليه بعد مادق الملكي خشم برشلونه وجلست اهزاه شوي فجاه سولفنا بشخص ما وجاب عليه سالفة سروال السنه وانه دب ومقاسه اكس لارد
لارج
انا مت من الضحك لان السالفه بتفاصيله جد تموت ضحك
فيما بعد هوبا يقولي اني متين وان سروالي السنه مقاسه اكس لارج هو وشدراه اصلن وانا كلي رشاقه يالبى قلبي


سؤال اخير

رايك في كل من


المشاغب
معشوق الجماهير وصاحب الاعياد الي ما تنسي وكل شيء فيه زين رغم اني سمعت ان خشمه مخرب كل شيء


ليو ميسي
رجال وشاعر وفارس<====شفت كيف ارفع فيك يبو ريناد بس عيبه انه بفتره مضت صار هيكل عضمي هو وشيء ما والحين بعد الزواج يقولون الرجال عقل


بلد الوليد
مافيه احسن منه بس لو يخلي الشيبان بحالهم


هلالي الخبر
فارس النكبه


ماجد مقبل
اطلق مشرف بالتاريخ فديته ابو مقبل
ادارة شبكة الزعيم
وانا اقدر اقول شيء بالحكومة غيره يا ابراهيم




كلمه اخيره


اتمنى اكون ضيف خفيف رغم ان الاساله كانت غير خفيفه ولا ظريفه لذلك اتمنى ما ازعل احد مني واذا حد زعل بسلامته والله يخارجنا من ابراهيم وحواره

( كل الشكر لمن قاموا بإلقاء الأسئله على فلاح )











ما طــــاح .. إلا أنبطـــح . ( أيه صوفيا )


حكاية لو بقت في القلب أكثر لـ صارت حامضة . فلازم تطلع لكم

أعذروني على الأسلوب العفوي الشاطح . لأن السالفة كلها عبارة عن شطحة أليمة في تاريخ مسابقات شبكة الزعيم .
.

كان يوم عادي جداً لما جاني الأخ الحبيب العضو " السمسار الهلالي " واقترح أننا ندخل مع بعض في فريق واحد بمسابقة " الكاش " في المجلس العام ، وأن يكون أسم فريقنا " الطحاطيح "

ما رح أقول أني شعرت بأن القدر أبتسم لي ، ولا رح أقول أنه " كشّر " في وجهي لمجرد أني رح أكون زميل السمسار الهلالي في فريق واحد . لكن ، وافقت .

وافقت وماكان أمامي إلا أني أوافق ، والحمدلله أني وافقت ولا ماكان شفتوا هالفقرة .

بدأت المسابقة بعد ماطمني الأخ عزام ( السمسار ) أن المسابقة بالجيب . والله ياعليه أسلوب أليم .. يوصلك للبحر .. ويرجعك منلعن خيرك من العطش .

بدأت المسابقة . وبدأ " شد الشعر " وشق الثياب مني ، تارة لأن عزام يجاوب على السؤال وهو ليس الكابتن .. وتارة لأنه يجاوب على سؤال بإجابة خاطئة ثم يعرف أنها خطأ ويعدلها .

الزبدة بغى ينكبنا .. إلا نكبنا وخلّص وجاب العيد !

منظم المسابقة طلب من السمسار أنه يمسك أرضه وما يقعد كل شوي منزل رد وهو مب الكابتن . وحذرونا لو نسوي كذا ثاني بيكرشونا برا المسابقه . وانا بصراحه تمنيت ننكرش ونحفظ ماتبقى من ماء الوجه .. لكن قلت خلنا نجاهد من أجل نقطه .. وليتنا ماجاهدنا .

أنا بعدها قررت أغير الخطة لعلها تفيد . قلت له أنت سوي تحديث كل شوي للصفحة ولما ينزل السؤال انسخه لي بالماسنجر وأنا أدور عالإجابة وأنزله برد .

الأخ عزام ما عجبه الوضع ، مايبي يكون " محدّثاتي " يقعد يحدث الصفحة بس . فـ عزام فكر .. شغل مخه .. اقترح علي اقتراح جهنمي وقال : وش رايك تعطيني كلمة السر ليوزرك . وانا أدخل فيها ونصير أحنا الأثنين ( داخلين بيوزر واحد ) وأنت تحدثّ ولما تعرف السؤال وجوابه تعلمني وأنا أنزله .

أكذب عليكم لو قلت أني فكرت بكلامه ، كنت مشوش التفكير ولو أي حد عطاني أي حل لوافقت عليه .. فرحت وافقت على مضض وعطيته الكلمة السرية ليوزري وأنا أقوله : " إياك ورسايلي الخاصة .. إياك ورسايلي الخاصة "

أخذه وقال : ماعليك أبشر . << قايل انه كان معيشني بوهم .

قمت بتحديث الصفحة فوجدتهم نزلوا السؤال التالي .. وكان :

كنيسة صارت إلى مسجد * * * * هدية السيد للسيد

من قائل هذا البيت ؟!


أنا عرفت من أحد الأشخاص أن القائل هو : أحمد شوقي .

فقلت لنفسي رح أكتب الجواب فوراً وأنزله برد مادام أني أعرفه ، ومايحتاج أروح للسمسار واقوله اكتب : أحمد شوقي .

فرحت وأنا متحمس وعلى أمل أني أكسب نقطة وحيده وكتبت الإجابة وجيت أعتمد الرد وأنزله لكن فاجأني صندوق الرد برساله غريبة تقول : "قمت قبل قليل بإنزال مشاركة ، عليك الإنتظار 22 ثانية حتى تتمكن من اعتماد مشاركة أخرى "

أنا أنهبلت ، قلت وشلون يقول لي كذا وأنا لي يمكن خمس دقايق ما نزلت ولا رد ، استغربت جداً ومن الحوسة والإرتباك اللي تملكوني ماكنت فاضي أقول لعزام شسالفه ؟!

وأنا أصلا ناااااااااااااااااااااااااااسي أني معطي الأخ عزام " يوزري "

انتظرت 22 ثانية ، ونزلت الرد .

نزل الرد وقلت : الحمدلله .

ارتفعت فوق اشوف ردود المنافسين ، إلا وألقى رد ثاني بيوزر " R D H" .. أنا شفت الرد و انجنيت .

وأثري تأخرت بسبب عزام منزل رد قبلي .

ما انجنيت لأنه نزل رد بيوزري قبلي . لا لا . أنجنيت باللي مكتوب داخل الرد .

بغت تجيني سكته قلبية لما شفت الإجابة اللي كاتبها عزام .

كاتب أن قائل البيت هو : آية صوفيا !

أنهبلت .. ركبني " العصبي " .. أية صوفيا ؟ مين أية صوفيا ؟ تبع مين ؟!

رحت فوراً وأنا مغمض حذفت هالمشاركة " الفضيحة " بحق يوزري اللي كان خلفه عزام .


السؤال توه نازل . وليس تلك الصعوبة اللي تخلينا نوصل لأخر الحلول وهي : التخمين .

طيب حتى لو خمنّا ، نخمن بأسم واحد نعرفه . بإسم ممكن نبلعه . لكن " اية صوفيا " أبد ما تنبلع ياعزام .

أنا لو أعرف الرد أكتبه ، لو ما أعرفه ما أكتب شيء . لكن حبيب قلبي عزام سواء يعرف أو مايعرف .. " بنزل يعني بنزل الله لا يعوقني بشر "

والنتيجة : أية صوفيا .

قعدت كم يوم وأنا في حالة : ضحك .. وماخليت أحد أمون عليه إلا وقلتله السالفة .

بعد كل هالشد العصبي والنرفزة .. ينكتب لي : أية صوفيا .

بعد كل هالهياط قبل المسابقة أخرتها ينكتب ( أية صوفيا )

الله يرجك ياعزام .. شكلك تاركني أحرق أعصابي وقاعد تقرأ برسايلي الخاصة .

مع أني ما أذكر أنه فيه شي برسايلي الخاصة تخلي الواحد يفهي .



بعضكم يتساءل عن سر القريحة أو الغريزة أو " الشسمه " اللي خلت عزام يقول : أية صوفيا .

لا تقلقوا . لكم الإجابة .

لما قرأ عزام السؤال راح فوراً لجوجل وكتب البيت الشعري فيه وبحث عن قائله .

فطاح عزام على أحد المنتديات ، وكان فيه رد لأحد الأعضاء مكتوب فيه البيت الشعري نفسه وبأسفله قائل البيت اللي هو أحمد شوقي . وبعدها بمسافة بنهاية الرد مكتوب اسم " العضو " اللي أجاب .

من الإرتباك . راح الأخ عزام بدل ما ينسخ الإجابة " أحمد شوقي " راح نسخ اسم العضو المجيب ويوزره " أية صوفيا " << يازين من وداك التشليح بس !




من هذا المكان أشكر حبيب قلبي عزام على ( اللي يحس فيه خخخخخ ) ، ولا ماكان شفتوا هالفقرة ،

ومن يومها وأنا أسميه " اية صوفيا " وانتم وش بتسموه ؟!







وشكراً عزام لروحك اللطيفة .

عزام .. أعشقك !

وأعشق عفويتك !

وأعشق شطحاتك خخخخخخخخخخخخخخخ !


كان اسمنا " الطحاطيح "

وعقب " اية صوفيا "

أصبحنا " مطافيق "















رخصة الحمار










هـا قد وصلنـا معكم أحبتي إلى نهاية الشخابيط الثانية . آملين الله أن نلتقي بكم في شخابيط أخرى !

أشكركم جميعاً .. نفر نفر .. ونفره نفره على قراءتكم ومشاهدتكم .. وهذا شي يشرفني جداً !

أعيد وأكرر هالموضوع ليس مجلة .. إنما هي شخابيط جت في بالي وجمعتها بهذا الموضوع .

وفي قادم الأيام إن كان هناك شخابيط في رأسي .. فسترون " درة الشخابيط 3 " و " 4" ... الخ !

وإن شاء الله رح نفاجئكم بشيء جديد بالمرات القادمة .. وهالمرة رغبت أن تكون أقرب للأعضاء وسواليفهم كونه عدد خاص لرمضان .

أتمنى من أعماق قلبي أن الموضوع يكون حاز على إعجابكم ..

قبل الختام أحب أقول : أن الله لا يشكر من لا يشكر الناس . ومن هنا أشكر كل شخص دعمني معنوياً أو مادياً في درة الشخابيط أو بغيرها .

وأخص هنا من جديد المصممة عسيرية .. الشكر لن يوفيها حقها مهما تحدثت .. رغم تعبها إلا أنها أبت أن تفي بوعدها وتنجز التصاميم بارك الله فيها .. باقات ورد وشكر من الرياض حتـى عسير ثم عودة مره أخرى لمكان إقامتك .. الله يحفظك ..

وكذلك للأخت الفاضلة الهنوف التي كانت قد الثقة وبنت سنعه بمعنى الكلمة .

وهنا أتوقف وأنحني لحبيب قلبي ريكلمي على وقفته معي في كل شيء .. مثل الأخ الكبير وأكثر .. ماقصر أبداً ويعطيه ربي العافية .

وكيف أنسى ؟! " مفكك الأزمات " .. كيف أنسى ؟! .. كعادته " القيصر رهيب " ومن بداياتي في المجلس العام حتى الأن وهو بجواري في كل موضوع أكتبه . جهودك على العين والراس يابعدي .. والله يسلم دياتك .


والشكر موصول لحبيبي سلطان هو اللي أشار علي أسوي المقلب في شذى انا كنت ناوي على الهنوف بصراحه خخخخخخ
ماجد مقبل .. شكراً !


وفي مسك الختام .. أشكر حبيب قلبي وعزيزي من خارج المنتدى الذي عمل على نجاح هذا الموضوع من خلف الكواليس .. جزاه ربي كل خير ويعطيه العافية على كل شيء وبالتأكيد هو يقرأني الأن ..


أطلت عليكم .. هذا أنا .. لا تعطوني المايك .

أنتظر مشاركاتكم بشغف .. والحجز مسموح طبعا مع ضمان العوده لتعديل الرد ( فيس رافع فتحة خشمة اليمين ويناظر بحقد على وليد القحطاني )


شكراً لكم جميعاً .. اعذرونا عالقصور .. فما كان من صواب فمن الله ورسوله .

وماكان من خطأ فهو منا والشيطان .


تقبل الله صيامكم وقيامكم .. وكل عام وأنتم بخير .


تحيتي .. دمتم بأجمل حال


أبو يوسف

..][.. مخرج ..][..


وعدت أنها ستعود !

وماعادت .. ولا هم يحزنون !

هذه هي الدنيا تخطف منا من نُحِب في حين نكون لهم منتظرين .

كانت هنا وقرأت درة الشخابيط 1 . . والأن هي : عند المولى

رحمك الله يامنار .. وأسكنك فسيح جناته .