كـلنـا مـحتـاجـيـن شـويـة ( حن حن ) .. اصـرفوا لنـا تـغذيـة الـ( حن حن ) - نادي الهلال السعودي - شبكة الزعيم

Fahad Al Sudais · #1 13/10/2009, 12:37 AM

حيــــــــــاكم

كالعادة.. جيت

( هلّيت ) كما المطر بين المزون .. وانغرفت كما الجريش وسط الصحون

بسم الله علي.. بسم الله علي.. لايوقف لايوقــــف

استـهلال

قبل كل شي خلّون اعلمكم سالفة الـ( حن حن )

هذي الله يسلمكم وحده من اقاربي

تموت بالبزران لاصاروا توّهم مواليد ( مطاريس )

يعني من بعد الولادة وحتى تاصل اعمارهم ست شهور

او مثل مايرمز لها بمرحلة ( ماقبل السريلاك )

قريبتي هذي تتمعقط بالبزران اللي بهالعمر... وخذ ياتجغيف وسعابيل

وابتكرت لغة تخاطب غريبة عجيبة مضحكة مع هالاطفال الرضّع

وصعبة اشرح لكم بالتفصيل.. لكن باختصار

تجيب الكلمات الاصلية وتلعب بحسبتهن... يقال لها البزران بيفهمون كذا

عاد من أشهر الكلمات بلغتها ( حن حن )... ومعناها ( حنان )

يعني تمسك البزر وتخمّه بقوه وتقول :

قلبووووش والله ... يحتي عليك يحتي ... تبي اعطيك حن حن ؟؟

الترجمة :

كم انت لطيف.. يا اختاه عليك يا اختاه.. هل تريد قليلاً من العطف والحنان ؟؟

انـهلال

عاد تصدقون... اغلب البزران يتفاعلون معها ومع لغتها ( المطاريسية )

وتحس فيه تفاعل موب صاحي ابد من معشر الرضّع

وكلهم سبحان الله تشخص ابصارهم اذا قالت لهم : تبون حن حن ؟؟

وعاد الصدق الصدق

مو بس البزران ينبسطون... حتى انا والله

لما اسمع هالكلام النابع من القلب بمنتهى البراءة تضرب فيوزي

ساعتها احس اني فعلاً بحاجة القليل من الـ حن حن ... وش حيثي ؟؟

ترى الواحد مهما كبر ومهما مضت فيه السنين يبقى طفل كبير

ويبقى القلب ( طفل ) بين ضلوع ( رجل )

احياناً نصادف بحياتنا واحد طول بعرض... ملامح وجهه خشنه وجفس مع مرتبة الشرف

لكن لو قعد يتفرج على مسلسل قطري.. تنزل دمعته مثل البزبوز اللي يهرّب

بس ترى على النقيض... فيه جلوف ماينفع معهم الـ( حن حن ) وحدّهم مصارعة الثيران

اوّلهم واحد من اخوياي بالدوام

سويت معه موقف امس وندمت أشد الندم... الى الحين وانا حاقد على روحي

لأني صرفت جرعة ( حن حن ) لواحد ( تيس ) بكل ماتحمله هالكلمة من معنى

السالفه ومافيها انه كلمني امس الظهر

هالشخص كان من الصبح مشغول باللاب توب يحمل برامج للعمل

وطلع لكوفي شوب علشان الاتصال اسرع ويضبط معه التحميل ويخلص قبل نهاية الدوام

وطلب مني شي معين... وقال لي تكفى تعال جبه لي بالكوفي شوب

انا ساعتها كنت طالع من الدوام اتغدّى

خلصت غداي وقلت في نفسي : ليش ما آخذ له ساندوتش معي... تلقاه ياحرام ما تغدّى

والله وآخذ له ذاك الساندوتش اللي يخلي المعرس يسعبل ويجحد عروسته

( وهذا عيبي على فكره.... قلبي ماكله القطو .. كلّي حن حن )

واروح له وادخل عليه بالمقهى واعطيه الغرض اللي كان طلبه مني

وامد له ايدي الثانية بالساندوتش واقول : بالعافية على قلبك... قل بسم الله

رد الثور :

ومن قال لك اني ابي غداء ؟؟

قلت له :

بدون ماتقول.. انا جايبه لك من باب الـ( حن حن )

قال :

ما اشتهيه الحين.. رح عطه أي هندي ياكله

اقول مهوب منك والله... من حواجبك هاللي كنهن الساعة عشر وعشر

عموماً

لايهمكم هالتيس ويدمر روح الـ( حن حن ) بقلوبكم الغضّه

تأكدوا انه حاله شاذّه هو وحواجبه

ستجدون في الحياة الكثير من الظمأى بانتظار رشفة ( حن حن ) ساخنة.. وليست باردة

.

.

.

.

برايفت
7
7

.

برايفت ثاني
7
7

.

.

سي يا

صخّو تشان

.

.

.

صخّوووووور

كان

هنا

ورحل

alhilali15 · #2 13/10/2009, 12:45 AM

إقتباس

حجز لملفي بموضوعك وراجع بعد ما أخلص موضوعي

رجعنا

أهلا بالحن حن كله

شخصيا الطفل مثلما وصفه عميد المجلس لما يكون لحمه ما أخبر إني أحن حن عليه وإن أحد جاب لي بزره ولا ولده لجل أحن حن عليه فأحن حن عليه مجاملة

.

يالبيه يالطفل لما بدأ بعمر النضوج ودخل مرحلة السيرلاك

.
يمديك وقتها تعلمه اللكاعه

.

أختي الله يسعدها كان عندها طفلين مجرد إنهم تعدو السن الي قلت عنده خليتهم يسوون إنقلاب على أبوهم وأمهم

<--------------يتذكر دعاوي أبو الطفلين عليه

أما ولدي الي بيجي أحس إني بسحب على مندوبه هو وأمه وبخلي أمه مو بالأربعين بس عند أهلها بخليها ستة شهور وأصير أجيهم زي زواج المسيار

<----------بالله مو كلي حن حن

والله تراه من الحن حن فأنا شخص ما أتحمل طفل يبكي بالذات بهالسن تخبرون كيف صياحه شين

.

من جهة خويك وهو والله صادق.
فيه أحد يجيب ساندويتش لشخص جالس بكوفي شوب وشاربن من ذا القهاوي ويمكن ماخذ له كارسون وتجي تسوي فيها حن حن لو به حن حن جلست معه حتى يخلص شغله ووديته على أقرب مطعم بخاري ولا البيت وغديته

هذا هو الحن حن يبو حن حن

الصخره

كثر منك ومن حن حنتك ومن مواضيعك ومن ملفاتك

هلالي معالي · #3 13/10/2009, 01:12 AM

ياخي يبو صالح مواضيعك الاخيره كلها لحسة بالنسبة لي

لم افهم الغرض هل هو عدم {الحنحنه} للتيوس؟

ام عدم فقدآن الامل في التيوس انهم في يوم من الايام يفهمون {الحنحنه}

لي عودة ان قاله الله

هلاليه محترفه · #4 13/10/2009, 01:47 AM

إقتباس


	يعني تمسك البزر وتخمّه بقوه وتقول : قلبووووش والله ... يحتي عليك يحتي ... تبي اعطيك حن حن ؟؟

انا احب الصغار الي في هالعمر بس في شي منرفزني
جلست افكر وافكر ليش نكلم البزر كذا! مالقيت جواب !!
طيب أبي افهم كلمة " أغـا"

واذا قلناها للبيبي يضحك ليش؟؟؟؟
أترك لك الجواب لأن مخي فاضي

اما على سالفتك مع صديقك ..
ماتوقع ان فيه بين الشباب ذوق مو حن حن
على الأقل من باب الذوق خذها وخلها على جنب
بس ماعندك احد جلوووووووووووف
عساكم تفلحون مع حريمكم وتحنحنونهم

تشكرات اخوي الصخره ..

ḾŎĤǍṀẠḊ · #5 13/10/2009, 02:23 AM

حياك الله

اوما الكلام مع البزران غريب تطلع كلامات غريبه ما تدري ليش تصغر كل شي ههههههههه

المهم لي رجعه ان شاء الله ورانا دوام الساعه سبع ونص اهي اهي وسهران للساعه 2ونص

مَاهِينُورْ · #6 13/10/2009, 03:45 AM

..

أهلين وسهلين الصخرة

موضوع حلو خاصة اني توني طالعة من فترة أمومة استمرت ليومين وفشلت فيها

وماكان من أهل الطفل الا جلب خادمة فهي أفضل مني بكثير

بالنسبة لـ حن حن ولغة المشتركة بين الطفل والفتاة
سبحان الله هالعادة بس عند البنات أظن

كلمات مادري كيف نجيبه , وأعتقد يفهمها الطفل لأنه يضحك ويغاغي اذا سمعه

ياحبي لهم الله لا يحرمنا منهم

الله يعطيك العافية يالصخرة

معليش رد سريع جداً بس قلت أستغل الفرصة وأسأل عن
هالمملوح ماشاء الله اللي بصورتي الرمزية

جازلي بالحيل ليت إدارتنا تكثّر لنا من صور الصغيرين

v
v
هلالي15 & زوزو
الله يعطيكم العافية ع الإجابة
أنا عارفة إنه أمييير أكيد

ياقلبي هذا هو المريض " الله يشفيه يا ربّ ويفرح أمه وأبوه بسلامته "

هتلر / أجل تبيهم يحطون صور الخالِدَين

v
v

alhilali15 · #7 13/10/2009, 03:50 AM

إقتباس


	الله يعطيك العافية يالصخرة معليش رد سريع جداً بس قلت أستغل الفرصة وأسأل عن هالمملوح ماشاء الله اللي بصورتي الرمزية جازلي بالحيل ليت إدارتنا تكثّر لنا من صور الصغيرين

هلا ماهينور بتلقف واقولك كود انه من طوال العمار

,
راجع يالصخره وبرد على موضوعك

Mr.Scrub · #8 13/10/2009, 04:04 AM

إقتباس

الرسالة الأصلية كتبت بواسطة alhilali15


	هلا ماهينور بتلقف واقولك كود انه من طوال العمار,

الوكآد أن كلامك صحيح

, ولا لو هي على أنه مملوح كآن صوروآ ذآيب ولا هلالي معآلي , ممآليح ما شاء الله عليهم

الصخرة لي رجعه , بس مُش الحين

,
يالله حي أخونآ الكبير الصخرة

, أن شاء الله أمورك تمآم

الـ حن حن

, أغلب الشعب عندنآ نآقص حن حن , ألا فآقد شي أسمه حن حن

, طبعاً كلامي بالنسبه للشباب

الصدق أنا على أني فآقد حن حن ألا أني أعطي الصغآر , بس إذا صآح ماأعرفه ولايعرفني

, طبعاً ما أحب الصغير الا لمآ يحبي وأول مايمشي

بس يضل الـ حن حن اللي أعطيه الصغار يحوم الكبد

لأني أذكر مره خذت بنت أختي أوسع صدرهآ بس للأسف من ركبت معي السيآره ونفسيتهآ زفت

, أحآول أشوف وش السبب !!
أثر المسكينه مركبهآ في السيآره في عز الظهر

, حتى أنهآ جآلسه على طرف المرتبه من قوة الحرآره

ولا بالعآده تنبسط إذا خذتهآ معي , بعدهآ عرفت أن توقيتي الزمني سيئ جداً

لأني كنت متعود على العيآل لأنهم يركبون معي الظهر مبسوطين

, تأكدت بعدهآ أني كنت أركب معي ثوره

[ ثوره : جمع ثور

]

إقتباس


	بس ماعندك احد جلوووووووووووف عساكم تفلحون مع حريمكم وتحنحنونهم

فآقد الشي لايعطيه .. < هو كذآ صح

,

إقتباس


	هتلر / أجل تبيهم يحطون صور الخالِدَين

أيه بس لآزم يحطون جنب الصور كيس

, علشآن اللي يشوفهم من هنآ يرجع الأكل في الكيس الموجود

ذآيب + هلالي معالي ... قسم أني أمزح

الصخرة
الله يعآفيك , جبت موضوع على الجرح

لاهنت

miss zozo · #9 13/10/2009, 04:34 AM

اهلا بالصخره

,,,

مواضيعك رهيبة يااخي ماشاء الله لازم اضحك وانا اقرا

اما البزارين اللي بالشهور المطاريس ذولا مااواطنهم اصلا ولااشيلهم اخاف يطيحون مني اذا زانت رقبتهم شلتهم

اما صديقك هذا مب كفووو والله احس ماطاح وجهكـ ابببببببببد

مافيه شي اسمه مجامله ولا شكله قافله معه من الشغل

اللي يسألون عن المملوح اللي بالصوره الرمزيه لماهينور هو الامير :سعد بن نواف بن سعد

ولد نائب رئيسنا الله يشفيه ويقومه بالسلامه يارب

,,

الكلاسيكي · #10 13/10/2009, 05:02 AM

اهلاً وسهلاً بصخوّر بيك ..

سبحان الله .. بعض الناس يحب الاطفال واللعب معهم ويشعرك فعلاً بان الطفل منسجم معه

ولو انه مايدري عن السالفه .. بس احساس , وعاده ان هالشخص لمتلك من الـ حن حن الشي الكثير ..

وانت يابو حن حن .. لا تحنحن إلا على من يستحق الحنان ..
وحتى يمكن تشوف ناس شكلهم حنونين , ولكن تقرب منه تكتشف انه وحش

الصخره .. كعادتك رسمت الابتسامه ..

شكراً لك .. وتقبل احترامي ..
دمت بخير

صِبآ نجّد · #11 13/10/2009, 05:10 AM

حيآك الله ..

ودييينهم الصغنونين , كذا بالفطره لا شفتهم تبدا تتغير اللهجه والنفسيه وكل شي ,, يا حبـي لهم

الاطفال وش زينهم يهبلون طيور الجنه بـــــس لا يصيحون

.. ..

كل الشعب ناقص حن حن

<_>

الله كريـم

اما بالنسبه للناس اللي تجيهم بالطيب و يستكثرون قولت شكرا ,, فنص المجتمع تسذا

الله ياجرنا بس

منوّر يا صخ صخ

Fahad Al Sudais · #12 13/10/2009, 06:54 AM

إقتباس

الرسالة الأصلية كتبت بواسطة بريماكس


	بريمو تشاااااااااان

جاكي شان

<< مسك خط

لاتبطي علينا تراي احتريك... كلّي شوق ومحبة.. وماسك الهوى بـ إيديّا

‏**m!sS fLoWeR** · #13 13/10/2009, 07:03 AM

فعلا انا لاحظ اخواني وهم يكلمون اصدقااائهم دفااشه مو طبيعيه ولما اسئله ماتزعلون من بعض ع هالاسلوب يقول لاا متعودين مو مثلكمـ مدلعات يالبنات
ليه نسميه دلع لما نكون شويه ذوووق مايعتبر دلع
ع العموووم انت وفر حن حن حقك للناس تقدره

™® عــذب الســـجايا ®™ · #14 13/10/2009, 07:21 AM

اي والله محتاجون حن حن لو نص كيلوو

لكن العالم اليوم مشغولة بهمومها

حتى الحرمه يلهونها ويكدرونها عيالها وتنسى زوجها

.....

اما التيوس فمالهم الا العصا

الـمـشـاغـب · #15 13/10/2009, 08:30 AM

هلا وغلا الصخرة

هـ الحن حن مع البزران عندي على عكس قريبتك ..
البزران من عمر يوم إلى 6 أشهر ما فيه أمل أعطيهم حن حن ولا دن دن ..
سبحان الله مدري ليه أحس أنهم يحومون الكبد

لكن من بعد الـ 6 أشهر .. يا كثر ما أعطيهم من حن حن وعطف وأمومة

أمووت في البزران من بعد الـ 6 أشهر

بالنسبة لبعض الناس مثل خويك .. أحياناً ما ينفع معهم الحن حن .. لكن المطلوب عدم اليأس معهم

حاول معه وحاول حتى يحن قلبه , وإن تطلب الأمر لا يمنع من الأخذ بالأحضان وطبع القبلات الحن حنية على خدّيه

بس انتبه تعطيه حن حن في مكان عام عشان محد يبلغ عليكم ويفهمكم غلط

إقتباس