جمل سخيفة .. ورسائل غثيثة - نادي الهلال السعودي - شبكة الزعيم

ابو طـــــلال · #1 07/10/2009, 07:48 PM

موضوع ورى موضوع .. ماعندي وقت .. احسن إني متأخر واجد

كتبت موضوع أمس ونقلوه للإتصالات .. كان خارج عن الذوق العام

والله ماكان القصد الخروج عن الذوق العام .. بس كنت ناوي أوسع صدور الأعضاء بصور هالمبزرة .. بس خل عنكم اللى ماشاف الصور فاته نص عمره

==
عندي محاولتين لخاطرتين .. وحده كتبها شخص أمه معها دكتوراه ومثقفه جداً وأبوه ( سلتوح ) معلق شهادة الخامس ومبروزها بالمجلس وهو أحسن أخوانه وعائلته شهادة

طلع مع الولد هالخاطرة

اللى أمه مثقفه وابوه متخلف

في حياتنا المروحة .. نبحث عن الأمل .. الأمل المفقود .. اللذي لطالما بحثنا عنه ولم نجد سوى بعض الذكريات المخيسة .. هنا أقف فاغراً لإسترجاع مايمكن إسترجاعة من ذكرياتي .. ليست في الذاكرة سوى البربسه .. لايوجد في ذاكرتي مايسوى ذكره ...

والحين دور الولد اللى أمه ( بسيطة ) وابوه مثقف ودارس بأمريكا وحياته مابين بحوثة العلمية .. ومكتبتة في البيت وأمام القنوات الفضائيه العلمية ..

طلع مع ولدهم هالخاطرة

أين الأمل .. وينهوبه ؟ ... أردالي إن غديت بليّا أمل .. وان عشت دون حلم .. أو هدف .. تسنيبي كل من حولي يبلغ حلمة إلا انا أهش الذبابين .. الله لايوزي بحالي .. كيف للإنسان ان يقود حلمة دون ان يكون لحلمة تخطيط ..

نكتفي بهذا القدر

.. قدر وإلا قلايه نياهاهاهاها

أكتفيت لأني ماعرف أكتب خواطر وأتفلسف واجد .. كل الأثنين عندي ( رابعه إبتدائي )

الله يخليهم لي

هل تلاحظ مدى تأثير الوالدين على ثقافة الأبناء .. وأفكارهم .. وسلوكهم .. وحتى خواطرهم .. الخاطرة الأولى فيها تأثير من دخول بعض كلمات الأب البسيطة .. الذكورية .. وفي الخاطرة الثانية تطلع كم كلمة فيها حس أنثوي بسيط .. وفي الثنتين هي نفس المعنى بس بتبهير وزبرقة الكلمة ... يعني بدال ماتقول ( بوسه ) تقول ( جغفة ) أو بدال مايقول ( حضنة ) تطلع كلمة ( خمة ) >> قديمة داري

مثل قولة ( بصق في وجهة) في بديل وهو ( تفل بوجهووه )

وفيه كلمات واجد .. مثل : كما تشاء = بصرك .. او بسلامك .. او بقريحن يطيربك

الناس عندنا تهتم بزخرفة الكلمات والحرص على إخراج الكلمة ( متعوب عليها ) ويكون عند البعض = مثقف

ومرات الكلمات البسيطة رغم عمق مظمونها تدل عند البعض عن شخص ( متخلف ) او جاهل

يقولون الرجال مخابر مهيب مظاهر ... ويقولون الحرمة فرمة مهيب شرمة >> من عندي ذي يامعاشر النساء

======

وقفة .. مخرج .. دخول خروج .. أمامك تحويلة >>> بعض المواضيع مدري ليه فيها هالكلمات . بس حلوه

أكره ماعندي بعض الجمل والرسائل اللى تطلع بوقت مهيب وقتها .. مرات احلم فيها من المغثة ..

مثلاً

* ودك تكلم ظروري مايدق ويطلع مسج ( الإتصال خطاء ! ) ودك تكسر الجوال باللى فيه لاهو مقفل وترتاح .. ولامشغول وتعيد الإتصال !

* عند مكينة الصراف ومطفرررررررررر وتد خل البطاقة وكل شي صح والرصيد مليان

>> توه طالع الراتب .. وتتاخر البطاقة .. وتتأخر .. وتقول أووووف !! تبيها تستحي على وجهها وتسرع

وبرضه ماصار شي .. وبالأخير يطلع مسج يقول : تم سحب بطاقتك الرجاء مراجعة أقرب فرع ؟؟ واليوم الإربعاء وبكرا خميس وجمعة .. ومابمخباتك إلا ريال مشقوق !!

* واحد عطاك موقع مهم .. او رابط لشغل ظروري وقالك أدخل عليه .. او مثلاً واحد قالك تراني أرسلت لك على إيميلك مسج ظروري .. وينتظر ردك .. تدخل البيت .. تفصخ الثوب .. تشغل المكيف .. تسوي شاهي وانت بطريقك بفتح الجهاز تلقى الشاشة مكتوب عليها ( لقد نفذ إشتراكك )

* تكتب موضوع ... تتعب فيه .. تنزل وتحط وتعدل وتنسق .. وآخرتها تضغط على إرسال الموضوع تطلع كلمة ( إيرور ) اقبح كلمة شفتها في شاشات الكمبيوتر !! وللأسف يروح الموضوع ومايرجع .. يعني يروح التعب والله يستر من هالموضوع لاتطلع إيرور أو لايمكن فتح الملقم .. تشش

* مباراة مهمة ... تعنيلك الكثير .. تحتريها لك أسبوع .. طالع من دوامك علشان تريح شوي قبل ماتبداء .. أول مايصفر الحكم .. بعدها بشوي يطلع مسج بالتفزيون ( لم أتمكن من إيجاد القناة ) وتوها مشتغلة ؟!!

قد صارتلي ..

إذا الموضوع أعجبكم فهو من الله .. وإذا الموضوع ماجازلكم تراه مني ومن أبليس لعنة الله عليه التسلب

> فاهم غلط

أخوكم الصغير ابو طلال

رسالة لجميع الاخوة الأعضاء .. الدعاء لوالد العنود بالرحمة والمغفرة .. ولجميع المسلمين
ورجاء من العضوات الوقوف بجانب العنود حتى تطلع من هالصدمة .. وإبلاغها التعازي واصدق المواساة
رحم الله والدها وجميع المسلمين