تنسيم اول يوم في العيد(انا واختي) بالله وش نحس فيه - نادي الهلال السعودي - شبكة الزعيم

وسن الهلالية · #1 21/09/2009, 01:50 PM

السلام عليكم ورحمه الله
كل عام وانتم بخير
قبل لا تقرون الموضوع كل واحد يحط اربع حبات حلاوة العيد ارسلوها على الخاص

ياويل إللي يقول لي فيكم وش عندك كاتبه موضوع في هذا الوقت

ترى ماكاتبته الا والطفش معبي البيت
عشان كذا لاحد يقول لي ترى موضوعك سامج وماله داعي
ترى بطلع حرتي فيه

>>>>>>>>>>>عصبت

شوي وتصيح من الطفش

ولا بالله عليكم ثاني يوم في العيد والساعة الحين وحدة الظهر
والاهل إلى الحين نايمين
صراحه نفسي اروح ارش عليهم موية باردة كود انهم
يفزون
ويطلعونا ونتمشى مثل خلق الله

عاد ماقلت لكم >>>>>>>>>>>يقال لها عندها سالفه

امس اول يوم في العيد>>>>>>>>>>>>>>>>>>ماشاء الله شلون عرفتي

والله اني ذكية وافهم على طول بس مااحد عطاني فرصة

المهم امس طال عمركم قمة التنسيم انا واختي

بما ان بيت الوالدة الشيخ ابو سعيد هو البيت كبير العايلة
فا الاجتماع كان عندنا المهم يوم طلعوا من عندنا بعد ماعطونا المقسوم>العيدية

وخفه الصجه واللجه >>>>>>>>>ياحبيلهم
المهم اتصل علي اخوي وقال يالله يابنات قوموا بنطلع نشوف الالعاب النارية
قلنا قداااااااااااااااااااااااااااااااام
وتقسمنا على سيارتين >>>>>>>>>>على فكرة ترى نحن عددنا اربع بنات
والسيارتين كبار والمقصود بالتقسيم هنا كل ثنتين في سيارة عا تخيلوا اشكالنا تقسيم
وتقسيم وفي النهاية السيارات تصفر على اربعه في كل وحده>>>>>>>>>>المستخدم فاطس من الضحك

المهم اخواني مابينهم تنسيق>>>>>>>>>>>>>>>>>>>ياهو عليهم فلسفه وهياط ماراحوا بعيد
حالهم حال باقي الرجاجيل فلسفتهم زايدة>>>>>بتنجلد

الموهيم واحد مشى وراح على الالعاب النارية حق العزيزة والثاني إلي انا واختي معاه مشينا على الملز
يوم قربنا خلاص نوصل اتصلوا على بعض وقاعدوا يتهاوشون اثاري كل واحد مفهم الثاني انهم متفقين على مكان واحد
الا وهم من جنبها الله يهديهم
الموهيم اخوي الكبير قال لاخوي الثاني تعال للملز بسرعة ولا ترى الشاهي بالنعناع المكسرات بتقضى علي

عاد نحن بطلوع الروح دخلنا للملز>>>>كل هذا عشان كم طروعه بتنفقع في الجو>ياحليلنا

والحمد لله وصلنا وجلسنا ننتظر وجات الساعة 9:30 ونحن ننتظر ووالناس قاعدين حولنا وبزرانهم
يطرطعون
وجات الساعة 9:39 وقامت المواقع الثانية يطرطعون ونحن لسى ننتظر وخلصوا
ونحن ننتظر شوي دقت الساعة 10:00 ونحن ننتظر والناس ملوا وطفشوا
وعاد انتم تعرفون اهل الرياض يموتون في شي اسمه اشاعات كل واحد من إللي حولنا
مسك جواله واتصل على اخوياه ويأرنب عليهم إللي يقول احترقت الطراطيع
وإللي يقول مافيه طراطيع اصلا وكل واحد طلعت اشاعه زي وجهه
وعاد من قل الدبرة وهو يتكلم يتمشى بين السيارات وياناس اسمعوا والعالم تسمع
والاشاعات تنتشر>>>>>>>>>>>>الله يهديهم بس

المهم السيارات بدأت تتحرك والناس بدأو يروحون لبيوتهم
واخيرا طرطعوا طراطيعهم

الألعاب النارية بدات بشلال اول مرة يسونه على بوابه الملعب
وشوي تبدأ الألعاب النارية صراحه خيال السنة هذي
لانه معاها عروض ليز وعروض البخار شي صراحه
المهم يوم خلصوا
ونحن راجعين للبيت الا ننشب في ذيك الزحمة
ونتصل على السيارة الثانية الا وهم ناشبين في شارع ثاني
ونحن مانطلع منها الا الساعة 11
يوم وصلنا للبيت نزلت انا واختي اخوي اخذ زوجته وعياله وراح لبيته

عاد انا واختي طلعنا ومانفكر الا في المخده
يوم وصلنا لباب البيت
تذكرت اني نسيت المفتاح في البيت واخوي في السيارة الثانية
معاه مفتاح بس إلى الان ما وصل
ونقعد ندق الجرس ومااحد يرد ابوي وامي نايميين

قعدنا ندق ومااحد يرد
عاد خربتها انا واختي
جلسنا على الارض قدام البيت تقل نشخذ
وحطينا الشاهي والمكسرات وحلاوى العيد
وقعدنا نفلها وسواليف عند باب البيت
وبعد ساعة تقريبا وصل اخوي واختي من السيارة الثانية

مايستفاد
1)لاعاد تروحون لمواقع الألعاب النارية ابدا
2)قدام باب بيوتكم هذاك المكان الوحيد إللي مااحد جلس في وشرب شاهي
لااحد يخربها ويجلس هناك
3)الحين اكتب الموضوع والجوال جنبي وافكر اتصل على اخواني عشان نروح مثل امس
بس اخاف يصفقوني . وش رايكم اتصل ولا اقضب الأرض

عذرا على الأطاله

اختكم
وسن الهلالية