مسرح المـ ج ـلس ( سعوديون في الخآرج ) .. سآرع بحجز مقعدك ~
,,
آلسِلآم عليڪم ورحِمة آللهِ و بّرڪآإتـﮧ .. ~ شخبـأإأر الجميع .. عسآهم يسألون عني .. أإنا تمام وبصحـﮧ وعوآإفي الحمدللـﮧ .. يسعد لي مسآڪم يا أحـلى أعضآء .. مسآئكم / صبآحكم أحلى شي .. طرت ع بالي هالفكره وحبيت اطبقها و طلبت من الاخوان المشاركه ۈماقصصرو و اتمنى انها تنال ولو جزء بسيط من اسستحسانكم .. توكلنآ على الله ..
في صباح يوم من أيام الدراسه كان قناص سدير صاحي من صباح الله خير و رايح للمدرسه .. وينتظر في الفصل .. متى بتجي الشله المرحه .. وطبعاً كالعاده قناص سدير أول واحد يجي من الشله لأن بيته قريب .. وهو قاعد في الفصل وشوي الا صوت واحد قاعد يغني وطربان حده .. وكنه يغني ((نحمد الله)) .. و قناص سدير يتنافض من الخوف ,, وقام يسمي ويتعوذ من ابليس .. ومايدري وش قرآ من الخرعه .. اختبصت الحروف في بعضها ، وكان بينحاش من الباب ,, الا (( ذآيب و هتلر الزعيم )) طالعين بوجهه .. وصرخ عليهم وخرعهم .. قناص سدير : الحمد لله أنكم جيتوا، ليش تأخرتوا ؟.. قالوا: ليه وش فيك اليوم !! حنا كل يوم نتأخر !! هتلر الزعيم وهو "يستهزء": السنه على وشك أنها تنتهي ,, ولا تعودت على تأخيرنا قناص سدير : الا اليوم في الفصل شئ غريب !! وهو يعلمهم السالفه , الا بقيه الشله داخلين عليهم وهم : (( ريلآكس و سومآ )) جايين في سيارة وحدهـ كعآدتهم .. ذآيب علمهم السالفه وقاموا يضحكون عليه .. ريلآكس : تعوذ من ابليس ياقناص سدير أكيد هذا تاثير السهر ,, ولا الفيلم الأجنبي اللي شفته أمس مأثرفيك قناص سدير : لا ،، والله أني ما اكذب عليكم !! ولما كانوا يتطنزون وكل واحد يقط عليه كلمه ... وفجأأأأأأأأأأأأأأأأأأأأة رجع الصوت مره ثانيه وكان يغني(( لرابح صقر )) !! "تحملتك بما فيه الكفآية و لا ظني ابتحملك ثآني" !! وكل واحد يطالع الثاني ولفوا على قناص سدير ... على بالهم أنه جايب راديو جدهـ وأنه قاعد يسوي فيهم مقلب .. قناص سدير : شفتوا يا الحقيرين، صدقتوا الحين .. ذآيب : أكيد أنه راديو ولا مسجل .. سومآ :الله على الطرب يا رآبح قناص سدير : الله ياذا الراديو اللي يشتغل ويطفي على كيفه !! أما الباقين سكتوا دروا أن فيه بلاء في السالفه .. ريلآكس: هذا مو وقت مزاح خلونا نطلع من الفصل ,, لا يحطونها فينا و يقولون جايبين معكم جوالات و الا مسجل .. وتعهدات ويكلمون أبوانَآ على شئ ماسويناه .. هتلر الزعيم : لا ، لا ، يا أغبياء <- يعني عاد هو الذكي خلونا نتبع الصوت ونشوف وش مصدره’ .. المهم قعدوا شوي يستوعبون الموقف ,, وبعدين تبعوا الصوت .. الا هو في أخر الفصل من صوب الدوآليب .. توزعوا كل واحد يدور في دولاب,, ولا لقوا شي غير- ابريق - كلهم استغربوا الصوت كان طالع منه .. ريلآكس :اسمعوا يا عيآل اذا طلعوا عيآل الفصل للطابور . نأخذ الأبريق ونشوف وش سالفته .. هتلر الزعيم : أي والله صادق علشآن محد يعلم علينا ,, خبركم عيآل فصلنا .. وكاله آنباء اطلق من ((CNN)).. ذآيب : والله مافيني صبر انتظر خلونا الحين نشوف وش السالفه.. قناص سدير : أنا رأيي من رأي هتلر الزعيم .. وحنا ترى مو ناقصين مشاكل.. المهم قعدوا في الفصل ونفذوا الخطه وكل وآحد يشغل نفسها بأي شئ .. اللي يحل الواجب واللي ماسك كتاب يعني أنه بيذاكر على آخرالسنه .. واللي ماسك كرآسه و قآعد يشخبط و يرسم كاريكتيرآت على بآله رشيد سليم وعلى ذا الحال .. عيآل الفصل استغربوا مو من طبعهم يجلسون في الفصل هادين.. دايماً يجتمعون الصباح يدّوجون في أسياب المدرسه ويتلقفون على ذآ و ذآك .. واللي فيه حره من وآحد يبغى يكفخه يفزعون له .. أما عيآل الفصل يسألون وش عندكم جالسين في الفصل؟ أكيد مسوين شئ وما تبون أحد يمسكم..والاناوين على شئ .. الشله اشتغلوا أعذار عالعيآل اللي يقول نبي ننجح واللي يقول نبي نسبه .. واللي يقول طفش برآ و اللي واللي واللي .... الخ وأخيراً: دق الجرس عيآل الفصل "عله" ماطلعوا ألا بعد مانشفوا حلوقهم ويوم طلعوا بقى وآحد"نشبه"يقول تعبان ماني نازل يتسذب!!مافيه الا العافيه ... كنه حاس أنهم بيسون شيء ومايبيه يفوته..!! قعدوا يفكرون وسووا خطه ((أنما أيه)) على قولت أخوانا المصريين .. قام هتلر الزعيم وطلع برا الفصل وتأخر شوي وبعدهآ دخل علينا.. قال للولد : اليوم المدير بيكرم الطلآب المتفوقين ,, ... أكيد أنت منهم لأنك ماشاء الله عليك متفوق .. الولد نقز من الفرحه كنه ثور هايج يركض للطابور .. ذآيب : الله وأكبر على التعبان.. وبعد عناء طويل ضفوا عيآل الفصل ولا بقى أحد غيرهم .. هتلر الزعيم : يالله نفتح الدولاب ونشوف سالفه الأبريق..! وكل وآحد منهم يقول أنا مراح امسكه المهم تجمعت الأراء وقالوا... أنت يا ((قناص سدير)) بايع الدنيا يالله روح جيب الإبريق.. وهو مسوي نفسه قوي عليهم ومن داخله ميت من الخوف.. قناص سدير : تعالوا معاي لعند الدولاب وأنا بطلعه لكم.. ذآيب : لا لا...لا يكون خايف .. قناص سدير : معصي ((مو قناص سدير اللي يخاف من شيء سخيف)).. سومآ :أجل روح لحالك .. قناص سدير توهق مايدري وش يقول بس عز نفسه وكابر,, قناص سدير :عادي أروح لحالي أحسن ماأخذ معاي عيآل خوآفين .. ريلآكس : لوسمحت لا تعمم اصلاً أنامو خايف..(يكابر) وعادي بروح معاك .. هتلر الزعيم : وأنا بعد أبد ماني خايف وبروح معاكم.. وكلهم قرروا يجون مع قناص سدير ..
المهم راحوا لما قربوا من الدولاب زاد الصوت,, تشجع قناص سدير وفتح الدولاب ,, وطلع الأبريق وقعد يطالعه ..
قناص سدير: الصراحه ذكرني بأبريق كان عند جدي ومحتفظ فيه ,,..
لأنه على قولته يذكره بطفولته "الله يالخيره"..
الأبريق كان مليان غبره و مسوي ضجه في الفصل ,,...
قعد قناص سدير ينفض الأبريق من الغبار...الا دخان كثير يطلع منه.......
و العيآل يصارخون عليه يبغونه يوقف النفض...
ذآيب :حرام عليك هيضت علي حسآسيتي.......
قناص سدير : الله من الدلآخه فيكم هذا مو غبار ذا الدخان طالع من الأبريق يالهنود...!!
كلهم تصنموا يطالعونه وهو من الخرعه ذب الإبريق على الأرض
وتخبى ورى العيآل...والدخان كل ماله يزيد...والفصل فجأه ظلم عليهم ,, ..
وزادت الرهبه في قلوبهم كلهم..اللي يكح واللي يعاطس واللي جاهـ الربو ..... وحالتهم حاله..وشوي وسط الظلام والدخان كان فيه عيون " تلمع" وبدأ الدخان يخف شوي ومع خفت الدخان الا ذاك الرجال اللي يروع ... وشواربه تقولون شوارب الوجه اللي على "برينجلز"..... ولابس له ثوب وغتره والعقال مايل ,,,......... وكلهم بصرخه وحده(يمااااااااااااااااااااااااااااااااااااااااااا ااااااااااااه).. قال :وجع يا قليلين الأدب وش يصارخبكم.......!! هتلرالزعيم :من أنت..؟!!! "وهو يرتجف من الخوف"... قال :لا والله ,,,"يعني ماتعرف".......!! ريلآكس:لا والله ما نعرف من أنت....! ذآيب : وش شايفنا عباقره ذا الزمن .. قال :يمكن أنتم ماتعرفون بس هذآ يعرف..يأشرعلى" "قناص سدير"........ قناص سدير : أنا ,,,,, ياكذبك والله أنك كذوب .....!! قال :موأنت اللي نفضت الغبارعن الأبريق........ قناص سدير :ايه كنت انظفه و إلا حرام بعد ؟.... قال :خلاص أجل...أنا المارد اللي فيه وأنت ناديتني... ريلآكس :يعني زي المارد اللي مع علاء الدين... المارد :ايه ,, ولا مش مالي عيونكم..... ريلآكس:الا مالي عيوننا ونص بعد... سومآ:وراك مهمل بنفسك وليش ماتكشخت زين أحسن من كشختك ذي ,, ....يعني تلبس بنطلون وتيشيرت و تخلي شعرك كدش وتسوي حركتات و تصير كول ...... المارد :ليه شايفني من شباب طيحني و بابا سآمحني ,,...أصلاً تدرون أن هذا الثوب والغتره ,, من عصر الملك عبدالعزيز -الله يرحمه- وارثه أباً عن جد........ هتلر الزعيم :ورث أحلى منه ما فيه ما شآء الله...... قناص سدير : هيه أنت ,, الحين بيجي الأستاذ و الطلآب بعد.. لوسمحت .. أدخل في أبريقك الله لايهينك و انقلع عننآ,, لا تسوي لنا مشكله مع المدرس ترى بلاوينا كثيره.... ذآيب :وش رأيك تفسح معنا بعد أحسن... ياالله ضف وجهك......!!!!! المارد :أفا... والله ماهقيتها منكم بس عناد فيكم,,,........... مآ رآح أروح ..أنسوا .. لين تطلبون لكم طلب وااااااااحد بس.. هتلر الزعيم :وبتنفذه الحين....... المارد :وش رأيك بعد،أخلصوا أطلبوا ولا ترى بهون...... قالوا طيب وقعدوا يتشاورون وهم قاعدين يفكرون ويتناقشون.... قام المارد وطلع دلته وفناجيله اللي معفنه ومعها الربابه..وقام يشب الحطب... ويتقهوى ويغني أغاني من زمان مغبره مررررررره مايدرون من وين مطلعها منه ... قاعدين يفكرون اللي يبي درآهم واللي يبي يصير لآعب كورة و يصير مشهور زي سآمي الجآبر ,, واللي يبي سيارة و اللي يبي يصير مشرف في قسم المجلس ........ قناص سدير :يا عيآل وش رأيكم نطلب طلب يبقى ذكرى بيننا ...... ترى الفلوس والشهره ماراح يدومون لكم,,أما الذكرى تبقى معنا طول حياتنا ..... ريلآكس : والله منت بهين وش ذي الفلسفه الحلوه،طيب مثل ايش...؟؟!!!!! قناص سدير :مثل,, نروح أمريكا.........!! سومآ :وناسه نروح نهستر ونستانس على كيفنا ما فيه احد يمنعنآ.. وهم قاعدين يناقشون الموضوع كان هو مسوي ضجه وازعاج بهالربابه...’’’’’ هتلر الزعيم : ياأخي اسكت شوي خلنا نفكر زين لأجي افقع وجهك الحين....... !! المارد :"الهمام" أخلصوا علي ترى ماني فاضي لكم عندي شغل مهم اتصل علي مشجع نصرآوي يقول يبغى بطولة و الله الصرآحه انه اصعب طلب شفته في حيآتي الله يعين الله يعين اخلصوآ...... ذآيب : والله منت هين يآ خطير بس بسألك وشلون اتصل عليك معك جوال والا بيجر ؟ ,,........... المآرد : و انت وش دخلك ما تحس انك فليتها اقول اسكت و كمل نقاشاتكم مع اخوياك لا أهون الحين.. قعدوا دقايق يفكرون في قضيه روحتهم لأمريكآ وكل مايطالعونه إلا وهو يحرك شنباته وهو يقول"الهماااااام عجلوآ علانآ".............. المهم ,, قرروا يروحون أمريكا................. المارد :يا الله غمضوا عيونكم وفي خمس دقايق تكونون في أمريكا............. هتلر الزعيم :لحظه لحظه بروح أجيب حبوب الكبتآجون... قالوا : ليييييش.... هتلر الزعيم :والله ما اقدر اعيش من دونهآ صرآحه....... ذآيب :يآ ليل الليل انت و الكبتآجون اللي معذبك..... ريلآكس :اقول هتلر ما معك حبوب سلف..... و رآح هتلر و جاب حبوبه من درج سيارته و جاء و عطى ريلآكس حبوب سلف ،,..... ويوم جوا عند المارد ..... قال :خيييييييييييييير ان شاء الله وش هالحبوب اللي معك انت ويآهـ .......؟؟!! أنا يا الله أشيلكم يالخمسه على ظهري تبون بعد اشيل حبوب.....!! قناص سدير : الله ..!! يعنى الحبوب الصغنطوطة بتثقل عليك عطنا غيرها..... المارد : والله هاه شوفوني حلفت أني ما أوديكم الا لين يحذفون الحبوب اللي معهم هتلر الزعيم :حذف ربي رأسك كلش و لا الحبوب.... المارد :شوف أنت "يقصد هتلر الزعيم" ..ترى بخليك تنثبر هنيآ ... اذا طولت لسانك علي مره ثانيه سمعت ؟...... هتلر الزعيم بعد مابقق عيونهو حس ان الدعوة جد : هآه ايه ايه سمعت..... المهم حذفوآ الحبوب اللي معهم ورجعوا له........ المارد : يالله غمضوا عيونكم .. واللي بيفتح عيونه ترى ياويله مني......... غمضوا عيونهم وطول هم مغمضين ......... قناص سدير: يالله ياأخي بسرعه عورتني عيوني........ المارد : خل الجحلط اللي وراك يغمضون عيونهم وبعدين أوديكم...... يوم لف قناص سدير عالعيآل الا((ذآيب و ريلآكس )) ... فاتحين عين ومصكرين الثانيه , يبغون يشوفون كيف بيروحون لامريكا..... قناص سدير : يا عيآل وجع غمضوا زين علشان يودينا لأمريكا ..... والله ماني مصدق أني بروح لها والا ترى بنروح ونخليكم.... قالوا:لالا خلاص بنغمض زين .. وصكروا كلهم عيونهم ,,.. وشوي خبط ولزق الا وهم في أمريكا .. ما سمعوا الا صوت المارد ’’’’ يضحك عليهم يقول :يله ياأغبياء أفتحوا عيونكم ؟
الكل فتح عيونه ’.. وكانوا بالفعل هم في أمريكا وكانت أشكالهم غلط ... بهالثيآب والشمغ,, وكل واحد يمرعليهم يطالعهم بتعجب و استغرآب واللي زاد الطين بله ....أن " المارد " صاف جنبهم يعني ... هم ياالله ينبلعون جاي هو يكمل بعد هو و شنبه......!! العيآل تصنموا من زود الصدمه وماتوقعوا أن السالفه بتصير صدق....... وشوي قام المارد يطالعهم وقال :وش بلاكم أول مره تشوفون ديره زي امريكا ... والله شكلكم عيآل فقر ,, أول مره تسافرون........!!!!! سومآ : شوفوا عاد من يتكلم يعني تبي تقول أنك قد رحت امريكا من قبل..... قال : اصلاً توني قبل أمس متغدي مع أوبامآ .. ذآيب : الله يا "اوبامآ" طيب وش كان غداكم؟! لا تقول متغدين من البيك ؟... هههههههههههه قاموا يضحكون ويتلفتون عليه........ هتلر الزعيم : بصراحه أنا أول مره أشوف مارد،لا بعد مو أي مارد راعي صواريخ .... المارد : والله بكيفكم تصدقون ولا أنقلعوا المهم بعد ثلاث أيام بنلتقي علشان أرجعكم.... قناص سدير : يا أخي خلها أسبوع... المارد : ليه..تحسبوني فاضي ترا وراي مشاوير ....... ريلآكس : ليه معزوم على غداء بعد.... هتلر الزعيم : لا يكون غداء عند هلالي من ارض اليمن..... سومآ : لا والله و انت الصآدق الظاهر انه معزوم عند مآيكل سكوفيلد قعدوا يتطنزون عليه وهو ناقد عليهم يطالعهم بنص عيييييييين..... المارد : تطنزوا بوريكم يالتسلآب هين هين...... ذآيب : هيه أنت أنا برجع معاك مقدر أنام برآ بيتنا....... المارد : أ ولاً "أنا مو أسمي هيه" ثانياً أنقلع دبر عمرك أنا ماني مكلفٍ فيك تبغى ترجع أركب الطياره وأرجع لبيتكم...... سومآ : طيب ,,,, وش أسمك....؟؟!! المارد : أسمي"مشخآط"....... هوقال أسمه ولا ماقال فقعوا العيآل ضحك عليه أنه من جده..... هتلر الزعيم : يرقع السالفه بعد ماحس أنه يتكلم من جد: والنعم والله ,,, .....هذي الأسامي ولا بلاش.......... المارد "مشخآط" تشقق من الوناسه وهو يقول:ماعليك زود هذي الناس اللي تفهم و تعرف الاسامي الزينة ذوق والله ما شاء الله عليكم >> مشخآط : ياالله أنا رايح اللحين.... ريلآكس: تعال يا"مشخآط" وين بتروح وتخلينا حنا ما معانا فلوس .....!! علشان نأكل ونشتري لنا ملابس و علشان بعد ندور لنا بيت نسكن فيه.... ذآيب : ايه تكفى لازم تعطينا فلوس امريكية علشان ندبر أنفسنا..... قال : أسمها دولارات... قناص سدير : ايه،المهم بس تكون $$ فلوس $$ وعطاهم فلووووووووس...... سومآ : أنا أشهد أنك رجال شهم,,,.......... وانقلع مشخآط وضف وجهه..... ذآيب و ريلآكس هم المترجمين لهم ......... قاموا يبربرون مع الأمريكان ألين مآ عرفوا مكان شقه يسكنون فيها........ ومن الفرحه لأنهم في امريكا قعدوا يومين ماطب النوم في عيونهم وش عليهم على قولت مشخآط"عيآل فقر" ماشافوا خير....!! قناص سدير : يا عيآل كلها ثلاث أيام ونرجع لديرتنا خلونا نستانس... .. ولا نخلي شارع ما ندج فيه والله ما صدقوا خبر،,,,,
هتلرالزعيم :أنا معك مآ ابي أدخل بروح ادور حبوب كبتآجون يمكن القى عند البقالات اللي هنآ....
سومآ :وش فيكم مكبرين السالفه .......!!!!!!
خلونا ندخل ونشوف وش فيه أن أعجبنا والاطلعنا.....
ذآيب :يعني نرقص ونغني،،........
قناص سدير"أنا"بدخل واللي يبي يدخل يجي وراي
دخلوا كلهم وقعدوا وهم مسكرين خشومهم,,,,,,
من ريحه الوسكي اللي يتسكبونه"جعل يوسكيهم السلال"......
وكان فيه مغنيه قاعده تغني أغنيه ترفع الضغط وتجيب الهم...
و من الملل نآموآ ....
خصوصاً أن لهم يومين ما نآموا ........
و قناص سدير مايبي ينام لأن وراه مشاوير توها ماجت ربع أمريكا
قعد يقوم العيآل وكل وآحد يقول :وش تبغى..قال:يا الله قوموا تنشطوا.....
قالوا:أنقلع ...بس هذا اللي تبغآه.... !!!
قناص سدير :أنا بروح ارقص من اللي بيرقص معاي....
وكل وآحد فتح فمه ,,,,,,,,,,,!!!!!!!! هتلرالزعيم :يا رجآل هي خاربه خاربه أنابرقص معك.. بس ما فيه أغنيه لراشد ولا رآبح والا خالد عبدالرحمن.... ذآيب :أنا ماأعرف أرقص بس صوتي حلو بغني لكم أغنيه ترقص.... ((ريلآكس و سومآ )) : وحنا بعد بنرقص معكم وش ورانآ....... المهم نفذوا اللي في رؤسهم وقعدوا يغنون ((يا سلامي عليكم يالسعوديه)) وفلوها رقص وهبال ,,,, ومابقى شخص- في ذا الشارع الاجاء.... ومن خبالهم ربّحوا راعي الكازينو .................. واتفق معاهم يجيه بكره ويغنون في الكازينو’’’’’’’’’ ويعطيهم ذيك الفلوس مقدم"يعني عربون"..... وهم من الفرحه ما صدقوا وافقواعلى طول.......
ذآيب :ياأغبياء الحين بنشتهر ويوصل الخبر لأهلنآ في السعوديه...
يومآ :والله أن شافني أبوي إنه ليذبحني.......
ريلآكس:يا أغبياء بكره بيجينا المارد وبيأخذنا وبنروح السعوديه ان شاء الله
يعني لا من شاف ولا من درى.........
قناص سدير :طيب.. وإذا طلعت صورنا.......!!!
هتلرالزعيم :عادي بنقول ناس يشبهونا.........
وأصلاً وش جاب صورنا في المجلات السعوديه ........!!!
واذا افترضنا أنها بتجي ماراح تجي الا في المجلات الأجنبيه
وأنتم خابرين أهلنا حَدهم مجله فواصل وأن أكشخوا
أشتروا مجلة فوكس...........
جاء اليوم الثالث وهو أخر يوم لهم في امريكا....
راحوا للكازينو ويوم دخلوا الكازينو الا والله ما بقى أحد في أمريكا عربي الاجاء
وقعدوا يغنون مصري على لبناني على سعودي على كويتي حتى العراقي غنوه ’’’’
المهم ما خلوا شيء ماغنوه .. والناس رقص ودنيا وما خلصوا الا الفجر ......
وكل واحد يهوس وراحوا لشقتهم وعلى طول حطوا روؤسهم ورقدوا,,,,
وجاءت الساعه"6 الصباح" الا جرس الشقه يدق..,,,,,,
ولا واحد من العيآل قام يفتح الباب كلهم دايخين..
والجرس نرفز قناص سدير ما عرف ينام منه
ويقوم من النوم وهو "معصب" وتوه فاتح الباب
لا ذاك الشي الطويل
ويطالعه زين الا هو"ميكرفون" كانوا الصحفيين عند الباب ...
يصورون ويتكلمون عاد هو مافهم ولا شيء من اللي يقولونه,,,, ويصكر الباب بسرعه ..ويروح يقوم العيآل ((يا ويلناويلاه عز الله أنفضحنا..... عز الله تعلقت أرقابنا في المشانق....قوووموا ياعيآل شوفوا وش صار...!!!))) العيآل قاموا مخترعين على صياحه قال لهم السالفه الين ما استوعبوا.... وكل واحد خايف مايدري وش يسوي... هتلر الزعيم :اسكتوا ولا تطلعون صوت علشان يروحون ... قعدوا عشردقايق يتسمعون عند الباب ما سمعوا شيء .... سومآ :روح يا قناص سدير طل من عند الباب شكلهم راحوا... وهو يمشي بهدوء ويطل من العين اللي في الباب وشوي ,,, ألاصوروا عينه بسررررررعه عاد تخيلوا شكل عيونهمطبقه من النوم ...... ويقوم"ذآيب" يبي يصكر الدريشه الا ظله جاء عالجدار ويصورونه.... ويصورون أي أي شئ يتحرك ..المهم ذاك اليوم ماطلعوا من الشقه .. لأنهم مسنترين عند باب الشقه , وحتى عند بوابه العماره... هتلر الزعيم :وش نسوي والمارد مشخآط للحين ما جاء.... ذآيب: صدق وش فيه"مشخآط"ما جاءيأخذنا... سومآ:أكيد أنه مضيع الدرب.... ريلآكس:والله حنا اللي نضيع الدرب... يا حبيبي هذا مارد يعني يعرف العالم كله وأكيد أنه ما خلى ديره الا مازارها..
وهم في الشقه محبوسين الا المجله مدخلينها عليهم من تحت الباب.....
وسقوم قناص سدير سركض وسجيب المجله وسفتحها تفرج فيها إلا صراخه ’’’’’’
..........شوفوا عيني يا عيآل صوروها.....!!!!!
ذآيب:حتى ظلي اللي على الجدار صوروه....
قناص سدير :جعلهم المرض وش يبون بعيوني يومهم يصورونها ....
ياليتني كنت لآبس نظارآت كان تهون ,,,,,,
هتلر الزعيم:يا اخوي محد يعرفكم((ذآ ظل وأنت عين)) والله مايعرفونكم...
سومآ:والله أنهاصادقه...كملوا يتفرِجون للمجله الا المصيبه الكبرى ..!!!!!!!!
صورهم كلهم وهم يرقصون ويغنون....’’’’’’’’
ذآيب :ياسلام هذي فيها قص رقاب وقالت عطيني المجله
وقعدت تقرأ العنوان الا مكتوب((شبآب سعوديون يغنون في أمريكا))...
خافوا العيآل وكل واحد يفكر وش راح يسوون فيه أهله اذا دروا...... وكلهم على أعصابهم وكل واحد يقول للثاني أبوك يهون ولاأبوي.... المهم ويجيهم ذاك الفاكس .......... قناص سدير :عيال غريبه جانا "فاكس" من اللي يدري أن حنا هنا... هتلر الزعيم :أكيد أنه من معجبين امريكان ........ تعرفون الامريكيين ما يتخبى عليهم شيء.... قام قناص سدير لعند الفاكس .. بيشوف من اللي مرسل لهم .. الا والله ذيك الأصابع الي تطلع من الفاكس .....!!!!!!! وشوي الا ذراع أبوهـ وهو واقف من الصدمه الا و يد أبوهـ تعطيهـ ذاك الكف ,,,, والعيآل قاعدين يصارخون وبنفس الوقت يضحكون عليه ....’’’’’ وبعدها عرف أن أبوهـ ماقدر يجي لامريكا فقام ارسل يده بالفاكس السريع.... العيآل:ياحظك يا قناص سدير بصراحه حنا نحسدك...... قناص سدير :على ايش حاسديني لا يكون عالكف اللي جاني...... قالوا:ايه،أنت الحين افتكيت وخلصت ولاتخاف من شئ , الدور والباقي علينا احنا..... وسقوم" ريلآكس" يبي يصكر الدريشه لان البرد ذبحه الا ذاك العقال الطاير ويكفخه على رقبته ... أثر أبوهـ مرسل عقاله من السعوديه الى امريكا ...... نعنبوك عقال .. والله وسمه في رقبتهـ ..... هتلر الزعيم :أكيد أبوي ما درى ولا كان أول من يكفخني.... قناص سدير : أناو ريلآكس خلصنا من طق أبونآ , أجل بنروح نجيب لكم أكل .... وطلعوا من الشقه...ويروحون السوبرماركت ... ويشترون لهم شيء يوكل على قدهم لان الفلوس على وشك تخلص.... كملوا الدرب وراحوا للشقه...يوم دخلوا على العيآل كانت أشكالهم تكسر الخاطر من التفكيربأبوآنهم..
جاء اليوم اللي بعده و"مشخآط" ما جاء ولا طل عليهم.... ريلآكس : خلونا ننزل لشارع نتمشى ..... وأن شاء الله نشوف "مشخآط" في دربنا ونرجع لديرتنا الحبيبة... يوم نزلوا,,الا ذولاك الولدين..واقفين لابسين ثيآب و شمغ ....! ويقربون منهم الا هم من عيآل مدرستهم...........!!!!! و الطااااامه الكبرى طلع اخو ذآيب اللي اصغر منه يلقبونه بالأثرم لان سنونه متكسرهـ.. ولما شافوهم قاموا يصارخوون ويضمونهم مثل:الباكستآنين اذا جو يعآيدون بعض .. ويقوم الزعيم الآسيوي (الأثرم ) من الفرحه ويحب رأس أخوه.. طبعاً هذي أول مررة يسويها .. والظاهرأنها آخر مررره)) هتلرالزعيم : اقول يا الاثرم من اللي جابكم هنا.....؟؟ الاثرم : والله مدري وثثمه.. واحد يطلع من ابريق الله لا يبلانا واحد ثيفه يروع أسمه ثخبآط مدري مثخآط... ذآيب : الله يسترمن مشخآط لايجيب كل عيآل المدرسه و الوكيل و المدير معهم... هتلر الزعيم : والله لا اوريه بس خلووني اشوفه ..... يعرف يجيب عيآل ,,, بس ما يعرف يودينا في طريقه.......!!!! المهم .. أخذوآ اخو ذآيب معهم. وكل يوم ينتظرون "مشخآط" يتذكرهم ويرجعهم للديره...... الاثرم : إلا ثدق يا عيآل كم ثااار لكم وأنتم هنا ؟؟؟؟؟؟ سومآ : عدي وأغلطي اتوقع بالأنجليزي شهر... وبالعربي شهرين هههههههههههههه الاثرم : كيف يعني ما فهمت.. ريلآكس : أصلاً ما راح تفهم ... لأن العيآل جتهم حاله هستيريه يتحلموون ويخربطوون بالكلام.... قناص سدير : بصراحه أحس أني بستخف أبي ارجع للسعوووديه.... يوم قال كذا حزنووا العيآل واللي يحط يده على خده واللي يمسح دمووعه... سومآ : عيآل تدرون وش نفسي فيه ؟؟ !! العيآل : وش نفسك فيه !! سومآ : نفسي في كبسه.... أما العيآل من سمعوا طاري الكبسه اختبصت اشكالهم ... اللي نقز من مكانه واللي بقق عيونه@....... واللي فتح فمه وهو يـتـذكر شكل الكبسه......... قناص سدير : يــــــا الـلـّه ..والله من زمان عن الكبسه ... ريلآكس : خلاص عيآل ماأقدر أتحمل لا تعذبوني زيااااده.. .. سومآ : ((وهو يبي يلطف الجو)) عيآل وش رأيكم أعشيكم اليوم كبسه على حسآبي... ذآيب : والله قدآم بس من وين بتلقى الكبسة هنا....... سومآ : يمكن نلقى لان الكبسه صارت طبخه عالميه مشهورهههههههههه... هتلر الزعيم : عيآل بكيفكم تبون كبسه ولا هونتم ترى إذا هونتم يكون اوفر... عشان المصاااريف وبما أن حنا زاد عددنا لازم نوفر.... ريلآكس : لا ..لا..من قالك هونا والمصاريف الله يلحقنا خيـــــــر... الزعيم الآسيوي (الاثرم ) : يآ ذين الكبثه ذينآه.. قناص سدير : ما اظن ان حظكم حلو ومشخآط هو اللي جاااايبكم... وقاموا العيآل يستعدون عشان الطلعه..ولما جو ينزلون.. الاثرم يبغى يفتح الباب.......... مسكه هتلر الزعيم مع اذآنه وقالت: الأخ وين رايح؟؟؟؟؟ الاثرم : ..وث فيك مو حنا بنزل نتعثى برا .. !!!! هتلر الزعيم : ايه بننزل نتعشى..بس مو من عند الباب بننزل...!! الاثرم : ليث..... ؟؟؟!!! ذآيب : لأن صاحب الشقه يستنى تحت عند البوابه وحنا ياحلو ما دفعنا الإيجااار صارلنا شهرين.... الاثرم: طيب من وين بننزل...؟؟!!! قام قناص سدير أشر له عالشبااااك... الاثرم: تمزح ثح!!!!! قناص سدير: لا والله ما امزح ما لناغير هالطريقه والا انثبر ما له داعي تتعشى برآ......... الاثرم: لا عاااد ماني منثبر يلاّ خلنا ننزل والله يستر لا أطيح على خشتي ... المهم نزلوا للشارع....... الاثرم: الحمد الله أن حنا ثاكنين في الدور الثاني .. ولا كاااااان قلنا على الدنيا الثلام... قعدوا يمشون بشوارع امريكا ويدورن تأكسي يوديهم وكل ما مروا من جنب احد قعد يطااالعهم بإستغراااب
ذآيب: هااااااه يا ريلآكس دور لنا مطعمٍ زين يسوى كبسه أو رز بخااري
وكل ما مر عليهم أحد كسروا خاطره رمى عليهم قرش والاقرشين
و((سومآ)) قاعد يجمع القروش ويعدهااااا.......
سومآ: هتلر الزعيم شوف هذا القرش كم يساوي بالسعودي...
هتلر الزعيم: عطني اشووف قام يضحك شوف .....
كل قرش يساوي عندنا بالسعوديه ريال واحد........!
قناص سدير : يا ماااال الفقر خير انشاء الله شايفينا نشحذ,,,,,
وكل واحد يعطينا ريال واحد بس.............!! الاثرم (اخو ذآيب ) : عيآل عيب عليكم تاخذون القروث كنكم ثحاذات... هتلر الزعيم : اقوول تلآيط واللي يرحم والديك صرنا طقاقات ’’’’’’’ و رقآصين و مغنين و ما تبغانآ نصيرشحاااااااذاات ........... وبعدين هذا مجتمع مايعرف العيب يعني أخذ راحتك عالاخر.... الارم: (((وهي قاعد يعد القروش ))) والله حنا ما طلبنا منهم شي هم اللي عطووناااا..... قناص سدير ( اللي يجي من الله حياااه الله )).... الاثرم: عيآل أناجووعان خلونا ناكل أي ثيء مولازم كبثه... ويقوومسومآ ويطقه على رأسه.. الاثرم : وجع وث فيك يا الدب...........!!! سومآ : ايه اكيد الاخ شبعان من الكبسه مالك الا يومين في امريكا اما حنا الله يرحم حالنا صار لنا شهرين نشفنا من كثرما كلينا ذاالنواشف... قناص سدير : عيآل من جد هذي امريكا والله ماني مصدقه ....!!!!!! ويدور على نفسه.. مصدق انه بيتر اللي في "هآيدي "... الاثرم: والله يووم قال لناهذاااااااااااااا وثثمه سومآ: مشخآط الاثرم: ايه ثح مثخآط..يوم قالنا بيودينا امريكا توقعت انه يكذب علينا بيحذفنا وراء مدرثتنا... وشووي الاريلآكس يناقز وسط الشاارع يبغى يوقف البااااص اللي اقبل عليهم..... ولما وقف الباص عندهم..لفت على العيآل وقالت: يلاّ لايروح ويخليكم..... وقاموا معه وركبواالباااااااص،،،،،، وكاان راعي الباص مشغل أغنيه كلاسيكه هااادئه ...... ’’’’’ الاثرم: ((وهو طربااان))هيه يالمترجم ((يقصد ريلآكس ..)) التفت عليه ريلآكس: والله المترجم له اسم...!! الاثرم: ((وهو قاعدو يدق رقبه)) طيب ريلآكث ولا تزعل.. تكفى قوول للسواق يشغل لنا شيء يهيظ للرقث ,,,, وياليت يكوون للطقااااقه موووضي يعجبني طقها... قناص سدير: اقوول انثبر بس..تبغى تفضحنا عند هالاجااانب... هم اشكالناويالله بلعوووها وانت جاي تبغى تسوي ,,,, ...(( فلكلووور شعبي )) اقووووول انطق مكانك........... اما (( ذآيب و هتلر الزعيم ))كانوا ملزقين وجيهم بالشباااك ويسولفوون وكل السوالف تعليق على خلق الله... وشوي الا قعدوا يصارخوون ويناقزون في اماكنهم,,,,, ويقولون للسواق (( (( stooooop-stoooooop............ وينقز سومآ معهم وهو ما يدري وش السالفه .. .. .. بس الولد حق فزعااات ويحذف جزمآته ((تكرمووون)) على السواق ويصكه مع رأسه وهنا وقف السواق - وهو خآيف -.... !! وينط من مكانه ويفتح الباب ويهج ركض من الخوف.... قناص سدير : حسبي الله عليك يا سومآ وراك نحَشت الرجااال.... سومآ: لا بس كنت ابغاه يووقف.... ريلآكس: الله يعينا ندور باااص ثاني يودينا... الاثرم: ندور أحثن ,, وث ورانا... وكملوا طريقهم ومهمة البحث عن مطعم يسوي كبسه.... ألين تعبوا وقرروا يرتاحون وجلسوا في زاويه الشارع من التعب يهوجسون بالكبسه اللي بياكلونها الا والله ويمرعليهم ذاك الرجااال الكاااشخ... (( لابس طيحني + لابس قبعه فوقها نظاره شمسيه + الشوارب كنها قرون ثور + وحاط على ظهره ربابه ))) ..... قاموا العيآل يضحكون على شكله...’’’’’’ الاثرم : اخص وش ذا الكشخه وخروا عنه بس... هتلر الزعيم : شكله والله من بدو امريكا اللي توهم يتحضرون.. سومآ : والله كنه واحد من ربعنا كاشخ... انا اعرف اشكال وراعينا اذا كشخوا ... والرجاال في حاااله يمشي .. قناص سدير : عيآل مو يشبه مشخآط.....!!!!!! ذآيب: الاوالله يشبهه مرررررره... ريلآكس : وانا اقووول وين شفت ذي الربابه؟؟؟؟ هتلرالزعيم:يا عيآل هذا مشخآط الحقووووووووووووووووووه ......
وما شاء الله هجووووا العيآل وراه ,,, يركضون كأنهم قطيع من الغنم عندمآ يرى الزت ( وانتم بكرآمه )... ويوم التف يشيك عالوضع الا لقاهم يلحقونه ,,,, ويقط القبع هويحط رجله يركــــــــــــــــض.................... هو يركض وهم ورااااه الين ما دخل ذاك المتحف و كان المتحف شبه فاااضي... واخيراً وصل ((مشخآط)) عند زاويه في المتحف وماله مجاال يهرب سومآ: فكوني عليه هذا اللي قاااهركم !! والله لانسيه اسم امه... مشخآط : حرام عليكم وش تبون فيني ؟؟؟ هذا جزاي اني قاعد امشيكم ...... اهلكم اللي هم اهلكم ما مشووكم ولا فكروا اصلاً يسفرونكم برآ حدكم الطآيف و الا الشرقية و الا ابهآ وتخب بعد.. قناص سدير : الحين حنا اللي حرام علينا واللي سويته انت فينا مو حرام هااااااه؟؟؟ مشخآط : وش سويت فيكم؟؟؟ ريلآكس : سؤال وجيه..!! جاوبوا عليه بس باختصار لاني ذابحه ذابحه الله لا يعوق بشر.... هتلر الزعيم : انااللي بجاوبه مو قلت لكم من قبل لاشفت وجهه بوريه الشغل زيــن... يمسكه من الكرفته اللي لابسها برقبته ويخنقه وهو يصااااارخ وعيونه تناقزت من مكااانها....و الاثرم يعض فيه << والله مدري كيف يعض و هو اثرم كل ثنونه اقصد سنونه متكسره .. ذآيب: عيآل فكووه لايموت الرجاااال ونتوهق به.... مشخآط : حسبي الله عليكم بغيت امووت.. .. سومآ: ليتك مت... عشان تعرف تكذب علينا يا حيوآن .. مشخآط : بصراحه نسيتكم وبعدين كنت مشغوول مرررررررره و توني جآي من النصرآوي ذآك مافكني الا يبغى بطولة و انحشت منه و جيت هنآ.... قناص سدير : الله والشغل عااااد..تعرف تجيب عيآل ,,,,,, بس ماتعرف ترجعنا للسعوديه وانت راجع صح والا... .. .. مشخآط : خلاص حصل خير آمروا انتم بس وتدللوا بعد.......... ريلآكس : ما نبي نتدلل بس نبي ترجعنا اللحين للسعوديه... ذآيب: أيه .. نبي ترجعنا للسعوديه ... مشخآط : متى تبون ترجعووون؟؟؟؟ قناص سدير : الحين يعني متى؟؟ مشخآط : لا لا الحين مااقدر عندي شغل مهم......!! هتلر الزعيم : ((وهو معصب)) قلنا الحين يعني اللحين والا مشخآط : خلاص ان شاء الله اللحين اوديكم بس أسمعوا مو كلكم بتروحون!!!!!! شوفوا انا راح اوديكم على دفعات لان ظهري يعورني مايستحمل ناس كثيره أول دفعه ثلآث عيآل بس .. وكانوا (( هتلر الزعيم , سومآ , الاثرم <<يا حثآفه بيروح ,)) إلتفت مشخآط على العيآل الثلآثه وقال: يلاّ غمضوا عيونكم... وشوي إلا العيآل مختفين ومشخآط معهم.... ******وقعدوا ساعتين ينتظرون متى يرجع مشخآط ****** ريلآكس : ياربي متى يرجع مشخآط ؟؟!! والله شكل مشخآط صار خبر كان...... قناص سدير : يمكن مشخآط غرّز بالطريق أو نشب فى شجره او خلص عليه البنزين .... ذآيب: عيآل خلونا نرجع للشقه ترى مافيه أمل مشخآط يرجع... قناص سدير : صحصح زين نسيت إننآ مادفعنا الإيجار.... ذآيب : طيب اللحين وين بنام لا تقوولون بالشاارع...!!! ريلآكس : خلونا ننتظره شووي.. يمكن نكسر خاطره ويرجع لنا.. قناص سدير : صدقوني ما راح يرجع.. آآآآآآآآه ليتني رحت مع العيآل يوم رااااحوا.. ذآيب: ترى شوي وبيقفل المتحف.. قناص سدير : خلونا نطلع لا يقفلون علينا ونتحنط هنا ,,
طلعوامن المتحف وقعدوا يمشون ويدورن لهم مكان ينآمون فيه
وهم يمشون بالشارع لقوا مكان ما فيه غيره علشان ينامون فيه
وكان لعبه كبيره على شكل بيت في حديقه بيت فخمه
وبعد معاناه ... دخلوا في اللعبه وخمدوا فيها ..
ذآيب سمع صوت بس اكيد ما فهم كان انجليزي
وينادي العيآل ويقومهم بس لا حياة لمن تنااااادي......
وفجأة زاد الصوت وكأن احد يتكلم بميكرفون
ريلآكس بعد ماصحى : وش هالصوووووووت؟؟؟؟
ذآيب يقوم قناص سدير...........
قناص سدير : بسم الله وش فيكم قامزين مع ذا الفجر...؟؟!!!!!
قالوا : فيه صوت بس ما ندري وشهو...؟؟
قناص سدير : طيب ما فيه واحد منكم ذكي يكلف على نفسه شوي ويطل مع الشباك ويشوووف وش صاير !!!! ويقوم قناص سدير ويطل من الشباك الا شرطه " FBI " محوطين المكان وكانوا موجهين الرشاشات عليهم... (( والسالفه ان اهل البيت بلغوا ان فيه ارهابين في حديقتهم )) قناص سدير: عيآل رحنا فيها.......!!! ريلآكس: لا شكلهم ماسكين حراميه اسمعهم يقولون سلموا انفسكم.... قنآص سدير: وكان يرتجف من الخوف يقصدون احنا يا الغبي .. ويقومون العيآل ويطلون من الشبابيك واللي يطل من الباب وشافوا وتاكدوا ان الوضع صدق ريلآكس: عيآل يا ويلنا ويلاه خلونا نسلم انفسنا احسن من يداهمونا ويطلقون علينا الرشاشات....... قناص سدير: انا ما راح اتحرك من مكاني... ذآيب: خلونا نطلع زي ما قال ريلآكس ونفهمهم السالفه... ريلآكس: اللي عند الباب أول واحد يطلع خلونا نلحق على اعمارنا... وكان قناص سدير اللي عند الباب.....
قناص سدير : انا ما راح اطلع اول واحد...
ذآيب : شوفوا انا عن نفسي اخر واحد بطلع سمعتوا..
قناص سدير : (( وهو يرجف )) وأنا قبل الاخير..
ريلآكس: ما شاء الله عليكم طابور مدرسه......!!!!
****
وشوي الا بصوت يتكلم انجليزي وهم ساكتين
عشان ريلآكس يستوعب وش يقولون.....
وبدأ العد التصاعدي 1 2 3...
التفتوا على ريلآكس....(( يعني وش السالفه)) ؟؟!!!!!!!
ريلآكس: عيآل هم بيعدون للعشره, واذا ما طلعنا بيرمون بالرصااااص...!!
ذآيب : يا ويلنا والله ما لقينا من وراء مشخآط خير ...
قناص سدير : خلاص عيآل انا بطلع توكلت على الله ....
وطلعوا وراهـ العيآل وكل واحد رافع يدهـ مستسلمين..!!
قناص سدير: والله ما سوينا شئ بس ((سليب sleepسليب))...
قام قائد الشرطه يتكلم ......
ويجي الشرطي عند قناص سدير يبي يكلبشه وكان قاعد يقول الشروط عليه
وهو اكيد ما يدري وش يقول.....!!! قناص سدير : اقوووول لا تكثر حكي كلبش وانت ساااكت.... ريلآكس : يقولك تقدر تحط لك محامي - - - - - وإلى اخره.. قناص سدير : آآآآه على اول شبابي اصير راعي سوابق يا حظي الردي...
شوي الا شيء صقع قناص سدير على وجهه و ذآيب بعد معه
ذآيب: وش ذا اللي صقعني...... ؟؟!!
كان فيه ولد صغنون يبكي ويتكلم ويحذف عليهم
ومعه امه وابووه يهدونه
قناص سدير : هذا وش يبي ؟؟ والله لا اقوم اصفقه...
ذآيب :والله يبي له تربيه.....!!!
ريلآكس : عيآل حرام عليكم هذا الولد اللي نمنا في لعبته البيت...
ريلآكس: آه وش الله بلاني مع ذا المبزره اللحين هم يحسبونا ارهابين
وانت ووياهـ مستانسبن.... قناص سدير: يعني يحسبونا من جماعة اسامه بن لادن.. قام الشرطي والتفت عليهم ويطالعهم بنظرات خبيثه ريلآكس: بصوت واطي يالحمار لا عااد تجيب طاري ذا الاسم مره ثانيه فااهم.. قناص سدير : لا انا اقصد اسامه هوساوي ...<<<< (( يبي يكحلها عماهآ )) ولف الشرطي مرره ثانيه يناظرقناص سدير وهو معصب ريلآكس: اقوول يا زينك سااكت.. ذآيب : الحين صدق أن حنا إرهابين كله من لسانك الطويل..!! ريلآكس: والله شكلكم بتجيبون العيد في التحقيق... قناص سدير: عيآل شوفوا في التحقيق قولوا الصراحه إلاسالفه مشخآط لأنهم ما راح يصدقونا...... ذآيب: وش نقول كيف جينا لامريكا ..؟؟؟؟؟؟ وحنا لا معنا جواز ولا فيزا ولا هم يحزنون..!! ريلآكس : صح اللحين يحسبونا "مهاجرين غير شرعيين "... قناص سدير: عيآل تشهدوا على ارواحكم حنا رحنا فيها يعني رحنا فيها.......
** المهم خذوهم وحطوهم في زنزانه فاضيه ** وبعد نوووم عميق جاهم الشرطي الساعه 6 الصبااااح وقعد يضرب الباب بعصاااااه ويقوووول" Stand up " وقاموا كلهم ..!! قناص سدير : وش يبي هذا مصبحنا مع صباح الله خير.... ريلآكس: لا بس جااي يعزمنا على الفطور..... ذآيب: يا سلآم عز الله اني جوعان .. ***قام الشرطي يضرب الباب ويقوووول (( كويكلي ))..... ******المهم سحبوهم واحد واحد ودخلوهم بغرفه وهم قاعدين يستنون الفطووووور**** وشوي يدخلون عليهم جيش محققين ومعهم مترجم " مصري " وقعدوا يقزونهم ويتكلمون بينهم وبدت اسئلتهم..... المترجم : تعرفون شذى و الهنوووف..؟؟؟ قناص سدير : ايه اعرفهم لا يكون صاير فيهم شيء..!! المترجم : ايه يا ابني بتئوووولي ايه بتعرفهم ؟؟؟ ** كل المحققين يطاالعونه والشرر طالع من عيونهم ** قناص سدير : ايه والله اعرفهم بنآت جيراننآ كنت العب معهم يوم اني صغير بس كبرت و تغطوا عني ياليتني ما كبرت .. المترجم : بوص يا ابني شذى و الهنووف اللي بنسالك عنهم هم ارهابيين......!! قنآص سدير : ارهابين !!! يمين بالله ما اعرفهم.....!! **** انتهت الاسئله وانتهىالتحقيق ... ورجعوهم لزنزانه **** ذآيب : جوعان ياربي وش اسوي يعني اكل ثيابي... قناص سدير : عيآل شوفوا انا بغني وانتم ردوا ورااي علشان ننسى الجوع ...طيب قناص سدير (( يا ماال فرقى العين يوم حبسوني ))...والعيآل وراه يرددون....... ***ويجي الشرطي ويهاوشهم *** ذآيب : يا وجه الله ما يخلي احد يستانس او يفضفض عن نفسه شوي... ريلآكس : ترى اذا سوينا ازعاج راح يحطون كل واحد بسجن انفرادي مع الفيران يعني اسكتوا......!! **الشرطي رجع عليهم بس ذا المره جاااي ومعاهـ صينيه كبيرهـ** ***ويوم حط الشرطي الصينيه على الارض وشافوه وش جايبلهم... التفتوا على بعض من زود الصدمه ,,,,, ***** الفااااااجعه ***** كا ن جايب لهم (( عشر حبات زيتون اسود + حبه جبن + خبزه وحده )) ذآيب : اظن هذا فطوري وانتم للحين ما جاء فطوركم... قناص سدير : تنكت ,,, هذا فطورنا كلنا.....!! ذآيب : وجع .. وش ذا الفقر......!! ريلآكس : اقول احمدوا ربكم والله شيء احسن من لا شيء . ذآيب : يا ربي ما شبعت جووعان مررررره. ريلآكس : ما عليكم يا عيآل خلوا السفاره السعوديه تجي وابشروا بالخير.. قناص سدير : ايه انطر يا حمار الين يجيك الربيع) يعني السفاره بتخلي اشغالها وبتجي علشانا اقوول تحلم بس لا يكثر.... *** ومشت الساعات والدقايق ولما جت الساعه 3 العصر جاء الشرطي وفتح عليهم الباب*** قناص سدير : وخروا جاكم عنتر زمانه........... ** قعد الشرطي يناظر العيآل بنظرات غضب و يتكلم مع ريلآكس** ريلآكس : عيآل ابشركم السفاره السعوديه جت وطالبينا اللحين... قناص سدير : والله و صرنا شخصيات هاامه ...!! ذآيب : يآلبى قلبهم اللحين بيفزعون لنا وبيرجعونا للسعوديه يا بلآدي كم علشآنش .. ** تناقزوا العيآل وراحوا مع الشرطي للغرفه اللي فيها السفاره **.. السفير: يلاّ علموني وش سالفتكم وبدون كذب عشان نساعدكم.. *** قعدوا يعلمونهم السالفه من طق طق للسلام عليكم,,,,*** السفير : تقدرون تروحون لبيتكم الحين بس بدون مشاكل... قناص سدير : بنروح السعوديه...!! السفير :اي سعوديه اقصد تقدرون تروحون المكان اللي جيتوا منه...!!!! وطلعتهم السفاره على كفالتها وقالوا للشرطه ان هالعيآل مجانين وهربانين من مستشفى الامراض النفسيه..,,,, ذآيب : والله انا توني اكتشف ان عندي انفصام بالشخصيه..!! يعني مره مجنون ومره ارهابي ................!!!!!! قناص سدير : بسم الله علينا من الجنون ليش يقولون عنا كذاااااا حرام عليهم انا عاقل وعقلي يوزن بلد .......... ريلآكس : واضح العقل اقول احمد ربك بس طلعوناااا ............... يقولون مجانين مهابيل اهم شى نطلع من السجن ..... (((((((وهم طالعين من السجن)))))))) لقوا بالطريق شايب معه وآنيت وقاعد يحمل شعير وقربوا من عنده ... قنآص سدير : ريلآكس جاء شغلك ترجم وخله يركبنا ..... الشايب يسألهم ....... ريلآكس : عيآل وين تبغون تروحون؟؟؟؟؟؟؟؟ ذآيب : نبغى هوليود تكفون خلونى اشوفها هاذي امنية حياتي....!! قناص سدير : اقول ياكثر امنياتك بس ...!!!!! **********وركبوا العيال بالحوض ورى مع الشعير************
ويوم وصلوا لهوليود نزلوا العيآل وريحتهم شعير... وهم يمشون لقوا مهرجان لمشاهير هوليود راحوا يركضون ويصارخون من الفرحة وكان مره زحمه وقعدوا يطالعون الفنانين ويدفونهم الناس على السجاد الاحمر ويلقون "اوبرآ " ....... قناص سدير :عوبره مدرى اوبرآ .....!! وقعدوا العيآل يسلمون عليها ,,, ذآيب : يمسك شعرها ويقول : ماشاءالله وش هالزين ...؟؟!! بأي مشغل مزينتـ(ـن) شعرك خل اعلم اختي تزين شعرهآ زيك عند هالمشغل...!! وهي تضحك على بالها يمدحونها ......!!
وبعدها جاء ( البودى قار) حق اوبرآ وطردهم ......
وقعدوا يمشون ويتمشون بالشارع ................
ريلآكس:عيآل حرام شوفو الشحاذ يكسر الخاطر
قناص سدير : وينه ..؟؟ اي والله حرام عيآل يكسرالخاطر احد معه قرش ذآيب : القروش مع هتلرالزعيم اخذهآ معه للسعوديه قناص سدير : وش رايكم عيآل نصف جمبه ترى والله اشكالنا اشكال شحاذين...... ))))))) وقربواااااااااااااا من عنده ,,, لماقربوااااااااااااااااااا((((((( ذآيب : م م مشخآآآآآآآآآآآط قاموكلهم يصرخون بصوت واحد مشخآآآآآآآآآآآآآآآآآآط......!! ويوم شافهم قعد يبكي ويتمسكن.. قناص سدير :وين العز..؟!! وين العشاء مع اوبامآ..؟!! مشخآط: ايه ياحظكم الحين قاعدين تتشمتون فينى ...!!!! ذآيب : عيآل حرام هذا مهما كان اخونا المسلم..! ريلآكس: وشدراك انه مسلم يمكن يكون مسيحي ...!! مشخآط : مسحوا فيكم الارض ان شاءالله انت وياهـ انا مسلم غصب عنك يآ ورع ريلآكس: والله يسب بعد ....!! ذآيب : طيب وشفيك؟!.. وش اللي خلاك بهالحاله ..؟!! مشخآط: ضاع ابريقى وهو راس مالى قناص سدير: افاااااااااااااااااااااااا ياذا العلم ريلآكس: شفت يامشخآط كما تدين تدان...... مشخآط : عيآل تكفون سامحوني انا عارف اني غلطت بحقكم بس مالي غيركم قناص سدير: وش تقصد بهالكلام ليكون بتخاوينا بعد.... ! مشخآط: ايه..تكفون والله لاصير لكم خدام بس لا تخلوني لحالي ما احب الوحده قناص سدير: اهااا الحين جربت كيف الوحده ,, لا مستحيل ناخذك معنا بعد كل اللي سويته فينا ..... ريلآكس: عيآل تعالوا في جلسه مغلقه نتشاور فيها ذآيب : عيآل حرام خلونا ناخذه معنا ريلآكس: خل قلبك طيب يا قناص سدير وخلنا ناخذه معنا و نآخذ أجر قناص سدير : استريح انت وياه كل اللي مسويه فينآ و تقولون خل نآخذهـ معنآ..!!!!! *****وقعدوا العيآل يقنعون قناص سدير******** ذآيب : حرام شوف شكله ماعنده احد ...... ريلآكس: ياغبي الحين هو معه فلوس من وظيفه الشحاذه يعنى راح يفيدنا وخاصه ان حنا جوعانين....! قناص سدير: خلاص موافق بس بشرط ونقز مشخآط وكان يسمع كلامنا مشخآط : موافق موافق على شروطكم....$$$ ذآيب : خوش جلسه مغلقه .........!!!!! قناص سدير :اسمع اول شروطنا: اولاً: تعشينا..وثانياً : تدبر لنا وسيله نرجع فيها لـ السعوديه..! قال: موافق..!! وراحوا مطعم وطلب لهم مشخآط,, ويوم كلوا و شبعوا قناص سدير : مشخآط ترى باقى نص الاتفاق مانفذته... ويقعد مشخآط يفكرررر وهم ينتظرونه وشوي يقوم ينقز,, ويقول لقيتها لقيتها ريلآكس: يالله يا مشخآط وش اللي لقيتهاا تحفنا مشخآط: نخطف طياره رايحه للسعوديه ........!!!!!! ×××××العيآل اسكتووووووووووو من الصدمه مومصدقين××××× قناص سدير يبلع ريقه : لا لا يا مشخآط ما اتفقنا على كذا....!!!!!!! ريلآكس: بصراحه هذا شيء كبير مافي غير ذي الفكره .... !! قناص سدير : قايل لكم هذا ماينفع بشي غير الفضايح @ ذآيب : ممكن توضح كيف نختطف طياره؟؟ قناص سدير :ذآيب متاثر بهالافلام الاجنبيه الى تشوفها ريلآكس: طيب يعنى كيف نركب طياره وحنا اصلاً مامعنا لاجواز ولا فيزا؟؟ مشخآط :اسمعونى زين ماعليكم انا راح ادبر لكم الجوازات وكل شئ ريلآكس: طيب مدام انك راح تسوي لنا جوازات ليش نلف وندور مو لازم نخطف الطياره نروح كنا مسافرين .... حالنا حال الناس والا انت تحب تسوى اكشنات ترى والله مو لايق عليك !! اسمعو زين انا راح ازور الجوازات والتذاكر وبعد مانركب الطياره وتقلع بساعتين راح يكتشفون ان حنا مزورين فهمتوووووووووووووووووااا قناص سدير : شوف انت المزور مو حنا لاتحطها براسنا ترى محنا ناقصين. ذآيب : الله اكشن ونآسه احب هالاشيآء اللي مثل كذا.....@ ويوديهم مشخآط لاقرب مصور ويصورهم هذيك الصور ويبدا مشخآط مهنته فى التزوير وصارت الجوازات جاهزه ريلآكس: شكله والله من اكبرالمزورين فى العالم .. قناص سدير : خلونى بس ارجع السعوديه والله لاعلم عليه علشان يعطونى مكافآة لاني ادافع عن وطني و احميه بعد الله من هالحثآلة ذآيب : يالله مانى مصدق بنسرق طياره ..!! ريلآكس: وانت الصادق نخطف طياره مو نسرق ياحلو ..!! ذآيب : وش الفرق بين نحطف و نسرق ؟ مشخآط: وقص السانك انت وياه اقصروا اصواتكم لاحد يسمعنا وتخرب الخطه قناص سدير : وعععععع من زين الخطه عاد ...@
المهم راحوا وركبوا الطياره وكل واحد قاعد على اعصابهـ ذآيب : لوسمحت يامستر مشخآط وش نوع السلاح الى راح نستخدمه ..؟!! قام مشخآط يتخبط قال هاه وش تقول سلاح اصلا نسيت سالفه السلاح ....!!!! وهناااااا شهقوووووو العيآل كلهم قناص سدير :حسبى الله عليك يا مشخآط والله انك بتجيب لى الضغط هذا شئ ينسئ ..!! ريلآكس : وهو معصب اجل بأي شيء نخوف الركاب...؟...بالربابه حقتك..!! مشخآط : خلاص لاتخافون راح ادبرها يعنى ادبرها ........ ومرت ساعه ومشخآط يفكر ومتَرالطياره تمتير ريلآكس : عيآل بقى ساعه على مايكتشفون السالفه.... ذآيب قاعد ياكل ويقول : يازين اكلهم زيناه....... قناص سدير : الحين حنا بورطه وانت قاعد تبلع. ذآيب : اقول حنا ممسوكين يعنى ممسوكين خلهم يمسكونى شبعان احسن من اكون جوعان ولانسيت وش صار فينا بالسجن من الجوع ريلآكس : فال الله ولا فالك لاان شاء الله مايمسكونا ولانرجع للسجن وشوى جاء مشخآط يركض وقعد بسرعه وقام يتلفت وراءه قال : الحمدلله ماشافونى ....! قناص سدير : وش فيك تركض و خايف......؟؟!!!! مشخآط : لقيت بزارين يلعبون ومعهم مسدسات مائيه سرقتها منهم ذآيب : لآ يكون هذا السلاح امحق سلاح بس طيب وينه ..؟!! قام يطلعها من بطنه وكانت ثلاث مسدسات ويقول شوفوا هذا واحد لى لانى راح اروح لجهه الكابتن واحد لـ ريلآكس و ذآيب علشان تستأسرون الركاب فى الدرجه الاولى واحد لـ قناص سدير علشان بتكون فى أخر الطياره .. وبعدها بزمن من الوقت .. مشخآط : ذآيب تعال معى والباقين توزعوا بالطياره وانتبهوا ..لا .. احد يشوف المسدسآت كل واحد يمسكها بيده ولا تخليه يبين علشان الركاب يحسبونها انها عبوه ناسفه o.k ؟ قالوا كلهم o.kkkkk قام ذآيب و ريلآكس يتناقزون ويقولون يه يه يه قناص سدير : وجع .. وش فيكم خضيتواالطياره...؟! ريلآكس: ياغبي علشان نخوف الركاب...!! قناص سدير : وش دعوه ماخوفتوهم باشكالكم ...!! وراح مشخآط و ذآيب يستاسرون الكابتن ومساعده وكانوا الركاب خايفين ويبكون ويصارخون يكسرون الخاطر الا صوت مشخآط بالمآيكروفون مصدق عمره يقول:هنا الكابتن مشخآط يحييكم ويتمنى لكم رحله سعيده وعلى الاخ ريلآكس التوجه الى الكابتن مشخآط وكان مشخآط يبغى ريلآكس يترجم للكابتن بس ورجع ذآيب مكان ريلآكس.... (( قناص سدير ))مستأسر المضيفات ومشغلهم سوي قهوه سوي شاهى .. ذآيب: كان يتفرج على التلفزيون وفجأة شاف صورهم قام يركض بالطياره ويصارخ انفضحنا انفضحنا صدق الحين خوف الركاب قناص سدير : وش فيك .........؟؟؟!!!!!!! ذآيب : صورنا بالاخبار ياويلى من ابووووووووووى..!! قناص سدير : حرام عليك يا مشخآط ضاع مستقبلي والسبه خططك الفاشله كنت ابغى اصير دكتور .. والقهر انه هو الوحيد الى ماطلعت صورته ........!! ذآيب : خلنى اروح اقول لريلآكس و مشخآط الخبر الشين ويوم دخل غرفة الكابتن لقى كرسي الكابتن ومساعده فاضيه ***ريلآكس يتصفح مجله أمريكيه و مشخآط نايم *** ذآيب: وين الكابتن ومساعده ..؟؟؟؟!! ريلآكس: الله لايعمينا ... شفه وياشر على زاويه الغرفه وكان مربوط هو ومساعده فى الزاويه ........ ذآيب: طيب من اللي الحين يسوق الطياره ..؟؟!!! ريلآكس: مو لازم احد يسوقها هى تسوق بنفسها ’’ انا مره شفت طياره كذا بالتلفزيون....................!!!! قام ذآيب يمسك المآيكروفون ويناديني ( الحقنا يا قناص سديييييييييير ) ويوم سمع قناص سدير صوت ذآيب و يروح لذآيب بسرعه ذآيب : شف هالخبلان وش مسوين مربطين الطيار ومساعده والطياره طايره لحالهااااا .......!!! قناص سدير : حسبى الله على ابليسكم فكوهم بسرعه لاتطيح الطياره..... × ويفكونهم ويقعد الكابتن ومساعده في اماكنهم × .....
*** وبعد ساعات طويله وصلوا اخيررررراً لسعوديه*** وقفت الطياره بمطار سدير << ايه يقولون انهم بيحطون مطار عندنا خلوني اتحلم الاحلام ببلآش ,, وماشاء الله مابقى شرطى بالمملكه ماجاء فى المطار ويقعدون العيآل يطلون من الشباك واللي يبكى واللي يمسح دموعه قناص سدير : ياويلى كيف انزل الحين اخاف ابوي تحت ينتظرني ذآيب: الله يقطع شرك يا مشخآط حنا الاغبياء الى سمعنا كلامك وخططك الفاشله
ريلآكس : انت ماتبت من هالخطط وبعدين ليش ننزل نص الركاب؟؟؟
مشخآط : والله مدرى بس دائما اسمع انهم ينزلون نص الركاب ..
المهم من شده غبائهم للمره المليون سمعوا كلامه ونزلوا نص الركاب0
وشوى جآء ريلآكس وقال:عيآل وين مشخآط احد شافه ....!!!
كل العيآل قالوا لا ,,ولا احد شافه ويقعدون يدورون مشخآط......@ ووشوي قعد ذآيب يصارخ ويأشر على التلفزيون ويقول شوووفواااااا ×××وهنا كانت الفاجعه ××× كان مشخآط طالع فى الاخبار ومكتوب تحت فى الشريط ((( انه من احد الناجين من الركاب ))) وكان مشخآط يتكلم ويقول ان هالعيآل ارهابيين ,,, ومعهم اسلحه خطيره وفتاكه وقنابل يدويه و كل ابو شي...........!!!!! )))والعيآل من هول الصدمه قعدوآ يبكون وحالتهم حاله والى جاهـ حاله هستريه قعد يبكى و يضحك(((
ريلآكس : الله لايوفقك يامشخآط النذل00 قناص سدير : انا قايل لكم هذا ماله امان بس ماصدقتونى ذآيب: حرام عليه وين الاسلحه الفتاكه والله ماعندنا الا الدجه ريلآكس : و المسدسات اللي معنا مائيه وتضغط عليهآ يرش بعينك ويقعدون العيآل يبكون وكل واحد يندب حظه وشوى طفت انوار الطياره وكانت الدنيا ظلام وصارت مداهمه قويه بالطياره
ريلآكس:اي مشخآط بسم الله عليك قايل لك انك تتحلم والله شكله حلم مشوق بتقوله لي بعد الفسحه اوكيه وطلعوا من الفصل وهو قاعد يحمد ربه على انه حلم ولما طلعو العيآل من الفصل للفسحه ومابقى غيره سمع صوت عندالدولاب وكان صوت مشخآط يغني ((ياسامعين الصوت ردوا عليا)) وينقز من مكانه و يتلفت بالفصل ويقول ليكون اتخيل ان شاء الله انى اتخيل ويقرب جمب الدولاب ويفتحه وهنااااااااااا لقى ابريق مشخآط وكان صوت مشخآط طالع منه وهو تجمد في مكانه مشخآط :هاه قناص سدير ماتبغى تروح لامريكا مره ثانيه .. ويقعد يصرخ ويقول لا لا مابى اروح ابي امي ابي ابوي ابي زوجتي لا ماني قادر لا مستحيل,, ويطلع من الفصل يركض
((خرج ولم يعد))
(( النــــهـــــــــايــــــه ))
اعذروني التنسيق مش و لآبد .. لكن و الله من اللي صآر لي .. من بعد صلآة الفجر الى صلآة الظهر و أنا أضبط في الموضوع .. يوم اقآم مسجدنآ و ضغطت على استعراض المشاركة و قلت بروح اصلي و ارجع اشوف يوم رجعت لقيت اللآب طآفي .. الحمدلله على كل حآل .. في النهاية , أشكر جميع من ساهم في انجاح هذا العمل ..
و اتمنى ان المسرحية نالت استحسانكم وكانت خفيفه لطيفه وما ازعجناكم ..
هلا وغلا ابو عابد ابداع ماشاء الله عليك انت والشباب الي معك ماشفت القصه كآمله ولكن \\ المجهود الجبآر جعلني ارد ولو بكلمه شكر . لي عوده اخرى اذا قريت القصه ان شاء الله
مسرح المـ ج ـلس ( سعوديون في الخآرج ) .. سآرع بحجز مقعدك ~ 
~
؟..
!!
!!
<_ والله الشلخ ,,
الوضع العادي
