المجتمع السعودي... هل هو ( نخبوي ) ؟؟ وكم يبلغ عدد ( السملّق ) فيه ؟؟ - نادي الهلال السعودي - شبكة الزعيم

Fahad Al Sudais · #1 15/09/2009, 05:46 AM

حيــــــــــاكم

انا جيت

المجتمع السعودي... وما ادراك ما المجتمع السعودي

منظومة كسائر المنظومات القائمة على ( تضاد الحاكم والمحكوم )

تتطور ببطء.. وتسابق الزمن بسرعة لاتتجاوز عشرين كم في الـ( سنة )

يؤطّرها برواز عربي اصيل لم تمسّه انامل ( العلوج )

يقابل هذا الاطار بالطبع عدّة احداثيات لا مفر من تواجدها

في مقدمتها تأتي الذات البشرية للمواطن السعودي بشقّيه ( المطنوخ والمعدوم )

ومن نافلة القول ان نعترف بوجود نظرة دونيّة خاسئة من اصحاب المعالي ( المطانيخ ) لأخوانهم في الدين والـ( بطاقة المدنية )

واقصد بذلك ( المعدومين )

فالمواطن المطنوخ لاتتعدّى نظرته للمعدومين سوى أنهم ( شلّة سملّق ) لابوووهم لابو اللي جمّعهم

وهذا طبيعي على كل حال..

فمن تعوّد على الاكل بملعقة من ذهب ( تحوم كبده ) اذا رأى شخصاً ( يلحس ) اصابعه بعد الطعام

ولكن اللافت ان فئة ( المعدومين ) في السعودية يتم التعتيم عليها اعلامياّ بشكل سافر

إعلامنا الموقّر يضلل الرأي العام العالمي عن حقيقة الطبقية في مجتمعنا

كما أنه يتكتم عن العدد المهول عن عشاق التميس والفول مقارنة بعشاق الموائد العامرة والبنت البتول

وكثيراً ما أوهم العالم ان المواطن السعودي ( يتاغر ) قريشات

واذا ماعنده لكزس ضروري بيكون عنده جنط لكزس حاطّه كـ( تحفه ) فوق الطاولة في مجلس الرجال

.

.

ولكن ماذا عن ( صندوق معالجة الفقر ) ؟؟

ولو بحثتم في اسباب ( تحنيط ) صندوق معالجة الفقر لعرفتم السبب الحقيقي الذي طار بسببه رأس الوزير المسكين ( النمله )

الوزير المغدور قام برفع تقرير شامل عن الميزانية الأوليّة التي يحتاجها الصندوق لتوزيع لقمة بسيطة تعتبر في عرف

اخواننا المصريين ( مسح زور ) لشلّة الفقراء المعدومين في مدينة الرياض فقط

فكانت الارقام شبيهة بقيمة صفقة انتقال ( كريستيانو رونالدو )

ولهذا السبب قام أولو الامر بإحالة الملف بكل حيثياته الى السيد ( فلورنتينو بيريز ) وتم طي قيد الوزير الغلبان

علماً بأن هامور جدة الملياردير السعودي ( منصور البلوي ) قد تكفل مشكوراً بالـ(تصوير) مع كل فقراء الصندوق

.

.

لحظة لحظة...

نسيت شيء مهم

طبيعة الانسان ياسادة مجبولة على حب الذات والخوف من كل تحدٍ آت

الخوف من البديل ومن رياح التغيير شعور نفسي طبيعي يقل عن الفقير ويتفاقم عند الغني

الموظف البسيط على المرتبة الرابعة ليس لديه أي مانع في الانتظار لمدة اربع سنوات لتتم ترقيته للمرتبة الرابعة

بينما المدير العام على المرتبة الرابعة عشر لن يهدأ له بال حتى يتحول الى رئيس مجلس ادارة بالمرتبة الخامسة عشر

يعني بالمحصلة النهائية.. حياة ( المعدوم ) أقسى لكنها اكثر راحة نفسية من ( المطنوخ )

ولهذا السبب نجد ان الاغلبية من المعدومين يميلون مع الوقت الى الركود والرضا بما هو موجود

.

.

ولكن ماذا عن ( البيروقراطية ) في السعودية ؟؟

تدرون وش اللي ساعد على انتشارها كالنار في الهشيم ؟؟

طيبة المواطن العادي البسيط والغلبان

اصلاً وش تكون البيروقراطية اكثر من انها مجموعة ( تخويفات وتأويلات وتهويلات )

وتصوير النظام على انه وحش من الاوراق المحشوّة بالكثير من التواقيع والاختام والارقام ؟؟

وحنا بالطبع مالنا خلق على وجع الراس وكثرة الشيل والحط

علشان كذا دايم ندربي روسنا ونقول سمعاً وطاعة يا ( صادر ووارد )

تعيش البيروقراطية... وكلنا بيروقراطيون... اذا غاب فينا بيروقراطي فكل واحد عندنا ( رقبته سدّادة )

.

.

( الاقتصاد الداخلي ).... اركب الهوا صاروخ

الدولة السعودية تعاني من عقوق ابنائها المبتعثين في هذا الجانب الحيوي

لأن الواحد يروح ( امريكا ) ويدرس كل اسرار مداخيل ومخاريج الاموال والنشاطات الاستثمارية في بلد الرأس مالية الاولى عالمياً

وكل عصريّة يتقهوى في بنك من بنوك ( مانهاتن ) ويتعشى في برج مركز التجارة العالمي

وياخذ له ثلاث سنين من حشو الدماغ بالافكار الاقتصادية النيّره

ويرجع لنا هنا ويجحد ام الاقتصاد ويحط حيله بنصرة قضايا ( حقوق المرأة )

ويصير كاتب كبير في جريدة الوطن وتبدأ سلسلة مقالاته ضد ( الهيئة والخطاب الديني )

.

.

( الاقتصاد الخارجي ).... اطلع من نافوخي الله يرحم والديك يا ( مخ )

السعودية تستورد من الصين كل شي... كل شي... وفي رواية اخرى ( كلّش )

وتدفع لهم بالآجل... والفلوس تهل زي المطَرَه والرز

وما يهم جودة البضاعة دام الدفع ( بالتقسيط المريح )

ولهذا السبب اصبحت محلات ( ابوريالين ) اكثر من السيد ابراهيم الفريان

لكن بالمقابل عندنا اشياء كثيرة ومنوّعه نصدّرها للصين وغيرها من دول العالم

خذ عندك ( تمر سكري – تمر خلاص – تمر خضري – تمر ......... الخ

)

.

.

تعال لـ( التعليم )

الدول الاخرى كلها بلا استثناء تجهز الأيدي العاملة لخدمة البلد بشكل ذاتي وعلى طريقة ( منكم واليكم )

تأهيل وتدريب ثم تخريج كفاءات وقدرات تعطي ماعليها واكثر لدفع عجلة النمو

في السعودية

محاولات مستميته لاستيعاب اكبر قدر ممكن وحشو الجميع في القاعات بصرف النظر عن ماهيّة ( المخرجات ) !!!

نظام التعليم هنا يعاني من ضعف التناغم بين مخرجات التعليم وحاجات الاقتصاد

المجتمع السعودي يفتقد الى الكثيرمن المهارات والقدرات التي مازال التعليم ( متنّح ) امامها وكأنه قد احتسى جردلاً

من اللبن بعد افتراس حبة بخاري مع الرز

.

.

( العلاقات الاجتماعية العامة )

الحوار... اكبر معضلة تواجه كل من يحمل بطاقة احوال سعودية

السعوديين لايمكن ان يتحاوروا فيما بينهم

وهذا شيء طبيعي لشعب اعتاد على ( التلقين ) منذ الصغر ولم يتأسس على الحوار

حوار أي مواطن سعودي مع مواطن آخر يبدأ بمقولة ( اسمح لي ترى ماعندك سالفة ) وينتهي بـ( مضاربه ) وهياط

كم مره سمعتوا بالاخبار عن قصاص فلان لقيامه بقتل فلان ( إثر خلاف كان بينهما ) ؟؟

يعني كانوا يسولفون ويتحاورون... اختلفوا وتهاوشوا وجابوا العيد في بعض

ليش نبعد... خلونا في المنتديات

روحوا لأي موضوع فيه قضيه مطروحه للنقاش... بتلقونه ( مغلق ) مع ايقاف عضوين او ثلاثه بعد حذف الردود المسيئة

.

.

طيب اتحداكم تقولون لي ماهو اشهر ( ديربي ) سعودي ؟؟

لا احد يقول لي ( الهلال

و النصر

)

لأن فيه ديربيات كثيرة غطت عليه وسحبت البساط والزولية

عندك مثلا

ديربي ( stc وموبايلي ) وديربي ( طاش والمطاوعه ) وديربي ( اليوكن والتاهو ) وديربي ( الدمشقية وبيتزا هت )

وهالاخير لاتستهينون فيه... تراه مهم وراحت فيه قبايل

بس هالكلام مايعني ان السعوديين دائماً منقسمين وماعمرهم توحدوا

لا بالعكس

كل السعوديين يقفون صفاً واحداً تحت راية جوالات ( نوكيا )

وكلهم يتشققون من الفرحة اذا جتهم الوجبة في ( الطيارة )

وكلهم ايضاً لايستعملون للشرب من البرّاده غير قارورة ( المنهل )

وفيه شي أهم من كل اللي فات

ويشترك فيه السعوديين بجميع فئاتهم وميولهم وأطيافهم العرقية والمذهبية والرياضية

القصمان والجنوبيين والشماليين والشرقيين واهل الحجاز.. السنة والشيعة والصابئة والمرتجئة والخوارج... الاسلاميون والعلمانيون والوسطيون.. موظفو القطاع العام والقطاع الخاص والعاطلين والطلاب والتجار وهوامير الاسهم.. رجال الامن والخارجون عن القانون.. اصحاب السمو والمعالي والسعادة والفضيلة واصحاب السوابق.. الهلاليين والفقراويين والاتحاديين وعشاق الملكي وانصار البرشا والمانشستراويه والانتراويه والمدفعجيه وحتى مشجعي بايرن ليفركوزن..

كلهم كلهم بلا استثناء.. ماعلمنا منهم ومالم نعلم..

كل ابوهم ( سعابيلهم تقوطر ) اذا جاء طاري ( المسيار )