بسم الله الرحمن الرحيم ..

السسلام عليكم جميعاً ..

بالبدايه أبارك لكم بـ العشر ..
و الله يجعلنا ممن يتقبل دعاه بهالأيام يارب
وياليت كل واحد تزيد طاعته وتقربه لله بهالأيام لأنها ايام معدوده ..
وأيام فيها الأجر مضاعف بإذن الله .. < لبى المقدمات ياناث .. اثارين منب هين


اليوم بقولكم سالفه حصلت بـ الجامع اللي عند حارتنا بـ صلاه الجمعه ..

اليوم انا نمت 9 الصباح وقلت لـ أخوي يقومني الساعه 12 الى ربع لـ صلاه الجمعه
ويو جت 12 الى ربع قومني وميير اني عجزت اقووم مابي حييل بالمرره
قلت قوم اخوي همن تعال لمي .. قال قومته مابقى الى انت .. انجز يالله
وميير اني تعوذت وقمت .. وتوضيت ولبست ورحت للمسجد مع اخواني ..
وقلت لهم اني اليوم ناوي أتأخر بعد الصلاه .. يعني لاتنتظرونن برجع مشي
ونزلنا للمسجد وصلينا وبعد الصلاه بالعاده يقوم كم شحاذ ويقول كلام أن أمه وأبوه ميتين وأن ماعنده فلوس وعنده مرض نادر وعلاجه غالي
وهالمرض ماهو موجود عند احد غيره .. مايدري ان الشحاذ الثاني عنده نفس المرض ..
والناس ع حسب اسلوب الشحاذ اللي يتلكم ..
اذا حلفه واجد وعيونه تغورق وشماغه مقطع وثوبه اصفر .. هذا بيجيه رزق ماحلم بوه ..
اما اللي توه يشحذ وجديد ومايعرف هالأشياء فـ بيجيه رزق بس مهب كثر خويه

عااد اليوم هذاا جو اثنين واحد يسار و واحد يمين < ماتلاحظون ان اللي يشحذون بصلاه الجمعه ماقد قامو اثنين قريبين من بعض
يعني ماعمري شفت اثنينهم يمين او اثنينهم يسار .. دايم يكونون متوزعين واحد يمين و واحد يسار
وحريمهم عند البوابات .... والله انهم لاقينها ..

عاد سلمكم الله واحد من الشحاذين مراهق عمره يمكن 18 او 17 ويتكلم ويقول اللي عنده .. ويوم راح يجلس عند البوابه يمشي وكنه معاق استغفر الله ..
بعد يمكن ربع الى ثلث ساعه قام واحد من الجماعه اللي بيتهم جمب المسجد ..
وأسمعه يهاوش وهو عند الباب وميير يجتمعون عنده الجماعه كلهم ..
عاد الفضول نغزني بهالوقت نسأل الله السلامه وقمت بعرف وش السالفه ورحت عندهم ..
لقيت ان اللي ماسكه يقول انه نصاب هاللي يشحذ وان مابه الى العافيه ..
وهذاك الشحاذ يحلف انه مريض وان مشيته كذا ومايتصنع بها ..
عاد أغلب الجماعه قالو للرجل اتركه وخله .. ياخي انت وش عرفك وانه يحلف بالله وبالعشر وكيف ينصب ..
قال والله انه نصاب وان مابه الى العافيه لاهو مريض ولاهو محتاج ..
عاد فيه كم واحد كان مع هالرجال .. يقوولن ان الشحاذ نصاب ومابوه شي
واحد منهم دق ع الشرطه وقالهم السالفه .. الشحاذ الثاني( اللي عند الباب الثاني) سمع هالأدمي وهو يدق ع الشرطه وميير يحط رجله <
عاد الجماعه اللي كانت معارضه الرجال اللي ماسك الشحاذ .. صار بوجيههم هيك ( !!! )
عاد وقتها الشحاذ خاف ع نفسه ..
وياويلي عنه مراهق مايعرف كيف يصرف نفسه زيي الشحاذين المتمرسين
وقاله اللي ماسكه تبيني اتركك .. امشي طبيعي قدام الجماعه عشان ماتطلعن كذاب قدامهم .. قال الشحاذ: تعاهدني تتركني قال: أيه ..
وميير يمشي الى نص المسجد مافيه لا اعاقه ولا شي وقصم .. < رمضان واول ايام العشر و يوم جمعه .. وشوفو كيف النصب زي السلام عندهم
عاد تركوه وراح يمشي .. الرجال اللي مكلم ع الشرطه كان برى ينتظر الشرطه
ويوم دخل قال وراكم فكيتوه .. وانا توني مكلم الشرطه والحين بيجون < كان وقتها يتكلم وهو معصب لان اسحبو عليه الجماعه
وميير نفس الرجال اللي وعد الشحاذ انه يفكه راح و مسسكه مرتن ثانيه ..
< مكتوب له اليوم آخر يوم له بالرياض
وجت الشرطه عاد وركبته ..


واناا ناوي أقرى قران وأعيين من الله خير .. لكن الله يخلف ماصار


مقتطفات :

- ماتلاحظون ان اليمنيه انتشروو بشكل عجيب هالسنتين وان سلبيات بعضهم أردى من سلبيات بعض الباكستانيه ؟! ..

- يوم الجمعه و برمضان و باول أيام العشر .. لا وبعد توه مراهق عمره 18 ويسوي هالتصرف ..
تتوقعون اللي أكبر منه وش هو مسوي .. ؟!

- اللي مسك هالشحاذ يوم يعاهده انه يفكه لو مشى طبيعي قدام الجماعه
ورجع مسكه مره ثانيه .. تحسسون بها شي ولا عااتي يستاهل هالشحاذ ..
مدري احس لو غيره مسكه كان أحسن

- تكفون لاتفوتكم ولا ركعه بـ العشر وعليكم بصلاه التراويح والقيام آخر الليل
ويالله تجعلنا من اللي يدرك ليله القدر يارب

- اللهم انك عفوٌ كريم تحب العفو فعفو عني ..

- اول موضوع اكتبه بـ العاام .. فـ إذا حسيتو شي متراكم وشي شابك مع شي بالغلط
أستروو ع ما واجهتم ..

آسف ع الإطاله .

الله يعين وزين ماسوا للي دق على الشرطه ...

واعجبني اللي كبر ذمته حبتين اللي وعد الشحاذ يفكه وسحب عليه ..

لكن بسأل شاب عمره صغير يشحذ ؟ لو يشتغل ويغسل سيارات او معقب

مو احسن كأقل تقدير ؟


’،


انا والله اقول للوالد لاتعطي احد قروش يقول كلها خمس ريال تزيد تنقص ..

وهي على حسب نيتك اقوله طيب فيه جمعيات خيريه ... يقول ما اضمن

واحب اعطي انا عشان اعرف فضل الله علي ...

//

مره صارت لنا سالفه جت شحاذه وسيعه وجه

تشحذ عند اشاره الوالد عطاها قالت كل هذا و تعطيني كذا لو داريه ماجيتك ..

والوالد يحلف لها انه مامعه شي الحين (( وانا معصب ودي اعطيها كف ))

هلا بريآن

و الله انك صدقت اليمنيه و الله كثرو اكثر من قبل رح لركا بلازا بعد المغرب ولا شي

ياكثرهم كثراه يجيك واحد عمره 13 سنه ينشب لأمن جآبتك بعدين يروح

5 دقايق الا وهو يرجع رحمته انا و عطيته لكن النصب و الله كآثر صح فيه ناس محتاجه

لكن فيه ناس محتآجه و تتبلآ على نفسها هالمراهق هذا الي تتكلم عنه لو انه اشتغل كان افضل له

يعني توك شآب فيك حيل

كينق ميلآن جزآك الله الف خير يعطيك العافيه


ريآن لا تحرمنا من جديدك

تحياتي

وعليكم السلام ورحمة الله وبركاته
/،
حقيقة صدمة
الصدمة مو لأنه نصاب ، لكن الصدمة ردة فعل الرجال اللي مسكه ،
صراحة أعجبني خخخخ ..
أجل مسكه وقال له امش ، والأحسن أنه قال له لك الأمان ثم مسكه ،
استغفر الله ما يجوز يخون العهد بالمسجد << توّه يقول أحسن
/،
بس ما تلاحظ أن كل الناس يصير لهم مواقف مع الشحاذين << يمهد لسوالف
طال عمرك قد مرة واحد نشب للوالد ، عاد قال له ما معي فكّة " صرف " ، قال اشتر من البقالة واصرف والله مو الوقاحة
/،
ومرتن ثانية ، واحد بالمسجد نفس الفكرة ؛ شحاذة معروفة طريقتها ،
بس هذاك اليوم قررت أنشب ،
الموووهيم ، طلعت بالشارع وركبت السيارة وأخذت أترقب ،
ماهي الا كم دقيقة ، طلع بعد ما فضى المسجد تقريباً ،
شغلت ودزيت له ، المارية كان يعرج تراه ، المهم رحت له ونزلت القزاز قلت له ما تبي أوصلك ؟
قال لالا أباخذ ليموزين ،
قلت يابن الحلال أنت لاقي تاكل عشان تركب ليموزين بثلاثين ريال
قال عفط وجهه عليّ وعصب وقال شكراً شكراً
المهم قررت أني أكشفه ، يعني كاشفه كاشفه ،
حرّكت وقعدت أسوق على مهلي ومشغل " سوء على مهلك سووووء " ..
ماهي الا ثواني ، وأشوف بالمرايا ولا هو راكب قراند ماركيز أبيض مظلل موديل 94 ، ومشى ولف يمين ودز ، وأقوم أخش بالحواري وأدوره ولا لقيته ، قسم بالله قهررر ، ايه صح ، يوم مشيت عنه مسافة قام يمشي عادي ولا يعرج ولا شي
/،

إقتباس - يوم الجمعه و برمضان و باول أيام العشر .. لا وبعد توه مراهق عمره 18 ويسوي هالتصرف .. تتوقعون اللي أكبر منه وش هو مسوي .. ؟!

شف .. هم درجات ، يعني يبدي بفريق الناشئين يسرق عن طريق التعاطف ،
منهم يتدرج ويوصل للفريق الأول ويسجلونه محترف ،
ومنهم يحترف إحتراف خارجي ويسرق بطريقة منظمة يعني سرقة شركات وإختلاسات وهلمجرا

إقتباس - تكفون لاتفوتكم ولا ركعه بـ العشر وعليكم بصلاه التراويح والقيام آخر الليل ويالله تجعلنا من اللي يدرك ليله القدر يارب

الله يجزاك خير .

إقتباس - اول موضوع اكتبه بـ العاام .. فـ إذا حسيتو شي متراكم وشي شابك مع شي بالغلط أستروو ع ما واجهتم ..

لالا ولا يهمك بس لا عاد تفكر تسولف ..

..

لـ الاسف ان العصابات من اليمن كثروا ..

يعني كل يوم تلقاهـ في مسجد ..

لـ الاسف انهم يسيؤوون لـ سمعة اهل اليمن ..

..

انا اعرف ناس محتاجين ..

بس عندهم كرامهـ ..

يعني ما يطلعون لـ الشوارع او المساجد ..

تلقاهم عفيفيين ..

ولآ كأنهم محتاجين ..

..

اخوي ريان مشكور على موضوعكـ ..

و السلام عليكم ..

..

باختصار مثل ماذكر احد الاخوان .. هناك من يحتاج فعلآ ..
يعني شخص بيذل نفسه ليش .. حنا نقول عشان عصابه ولا عشان شخص
طيب .. حنا وش درآنآ عن ظروفهم؟ ماقول الا الله لايحوجنا لاحد ان شاءالله
والحمدلله على العافيه .. يمكن البعض مايدري عن طعم الحاجه عشان كذا يتكلم
بتريقه وساعه صدر لكن الشكوى لله .. عذرا على الاطاله

وٍآنـٌآ آقـٌوٍوٍوٍوٍوٍوٍل ليـٌه آلمجـٌلس منـٌوٍرٍ ,,
آثـٌرٍ رٍيـٌآن منـٌزٍل آوٍل مـٌوٍآضيعه فيـٌذآ ,,؟
عـٌآد تصـٌدق مـٌن قـٌوٍهـ آلنـٌوٍرٍ آنـٌي لآبـٌس نظـٌآرٍآت ,,؟

شـٌف .. دآيمـٌآ ملآحـٌظ شـٌي ,,
آلفقـٌيرٍ .. آللـٌي فعـٌلآ فقـٌيرٍ .. عمـٌرٍهـ مـٌآ يمـٌد يدهـ للنـٌآس ..!!
حتـٌى آلجمعـٌية آلخـٌيرٍية .. مـٌآ يسجـٌل فيهـٌآ آلآ بعـٌد وٍيش ..!!
وٍعمـٌليآت آلكـٌذب ذي كـٌلهآ .. متعـٌوٍدين عـٌليهآ صـٌرٍآحة ,,


يعـٌطيك آلعـٌآفية رٍيـٌآن ع هيـٌك مـٌوٍضوٍع ,,






مـٌوٍدتيّ ,,

هلا بريآن

و الله انك صدقت اليمنيه و الله كثرو اكثر من قبل رح لركا بلازا بعد المغرب ولا شي

ياكثرهم كثراه يجيك واحد عمره 13 سنه ينشب لأمن جآبتك بعدين يروح

5 دقايق الا وهو يرجع رحمته انا و عطيته لكن النصب و الله كآثر صح فيه ناس محتاجه

لكن فيه ناس محتآجه و تتبلآ على نفسها هالمراهق هذا الي تتكلم عنه لو انه اشتغل كان افضل له

يعني توك شآب فيك حيل

كينق ميلآن جزآك الله الف خير يعطيك العافيه

ريآن , بالله هذآ أسم !! , يعني أهلك يوم يسمونك صآدقين ولا يمزحون !!
يعني لو الله مدك بعمر وجآك ولد يقول لك : [ بآبآ ريآن ] , [ أبوي ريآن ]
طيب إذا الله عطآك عمر وجآ ولدك ولد , يقول لك : [ جدي ريآن ] !!
< طيب ورآ ماتآكل كبر رآسك
,
هلا وغلا بـ ريآن
لايهمك الكلام اللي فوق , كلهآ مدآعبه وأسمك حلو < أحد مآخذ رآيك
والله وأنا أخوك الشحآذه فيه رزق , وأحسسن مآفيهآ مايبي لهآ رآس مآل
بس الرجآل اللي مآسك الشحآذ والله ياهو فآضي
أنا لو بشوف شحآذ وأنا صآيم والظهر !! وأدري أنه كذآب ماقلت له شي
,
كآن هنآ

إقتباس طال عمرك قد مرة واحد نشب للوالد ، عاد قال له ما معي فكّة " صرف " ، قال اشتر من البقالة واصرف والله مو الوقاحة

زين ماقآل لك : عطني الفلوس أصرفهآ لك , هنآ الوقآحه بعينهآ
,
نرجع للأخ الحبيب ريآن

إقتباس - اول موضوع اكتبه بـ العاام .. فـ إذا حسيتو شي متراكم وشي شابك مع شي بالغلط أستروو ع ما واجهتم ..

ماوجهنآ الا كل خير , وهذآ المحل وتدله لاعآد تقآطع < علوم مرجله
يعطيك العافيه يابعدي على الموضوع

الحمدلله برمضان ماشفت شحاذ .!!

بس اذكر مره كنت ابي اطلع من البيت واخوي نازل قبلي ويا اختي الصغيره
وانا كنت بس ابي البس الجزمه ((اعزكم الله ))
ويوم نزلت لقيت اخوي يكلم واحد واركض واشوف الا شحاذ قايل لاخوي الصغير انتظر
الوالده

المهم وزبدناه والوالده وقفت عند الصراف الي في الشارع اللي ورا البيت
ولقت شحاذ بنفس الشكل ثوب اصفر وشماغ معفط ومو مكوي

ونفس الحركة ورقة مزورة وانا تعبان وانا وانا بالنهاية المطلب الكبير ابي فلوس

ياخي حتى لو مريض فيه الف شغله وشغله تغنيك عن الشحاذه

والله ياريان الحين مااندري نصدق مين ونكذب
لكن الله يعطينا على قد النيه> > مآاادري وش دخلها لكن يالله
ويسلموووع هيك طرح

لاعدمنااااااااااااااااااااااكـ