(يوميات رمضانية "20" )) صاحب القلم الساخر(مـغاط) --( يالحريم تبون الرجّال يحبكم ؟!. + نصائح بـ (نكهه مغاطيه ).!!
فكرة - سندريلا الهلال اعداد ومتابعة - الهنوووف تصميم - عسيريه لنا من كل عام شهر فضيل .. أعاده الله علينا وعليكم وجميع المسلمين بالخير واليمن والبركات وكل عام وانتم بخير
**][يوميات رمضانية 1430 هـ ♥][ ** لقد عدنا اليكم .. تحملنا الاشواق للقياكم .. ونسعد ان نعيش معكم . . في سلسلة تحمل بين طياتها يوميات الأعضاء الرمضانية من كل عام هذه السلسلة أنتم أهل بيتها ونحن ضيوفا في حضرتكم ،،، + +.........+ + أهلا وسهلا بكم أحبتنا .. ودعونا نرحب سوية بالمضيف "العشــرون " صاحب القلم الساخر "مــغــاط .- " لك يحكي لنا احداث يومه مع شهر رمضان المبارك ..
الـسـّـ.....ء <<< سلام صايم !! كل عام وأنتم بخير ..
-السحور :
كنت قايل للأهل لا أحد يقومني للسحور إلا الساعة 4 << والله لو إنك تبي تتسحر موزة بلحالها ما أمداك !! المهم قمت ثلاث ونص . . وألقى الوالدة متفلته وضابطه ذيك الكبسة اللي ما بقى شي ما حطته بها .. ليمون أسود .. هيل .. قرفة .. قطيعات لحم .. و دجاجة متربعة فوق الصحن .. أكبر دجاجة شفتها من دخل رمضان الظاهر إنهم ذابحينها وهي راجنة !! وقطع طماط على شكل شرائح و خيار مقطع << بالله وإلا أنت قد شفت أحد يحط خيارة كاملة على رزهم !! ما بقى شي ما حطته . . اعرفوا إننا يوم قضينا آكلين لقينا دبـّاسة !! يا حبي لها الوالدة عسى الله يطول عمرها !! المهم قعدت واجتمعوا الأهل وأمي تحتري ردّة فعلي !! قلت : وأنتم ما تعرفون إلا رز !! << مهوب عاقل النمساوي !! يوم زعلت الوالدة !! قلت خلااص أمزح يا بنت الحلال !! والله و أتكيّ بجنبها وأقعد أوكلها وأراضيها .. صح إنهم غاروا بعض الناس بس ما علي منهم الجنة تحت رجلين الأمهات << أشوى إنك ما أنتب شيخ !!
دقيت بالسحور الين حسيّت إن آذاني صفرّت .. يالله أسمع اللي حولي !! أذن وتوضيت ورحت أصلي .. وحنا بالطريق قلت لأخوي اسمع . . إذا قال الإمام ولا الظالين طقني مع مرفقي عشان .. أقول معكم آمين !! << يا شين تنكيت رمضان !!
الشاهد :
- تدرون إن الأم محتاجة حنان وكلمة دافية أكثر من أي مخلوق ثاني على وجه هالأرض !! تكفون لا تحرمون أمهاتكم منها !!
- ليه ما نشكر هالضعيفات اللي يطبخن لنا . . سواءا أخواتنا أو بناتنا أو حريمنا أو أمهاتنا .. ونقدم لهن كلمة حلوة .. تحسسهن بقيمتهن ؟! صح إنهم فالينها ما يصومون إلا 23 يوم ..بس ولو .. ومن هالمنبر .. نقول لهن : تسلم يدياتكم يارب !! ليه ما نتلذذ بأكلنا ؟! وآخذين الدعوة طقاق وشبعه !!
- الدوام : قمت الساعة تسع ونص تقريبا .. ومن قمت اليوم وأنا ماش أحس ودّي أسمع نشيد ودّي أفتح التلفزيون أشوف وش جايبين بقناة المجد .. المهم نظام الشركة عندنا برمضان الـ Check in من 9ونص إلى 11 . . والـ Check out بعد ماتداوم ست ساعات تقلب وجهك !! بالعادة منيب أقوم إلا عشر وربع آخذ لي شاور و أدق سلف و أبصـّم الساعة 11 .. وأطلع 5 العصر تافل العافية لو أحد يضرب لي بوري لحقته ونزلت عليه بالمسواك !! لكن أقول لكم قمت بدري اليوم شوي .. المهم تروشت وطلعت عاد جونا يالله من فضلك .. طبلون الموتر من فوق تقدر تضبط عليه نقانق .. وشيش طاووق .. ويغدي ولا عندك بأزين منه ولو تطوّل ما توخره احترق !! التفت يمين وأنا القى CD على المرتبة .. معطينياه مطّوع من عند منتزه !! المهم شغلته .. وأثر فيه شيخ ما شاء الله تبارك الله عليه .. عليه أسلوب يحبه قلبك .. ولا هوب من ذولاك اللي من أول ما تبدأ المحاظرة الين تقضي وهو يهدّد ويتوعد !! وإلا يصيح !! الصراحة أعجبني أسلوبه .. ومن قوّ الحماس بغيت أروح آخذ عمرة .. بس عندي اجتماع الساعة ثنتين وتعوذت من أبليس وقعدت !! وأنا على الطريق أكلت مطبّ يحبه قلبكم مدري من قوّ خشة الجو مع الشيخ .. وإلا من موتة قلب المسؤولين عندنا بالأمانة والبلديات .. أو بسبب استهتار المقاول اللي مهنا أحدن يحاسبه !! تبيهم يحفرون لك شارع والله ما ياخذ منهم يوم !! بس تبيهم يرجعونه على حلـّه لازم معاريض وملعنة جدف !! الحمد لله إني مانيب ألبس تقويم ضروس !! و إلا والله إن ينفك من قو ّ ذاك المطب !! وأنا على الطريق قبل لا أوصل للشركة بشوي .. شطفني موظف معه سيارة رسمية من سيارات الشركة !! يمشي سبع آلاف .. وشماغه طالع مع الدريشة باقي شوي ويوصل شنطة السيارة !! كل هذا عادي ونقول بيجي نظام " ساهر " ويبي يوريكم الشغل يا "شوماخر و باخشب" !! لكن مطبّ ارتفاعه سبعه متر !! ولو توقف عليه .. شوي وتشوف حوش البيت اللي بجنبه !! ولا تهدّي و لا حتى تضغط الفرامل مجاملة !! وصلت مكتبي .. شيكت لستة المهام .. وشيكت على المسد كول بالتلفون ورديّت على الإيميلات المهمة وقلبت التقويم لقيت مكتوب فيه حكمة تقول : " لا ينبغى أن نبحث !! يجب أن نجد !! << يعني نلقى ونكتشف جديد" !! رغم إن هالمقولة قاريها من زمان إلا أنها أعجبتني يوم قريتها من مرتن ثانية .. و هي للرسام الأسباني بابلو بيكاسو .. اللي يقوولون والعهدة على الراوي إنه عاش (26000 يوم) وأنجز (26000عمل) مابين لوحات وبين منحوتات .. وجدّد في الفن !! و طبعا تدرون إن لوحته " الولد والبايب أو الغليون " هي أغلى لوحة بالعالم وبيعت بـ 104 مليون دولار قبل فترة !! << طيب أنت وش دخلك بالموضوع ؟!
صليت الظهر .. رجعت و مريت بسرعة البرق على جريدة "الجزيرة والرياض" .. وفتحت " مصحف إلكتروني " وقريت لي تقريبا وجهين .. اللهم لا نفاق << تكفى ياللي قاري نصه !! المهم .. أجريت كم اتصال وارسلت كم إيميل .. و طلبت تحديث لجميع التقارير .. و حضرّت للاجتماع وكان بمبنى ثاني .. طلعنا ثلاثة من الإدارة تقريبا الساعة 2 إلا ربع .. وصلنا على الوقت .. بدا الإجتماع .. وكلمة منا وكلمة مناك .. وهذي ليه ؟! و هذي لازم !!
رجعت لمكتبي بعد صلاة العصر .. قلت ياولد وأنا راجع أبعدّ .. كم واحد مبتسم من المبنى الثاني إلين ادخل مبنانا ؟! وقعدت أطلطل بوجيه العالم .. وأبشركم من خمسين واحد تقريبا صادفتهم بطريقي لقيت اثنين اللي ابتسموا وواحد الظاهر إنه يبي يوخر شي ناشب بسنونه وحسبته والا مهوب قصده !!
جيت لقيت أوراق وحوسة بمكتبي .. شخمطت على بعضهن .. واتصلت على مكالمات المسد كول .. ورديت على الايميلات اللي سحبت عليها الصبح .. والايميلات اللي جت جديدة !!
تقريبا على الساعة 4 ونص .. جاني مهندسين اثنين .. سعودي وتونسي .. وتقريبا هم رقم ثلاثة واربعه من اللي ابتسموا وهو قاصدين !! كان فيه موضوع انهيناه بسرعة .. ومن عرض الكلام اللي يهمكم أنتم ووجيهكم <<< تعرفون آخر الدوام !! كان السعودي يرّيش بـ التونسي .. قال : حرام عليكم أنا مثل الحصالة اللي مافيها إلا " ريال حديد واحد " !! فلو تحركها تكتشف لجتها .. لكن لو الحصالة فعلا فيها " دراهم واجد " كان صارت أكثر رساوة . . ولا سمعتوا هالإزعاج !! طبعا هو يقولها من باب التواضع !! لكن ذكرني بالحكمة الصينية اللي تقول : " العربات الفارغة أكثر ضجيجا " !!
كنت مضغوط إلى رقم الفنيلة .. وكان عندي موعد في السفارة و اتصلت واعتذرت وأجلته للسبت !!
-الشاهد :
- أنت كم عشت من يوم ووش قدمت ؟!
- يعجبني بعض المطاوعة اللي يخاطبون العقل و يقدمون الفائدة من دون أي " تصادم " !! وبعيدين عن " إثارة العواطف " !! - استفدت من السي دي اللي عطانيه المطوع .. وسمعته !! واستفدت من المصحف الالكتروني اللي ارسله واحدن "دويشر" وقريته !! بالله وش كثر الأجر اللي بيحصلونه كل الاثنين ؟!
- ليه بعض ضعاف النفوس إلى الحين يعملون بمبدأ " جلدن مهوب جلدك .. جرّه على الشوك " !! ولا هم بكفو تأتمنهم على عنز !! - من الأشياء اللي تعلمتها بحياتي وكل يوم أتأكد منها .. إن الأشخاص المتواضعين هم الأنجح هم الأقل ترزز !! أما الخاوين وحقين الزحمة فهم الأكثر .. و هم " الأزلب " !! - تكفون ابتسموا !! - العودة من الدوام :
طلعت تقريبا خمس وربع .. لازم أتأخر شوي .. لأني لابد بنهاية دوام كل يوم .. مخصص " فولدر " أحط فيه جميع العمليات " المعلقة " واللي ما بعد أغلقت واسم الشخص المسؤول .. والمهام اللي ما زالت في طور التنفيذ ولحد الآن ما خلصناها .. عشان تكون من أولوياتي بكرة ويسهل علي أتابع " الإنجاز " وهل الشغل ماشي على ما يرام وإلا خيقي بيقي تسنه إدارة أنديتنا !! بعد ما انتهيت لقيت اثنين ينتظروني .. ومشينا الين وصلنا مواترنا .. واحدن منهم صديق من ابتدائي .. بقول لكم سالفتي أنا وأياه بأول رمضان صمنا !! بآخر الموضوع بتلقون السالفة !! << يسمع بالتشويق !!
المهم كان بنزيني فاضي فاتجهت لمحطة بنزين <<< أشوى حسبناك متجه لـ بندة !! المهم قال لي الهندي .. "أهمر" وإلا "أخزر" ؟! .. قلت 91 يا رجال .. << واضح إن معه ددسن !! .. رد علي أبو هنوّد .. عبيّ واحد وتسعين ريال يعني؟! وعطاني ابتسامة تميلّح بخصوص ذبته الأخيرة !! وأنا اللي أناظر وجهه وأناظر لي البنزين !! هو إني أنزل عليه وأشبكه بلهاته .. وإلا آخذ اللي من يده وأمزعه من تحت الأذن !! قلت صديق .. أنتا مسلم ؟! قال أيوه .. قلت أجل عب وكل تبن !! بس بعد الصلاة .. الحين ما يصلح عشان أنتا فيه صوم !! بلع ريقه و فهم وش ودّي أقول !!
المهم اتصال منا .. واتصال مناك .. إلا هذا اتصال من الأهل . . توني مابعد كملت حرف الواو من قولك ( ألو ) .. إلا هم طايرين بحلزدي !! وجب ذا واترك ذاك !! ووين ذا ؟! وبعدين ترانا ماعطينا حق الورد فلوسه !! قلت وشو ورده ؟! قالوا شكلك ناسي العزيمة ؟! – الصدز إني ما طقيت لها خبر مهوب بس ما ذكرتها - !! قلت وين مثل هالأشياء تنسّى !! وبعدين على هالأغراض والحوسة والله لو إنكم عازمين ( محمد بن نايف ؟ ) !! قالوا أها بس بدينا بالسياسة !! . . وأنا أهز راسي .. طيب طيب !! زين زين !! تسني أسكـّت بزارين !!
الشاهد :
يالحريم تبون الرجّال يحبكم ؟! فكوّه من شركم بمثل هالأوقات اللي يصير فيها تافلن العافية !! والله يا إن الحرمة اللي ترضي وتفهم الرجال بمثل هالـ(وقت) !! تكسبه ( طول العمر ) !! إذن أتركوا عنكم الصجة ووجع الراس اللي ماله سنع !! هي ناقصة ؟!
- الفطور:
وصلت على الآذان .. ونفس الوجيه السفرة اللي على السحور هي هي اللي على الفطور .. الفرق إن كل واحد يابسة خشته ويالله يرمش !! أخذت لي كم فنيجيل قهوة على كم تمرة .
. أختي الصغيرّة متعلمة وشلون تسوّي دونات .. مافيه ولا وحدة مقاس الثانية .. صايرات تسنهن ذوليك الكفرات اللي يمسكن سياكل البزارين . . قلت عمى وش ذا ؟! يوم غزّوا عليها الضعيفة .. قالوا هي هي !! والله إني فرحت .. وقمت أريّش بها .. ما قمنا من الفطور إلا أنا مقنعها نفتح فرع ( مغاط دونات ) بسوق النساء !! والربح بالنص !!
الشاهد :
- ترا جمعة العائلة مع بعض في هالشهر الكريم !! تنشرى بالملايين !! فلا تحرمون أهلكم هاللذة !!
- يا زين طرح الثقة في الصغار !! يكبرون وتكبر معهم .. حتى لو إنهم حايقينها !!
بعد التراويح :
بعد ما أفطرت طلعت أنام .. طبعا بعد ما صليت <<< والله الظاهر إنك مكبتها نومة !! إلى وقت صلاة التراويح << الأولى مشيناها بس ذي ماش ما تجي !! المهم يوم قمت وأثر العالم مخترشة والمجلس مليان .. دخلت وسلمـّت << بالله؟! وسالفة منـا وسالفة مناك .. يوم جت المباراة .. جبنا العشاء <<< المفطح أبدى من برابيس ربعنا !! غسلت يدي وطلعت للإستراحة ..
الشاهد :
بعض العزايم مالها سنع !!
مباراة السعودية * البحرين :
- في 09-09-09 : دبي تبلور (مفهوم التخطيط ) لـ ( واقع مشاهد ) !!
- ونحن نؤكد أن ( تخطيطنا المدروس ) : كذبة عايشين على رونقها وزيفها ( 16 سنة ) !!
قادنا هالـ(تخطيط) لإنحدار خطـّي .. معلنا ً (انفجار تلك الفقاعة الصابونية ) !!
الشاهد : تدرون وش يقول (إنيشتاين) :
"الحماقة والجنون أن تفعل الشيء ذاته مرات ومرات !! وتتوقع نتائج مختلفة " !! - إذا (الوجيه هي الوجيه ) !! والأشخاص هم الأشخاص !! والفكر هو الفكر !! بالله تشملنا مقولة إنشتاين وإلا لا !!!؟؟؟؟
الماضي الجميل : << وش خليت لفريد الأطرش !!
ذكروني أقول لكم سالفة الشكشوكة .. بأول رمضان صمت به !! وإلا تدرون وشلون خلوني أقولها لكم الحين وأنا عجل !! يومني بثاني جتني كحة مدري انشحط حلقي . . المهم أمي جت لمي قالت شف يا مغاط ترا ريحتك متغيرة .. وحتى صوتك متغيّر .. والظاهر إنك بلغت .. وعشان تسذا لازم تصوم هالرمضان !! قلت أما ريحتي متغيرة ؟! تيس ؟! قالت جاك العلم !! عاد بوقتها ماش ما خشت بمخي مسألة بلغت !! والله لو إني مولود وعمري خمس سنين !! قلت تدري رضا الله من رضا الوالدين !! بالغ بالغ الشكوى لله !! المهم يوم جت ليلة رمضان .. وصلوا التراويح .. وأثري يالله أشوف الأرض .. قلت اسمعي (يوه) <<- يوه يعني (يمه) بس بالأسباني !! المهم .. لا تنكبيني .. لازم تقوميني للسحور !! عاد منول الزاحف هو اللي يسهر إلى 11 وإذا داخ ونام وهو متوسد مركى من مراكي المقلط .. جو لمه وغطوه بجلال صلاة !! وعليها إلى بكرة !! المهم إني واثق بالوالدة إنها تبي تقومني للسحور .. ويوم غفت عيني .. إلا والله وأحس بشيء أحرش !! لمس يدي !! وأفتح عيوني .. إلا والله هذي رجل الوالد يقومني لصلاة الفجر !! قلت : خيييييييييير ؟! قال قم تجدد وصل !! قلت والسحور !! قال أقول أنهج لا يقيم وأنت ما دخلت المسجد !! أول مرة أحس إنها خنقتني العبرة ولا قدرت أصيح .. جاني شعور بزر رايحن مع أهله للملاهي .. وعيـّوا يدخلونه .. وأبوه راح وخلاهم ولا معهم جوال يدقون عليه !! يعني أبرّص عند باب الملاهي الين يخيب ثناي !! والله وأروح لمي .. قلت يعني سويتيها ؟! قالت : ميخالف م أنتب ميت من الجوع !! توضيت وصليت ..
يوم جاء الصبح ورحت للمدرسة .. وأثر بزارين أولى وثاني وثالث .. فالين أبو أبوها .. سندويش وفيشارات وفلة حجاج !!
المهم سعابيلي خانها التعبير !! وتلخبطت الغدد اللمفاوية عندي !! وضغطت على نفسي لأن المدرسين كلهم قالوا لنا : قصة غزوة بدر وإن الصحابة حاربوا برمضان !! وكل ما قلنا شي .. قالوا لنا قصة غزوة بدر !! الحين مبزرة بثاني وثالث وش يعرفنا بهالأمور !! المهم طلعت وماش أحس لو أحد يجزمنـّي والله لا آكل ( مسـّاحتي) حتى شكلها صار يشهـّي !! قال لي خوّيي اللي الآن زميل عمل !! وش رايك نأدبها (شكشوكة ) .. قلت مهبول أنت .. وين يعمي ؟! تبي أمّي توطى جبهتي !! قال وش دراها !! والله لو إننا نبي نشرب توت !! المهم أغراني .. رحت معه لبيتهم !! والا والله فيه قدر شكشوكة من الصبح ماكول منه ومبربسين به أخوانه الين قال بس . . أتوقع لو يكبـه لدجاج .. سحبوا عليه !! المهم جاب القدر قال يالله خلنا نهد به !! واثره يبينا ناكل بيدينا !! قلت يخوك والله لو إنه سليق !! قم جب خبز !! قال تشرّط أنت ووجهك !! قلت لا يا ابن الحلال .. أوكي جوعانين بس ما توصل الأمور لهالمستوى !! المهم جاب كيس فيه صامولية ونص !! معضضات الين قالن بس .. ومافيه إلا العجين مالي الكيسة .. لأن أخوانه مهوب ياكلونه .. والله ونسمـّي ونعثي بذيك الشكشوكة .. خخخخخخخخخخخخ يوم قضى الصامولي .. والله ونبدأ نتعامل معها على أساس إنها من المأكولات الشعبية .. وناكلها تسننا ناكل حنيني !! المهم رجعت للبيت . . قالت الوالدة .. هاه عسى ما جعت ؟! قلت صايم يا بنت الحلال !! <<< يا شين بعض الأجوبة اللي مالها دخل بالسالفة!! المهم إنها عدّت على خير .. وبقى هالموقف ما أنساه طول العمر !!
الشاهد :
- ترا التدرج في التربية والتعليم والتدريب من أهم المتطلبات !! مهيب الدعوى قل به قل به !! - أفهموا إن " الطفولة " مرحلة لازم يعيشها البزر !!
ختاما .. ثلاث نقاط سريعة :
أولا : والله إني أحبكم يا حقين المجلس .. ولكم معزة خاصة .. لكن أدري أنكم عاذريني .. والجايات أكثر . ثانيا : ألف شكر للأخت الهنوووف والطاقم المساعد لها شكر خاص .. والمفروض هي والأخت شذى يستفاد من طريقة دعوتهم للأعضاء المشاركين في الفعاليات !! لأنهم يملكون من الأدب والرزانة والاهتمام الشي الكثير .. اللي يجبر الواحد إنه يثمـن هالحرص والجدية في الدعوة .. ويوافق على الاستضافة .. شكرا الهنوووف مرة أخرى .
ثالثا : أعتذر على هالمصالة .. والإطالة اللي مال أمها داعي .. لكن طمرّوا وتراكم بحل !!
كل الشكر لـ القلم الساخر **][ " مــغــاط "♥][ ** يوميات مميزه ونصائح قيمه بنكهه مغاطيه سعيدين بمشاركتك بالمجلس العام
وانتظرونا غداَ مع المتميزة عاشقة الزعيم 15 .-
أرق التحايا وأطيبها من مشرفي واستشاري المجلس العام
(في البداية اعتذر انا الهنوووف عن الخطا الفني فهذا يوم 19 لـ الاخ مغاط لاني لخبطته معاي مره اقول 19 مره 20 بس الظاهر يحب التميز فـ اختار 19 )
هلا والله بك اخوي مغاط واهلا بك بالمجلس العام
مايمدحون الترحيب الكثير يقولون يصيب الشخص بالغرور ندخل على اليوميات ع طول
الشاهد الاول على طاري الشكر فيكم طبع يالرجال يقهر لاعجبكم شي تنتقدونه كانه عيب تقولون حلوو اتذكر خالي لاجذبه ولفت نظره شي بلبسنا جلس يعذرب حتى ابوي الله يطول بعمره لاقلت له شرايك قال حلو بس وراه قصير والا طويل والا لونه وراه كذا والا مدري ايش
الشاهد الثاني اصلا مايترزز الا الي يحس بالنقص
الشاهد الثالث يقولون لك ابوطبيع مايجوز عن طبعه وهالطبع بالحريم فصعب تغيره او تقنعهم لاشعوري اصلا مثل كلمه وينك في - - - > متبريه ماكنها منهم
الشاهد الرابع المدح نحبه ونفرح فيه حنا الكبار كيف بالصغار
الشاهد الخامس بالعافيه الشكشوكه يالتسذوب
\ / عوافي اخوي مغاط على هالمشاركه المميزه وانا الي اقدم شكر خاص ومختلف لك لـ تحملك ازعاجي وعلى موافقتك وحضورك وحسن تعاملك وان شاء الله ماتوقف على هاليوميات نبيك نصائح للعيد اليوميات تمزيت بين الاسلوب الفكاهي والنصائح القيمه يمكن تكون بسيطه بس محد ينتبه لها واهم شي انها ظهرت بنكهه مغاطيه لايجيدها الا مغاط
مشاركتك بالمجلس العام اسعدتنا كثير شكرا لك كثر ازعاجي
هلا والله مغاط
الا هذا هو نفسه يوم مبارة المنتخب ؟ أجل سوو دمج لـ مغاط وأكن مع بعض
يومك تُحفه صراحةً الله يعينكم ياللي تداومون برمضان والله ياإنكم تاكلون شسمه
والأردى من كذا الدوامات اللي فيها طلعات من مكان لـ الثاني وحوسه
صحيح اننا نتعب وحنّا نزيّن الفطور بس والله ماهوب قد تعبكم ..!
إقتباس
- تدرون إن الأم محتاجة حنان وكلمة دافية أكثر من أي مخلوق ثاني على وجه هالأرض !! تكفون لا تحرمون أمهاتكم منها !!
ياسلام عليك كلامك عين العقل مقصرين حنّا من هالناحيه
ياعمري يايمه دايم تتعب وكل شيء وقليل تسمع كلمات شكر
بس من تالي الناس تنبهوا لهالشيء والحمد لله صارت تنسى التعب لامن سمعت الكلام الزين
وبالنسبه للإبتسامه انت صادق انا وهو انا وبالبيت لاصاروا الناس صايمين مااشوفهم يضحكون
يعني أوّل كان الأكل هو اللي يضحكنا ؟
وسالفة اننا نبي رجالنا يحبونا ! طيّب الاغراض من يجيبها لنا اذا رجّال البيت ماجابها
ترانا مجبورين ننكد عليكم بمثل هالاوقات عشان على الاقل على الفطور تلقى الشيء اللي تحبه
شكراً مغاط على هالمشاركه الجميله ومشكور على النصائح الذهبيه
نفكّر نجربها .. نفكّر
منور والله بطلتك وحياك بالمجلس دايم اليوم يارب ...
مبروك العيد قبل الزحمه وكل عام وانت بخير وصحه يارب
إقتباس
الرسالة الأصلية كتبت بواسطة المنتدى الاستشاري
مباراة السعودية * البحرين :
- في 09-09-09 : دبي تبلور (مفهوم التخطيط ) لـ ( واقع مشاهد ) !! - ونحن نؤكد أن ( تخطيطنا المدروس ) : كذبة عايشين على رونقها وزيفها ( 16 سنة ) !! قادنا هالـ(تخطيط) لإنحدار خطـّي .. معلنا ً (انفجار تلك الفقاعة الصابونية ) !!
الشاهد : تدرون وش يقول (إنيشتاين) : "الحماقة والجنون أن تفعل الشيء ذاته مرات ومرات !! وتتوقع نتائج مختلفة " !! - إذا (الوجيه هي الوجيه ) !! والأشخاص هم الأشخاص !! والفكر هو الفكر !! بالله تشملنا مقولة إنشتاين وإلا لا !!!؟؟؟؟
وأنا ووجهي جالس أقرا أقرا ولا حجزت رد ..
وسع الله صدرك بالعافية ،
بس يومك تحمّست وبغيت تدز العمرة شي ثاني ، قلبي عورني من الضحك << مهب قايل بطني عشان ما تحسبونه دب ، خوفكم بعد انغسل مخكم من موضوع الاخ اللي يقول شلون تعرف العضو دب ولالا ..
يارباااه يامغاط ويش هالأرقام هذه ماشاء الله.. إبداع الله يحفظك إبداااع ماشاء الله تبارك الله. أتمنى لك التوفيق أينما ذهبت. فكرة - سندريلا الهلال اعداد ومتابعة - الهنوووف تصميم - عسيريه الله يبارك فيكم ياغاليين دائما ماتقصرون تحيتي قبل مودتي
(يوميات رمضانية "20" )) صاحب القلم الساخر(مـغاط) --( يالحريم تبون الرجّال يحبكم ؟!. + نصائح بـ (نكهه مغاطيه ).!! 
.- "
عن الخطا الفني 
)
كانه عيب تقولون حلوو
يالتسذوب
--
وآلكرف 
ومميز بما يحيوي من درر
...
الوضع العادي
