(( يوميات رمضانية " 14" )) المتميزة: ( رائدة الزعيم ) -(تبتداها بـ محارش ( بزران )- وتسدح بكل (مكان) وتختتمها بـ (أنا احبكم) " !!!
فكرة - سندريلا الهلال اعداد ومتابعة - الهنوووف تصميم - عسيريه لنا من كل عام شهر فضيل .. أعاده الله علينا وعليكم وجميع المسلمين بالخير واليمن والبركات وكل عام وانتم بخير
**][يوميات رمضانية 1430 هـ ♥][ ** لقد عدنا اليكم .. تحملنا الاشواق للقياكم .. ونسعد ان نعيش معكم . . في سلسلة تحمل بين طياتها يوميات الأعضاء الرمضانية من كل عام ، هذه السلسلة أنتم أهل بيتها ونحن ضيوفا في حضرتكم ،،، + +.........+ + أهلا وسهلا بكم أحبتنا .. ودعونا نرحب سوية بالمضيف "الرابع عشر" العضوه المتألقة " رائدة الزعيم ." لكي تحكي لنا احداث يومها مع شهر رمضان المبارك ..
بسم الله الرحمن الرحيم
السلام عليكم ورحمة الله وبركاته <<<السلام سنه ورده واجب ما تدق على أحد
تبون الصراحة كنت ناوية أرسل للهنوف أعتذر عن كتابة اليوم قلت لنفسي الستر زين بس لأني كنت أحسب يومي السبت سوفت ويوم دخلت يوميات القيصر رهيب وأنصدم أنه يومي بعده والمشكله ما دخلت الا متأخر وقلت يالله لعلها خيره
بأسوي مثل بقية الأعضاء وأبداء لكم من الساعة 12
لحظة قبل ما أبداء شخباركم الشهر عليكم مبارك_____> صايره حتحت أبارك بعد الزحمه من جد أحس بدري جداً أتذكر أسلم عليكم
وأستغل فرصة تواجدي هنا بالمباركة وإهداء أمي وأبوي وجيراننا الا ما قلتوا لي وش الأهداء أصلاً <<برامج القناة الأولى يهدون من غير ما يدرون وش السالفة
ما علينا منهم خلني أكتب لكم يومي لا تتوطون في بطني وموب ناقصه
لحظة قبل ما أبداء خلنـــي أنتهز الفرصة بما أني في منبر رسمــي وأعلــــــن من هنــــــا برائتـــي من تهمة الواسطـــه وشي ثانـــي ترى ما عندي خاصية إخفاءوهالخاصية تتوفر لدى المشرفين فقط والأعضاء لا طبعا لأن هالسؤال تكرر علي كثير + سؤال التوقيع والحمدلله زادوا مساحة التوقيع ويارب يعطوننا خاصية اللمبة الطافيه
خلني أكتب يومي لا أنجلد صدق
لحظة
لا ولاشي بس أختبر مدى صبركم "إنما يوفى الصابرون أجرهم بغير حساب"
طبعا الساعة تعلن الثانية عشر صباحا بتوقيــــت بيتنـــا كنت في هذه اللحظــــة المنتظره منسدحــــة عند التلفزيون مع أسرتي الميمونه المكونه من <<من جدكم بأجلس أعدهم مشوار
المهم كانوا مجتمعين عندنا وزوجة أخوي توها طالعة من الأربعين <<يالله باركولي خلكم سنعين
المهم طبعا أنا ما أحشم أحــد يعني أتســـــدح بأي وقت المهـــم جلست معهـــم الى حول 12 ونص يحمدون ربهم أني جالسه أقصد منسدحه معهــــم الى هالوقت طلعت صومعتي عفوا أقصد غرفتي وأطالـــــــع وإذا بي أرى جهازي وأفتحه <<شرايكم بالفصحى
تو عمي صالــــح معطيني درس حــــول الفصــــحى وأنها ما تستعمـــل بس ما لي خلق أجادله ومشيت ثلاث أرباع مواضيعه وناقشت القليل لأن مالي نفس
المهم وين كنا فيه أيه جلست عند الماسن وسولفت شوي الا أمي تناديني السحور خييييييييير أخروا السحور وذولي يسحرونا الساعه وحده ونص عشان ما يروحون خواتي ما تسحروا
الله لا يهينهــــم عندهـــــم بيــــوت يطبخون فيهـــا والا أقرب مطعــــم المهم نزلت على خاطر أمي وكلت كم لقمه ورجعت غرفتي أقصد صومعتي
جلست مع نفسي الى اليوم وتخلل جلستي مع نفسي العديد من المقاطعات ومو ظروري أذكرها للأختصار والا عادي وش وراي خلني أكتب أصلا يومي فاضي
المهم صلينا الفجر وقريت قرآن قبل الصلاة كالعاده طبعا أنا فيني طبع عجيب أســوي ملــــــيون شغلــــه بوقـــت واحــد أو ما أســــوي أي شـــي أبد
الساعه ثمانيه تقريبا طفيت جهازي اللي مشغل وما عنده أحد ونمت حطيت ساعتي 12 ونص عشان الصلاة صليت الا وأسمع صوت عمي موسى وعياله وهنا جاني ما يحتاج ذكر اسماء وقلت مو ضروري أنزل أسلم النوم أحلى وبعدين عياله أولاد بأتغطى أشوفه في مناسبة أخرى
والله وأرجع أكبر المخده وحاطه الساعه 3ونص بعد صليت والغرفه باااااااااارده وظلاااااااااااااام وأتذكر كلام ناس لي أمس عن المساعده وأنه أنانية الواحد ما يساعد على الفطور الا أن حتى هالذكرى ما خلتني أصير سنعه وفضلت أن أنعت بالرباديه على أن أنعت بسنعه الألقاب ما تطول العمر ولا عليها راتب والنوم سلطان <<طبعا مش أبو عبدالله زوج أختي هذا شي ثاني ماعلينا وأكبر المخده الى الساعه خمسة رن جوالي
المهم قمت ورديت على المكالمه والمتصلين عارفين أن نفسي خايسة أعتذروا وقالوا ندق وقت ثاني طبعا ما كبرت المخده حلى هي نزلت أنسدح تحت لوقت الفطور
أحس أنها يوميات زول موب يوميات رائده أنا قايلته شكلهم مبدليني في المستشفى أشك أني بنت أهلي ما طلعت مثلهم قلت أقرى قرآن الى ما يأذن الا والسيد يزن 6 سنوات يجي يقول لي خالتي عريب قلت نعم قال أنا ما أحب الأغاني أنا ما أموت في الأغاني <<حسيت اللي على راسه بطحا تتمه جملته محمد أخوس هذا أنا ما عاد أحبه لأنه يحب الأغاني المهم قلت زين جزاك الله خير وفرحت بتوبة ولد أختي وقلت أجل خلاص ما بتصير مغنن قال لاء أنا بصير كلمة سريه هاه باسوورد قال أيه يعني وشلون بتصير كلمه سريه
يعني أمسك اللي يقطعون الإشارة وأركب زينون وأفحط الحبيب طلع قصده دورية سريه
طبعا قبل كم يوم كان يبي يغير أسمه لخالد الشمري ويصير مغنن قلت يعني أيش قـــــال مغنن زي محمد عبـــده وراشد الماجـــــد قلت أستغفر الله بعدين خالد الشمري بتصير مثل بشير شنان والحساوي الواحد يختار أسم فني يسوى أما أنت مختار أسم فني مدري وش يبي أسمك ينفع فني أما هالأسم بس الحمدلله ربي من عليه بالتوبه وبيصير كلمة سريه
المهم خمسه ونص ودو الفطور للمسجد والخياط وراعي البقاله ورجعوا وفرشنا السماط للفطور الأول الا أن الآنسه سارة 4 سنوات ما تبيني أجلس وما جادلت لأني ما لي نفس خذت تمره وطلعت فوق فتحت المنتدى الا اشوف يوميات القيصر طبعا أكتشفت أنا لازم أكتب يوميات قلت أشوى أني دخلت هنا والا نكبتهم
وين وصلن نزلت عشان الفطور الأول وجا عمي عادل بعد الصلاة سلم علينا وجلس شوي وراح لأنه ما جا بعد صلاة الجمعه
دخلت المطبخ وفكرت أصير سنعه وشبكت القلاية أقلي سمبوسه <<الحين المشاغب بيستانس أن البنات يومياتهم قلي ولف سمبوسه أبشرك ما كملت جت أختي وكملتها عني ولا حتى لفيت لأن أختي اللي لافتها
المهم تعشينا وجلست سارونه جمبي على رجل أختي وطول الوقت تقبص فيني وأنا كل ما صرخت ناظروها الا براءة تقوطر من عيونها ويقولون كذابه ما سوت شي وأنا اللي أقبصها وأمعط قرونها والسبب في الحرب من الفطور تبي أمي بجنبها وأنا ما أبي أقوم ما بقى الا بزران يمشوني على كيفهم على ما قالت أمي أنتي البزر لأنتس تطاقين البزران
بعد ما قمت قامت الأخت في الله وطبعا لأنها ما تبي تاكل بس مناحستني لفت على عماد تحارشه قلت ها صدقتوني سألتها عهود أنتي قبصتي عريب قالت أيه قلت شفتوا ضهر الحق طبعا هي ما بعد تعلمت الكذب بس السنه الجاية الله يعينني وأنسدحت تحت معم نشوف طاش <<يوميات زول وأثناء ما أحنا نشوف طاش الا وتجي لقطه أن حسنا ما تعرف تطبخ ولا تعرف شغل البيت عاد أختي تدق علي أتخيل عريب بتسوي كذا لي راحت بيتها ما أدري ليش ما خذه فيني مقلب والله أني سنعه وأعرف أشتغل لكن ما أحد عطاني فرصه
المهم كان باقي سمبوسه قالت أختي نلفها اليوم عشان بكره لكن المشكله وين قالوا لي لفيها الحين بيستانس سلطانوه المهم لفيتها بمعية الشله سارونه ويزن وأصروا يمطرسون معي لأنهم أول مره يشوفوني أزين فأصـــــروا يساعــــــدون
وفيما نحن نسولف أنا وشلتي الا وحبيب ألبي يزن يسأل الحين لين صرت كبر عماد وش بيصير أسمي قلت له فتحي قال والله الا وتجيني نفخة من أمه خلي ولدي في حاله
يا طــــووط إذا كــــبرت بتصــــير يزن جلـــس يصيح قال لاء أبي يصير أسمي عماد<<هو معجب في شخصية أخوي وأثناء طقاقه مع أمه الا ويدخل خيو ميدو وأعلمه عن سالفة إلتزام يزن وأنه صار ما يحبه <<أدور الشر
قال أيش قبل ما ينزل كان مولع السوني في غرفتي ومطول على الأغاني وقلت له يطفيها ونزل زعلان<<ما كنت قايله لكم اللي على راسه بطحا
طبعا وأهزئهم أثنينهم أغاني في رمضان قال أن شريط السيارات فيه أغاني وكان وهو يلعب مطولها المهم أني قلت جب الشريط أكسره فوق روسكم لكن أعتذر ووعد بعدم التكرار
شاكه أنه بيوفي بوعده لكن ما أبي أهز شخصيتي أخاف يقول لاء ويتعود عليها دامه يسمع كلامي فخلني أستغل هالنقطه لصالحي نرجع للسمبوسه طبعا أنا قلت اللي بألفه ما راح أقليه لأني مو فاضية أحترق من الزيت
وأثناء لفي على الحبة الأخيرة الا ويجي عمي صالح وأنا اللي ألفها أي كلام المصيبه كله أي كلام أخبر السمبوسه مثلثات الا سمبوستي صايره شكل مجهول
المهم جلست مع عمي الغالي نتناقش كالعاده وطبعا نقاشنا أمتد الى حوالي الثانية عشره والنصف وراح بيتهم ما بعد قضينا ما نيب قايله لكم سوالفنا تحوم سبودكم لأن أمي وأبوي وخواتي حامت تسبودهم وملو
بعد ما راح عمي عاد جلست شوي ثم طلعت فوق أكتب يومي عشان ارسله للهنوف
وأحب في آخر اليوميات أني أشكر الغاليه هنو على جهودها المتميزه في الشبكة وهذي شهادة حق لأنها ما شاء الله فراشه متألقه هنا وهناك ولمساتها بكل مكان الله يعطيها الأجر والصحه والعافيه وأحب أشكر الإستشاريين والمشرفين على جهودهم هنا في المجلس وشكر خاص للغاليه ماهينور على تألقها الدائم
آخر كلمة أقولها لكم أنا أحبكم<<شعندها سامي الجابر
شكرا لوقتكم اللي ضيعتوه في قراءة يومي البايخ ومشكلتكم الشخصية اللي قريتوا كل هالخرابيط لي هالشكر بالله وش ينفع الشكر بعد وقتكم اللي ضاع
شفتوا لو كم جلستوا تقرون قرآن أو تصلون كان أصرف لكم مليون مره من الجلسه هنا
أحسن ساد فيكم
من جد
ما بقى من رمضان كثر ما مضى أنتصف الشهر وحاولوا تستغلون كل ثانيه في العباده الواحد ما يدري يصومه السنه الجاية أو لاء من جد ترى رمضان فرصة حاولوا تستغلونها في الأكثار من الطاعه والله هالأيام كثر موت الفجأه وزلازل وغيرها ما كنا نسمع فيها في بلدنا على الأقل نستغل رمضان في الرجوع والتوبه ومحاسبة النفس
الله يعيينا ويعينكم على طاعته والله يجمعنا بكم ووالدينا ووالديكم في الفردوس الأعلى مثل ما جمعنا في هالمكان الطيب
بالحب والإشراق
كل الشكر للمتميزة **][ " رائدة الزعيم"♥][ ** وجزاك الله خير
وانتظرونا غداَ مع المتألقRDH .-
أرق التحايا وأطيبها من مشرفي واستشاري المجلس العام
صباح الخير ...
أول شيء ابعلق ع هالشيء .. آخر كلمة أقولها لكم أنا أحبكم >>> قاعدة اقول وش عندها علي الثاني مع سامي .. >>>> كان هالسبب الثاني لردي بعد الإول اللي هو لإنك رائدة الزعيم ..
المهم جلست مع عمي الغالي نتناقش كالعاده . تو عمي صالــــح صوت عمي موسى وعياله >>>>> ماشاء الله كل ذولي عمانك باقي آحد ولا خلاص ...
المهم كانوا مجتمعين عندنا وزوجة أخوي توها طالعة من الأربعين <<يالله باركولي خلكم سنعين >>>>> مبروك اللافي الجديد ..
المهم طبعا أنا ما أحشم أحــد يعني أتســـــدح بأي وقت المهـــم جلست معهـــم
>> والله لو انك عند جدتي كان توريك الحشمه مزبوط ... قال ايش قال منسدحه ..
الله لا يهينهــــم عندهـــــم بيــــوت يطبخون فيهـــا والا أقرب مطعــــم >>>>> ايه والله توي قبل شوي ابوي مهزني يقول مافيك سناعه اختك راحت وماعشتيها ... الله يخلي المطاعم ....
السمبوسه >>> عاد رمضان هذا ابداً مالمستها واليوم امي تقول بالدور ..
آخر كلمة أقولها لكم أنا أحبكم .. ^ ^ ياحبني لك وللي قايلها قبلك ..
ويعطيك ربي الف عافيه ........ ويوميات قميله اوي ..
شكراً لمن خلف الكوايس ...
بعدين مادري عن التنسيق إذا رجعت عدلته ماعاد اعرف الزيتي من الأسود ..
عريب
ما كأنكـ ذبيتي علي بالبدايهـ بس يالله كلني فدا لكـ
وقلت لكـ تراني حاجزهـ أولي العيد اذا الله عطانا عمر ان شاء الله
ماشاء الله يومكـ
كلهـ بيزي على ان اغلبهـ على شي ماله سنع
بس اسمهـ انشغلتي بحاجه
عمّان - خوات - اخوان البيت فيهـ صوت وفيه طالع وداخل
الله يخليهم لكـ يارب
يااا هلآآآ والله وغلآآآآ بـ عريب
ياطووول يومتس ما شااء الله , بس يووم قريته خلص بسررعه
يوووم جميييييل ولو ان أغلبه تسدح مانتي ببعيدة عن يومي امس بس مانب قايلة عنه شي الستر زين على قولتك ~> بس والله اني معذورة كنت تعبانة مانب مثلتس
ما شاء الله تبارك الله بيتكم في حركة وزيارات ووجيه جديدة
الله يديم هالتواصل ما شاء الله
بزارين خواتك
ياحليلتس معطيتهم وجه وتسولفين معهم , كيف متحملتهم ؟ ~> من يتكلم ؟ وحده تترك جلسات الحريم وتلعّب البزارين
يووووم جمييل رائدة مجلسنا
وصفك واسلوبك يجنن حسيت اني معكم
الله يعطيك العافية ويجزااك خير على النصييحة
وصدقتِ بكلامك ومدحك للهنوووف الله يجزاها خير
تستااهل هالمدح ما شاء الله قلتي اللي ودي أقوله من فعاليات الصيف بس عجزت /
\
إقتباس
وشكر خاص للغاليه ماهينور على تألقها الدائم
هاهـ
وش تألقه ؟ ومن متى هالكلآم ؟
العفووو ماسويت شي مدري على ايش تشكرينن
~~> ترى ماقلت لها تذكر اسمي بيومياتها , أصلآ ماحب الظهور للإعلآم
(( يوميات رمضانية " 14" )) المتميزة: ( رائدة الزعيم ) -(تبتداها بـ محارش ( بزران )- وتسدح بكل (مكان) وتختتمها بـ (أنا احبكم) " !!! 
ما تدق على أحد
يعني وشلون بتصير كلمه سريه
علشان اوري اهلي يومياتك 
ادين لك بالكثير لانك خليتني احس اني سنعه عندك 
بس في اختلاف بسيط انك تدخلين المطبخ وانا لا 
الوضع العادي
