(( يوميات رمضانية " 13" )) المبدع: ( القيصر رهيب ) " بـ ( بـراءه الأطفال وشهره سـامي ) ومغامرات لاتنتهي " !!! - نادي الهلال السعودي - شبكة الزعيم

المنتدى الاستشاري · #1 04/09/2009, 05:46 AM

فكرة - سندريلا الهلال
اعداد ومتابعة - الهنوووف
تصميم - عسيريه

لنا من كل عام شهر فضيل ..
أعاده الله علينا وعليكم وجميع المسلمين بالخير واليمن والبركات
وكل عام وانتم بخير

**][يوميات رمضانية 1430 هـ ♥][ **
لقد عدنا اليكم .. تحملنا الاشواق للقياكم .. ونسعد ان نعيش معكم .
. في سلسلة تحمل بين طياتها يوميات الأعضاء الرمضانية من كل عام ،
هذه السلسلة أنتم أهل بيتها ونحن ضيوفا في حضرتكم ،،،
+
+.........+
+
أهلا وسهلا بكم أحبتنا ..
ودعونا نرحب سوية بالمضيف "الثالث عشر"
العضو المتألق " القيصر رهيب ."
لكي يحكي لنا احداث يوما مع شهر رمضان المبارك ..

السلام عليكم ورحمة الله وبرركاته

ما أدري وش يكتبون في البداية و راح أبدا أحكي لكم عن يومي في نفس الوقت
اللي بدوا الاعضاء والعضوات قبلي فيه

وبسم الله نبدأ
الاربعاء الساعه 12 وعليها في الليل و من أرض الشرقية شغلت سيارتي متوجها
للعاصمة الرياض

طبعا وحداني لأنه نهاية الفصل الصيفي وكل واحد يرجع مع بلحاله
توقفت عند المحطه المعهودة
ونسيت إني ما صرفت فلوس والصرافه اللي عند ذيك المحطه دايم خربانه
ادور في المحفظة لقيت 30 ريال قلت إن شاء الله بتكفي
طبعا وانا رايح للصرافة شايل هم لو ما صرفت وما كفت وش بسوي لكن الحمدلله صارت شغاله

رحت البقالة بعد ما قلت للهندي يحط فيري على السيارة ويوم طلعت من الوشسمه
وأشوف 2 اشخاص ينتمون للسودان ويشجعون منتخب السودان واقفين عند سيارتي
قلت أكيد بيقولون نبيك توصلنا

فحطيت ببالي اسألهم وين بيروحون لا قالوا نبي الرياض بقولهم أنا وجهتي الشرقية
وإن قالوا الشرقية بقول أنا رايح الرياض

لكنهم خيبوا أمالي وقالوا ممكن توصلنا 40 كيلو قبل محطة العسكر
قلت لهم أنزلكم عالخط مو تقولي اطلع مخرج وما ادري شلون قال ايه عالخط وركبوا معي
ونزلتهم بعد 50 كيلو ضحك علي السوداني بـ 10 كيلو زياده

<<

وبعدها واصلت طريقي داعسا و موسوسا إلى الرياض مغير اطقطق بهالجوال
وأكل فصفص واشرب ببسي
والله وأتفاجأ باتصال من صديقيKING MILAN يقول لي هدي هدي لا تقعد تساقط عالعالم

أنا انلحست سالته وش يدريك قال دق علي واحد من العيال يسألني
انت خويك راعي السيارة الفلانيه وكاتب ورى سامي 9
قال عبدالرحمن ايه وهو راجع من الشرقية الحين
عاد انا استانست وحمدت ربي لأني صرت بمشهور بأني كاتب على سيارتي سامي

وصلت بحمد من الله ومنه ما قبل الساعه الثالثه فجرا بقليل
وجلست مع الاهل إلى السحور ومن ثم صليت الفجر و ( دلفت )

إلى غرفتي وعلى النت
جاني الاخ سعود أو كما يعرف ب الماركو روسي في الماسنجر
وعزمني على قروب ودخلت معهم سواليف و أعطوني 5 ريال عشان أكتب لهم دعاية باليوميات

وكنت فاتح 3 محادثات و كل وحده انشط من الثانية وهاتك يا مطامر بينهم
وحده منهم مع أحد اصدقائي يدعى عمر وهو على فكرة نظول عينه حاره

وبين المحادثات اطامر تائها إلى الساعه 10 الصباح ومن كثر ما كنت اكتب كثير
جاني ألم شديد في الكوع و صرت ما اقدر امشي عليه

<< تمشي على كوعك ..؟

استشرت النظول عمر فقال لي أنصحك بالفكس
وقمت أدور فكس ببيتنا لكن للأسف نسيت بيتنا صرت ما أدل فيه

فتحت الدولاب وطلعت شال نزلت المطبخ
وشغلت الغلاية وغرقت الشال بالمويه المغليه ولفيتها على كوعي الاشهب

ونمت و براءة الاطفال تعلو محياي << بلاكم ما شفتوا وجهي تعرفون كيف البراءة

صحيت على الساعه 3 وجلست مفهي على سريري إلى يمكن 4 ونص
وبعدين طلعت أودي أختي لحياة مول يبون يرجعون غرض
و للأسف الساعه 5 باقي ساعه و10 دقايق على الاذان والمحلات مسكرة
قلت الله يرضا عليك يا المدينه

أقدع محل يصك عالاذان

رجعت اجرجر اذيال الخيبة

جلست أسولف مع امي وأخواني شوي
ودخلت الماسنجر لقيت واحد من اصحابي نصراوي ازعجني بهدف سعد

قلت له أقول بس أجي الحين اعطيك السوني حقي تضبط لي الاوبشن فايل
والتحديثات قال كيفك تعال بأي وقت
كان باقي عالاذان ربع ساعه بس بيتهم قريب من بيتنا نوعا ما فلطت البلايستيشن
ودعست متوجها إليه طبعا قطعت اشاره وعكست شارع عشان اوصل بسرعه
اعطيه الوشسمه وارجع قبل الاذان عطيته وسولفت معه دقيقتين بالظبط ورجعت

( ولجت )

إلى البيت أفطرت وبعدين رحت مع اخوي نصلي
ورجعنا نكمل الفطور بعد الفطور جلست بين سماجة طاش و الماسنجر

في الماسنجر كان فيه صاحبي نواف وأنا ابغى اشوفه واطلع معه
لكني مواعد واحد ثاني و الصراحة ما كان لي خلق الواحد الثاني لأن بيتهم بالسويدي

أنواع المشاوير لا جيت بروح هناك لازم اقرا دعاء السفر وأقصر الصلوات

فقلت خلني اصرفه ويوم ثاني نشوفه وواعدت الاخ نواف صلينا العشاء
ورجعت
دق علي نواف قال ربع ساعه وانا عندك دخلت أستحما
( أحس إني نبيلة عبيد يوم أقول أستحما

)
أخذت شاور سريع مره وطلعت انتظر نواف لكنه أبطى ما جاء
دقيت عليه قال يا أخي انا لقيت في سيارتي ورقة مقاضي
و بقالي اجيب كبريت واجيك

انتظرت ربع ساعه والله ودق قال لي انزل رحنا المقهى
حصلنا واحد من اخوياه جلسنا معه شوي مشى الرجال و عالساعه 11 دق علي KING MILAN يقول وينك

فأجبته بأني طالع قال اسحب على خويك وتعال معنا قلت يصير خير
جلسنا للساعه 12 وشوي دقوا اهل نواف يبونه يرجعهم فبادرت انا بالاتصال على عبدالرحمن لأسأله أين أنت يا فتى الحلمية

قال في بيت عبدالعزيز قلت أوكي جايكم وأقول لنواف ينزلني عند عبدالعزيز
وعلى فكرة نواف ما يعرف عبدالعزيز << طيب الاعضاء وش دخلهم

كان متواجد يوم دخلت 3 انفار وانا رابعهم وبعد قليل جا واحد ما عرفه
لكن شكله حبيب

ومخططين الشباب من البداية يتسحرون في بيتزاا هت

طلعنا رحنا بيتزا هت اللي في طريق الملك عبدالله و انصحكم لا تروحون ذاك الفرع

والحين تجيكم السالفه

كنا 5 اشخاص دخلنا وجلسنا على طاولة جــــا الفلبيني الحيــــوان
قال قوموا فيه مكان اكبر رحنا للمكان الثاني وطلبنا وجلسنا ننتظر وننتظر
وننتظر وننتظر الييين طفشنا
يوم طفشنا جلسنا ننتظر وننتظر وننتظر وننتظر الييين قلنا بس ويوم قلنا بس جلسنا
نحتري و نحتري ونحتري ونحتري ونحتري ونحتري الييييين
<< مطوله الحاله يا أبو الشباب .. ؟

طاولتين جو بعدنا و نزلت طلباتهم وما عاد إلا يخلصون وحنا ننتظر
زهمنا الفلبيني وقال أووو معليش نسيت

العن ابليسك اكثر من ساعه ننتظر ولا جا إلا ببسي وتقولي معليش نسيت .. ؟

2 من الشباب كانوا مستعجلين ولازم يمشون و راحوا ولا تسحروا
وجلسنا حنا ننتظر كلمنا السوبر فايزر قلنا له يلغي حق الخدمه
قال أوكي ما تبون تدفعون انا بدفعها مسوي اخلاق الله يصلحه
قالوا صاحبنا عزوز لا يضحك عليكم بأخلاقه
قولوا إي والله مانبي ندفع مو منطق ذا تأخذ خدمة وانت خدمتك زي وجهك

المهم جلسنا ننتظر الين نزل الطلب ويوم نزل الطلب ولاه برضو ناقص

ما تكلمنا واكلنا اللي جا وحمدنا ربنا ورحنا نبي نتفاهم مع الحمير
رحنا عند قسم طلبات السفري وحصلنا واحد يتهاوش معهم كان طالب طلب
ويوم جاه طلبه معطينه شي غير اللي طلبه

كلم الفلبيني قاله الفلبيني ما حصلت اللي تبيه فطلبت لك هذا الشي

سفل باللي يدعي إنه السوبر فايزر قال السوبر فايزر معليش انتظرني ثواني بس
قاله الرجال خذ راحتك أول ما راح الكاشير لف الرجال ظهره
ومشى من المحل وتركهم يقابلون بيتزتهم

المهم

وطلبنا السوبر فايزر قال انا السوبر فايزر
وبالاخير طلع نصاب مو هو السوبر فايزر لكننا صدقناه وقلنا له كم حسابنا قال 160

قلنـــا له حلــــو وش مكتــــوب إننـــا طلبـــــنا عنــــدك
قال طالبين كذا وكذا وكذا وكذا قلنا طيب ما جا إلا هذا وهذا
قــــــال طيب وش تبون الحين أنزل لــــــكم البيتزا سفري
قلنا وش نسوي بها نتصور معها أخويانا ونحشتوهم بدون سحور
و الطلب أخذ أكثر من ساعة عشـــان يجــــــي ويــــوم جا
جا ناقص وتقول بكـــــل وساعة وجــه تبـــي 160

قال هذا اللي اقدر اخدمكم فيه

ارتفعت الاصوات وكان فيــه رجــال جنبنا
قال للموظف يا أبن الحلال المفروض عشاهم يصير ببلاش غلطتكم ذي
رد الموظف قال ادفعه من راتبي يعني انا قلنا له بصرك تدفعه تسرقه 160
ما حنا عاطينك
ارتفعت الاصوات وجـــا واحد مصري صـــار هــو السوبـــر فايزر الحقيقــي
وأخلاقه للأسف زفت جدا وطبعا حنا الثلاثه جالسين نشرح له الوضع و هو متقروش

سكت انا وصاروا اثنين يشرحون له وانا ساكت الييين عصب خوينا عبدالعزيز ورفع المصري صوته

انا برضو شفت كل العالم ترفع صوتها إلا أنا ساكت
فنافخت عالمصري قلت صوتك لا ترفعه << والله اني قوي هجدته بكلمتين

قام يطقطق ويحسب قال خلاص عطوني 130 قلنا ولا 130 ما تشمها جب الحاسبة
حنا نحسبها
حسبنا عشانا وللإنتقام نقصنا 2 ببسي

طلع حسابنا 110

شوي يقول المصري و الخدمــه أنا هــنا طرطعــــت بغيـــت أتفل بوجهـــه
أجل يا قليل الادب هذي خدمتك تبي عليها قروش وانت حتى تعاملك زي التراب
قلت له ما نبي ندفع خدمه قال أوكي براحتكم جيبوا 110 نطلنا في وجهه 110
ومشينا وتونا نبي نطلع ونسمع واحــــــد يقول حتى انا عـــندي مشكلـــة

يعني خلال نص ساعه 3 اشخاص مختلفين يشتكون

معقوله الخلل بعقول الزباين ..؟

ركب مع أبو داحم ونزلنا عبدالعزيزوتفرغنا لسالفة يبي يقولي إياه عبدالرحمن
من حوالي شهرين لكن كل ما قابلتهولا معنا أحد
وتوها تحصل الفرصة يقول لي السالفه خلصنا ورجعني بيتنا عالساعه 3 ونص

فتحت المسن والزعيم حصلت رسالة من الهنوووف تقول وين اليوميات
حطيت الحاله بالماسنجر بررررب يوميات و ( شرعت ) بالكتابـــة
و كلن يسأل بالمسن متى تنزل وكأني انا اللي أنزلهـــــا بكيفـــــي

جاني واحد عزيز جدا جدا جدا وبشرني إنه نجح بكل مواده في الصيف

وفرحت له جدا جدا جدا يا لبى قلبه

<< يمكن يالبى قلبها وش يدريكم ..؟

والحمدلله بعد ما انكسر ظهري من كتابة اليوميات انتهيت
و محتار وين أودي وجهي من الهنوووف على هذا التأخير
وشكرا لألكون

كل الشكر
للمتميز **][ "القيصر رهيب "♥][ **
والحمد لله على سلامه الوصول

يالمشهور

وانتظرونا غداَ
مع المتألقة - رائدة الزعيم

.-

أرق التحايا وأطيبها من
مشرفي واستشاري
المجلس العام

الكناري الأزرق · #2 04/09/2009, 05:52 AM

و عليكم السلام و رحمه الله و بركاته

اول شي و قبل كل شي..مو معناتها اذا كنت غايب عن المنتدى تلعبون برعيتي !!
مشاركاتي ناقصها اخبره فوق ال400 الحين صارت و 388 اين مشاركاتي الناقصه

؟؟
يالله بنحسن النيه و نقول انهم اخذوا مشاركه وحده زكاه لكل الف مشاركه

..

إقتباس


	ما أدري وش يكتبون في البداية و راح أبدا أحكي لكم عن يومي في نفس الوقت اللي بدوا الاعضاء والعضوات قبلي فيه

تكفون يا شباب اللي فهم شي يدز لي رساله بالخاص
قاعد يتفلسف و بيسوي لي فيها مقدمه عصماء..من جد تمخمض البعير فولد فأراً :d

إقتباس


	رحت البقالة بعد ما قلت للهندي يحط فيري على السيارة ويوم طلعت من الوشسمه

من يوم ما قريت مقدمتك العصماء و انا غاسل ايدي منك..هالوشسمه تسمى " مغسله " في اللغه العربيه

إقتباس


	لكنهم خيبوا أمالي وقالوا ممكن توصلنا 40 كيلو قبل محطة العسكر قلت لهم أنزلكم عالخط مو تقولي اطلع مخرج وما ادري شلون قال ايه عالخط وركبوا معي

يا عيني عالجرأه..اجل مركب لي 2 زوله الساعه 12 بالليل..خلك عنك و الله يا بعض الاحيان ان الشيونه يصير لها فوائد :
s2:

إقتباس


	استشرت النظول عمر فقال لي أنصحك بالفكس وقمت أدور فكس ببيتنا لكن للأسف نسيت بيتنا صرت ما أدل فيه

ان كانت جدتك الله يحفظها عايشه معكم..فـ رح دوّر بمحيط 30 سم حولها و ان شاء الله تلقاه

..

إقتباس


	اعطيه الوشسمه وارجع قبل الاذان عطيته وسولفت معه دقيقتين بالظبط ورجعت

اجل دقيقتين بالضبط..انت الظاهر حرمتك بتستانس عليك بالمستقبل..انواع التفاصيل

ما شاء الله عليك يوم حافل..او انت حفلت فيه يا ابو دقيقتين

.. لكن في النهايه يبقى يوم جميل و يالله ضف وجهك ورانا صلاه جمعه << خربها عالاخير :razz:

إقتباس


	فكرة - سندريلا الهلال اعداد ومتابعة - الهنوووف تصميم - عسيريه

يعطيكم العافيه

إقتباس


	وانتظرونا غداَ مع المتألقة - رائدة الزعيم .-

بالانتظار

.

نشوفكم على خير يالغالين..و كل عام و انتم بخير..

حتى ظلالي هلالي · #3 04/09/2009, 05:53 AM

أماااااااااا برائهـ اطفال يا علي ..
والله لو انكـ أنا :$

..

هنو ..
عساك ع القوة ♥
<< القلب مسروق

* افلقني لو اني قاريهـ اليوم ض1 .. النوم لاعب بحسبتي ..
بس قلنا علاوي لازم نسجل حضور ..

............................

باكـ

أما عاد كل هذا منتظرين ببيتزا هت

ما اقول الا ماشاء الله عليكم على سعت البال الي عندكم

علي وش ذا مركب احد معكـ

ماسمعت بالبسم الله الي يوقفون بالطريق بالليل

<< تذكرت السالفهـ وارتاعت

هذولا غير الي منحاشين والا محششين والا والا والا

الله يحفظكـ ويحميكـ منهم ..

بس تصدق يومكـ فلهـ

بس السياره وسامي شي

باللهي ماقد وقفوكـ احد النصراويهـ يستعبط والا شي

تعرف فيهم ضعف عقل شوي

هنو

وش اقول بس

عساكـ ع القوة

والا اقول لكـ نصيحهـ

ومن قلب بعد

لاعمركـ تجربين تنامين بدري
وتصحين الظهر

(توووووووووووووووبهـ

)
وتووووووووووبهـ و بعد تووووووووووووووبهـ

<< حالها يرثى لهـ

ع ـشقهــا هـلالـي · #4 04/09/2009, 05:55 AM

لـي عـوده بآذن آلله للتعليق ..~

بآك ..
يوميـآت منتـآزه جدن جدن

آلله يهدآك آبي بيتـزآآآآآآآآآآ

آيه نسيت اقول حمدلله ع السلامـه .. ومبروك نجآح صقيقك ..

يثلمـووو ع هيك يوميآت بحب الاكشن آوي آوي ..

سلآموون عليكون

K I N G . M I L A N · #5 04/09/2009, 05:56 AM

~

~

يوم جميل مليء بالمطاقق والأكشن والفله

مو يوميات بعض الناس

أنا طبخت لقيمات

وسويت الفطور

وقعدت اسوي السمبوسه

بصراحه شي جميل الي صار لنا في بيتزا هت امس

بس من جد من جد ما عمري شفت ناس بجيحه مثل حقين بيتزا هت !!

خدمه سييييئه لأبعد حدووود !! يلعن شكلك مصراننا قامت تزاعق من الجوع وما بقى شي على الأذان

وأنت تقولي نسيت يابو فلبن

!

ومن زود البجاحه المصري يقول هاتوا حق الخدمه ههههههههههههههههههههههه

المشكله أنا أنّكبت

أنا الوحيد الي طلب اننا نتسحر من بيتزا هت

الباقين كلهم يقولون ماك ماك ماك وانا طفشت منه بصراحه قلت خلنا نغير شوي لبيتزا هت والعيال لازم يلبون طلبي تعرفون شو كتير أنا مهضوم

, وعاد ما رحنا الا لأخيس فرع طريق الملك عبدالله الي جمب بيتنا بعد

ع العموم يومك جميل يا علي وفله وأخيراً فضفضت لك بالسالفه

ومبروك نجاح خويك الي يعز عليك

وبعد أذنك يا حلو عشان الهنوووف بس طلبت الصوره

الهنوف هذي صورة سياره علي

تم التقاطها بجوالي قبل شهرين تقريباً

وهـ بس يا سامــي

يعطيكون العافيه يا حقين الموضوع كل ابوكم

// حبــي وتقديــري //

мя.ħάίţħάм · #6 04/09/2009, 05:59 AM

القيصر ..

يوميات رائعه

وتعال انت من جدك يو تودي هالسودانين ..
ما شاء الله عليك يا قوي قلبك

بس وانا اخوك قبل لا تفعل شي اضرب حساباتك ..

بالتوفيق ..

ريكيلمي · #7 04/09/2009, 06:00 AM

أول شي الحمد لله على السلامة .. و مبروك نجاح من يعز عليك و عقبالك

يا شيخ لو اشوف خويي في المحطة يقول وصلني 40 كيلو قدام قلت توكل على الله

بصراحة جريء يوم سويتها

و الله الشرهة عليكم يوم تحاسبونهم على خدمتهم الخايسة .. المفروض صبرتوا لين نزل الطلب كله ثم طلعتوا لا تاكلون و لا تحاسبون

إلا يا علي للحين فيه ناس يلزقون على سياراتهم سامي و ياسر ؟

يوميات رائعة منك يا مبدع

الهنوووف · #8 04/09/2009, 06:00 AM

وعليكم السلام ورحمه الله وبركاته

اهلين بـ علاوي البريء والمشهور بعد

الحين من جدك تركب اي ناس

لو كانوا ارهابين __> متاثره

لاجد لو كانوا نصابين

انتبه بس ولاتسوي بطل

حمستني لـ لوحه سامي

ينفع تصورها

اخاف نشوفك بالطريق

ماتلاحظ انك مسكت خط بالانتظار

حالتكم حاله وبيتزا هت

\

/
يعطيك العافية اخوي القيصر رهيب
يوميك حلوو واسلوبك حلاهـ

___> لاتصدق

والحمد لله ع سلامتك بـ رياض الخير

إقتباس

الرسالة الأصلية كتبت بواسطة الكناري الأزرق


	لي باك ان شاء الله يعطيكم العافيه

الكناري هنا يالله ان تحيه

مابرحب فيكم كرهتكم خلاص يالقديمين

القيصر رهيب جبت الكناري هنا وبـ رمضان بديرتنا جبت خفايا
بنستضيفك دائما اجل

كانك بتجيب هالمماليح

االهنوووف

كانت

هنا

ورحلت

القيصر رهيب · #9 04/09/2009, 06:08 AM

إقتباس

الرسالة الأصلية كتبت بواسطة الهنوووف


	وعليكم السلام ورحمه الله وبركاته اهلين بـ علاوي البريء والمشهور بعد الحين من جدك تركب اي ناس لو كانوا ارهابين __> متاثره لاجد لو كانوا نصابين انتبه بس ولاتسوي بطل حمستني لـ لوحه سامي ينفع تصورها اخاف نشوفك بالطريق ماتلاحظ انك مسكت خط بالانتظار حالتكم حاله وبيتزا هت \ / يعطيك العافية اخوي القيصر رهيب يوميك حلوو واسلوبك حلاهـ ___> لاتصدق والحمد لله ع سلامتك بـ رياض الخير الكناري هنا يالله ان تحيه مابرحب فيكم كرهتكم خلاص يالقديمين القيصر رهيب جبت الكناري هنا وبـ رمضان بديرتنا جبت خفايا بنستضيفك دائما اجل كانك بتجيب هالمماليح االهنوووف كانت هنا ورحلت

لا من ناحية اللي ركبتهم حسبتها صح

نقطة تفتيش الدمام وانا رايح للرياض ما يوقفون عندها عسكر

ويبوني انزلهم ورا النقطة بشوي يعني ما راح يمسكوني بتهمة نقل عمالة سائبة

بالنسبة للكناري

و خفايا

اصدقاء من ايام يوزر رهيب الحزين

ويحبوني لازم يردون لعيوني

<< لا يكثر

و برضو عشان تعرفين اني قوي

>>الامبراطور<< · #10 04/09/2009, 06:17 AM

اهـلآ وسـهـلآ ,,
علـي ,,

يومك بكم تبيعه ؟ < سخيف صح

الا احد يتسحر بيتزا ؟؟ مالك الا ام خمس يا صنايدي

حبه ونص مظغووط من الكاتم

<< يعلمك انه متسحر منه

المهم يومنا جميل تخلله بعض الفقشات والكذبات الجميله

تقبل تحياتي

الله يوفقن · #11 04/09/2009, 06:18 AM

المفروض تسوي رسالة شكر لبيتزا هت سوو اكشن ليومياتك

موفق عزيزي

صراحة اليوميات هذي شي جميل تشوف الناس كيف عايشه واشياء كثيرة

مثلا امس اكتشفت ان حائل جاها مطر واشياء كثيرة

شكرا لفريق الاعداد

Blue Sun · #12 04/09/2009, 06:41 AM

هلا والله وغلا القيصر علي ..

الحمد لله على السلامة على ونورت الرياض ..

ما خليت شئ بيومك الا سويته ..

انت الوحيد الى الان اللي احس انك حللت اليوم من جد ..

تصدق احسب اني الوحيد اللي يشتكي من بيتزا هت اللي هناك ..اثاري العالم كلهم نفس الدعوة ..

ودي اتفلسف واجد لكن جالس اتابع فلم قوي على MBC MAX ..

رغم اني شايفه قبل وللبزارين بس فله من جد ..

يعطيك ربي الف عافية على اليوميات الرائعة ,,

وبانتظار يوميات رائدة الزعيم ,,

كل الشكر للقائمين على الموضوع فكرة واعدادا وتنسيقا وتصميما ,,

هلاليه سنعه · #13 04/09/2009, 06:51 AM

وعليكم السلام ورحمة الله وبركاته

اهلا اخوي القيصر

ماشاء الله يومك حافل بالاحداث والهوشات والفزعات..
بعض المطاعم يحسرون بالواحد ويخلونه بس يستنشق هالروائح الزكيه ..
وهم ماجابوه وعصافير بطنه داخت

.. الظاهر خطه عشان ياكل كثير

..
واما على النقص ياكثرها بالتوصيل على الاقل عندهم تقدر تجيبه
واحلى شئ انكم تشاوفون انتم وربعكم كل يوم ومتى ماتبون ..

يعطيك العافيه اخوي القيصر على اليوميات الجميله
وماننسى سندريلا

والهنوف

وعسيريه

الشكر موصول لهم ..

دمت بخير ..‘‘

ابو طـــــلال · #14 04/09/2009, 07:00 AM

ممتع هذا الفتى .. بحق وحقيقي ....

انا مدري شلون مااكتشفته من زمان ومراهنت عليه بالمنتدى ..

تحياتي للمبدع المسرع ......... المقلع هع

A S D · #15 04/09/2009, 07:09 AM

أبو ساره لبى قلبك

وش هاليوميات المليئه بالاكشن ؟!!
لو ندري ان يومياتك كذا من قبل كان خليناهم كل يوم يحطون لك يوميات خاصه

يأخي ما ذكرت اسمي انا مكلمك قبل اشوي اسئل عن اليوميات

ياخي انت اي واحد ينذكر في موضوعك يطلع مشهور < لا تصدق بس

إقتباس


	يوم طفشنا جلسنا ننتظر وننتظر وننتظر وننتظر الييين قلنا بس ويوم قلنا بس جلسنا نحتري و نحتري ونحتري ونحتري ونحتري ونحتري الييييين

ههههههههههههههههههههههههههههههه ذكرتني بحلقة طاش اليوم السامجه احسن ما فيها يوم يقول القصبي فكر فكر فكر فكر فكر دخول اسلام

ع ل ي 009
يوميات جميله

شكراً الهنوف

فيصل