(( يوميات رمضانية " 12" )) المتألقة: ( وجــدان ) " ويوميات كلها ( قـهـــر × قهـــــر ) " !!! ‏ - نادي الهلال السعودي - شبكة الزعيم

المنتدى الاستشاري · #1 03/09/2009, 04:05 AM

فكرة - سندريلا الهلال
اعداد ومتابعة - الهنوووف
تصميم - عسيريه

لنا من كل عام شهر فضيل ..
أعاده الله علينا وعليكم وجميع المسلمين بالخير واليمن والبركات
وكل عام وانتم بخير

**][يوميات رمضانية 1430 هـ ♥][ **
لقد عدنا اليكم .. تحملنا الاشواق للقياكم .. ونسعد ان نعيش معكم .
. في سلسلة تحمل بين طياتها يوميات الأعضاء الرمضانية من كل عام ،
هذه السلسلة أنتم أهل بيتها ونحن ضيوفا في حضرتكم ،،،
+
+.........+
+
أهلا وسهلا بكم أحبتنا ..
ودعونا نرحب سوية بالمضيف "الثاني عشر"
العضوة المتألقة " وجـدان ."
لكي تحكي لنا احداث يومها مع شهر رمضان المبارك ..

السلام عليكم ورحمة الله

كل عام وانتم بخير والله يجعلنا من عتقاء هالشهر الفضيل

انا مدري من لاعبن عليكم وقايلكم ان يومي ينفع ينقال ؟!
انا مدري ويني يومني اوافق مدري ليه ماعطيت سميي شبوط فرصه

بس دام ان هنو اللي طالبه ماقدرت اقول لأ

المهم طبعاً من يوم دريت عن هالاستضافه وانا ادعو ان يومي يصير فيه أكشن ولا شيء ينقال
صراحة َمدري هو استجاب الله دعائي والا ابكذب عليكم واقول لكم أحداث يوم ثاني واحطه على انه اليوم

ببدأ من بعد السحور .. صليت وجلست أقرأ قرآن شوي واكتشفت شيء !

اول مره أرتّل دايم اقراه صح انها قراءه خاشعه بس بدون ترتيل

جرّبت وقعدت ارتّل واكتشفت ان الترتيل حلو اول مره أحس اني اخشع خشوع تام

جربوا ياللي تستحون ترتلون والله العظيم راحه

خلصت قراءه ورحت لغرفة اختي اشوف اذا هي قايمه نبي نطق حنك

فتحت الباب لقيتها جالسه وحواليها اغرااض ياكثرها !!!
مجمّعه من الصيدليه اشياء وقاعده تحوس فيهن !
أثاريها تسوي خلطه

لحد يقول خلطه للركب

لاني بقولكم ياقديمين هذي هيّن مداومه عليها

جلست ازيّن معها الخلطه لين ضبطت

عزمتني احط معها بس عييت , بأشوف اذا ضبطت عليها جرّبت

طلعت من عندها الساعه 7 وسيدا لسريري ونمت

قمت الظهر صليت ورجعت نمت ..
العاده انا احط منبهي على الساعه 3 خلاص اقوم واروح اساعد امي بالفطور

ودايم اذا ماقومني المنبه تقومني امي , بس هالمره من كثر النعاس ماحسيت بالمنبه ولا قومني أحد !
قمت الساعه 4 الا ربع انصدمت يوم شفت الساعه

يعني امي قاعده تحوس لحالها بالمطبخ وانا نايمه !

نزلت تحت مالقيت أحد !
رحت المطبخ لقيت كل شيء على حاله !
كأن محد دخل المطبخ ولا سوا شيء

رحت اركض احسب ان امي فيها شيء ومودينها المستشفى والا احد صار له شيء --> من النوع القلق

اخذت جوالي ودقيت عليها بس ماردت ودقيت على اختي بعد ماردت

قمة التوتر .. دقيت على اخوي اول مارد بغيت اصيح من الفرحه

سألته عن امي والبنات قال انه موديهم السوق

قلت طيب والفطور محد سواه .. ترى مايمديني اسوي كل شيء لحالي

قال اننا اصلاً معزومين عند عمي

عاد انا بسم الله علي تذكرت اننا معزومين

وبغيت أكفخ نفسي من كثر ماانقهرت منها

يعني ابشرك ياسلطان حتى سمبوسه مالفيت

رجعوا من السوق ولبسنا وتكشخنا ورحنا هنااااااااااااااااك

يابعد الرياض عن بعضها مو مثل حايل يالبيييييه كل شيء قريب

مستحيل احد يتعذّر بالبعد تلتفت كل شيء حواليك
تخلّص اشغالك بـ نص ساعه ويخلصها غيرك بالرياض بـ خمس ساعات --> لازم المحارش

بس انقهرت لأن وقت مامشينا كان توّه بادي برنامج الشيخ محمد العوضي

برنامج علمنا عنّه مواصل شفت منه حلقه واعجبتني وقررت اشوفه كل رمضان

بسم الله ماامداني اقرر الا وتصير اشياء تخرّب قراري

وصلنا وافطرنا هناك وقعدنا نسولف

نسولف

للساعه 10
ابوي يقول شكلنا بننام عندكم عجزانين نرجع

المهم رجعنا لبيتنا وصلنا البيت الساعه 11 وماشفت باب الحاره كله من زحمتكم

دخلت المسن اسولف شوي مع البنات ويقهروني يوروني صور المطر اللي على حايل

عاد هم من وساعة الوجه داخلين بيتنا ومصورين فيه

يقولون يبين المطر ببيتكم اكثر من بيتنا

ولأني مااحب أنقهر لحالي ابقهركم معي

صورة للغيم

وهالصوره وقت نزول المطر

ولأني للحين منقهره اننا ماصمنا هالرمضان بحايل

جلست لين الساعه 12 ماسويت شيء بس اقهر نفسي وانقهر

وجلست اكتب لكم هاليوميات اللي كلها قهر × قهر

اتمنى انها تكون يوميات خفيفه عليكم

, وترى ماراجعتها لأني اكتبها بسرعه وبرسلها قبل السحور
والشكر كل الشكر للغاليه هنو على الاستضافه تسلمين يابعدهم

والشكر ايضاً لكل من اختارني وشكر شاطح لماهينور ض1
ايامكم سعاده يارب

كل الشكر
للمتميزة **][ "وجــــــدان "♥][ **
والرياض في قلوبنا

وانتظرونا غداَ
معالمتألق - القيصر رهيب

.-

أرق التحايا وأطيبها من
مشرفي واستشاري
المجلس العام