:: السوقدانـة في بيتنـا ؟ ::


الطبـق الأول

هو من أشهر وألذ الحلويات الحجازيه الباردة الخاصة برمضان

أصل الطبق ما أعرف بصراحة بس ممكن يكون مو حجازي الأصل

لأن معروف الحجاز يضم مختلف الأجناس

وكثير من الأطباق ليست حجازية الأصل بس

اتعرفت في بقية مناطق المملكة عن طريق الحجاز

سبب اسمها علمي علمكم

بس هيا خفيفة في عملها وعلى المعدة كمان وطعمة ومكونتها كلها مفيدة

المهم مالكم بالكلام الطويل

الطبق أو الحلا يتكون من :

* حليب ( 3 ملاعق لكل كأس ماء ) أنا حطيت 4 كاسات حليب
* سكر حسب الرغبة ،، بالنسبه لي لكل كأس ملعقة سكر
* هيل مطحون ( بالإمكان الإستغناء عنه )
* وأهم المكونات واللي هو اسم الحلا ( السوقدانة ) ملا كباية الشاي مو بياله كبايه << زي اللي يشربو فيها المصاريه

الطريقة :

ننقع السوقدانة في مويه ونخليها لين تشرب المويه الصورة ( 1,2 )

نحط الحليب على النار ونحركه الين يسخن ( الحليب يكون محلى خلاص ) الصورة ( 3 )

بعد ذلك نضع السوقدانة على الحليب وتكون النار متوسطة عشان ما تتلذع وتنحرق الصورة ( 4 )

طبعا نحركها كل شويه ونرش عليها شويه هيل مطحون الصورة ( 5 )



ونفضل نحركها الين تثخن وتسير ممزوجة مع الحليب

( السوقدانة لما تتحط عالحليب يسير لونها شفاف )

وبعد كدا نصبها في الزبادي ونخليها لين تبرد بعدين ندخلها الثلاجة

وبعدين وقت مابدكم تاكلوها خرجوها من التلاجة وامسكو الملعقة وسمو بالله

وبالعافية عليكم



النقط اللي شايفينها هيا السوقدانة

بصراحة كل اللي سألتهم عن طريقتها ما أعطوني مقادير محددة يقولولي بالنظر

وأنا استخدمت نظري كمان

وكان بابا أول من بدأ ياكل والحمدلله قلي قود طعمة وكلهم عجبتهم

:: رحلة الشام الى أرض الحجاز ؟ ::


الطبـق الثانـي

برضو من الحلويات ومشهور بقوووووووة

أكتر من اللي قبل

وأصلها والله أعلم من الشام

بس تعتبر من الحلويات المهمة والأساسية في الحجاز برمضان

نقدر نعملها بأشكال وأنواع عدييييييدة

في ناس بيعملوها بالقشطة وفي ناس باللوز وفي ناس بالجبنة وفي ناس بالموز

بابا ييقول من زمان كان يعملوها على الفحم وكانو يستخدمو القشطة البلدي

وأنا اخترت إني أعملها بالموز

أكيد عرفتو شو هيا

طبقي الثاني كنافة الموز << حطيت وردة عشان أحب القشطة أكتر

تتكون من :

* كنافة
* موز
* سمن (فارم)
* هيل (مو ضروري)
* شيرا ( قطر )

ما حددت كميات لأنها رح تختلف حسب حجم الصينية وحسب ذوق الشخص نفسو

طريقة العمل :

ناخد الكميه اللي نحتاجها من الكنافة ونطحنها بالمكينة صورة 1 ,, وإذا مو كسلانيين زيي

فتفتوها بإيدكم ( إذا بتعملوها بيدكم رشو عليها السمن بعد مايتذوب الصورة 2 وبعدين تفتتوها )

أما بالمكينة بعد ما تنطحن نحطها في تبسي ونرش السمن عليها ونفركها بالسمن كويس الصورة 3

بعد كدا نحط طبقة كنافة في الصينية بس ما تكون سميكة الصورة 4

ثم نضح طبقة من الموز المقطع
شرائح أقرب للنحيفة ونرش عليها الهيل المطحون

بعد كدا نحط طبقة تانية من الكنافة وبرضو ماتكون سميكة الصورة 5



وندخلها الفرن من تحت ثم من فوق الين تتحمر نخرجها ونسقيها بالشيرا

بس ما نكثر عشان الموز حالي

وبعدين اقلبوها في طبق وقطعوها وكلوها وهيا حارة وتقررررمش يم يم



فلسفة من عندي :

الكنافة لما تكون بالموز نفركها بسمن بدل الزبدة عشان تطلع مقرمشة

وبرضو كمان نخلي طبقة الكنافة نحيفة لنفس السبب

عكس كنافة القشطة

الطبـق الثالـث والأخيـر

واللي عليه الكلام

هو مشهور في الحجاز بس أصلو معروف من اسمو

يعني مايحتاج تعرفو تاريخو

الطبق هو الرز البخاري

مكونات الطبق:

اللحم ( ممكن دجاج كمان ) ،، رز ,,

طماطم ,, بصل ,, ثوم ,, فلفل حار ,,

قشر برتقال ,, معجون طماطم ,,

زيت

البهارات ( قرفة , قرنفل , هيل , ورق الغار , خولنجان , شيبه , فلفل أسود )

كل دي طبعا بهارات خشنة مو مطحونة.

ملح , بهارات مطحونه .

النكهة المميزة للبخاري من ( قشر البرتقال والخولنجان والشيبه )



للتزيين:

لوز ,, زبيب ,, صنوبر ,,


طريقة التحضير:

1/ يغسل الرز ويبقى منقوع في المويه لين وقت الطبخ.

2/ بعد تنظيف اللحم وغسله تقطع كل قطعة من اللحم نصفين.

3/ نجيب القدر اللي بنطبخ فيه ونحط زيت مو كثير ولا قليل وسط يعني ونحطو على النار

ونحط عليه اللحمة ونقلبها وتفضل في الزيت الين تتلذع شويه

4/ بعد ما تتلذع اللحمة نحط عليها الطماطم والبصل والثوم والفلفل الحار

( بالنسبه للطماطم والبصل ممكن نطحنها بدل التقطيع ,, والثوم مطحون طبعا ) المهم نقلبها كل شويه الين الطماطم يبدأ يذوب ونحط قشر البرتقال والبهارات المطحونة

ولما يذوب الطماطم كويس نحط معجون الطماطم .

5/ نقوم بوضع جميع البهارات الخشنة في علبة البهارات ونرميها في القدر

ونحط مويه ونحط كمان ورق الغار ونغطي القدر ونسيب اللحمة تطبخ الين تقرب تستوي .

6/ بعد كذا نضيف الملح ( أنا أأخر وضع الملح عشان تنضج اللحمة بسرعة ) بعد كدا نشيل ورقة الغار وعلبة البهارات وقشر البرتقال من القدر ,, ونرمي الرز على اللحمة

( نشيل قشر البرتقال عشان لا يعمل مرارة في الطعم ) وخلاص نغطي القدر ونخليه الين تنشف المويه ويستوي الرز .



طريقة التزيين :

1/ نحط اللوز في ماء مغلي شويه حتى يسهل تقشيره ,, بعد تقشير اللوز نقطع كل لوزة لنصفين .

2/ نجيب صاج ( تاوه ) ونضع قليل من الزيت ونقوم بتحميص اللوز ولما يبدأ يشقر نضع عليه الزبيب ونحركو قليل بعدين نطفي النار .

3/ نطبخ شويه رز أبيض لحالو وبعد مايستوي نلون نص الرز بالكركم



طريقة التقديم :

نقوم بغرف الرز في الطبق المخصص ثم نضع فوقه القليل من الرز الأبيض

الملون بالكركم ثم نضع فوقه اللحم وبعد ذلك نرش الزبيب واللوز على الوجه



وصحتين وهنا عليكم

بالعافيه

وأهم شي تقولون تسلم يدي لأن أول مرة في حياتي الطبخية أطبخ لحم