|
لأول مره أقرأ القصه لكنها اجبرتني على متابعتها.. ألف شكررررررررررر لأختي شهد إلي رفعت الموضوع علشان نشوف القصه ومن جد تستحق التثبيت وإحنا بإنتظار باقي الأجزاء يا اخوي ولا تتأخر علينا فيها وتقطع.. ولك كل الشكر.. |
انا مثلك اول مره اقرا القصه وانا الحين انتظر الجزء الباقي لا تتاخر علينا بصراحه موضوع يستحق التثبيت |
وين باقي القصه :( |
عسى ماشر هل للجروح بقيه ولا هذا اخر جزء |
أســــــــف لكل من الماسة الزرقاء الفتى .. الزعيم وهذا الجزء الثالث والعشرين 000 وهنا سأل الضابط خالد عن وجوده في المقبر وبيده خلجه ..... ورد خالد ..... خالد : شوف حضرت الضابط انا بتكلم بكل صراحه واتمنى انك اتصدقني الضابط : تفضل خلنا نسمع خالد : انا متزوج الحين ولي تقريبا شهر وانا حتى الحين ما اقدر اتقرب من زوجتى ... وكل ماحاولت اتقرب احس انها غير واكرها ... وتمنا على هذا الحال مثل ماتشوف الضابط : يا اخي يمكن لانك ماتحبها ومتزوجها بس كذيه خالد : لا والله انا تعذبت في حياتي حتى تزوجتها ... وبعت اللي عندي علشان اوصل لها الضابط : ووجودك في المقبره اش تفسيره خالد : انا رحت للحرمه عجوز وشرحت لها حالتي فقالت بان معمول لي سحر ومخشوش في المقبره الضابط : وانت كيف اتصدق هالكلام .. وانت شاب مثقف خالد : ارجوك يا حضرت الضابط انا من السعوديه وجيت الكويت علشان اتزوج ... وفي ليلة الزواج ابتليت بهذا الشي الضابط : طيب وكيف اعرفت انه مخشوش في المقبره خالد : هي اتعرف عن السحر وقالت لي وامسك الضابط بالخلجه ليفتحها ... ولكن خالد قال له ... لا تفتحها لانها مسحوره الضابط : خلني اشوف وبعدين انعرف الحقيقه وفتح الضابط الخلجه الصفره ,,,, ولقى فيها اسم خالد مسجل واسامي غير وهنا اساله الضابط عن اسم زوجته وامه فقال له خالد اساميهم .... وهنا صدق الضابط حكاية خالد ووجد اسم نوره واسم امها وام خالد الضابط : شوف كلامك صحيح بس نبغي انعرف وين هالعجوز اللي قالت لك عن السحر خالد : ليش هي مالها ذنب ... هي ساعدتني وبس الضابط : شوف هذا اجراء روتيني ولازم انشوف العجوز خالد : ارجوك ياحضرت الضابط هي مالها خص في الموضوع غير انها ساعدتني في حل مشكلتي ... وهي تقرب لي من بعيد الضابط : خلاص ياخالد انا مهب قايل لها شي بس ودي اشوفها وذهب خالد مع الضابط الى بيت العجوز ليتعرفون على الموضوع اكثر .. ودخل خالد يستأذن لهم من العجوز ,,,, وقال خالد للعجوز انها ماتخاف لانه قال لهم بانها تقرب له ودخل الضابط مع خالد بيت المشعوذه ,,,,, الضابط : ياحجيه كيف عرفتي ان السحر مخشوش في المقبره المشعوذه : ياولدي انا ادرس علوم التنجيم من زمان واعرف هالاشياء الضابط : انزين انت تعلمين الغيب المشعوذه : الله عالم الغيب ... وانا الا متعلمه علم التنجيم بس الضابط : اذا انا جيتك في شي ممكن اتساعديني المشعوذه : انا حاضره بلي اقدر عليه وهنا فرح الضابط من كلام المشعوذ ... ولفت نظره عن سؤالها في اي شي وسلم عليها وراحوا مركز الشرطه مره ثانيه .... وهناك وقعوا على الاوراق وانتهت قضية خالد المسكين اللي كان بيروح فيها وخاصه المشعوذه ورجع خالد ومعاه السحر الى بيت المشعوذه وشكرت خالد على مابدر منه من اخفاء الحقيقه عن الشرطه وقالت ....... المشعوذه : اسمع ياخالد دام انك انقذتني من سجن وعذاب فانا باقول لك كل الحقيقه اللي اخفيتها عنك ...... فرح خالد من كلامها ......... وقالت المشعوذه : توعدني بوعد الله وتحلف جدامي انك ماتقول للي سوا فيك هالشي اي شي وانك تتركه لحاله خالد : احلف واوعدك بالله انى اتركه ... ورب العالمين هو اللي بياخذ بحقي المشعوذه : جاتني وحده تقول انك خنتها وعلشان كذيه سويت لك السحر انك ماتتوفقك مع زوجتك خالد : من .... لايكون امل المشعوذه : وحده ماعطتني اسمها ... وهي اوصافها كذيه وكذيه ... وهي اللي عطتكم العصير علشان تشربونه فكر خالد من هالحرمه اللي اتفكر باني انا خنتها واوصافها مهب اوصاف امل ولكن شكه راح لدانه ... وتخيل نظراتها ... وكلام الام بانها كانت تحبه بس ليش ... وهو يقول انا ماخنتها ولا عمري حبيتها واعتبرتها مثل اختي وهنا بغى خالد يدفع الباقي علشان عطته اوصاف اللي سوت له السحر ....... ولكنها ماخذت الفلوس علشان خالد ستر عليها ... وقالت حق خالد روح واحذف السحر في البحر ..... طلع خالد وهو يفكر في دانه ... ليش سوت فيه كذيه وهو يعتبرها مثل اخته .... وتسلف بعد علشان يعطيها فلوس ..... ووصل خالد البيت ... واستقبلته نوره بابتسامتها الجميله ... ودانه اتراقب الموقف ولكنها ماتدري بان خالد كشف المستور .... وقبل لايدخل خالد المجلس ..... شاف دانه ونظر لها بنظرة غضب .... وحست من نظراته لانه اول مره ينظر هالنظره خالد : ابغيك يانوره اتجيبين صور العرس ودي اشوفهم نوره : وليش يعني ... في شي خالد : لا بس اشتقت اشوف الصور ... وشوفك بثوب الفرح نوره : ان شاء الله يا خالد وقام خالد يشوف الصور وهو يدور على صورة العصير اللي اشربه وتذكر كيف ان الدنيا لفت فيه ... ومن الصور شاف دانه هي اللي قدمت لهم العصير ومن صور ثانيه اتبين دانه ... اتشوف خالد كانها نظرة غضب ........ تعجب خالد من عمل دانه لاختها وهو ماهمه نفسه ... بس كيف اتسوي هالشي لاختها نوره المسكينه اللي مالها ذنب ...... واهنيه قرر خالد انهم يسافرون عقب كم يوم للسعوديه بعد ما انتهت مشكلته ... ونام مع نوره كانهم في بداية ليلتهم وعمره ما نام مثل هالنومه ......... ولكن دانه راحت للمشعوذه دانه : السحر انتهى واشوف خالد رجع لزوجته المشعوذه : وانت كيف عرفتي ... انت معاهم في البيت يعني وهنا بلعت لسانها وريجها دانه وما اقدرت اتكذب دانه : انا اخت نوره المشعوذه : انت ماتخافين من الله اتكذبين علي وتقولين انه خانك وراح لغيرك والله لو ادري انه لاختك كان ماسويت وهنا تغير وجه دانه ... وكانها عرفت الغلطه اللي اغلطتها بان الحب عمره ماجه بالسحر او بغيره وان الحب بالقلب ... احساس ومشاعر ..... واطلعت دانه من عندالمشعوذه بسرعه وهي تبكي على الغلطه اللي سوتها في حقهم ولكن قلبها يتقطع .... ودها بخالد يكون زوج لها .... وهنا راحت واتصلت بخالد وهو برع البيت ... ومحد معاه ... وقالت له ............ دانه : انا اسفه ياخالد على اللي سويته وارجوك اتسامحني على غلطتي بس انا ودي انك اتعرف باني سويت هالشي من حبي لك تعجب خالد من كلام دانه ............. خالد : كيف تقولين حب وانت بغيتي اتضيعيني واتضعين اختك يعني مهب حرام ... ما خفتي من الله ان يبلاك بعدين دانه : ارجوك يا خالد سامح قلبي اللي اعشقك ومهم تكرهني بعد قلبي متولع فيك وانا احبك واحب الارض اللي تمشي عليها بس ارجوك لاتزعل مني تاثر خالد من لكلام نوره وذلك لطيبة قلبه الذي يحب ولا يعرف الكره فقال خالد : ادعي ان الله يغفرلك مهب انا .... وانا مهب زعلان منك بس اللي انا اعرفه بان اللي يحب لازم يضحي للغير مهب يعذب الغير دانه : تبكي وتترجا خالد انه يسامحها .... وطبع كلام دانه على قلب خالد واخذت مشاعره تنجذب الى دانه وهو لايعلم ... بان قلبه انجرف مع مشاعر دانه *********** وللجروح بقيه 0 |
وهذا الجزء الرابع والعشرين 000 وانجرفت مشاعر خالد نحو دانه بدون شعور ... وكان بدانه اشعلت لها شمعه في قلب خالد بكلامها ... والمعروف عن خالد ببساطة عواطفه ومشاعره التي سرعان ماتنجذب نحو الاخر .... وهنا فكر خالد .. بدل انه مايعذب دانه ..... ويمكن تتعب نفس قبل ... انه يبادلها نفس الشعور ... حتى لاتتعذب من خالد .... ففكر بان مشاركته لها بالمشاعر والاحاسيس بتنحل المشكله عند دانه وبيكون له مكان عندها ولا تفكر بان تعمله سحر مره ثانيه .... وهاذي هي الطامه الكبرى اللي طاح فيها خالد بعواطفه ومشاعره ... وبعد ايام اتصل خالد في بيت ام نوره علشان يسلم على ام نوره ويتحرى الاخبار عن دانه وامل ولكن دانه هي من استقبل المكالمه من خالد ...... خالد : السلام عليكم دانه : هلا خالد خالد : دانه شخبارك الحين ان شاء الله بخير دانه : من عقب فراقك ياخالد انا ماشفت الخير خالد : ليش هالكلام يادانه دانه : انت تدري ياخالد باللي سويته في حقكم وهذا شي معذبني وانت معذبني اكثر من هالاشياء خالد : يا دانه اللي يحب مايسوي سواتك دانه : وش بيدي يوم خسرتك ورحت لاختي خالد : بس انا ما ادري بحبك لي يا دانه الا عقب ما خبرتني امك ولكن في الوقت الضايع ... لاني خطبت نوره وهذا ينهي كل شي المفروض دانه : ادري بس انا ما اقدر اني اشوفك بعيد عني .... على الاقل اتصل خلني اسمع صوتك حتى يرتاح قلبي او طرش لي من كلماتك خلني افرح بقرايتي لاشعارك مثل قبل خالد : مايسير خاطرك الا طيب يا دانه وانا بحاول اتصل من وقت الى وقت بس ما ودي انك تقولين لامل اني اتصلت او ان نوره اتعرف عن الموضوع دانه : ماعليك ... انت في قلبي سر وبتكون سر حتى النهايه فرح خالد لكلام دانه واخذت مشاعره تجرفه الى قلب دانه وهو عايش على ان يخلصها من همومها ... ولكن القلب اذا ضاع ضاع ونادر مايرجع مثل قبل او انه يتحكم في مشاعره مع الاخرين ..... وهنا جات ام نوره ام نوره : هلا خالد ها بشر شخباركم الحين خالد : الحمدلله بخير وكل شي تمام ام نوره : متى بتمرون علينا انا خاطري اشوف نوره ... وهي وينها الحين خالد : مع الاهل تحت .. وحنا فكرنا انجيكم يمكن بعد اسبوعين ام نوره : صج خالد ... الله تعالوا نبغي انروح البحر شوي انتمشى هناك وانت تدري محد يطلعنا كلش .... وابو نوره مشغول مع الثانيه خالد : ان شاءالله يا عمه مايسير خاطرك الا طيب وفرحت دانه بكلام خالد الذي شاركها المشاعر وياخذ ويعطي معاها وبعد يومين اتصل خالد .... علشان يسلم على ام نوره ..... خالد : ياعمه انا باجيكم هالاسبوع ابغيك في موضوع بس ما ودي حد يعرف عنه شي حتى نوره ام نوره : خير ياخالد وش السالفه خالد : لا مافي شي بس ودي اتكلم معاك في موضوع واخذ برايك ام نوره : حياك الله يا خالد انا في انتظارك .... وبعد اسبوع طار خالد مع نوره الى الكويت .... .. ولزمة عليهم عمته او ام نوره بانهم ينامون عندهم في الملحق الخارجي بدل انهم يسكنون في الفندق ... وبعد اصرار الام وافق خالد ... وعند العشاء جلسوا مع بعض و دانه تنظر الى عين خالد ... وخالد ينظر اليها من وقت الى اخر حتى يشوف ويتاكد هاذي صج اتحبه ... والى اي درجه حبها له ... وكأن نوره حست بنظرة اختها دانه .... بس خلت الموضوع لبعدين .. لين راح خالد ينام ....... *************** وللجروح بقية |
مشكور أخوي ESM1991 على تكملتك للقصه... وفعلا القصه جديره بالمتابعه والإهتمام... الله يعطيك العافيه وبإنتظار الجزء الخامس والعشرين.. |
السلام مشكور اخوي ESM1991 على هالتواصل الرائع ونتظر بقية الجروح لاتتاخر علينا |
:) اهلا أخي قصة مؤثرة جدا ولكن اين انت الن تكمل لنا بقيت القصة نحن في انتظارك :( |
قصه راااااااااااااااااااااااااااااااااااااااااااااائعه ... سلمت يداك .. ونحن بانتظار بقية الجروح ... |
مشكوووووور ..... وينك اخوي ESM1991 اتأخرت علينا !!؟ |
السلام عليكم وين الباقي تاخرت علينا |
والله قصة حزينة و غريبة وشكرا لك ياESM1991 بس وينك ياخوي تأخرت علينا .... تراك صرت زي دانة !!! سحرتنا بها القصة الرائعة :D :D ونحن نتظرك |
اخلص علينا وين الاجزاء الباقية |
أهلين أخوي قصة قمة في الروعة أجبرت الجميع على متابعتها رغم طولها .. ننتظر البقية على أحر من الجمر ولا تطول علينا .. |
| الوقت المعتمد في المنتدى بتوقيت جرينتش +3.
الوقت الان » 03:52 AM. |
Powered by: vBulletin Version 3.8.7
Copyright ©2000 - 2024, Jelsoft Enterprises Ltd