27/08/2009, 04:18 AM
|
| المجلس العام | | تاريخ التسجيل: 28/04/2003 المكان: المجلس العام
مشاركات: 2,104
| |
|
(( يوميات رمضانية "5" )) المتألق K I N G . M I L A N --" مابين ورقة الاختبـار و هتافات الجماهيـر "-... ! !
 فكرة - سندريلا الهلال
اعداد ومتابعة - الهنوووف
تصميم - عسيريه  لنا من كل عام شهر فضيل .. أعاده الله علينا وعليكم وجميع المسلمين بالخير واليمن والبركات وكل عام وانتم بخير **][يوميات رمضانية 1430 هـ ♥][ ** لقد عدنا اليكم .. تحملنا الاشواق للقياكم .. ونسعد ان نعيش معكم . . في سلسلة تحمل بين طياتها يوميات الأعضاء الرمضانية من كل عام ،
هذه السلسلة أنتم أهل بيتها ونحن ضيوفا في حضرتكم ،،،
+
+.........+
+
أهلا وسهلا بكم أحبتنا ..
ودعونا نرحب سوية بالمضيف "الخامس"
عضو اللجنة الاعلامية المتألق "K I N G . M I L A N ."
لكي يحكي لنا احداث يومه مع شهر رمضان المبارك .. نبدأ بسم الله : ~  ~ السلام عليكم  كيفكم يا حلوين و[ حلـوات ]   <<< امباااع
أولاً أحب أشكر كل القائمين على هالموضوع على هـ الإستضافه الجميله وإن شاء الله أني أكون ضيف خفيف عليكم يا رب 
بصراحه هاليوم يوم عصيب علي جداً  تعب وإختبار ومباراه وانفلونزا خنازير وحـرّ وقرف  صليت الفجر ونمت قمت الساعه 9 ونص الصبح على أساس اني بذاكر عندي إختبار نهائي ولا بعد فتحته << مسوي زاحف المهم أني انلحست ولا عرفت اذاكر وقلت لابوه لابو الإختبار والله وقعدت ع النت وسحبت ع المذاكره  ,,
وهذي بعض الصور من كتبي ومذكراتي العزيزه 
 المهم مالكم بالطويله , والله وأدق على خويي هاه محمد متى الإختبار خبري به الساعه 1 الا ثلث !؟ ايه ايه 1 الا ثلث يالله تعال الحين الجامعه خلنا نصلي سوى بمسجد الجامعه ونقعد نذاكر قلت له اوكي جايك والله والبس ثوبي وشماغي واطلع الجامعه وهذي صوره من داخل جامعتنا الموقره
 والله ودخلت الجامعه صلينا وبعدها دزينا القاعه وجانا الدكتور ووزع الأسئله وأنا خاااايف ما ذاكرت وحالتي صعبه , جت الأسئله واللهي سهله جداً [ 3 أسئله بس ] عليها 70 درجه  ,! المهم أني انّكبت ما عرفت وش أحل حاولت ما عرفت ألّفت لي كم كلمه كذا وخلصت وعطيت الدكتور الورقه وطلعت مستاااانس أخيراً عطلت أخيراً بصوم زي الناس وادز البيت سريعي وأنا راجع شفت موقف بصراحه أثر فيني لقيت بنقالي في عز الظهررر في عز الحررر واللهي حر يا ناس غير طبيعي لقيته منسدح ونايم على عتبة باب المسجد برى يا ويل قلبي بس ولقطت له صوره عشان أخليكم تعيشون الحدث
المهم والله ورجعت البيت ونمت علطول , قمت صليت العصر وبعد العصر جلست اتابع مسلسلي المفضل [ أم البنات ] حق سعاد عبدالله وغانم الصالح ناظرته لين قضى الساعه 5 وربع ,واخوياي يدقدقون علي أحرقوا جوالي  هاه وينك وينك لأني اليوم معزوم عند خويي بفطر عنده المهم يوم انتهى المسلسل رحت أخذت لي شور ع السريع كذا وأطلع لبيت خويي بمخرج 14 بعييد مره عن بيتنا لأن حنا بالشمال ماااغط والله ماشي 160 - 180 أبي ألحق ع الفطور جوعااان , يوم وصلت عند خويي الا وهو تووه يذن ولحقت ع الفطور ولله الحمد وصورت لكم الفطـور لبـى قلبـه خويي ما قصر بهالفطور الزين
 وهذي صوره للعصير الخورافــي صح أني ما شربته بس شكله خقق
 والله وافطرنا ولله الحمـد وصلينا ورجعنا وبدينا ندبغ بالعشاء وهذي بعض الصور للشوربه والحاجات الحلوه
يوم خلصنا من العشاء وقضينا ونسلم على خوينا والله وندز للملعب عشان مباراة الهلال   وصلنا للملعب يمكن الساعه 9 تقريباً جلسنا شوي برى نسولف بعدها دخلنا أنا و2 من اخوياي وأخذنا لنا مكان بنص الملللعب مرره مكان خورافي  , طبعاً الوضع زحححححمه مرررره وكتتتتتمه وحررررررر حررررر حررررر غيييير طبيعي والله العظيم يا ناس اول مره أحس بقيمـة المكيـف والله العظيم حررر مو طبيعي طبعاً فيه حقين مجلس الجمهور قاعدين يوزعون كمامات عشان إنفلونزا الخنازير والعدوى وزي كذا الله يجزاهم خير ما قصروا  , اذا لبست الكمامه أحترر مرره واذا فصختها برضه أحتر مدري وش اسوي احس أني بموت من الحر والكتمه المشكله روائح مخييسه ودخااان وأنواع القرف بس كلـه لعيـون الزعيـم يهـون , المهم بدت المباراه وأنا متحدي أخوياي ان الزعيم بيفوز 7 / 1 نفس ذيك المباراة حقت الموسم الي راح , شوي ويجي الهدف الأول حق ويلي لبى قلبه وبعدها الجمهور كل دقيقه [ ياسر ياسر ياسر ياسر ] يا كرهي لهم أي كوره تجي لياسر مغير يزاعقون ذا المبزره قسم بالله رفعوا ضغطي كرهوني بياسر وعاد أنا خلقه كارهه الصراحه بالفتره الأخيره عشان مستوياته السيئه وقاعد كل دقيقه أتهاوش مع اخوياي كلهم مع ياسر وأنا ضده وفيه 5 شباب تحتنا كلهم مع ياسر الا واحد مثلي ضده ويموت بـ سامي مثلي سيم سيم وقاعدين نتهاوش كل دقيقه أي كوره تجي لياسر ! هاه هذا ياسر الي مزعجينا فيه ومدري كيف وإذا جت كوره مظبوطه لياسر قاموا يهايطون هم أنتهى الشوط الأول بسلام وبتقدم الهلال , جا الشوط الثاني النقاش زاد عن حدته شوي  وأنا قاعد ألعن بالمدرب ورى ما يطلع ياسر ويدخل الصويلح وأخوياي يسبوني ويهاوشوني وما فيه الا قوة مرافس بالمباراه يا ناس والله جمهور الهلال مع إحترامي [ بعضهم ] قسم بالله يرفع الظغط من جد من جد مبزرررره واللهي مبزررره يعني شوفوا الغبنه والقهر عيني عينك , شفتوا الهدف الثاني حق ويلي هدف بطل وخورافي الي صلّح الهدف ياسر , بعد الهدف الجمهور بالعاده مفروض يهتف بأسم مين !؟ أكيد ويلي الجمهور لله ياخذهم يقولون [ ياسر ياسر ياسر ] وأنا أطررررطع ع الآآآآخر وش دخللل يااااسر يا عيال اللذيناااا يقولون عشان ياسر هو الي مصلح الهدف !؟ طيب يالي منب قايل هدف عيسى ورى ما قلتوا شلهوب ولا ويلي عشانه مصلحه ولا هدف ويلي الأول ولا هدف الشلهوب ليش ما هتفتوا بأسم الي صلح الأهداف !! ولا بس عشانه ياسر !! الله ياخذهم والله يكرهونك بياسر من جد شي يرفع الظغط !!
المهم يوم جا هدف ياسر الأخير خويي جا وشنقني شنقاً عنيفاً ولعـن سلسبيلي وصفقني لين قلت آمين قال هاه هذا ياسر رد عليك قلت يا لبى ياسر << أسلك له قلت أصلاً ياسر أفضل من ابراهيموفتش وافضل من ايتو وأفضل من ديل بييرو قالي ايه والله ان ياسر بنظري أفضل منهم كلهم قلت تكفى وخر عشان ما يقوم البقس من جد عاد
المهم وطلعنا من الملعب ولله الحمد بسلام وبعد كتمـه وحـر وعذاب داخل الملعب وخوف وترقب من انفلونزا الخنازير رجعت خويي بيتهم ورجعت أخذت لي وجبه من ماك على السريع وجيت وهذي صوره للسحـور
وبكذا يكـون يومـي أنتهـى ,,
أتمنـى أنـي ما أكـون ثقلـت عليكـم بشي , وإن شاء الله أني كنت ضيف خفيف الظل عليكم وأعذروني والله أني تعبـان جـداً وكاتب اليوميات هذي على عجل بس كله لعيونكم وربي شكـراً أحبائـي أعضـاء المجلـس العـام جميعـاً والسلام عليكم ورحمـة الله وبركاته كل الشكر للمتميز **][ "K I N G . M I L A N"♥][ ** وبالتوفيق والنجاح باذن الله وانتظرونا غداَ
مع العضو المتألق -هلالي الشماسية .-
أرق التحايا وأطيبها من
مشرفي واستشاري
المجلس العام
|
الوضع الشجري
