بسم الله الرحمن الرحيم السلام عليكم ورحمة الله وبركاته [ كل عام وانتم بخير .. والشهر عليكم مبارك .. والله يجعلنا واياكم ممن صامه وقامه ] ,’ الايام تمشي بسرعه قبل مده بسيطه نبارك لبعضنا بحلول الشهر الفضيل ومرت " سنه كامله " بحلوها وبمرها ورجعنا الحين نهني ونبارك .. ونحاول نساهم في الخير وندل عليه ونستقبل شهرنا الكريم فيه الأجر مضاعف في هالشهر ومافيه اسهل من انك تقدم الخير الطرق كثيره ومفتوحه ,. بالإمكان نمشي فيها ونساعد ناس كثير ناس محتاجه فقيره بعيده كل البعد عن الرفاهيه ..! ماراح يجيك من وراها الا اجر وخير لك ولأهلك .. مثل ماحنا عارفين قبل رمضان بكم ليله الأماكن زحمه والكل منشغل يقضي لبيته مقاضي رمضان المتنوعه ! بالمقابل في بيوت مسكره مانشوفهم يعيشون معنى الحاجه والفقر ناس متعففين .. يفتقدون لعائل لهم او وجود عائل لكن ظروفه صعبه ومايملك في جيبه أي شي ! يشوف في عيون اللي حوله مع حلول كل موسم اعياد مدارس ... الخ امنيات بسيطه بنظرنا .. لكن تعني له الكثير وللأسف بسبب ظروفه عاجز عن توفيرها لهم , ناس محرومين وبيدنا نساعدهم .. ليه لا ؟! من السنة الشريفه : (( من أنفق نفقة في سبيل الله كتب له سبعمائة. ولأن أعول أهل بيت من المسلمين وأشبع جوعهم وأكسوا عوراتهم وأكف وجوههم عن الناس أحب إلي من أحج حجة وحجة وحجة )) . الشهر الفضيل على الابواب والأسر المحتاجه كثير.. حنا قادرين على رسم الابتســـ : ) ـامه على وجيهم بمساعدتنا لهم .. ماراح يأخذ من وقتنا او مالنا الشي الكثير .. بمساهمتنا ومساعدتنا لهم اقل شي راح نحصل عليه دعاء بظهر الغيب منهم بأفضل شهر (شهر الخير) يا اهل الخير .. الفكره واعدادها بأن العضو والعضوه هنا بشبكة الزعيم يساهم معنا في مساعدة " الأسر المحتاجة " ,عن طريق السله الغذائية الرمضانية .. الموضوع سهل ومايحتاج جهد هذي السله بعد اعدادها تعطيها لأقرب / جمعيه خيريه / عندك .. او امام المسجد يوصلها لأسره محتاجه يعرفها او انت توصلها بنفسك لأسر تعرفها والتفصيل في هالنقطه بيكون مع " فتاه هلاليه " وبالامكان بعد تجمع من ( اقاربك ) اللي حاب يتصدق وتشتري لكذا اسره وتأكد ان الدال على الخير كفاعله احتمال انهم [ ناسين او لاهين ] نذكرهم وماراح يضرنا شي .. قال تعالى : ( مثل الذين ينفقون أموالهم في سبيل الله كمثل حبة أنبتت سبع سنابل في كل سنبلة مئة حبة والله يضاعف لمن يشاء والله واسع علِيم ) الحاصل هنا ان السله الغذائيه عباره عن [ كرتون ] فيه المواد الاساسيه الرمضانيه ومثال عليها : ( رز ، طحين ، زيت ، حليب، ، سكر ، شاي شوربة كويكر , مكرونة , فمتو , تمر سمبوسه , كريمه اوجلي المتوفر يعني , ملح , خضار ولحم او دجاج لو تقدرون ) .. هذي المقاضي تقريبا .. او انت خذ المقاضي اللي تشوفها اساسيه .. بعد رجوعك من أي مشوار تمر اقرب محل أو سوبر ماركت .. وتشتري وتخليه يحط لك الاغراض بكرتون وتوصلها .. وبكذا تكون ساعدت ’, اسره محتاجه ’, راح " تفطر وتتسحر كل يوم من خيرك وبتدعيلك " المهم قبل ماتوصلها نبي (( تصورها لنا )) وبعدين بنقول ليه ؟! <- نسمع بأسلوب التشويق بس ضروري تتصور اثناء اعدادها وبعد الانتهاء منها وتنرسل لنا .. شهر رمضان شهر له خصوصيته خصوصاً في مسألة الأجور كونها فيه مضاعفه وطرقها كثير اولها هذا الطريق ؛ الصدقه ؛ وان شاء الله نكون من السالكين له والصدقة ستر من النار .. قال صلى الله عليه وسلم : ((يا عائشة استتري من النار ولو بشق تمرة , فأنها تسد من الجائع مسدها من الشبعان )) اعضاء وعضوات شبكة الزعيم .. نتمنى نشوف عدد كبير من " السلات الغذائيه " تخرج للمحتاجين من هنا من شبكتنا .. ( نتمنى اللي حاب يشارك في اعداد سله لأسره محتاجه ماعندها أي امكانيه لشراء مقاضي رمضان وهو عنده المقدره بأنه يكتب هنا " مشارك " وبعدين راح نوضح الأمور اكثر واي استفسار حنا حاضرين ) ,’ حلو نقدم الخير للغير .. ,’ أحوّل المايك لــِ " فتاه هلاليه ؛ فت فت "

مابغيتي يافجر .. نجي الحين لطريقة تقديم الأغراض للمحتاجين .. * الشباب : ماعليكم إلا إنكم تشترون المقاضي الأساسية ( رز ، طحين ، زيت , تمر، حليب ، ، سكر ، شاي , شوربة كويكر , مكرونة , فمتو , تمر , سمبوسه , ملح , خضار ولحم او دجاج لو تقدرون ) .. طبعًا مايبيلها انقز لكارفور بنده العثيم بلشرف .. واشترهم كلها تبي تلقاها عندهم بعدها إتصّل على وحدة من الجمعيّات الخيرية .. (وبنحط لكم أرقامها تحت..) , طبعًا إنت شف أقرب؛ جمعيّه؛ لبيتكم ورح لهم عطهم الأغراض وهم بأنفسهم بيوصلونها للمحتاجين .. أو اذا استصعبت الروحه للجمعية رح لإمام مسجدكم وكلمه وعطه الأغراض وهو أكيد إنه مب يقصّر ويعرف عوائل محتاجه وبيوصلها .. ,’ أما إنتم يـ *البنات : فسهل جدّا لاتستصعبينها على نفسك وتقولين انا بنت صعبة أروح للجمعيّات .. لا ياعزيزتي .. كل اللي عليك إنك تروحين برضو لأي سوبر ماركت وتقشين لكهالمقاضي اللي ذكرناها ( آنفًا ) <- ترى كل هالحكي عشان أقول آنفا اجحدوها عاد وتعطينها أبوك / أخوك , وتقولين له يوديها للجمعيات أو يوصلها لإمام مسجدكم أو إذا كان أبوك / قريبك , يعرف عائلة محتاجه يقدّمها لهم .. يكفي بس لمّا تشوفون فرحة هالمحتاجين .. والأجر اللي بتكسبونه ورا هالعمل البسيط .. ,’ أرقام الجمعيّات الخيريّة بمنطقه الريّاض : 1 / جمعيّة البر ( فرع غرب الريّاض ) 4331550- 4335275 2 / جمعيّة البر ( بحي الشفاء ) : 4222777 -4225032 3 / جمعيّة البر ( بحي الروضة ) : 4256079 -4271896 4 / جمعيّة البر ( في شمال الريّاض ) : 4707765 - 4161916 - 4709999 5 / جمعيّة البر ( بحي الفيحاء ) : 2411998- 2411998 6 / جمعيّة البر ( بالخرج ) : 015442802- 015486005 7 / جمعيّة البر ( حوطة سدير ) : 064431278- 064431278 8 / جمعيّة البر ( ضرما ) " الجمعيّة مقابل البنك " : 015221424 - 015221179 - 015221297 9 / جمعيّة البر ( بالعريجاء ) : 4331550 10 / جمعيّة البر ( بحي معكال والشميسي ) : 2414283 -2434294 - 4111112 ,’ أرقام الجمعيّات الخيّرية خارج منطقة الرياض : جمعية البر الخيرية بمكه المكرمه 4223588 /4223014 جمعية البر الخيريه بالمدينه المنوره /043541717/043240960 جمعية البر الخيريه بجده 026391100/ 026913774 جمعية البر الخيرية بالقصيم 063647554/063647404 جمعية البر الخيريه بأبها 072246468 /072248824 جمعيه البر الخيريه بحائل 065317356 جمعية البر الخيرية بالمنطقة الشرقية 038268958 - 038266666 بالأخير كل اللي نبي نوصله لكم من خلال هالموضوع إن الواحد مايبخل على نفسه بالأجر .. يحاول يتصدّق ويساعد النّاس المحتاجه لو بريال إن شاء الله .. لأن الله " سبحانه وتعالى " امرنا بإيتاء الزكاة كركن اساسي من اركان الاسلام الخمسه .. ثم بالتصدق على المحتاجين.. و الصدقه ماهي فرض لكن المفروض ماننسى إن الصدقه تطفئ غضب الله وتمحو الخطيئه وانها وقايه من النار ( ومن فينا يضمن دخوله للجنة ؟! ) مافيه شيء بينفعنا قد أعمالنا الدنيويّة .. والواحد يدورّ [الأجر ] وبذل الخير هالايام بالذات , وبما إننا دخلنا رمضان فحابين نقولكم لاتنسون "إفطار الصائم" واي مبلغ تدفعه سواء كثير او قليل عادي بس الأهم لانترك الصدقه !! فلو جينا نشوف الغير مسلمين مثلاً يتبرعون ويدفعون لكن بدافع انساني .. مو بدافع ديني .. والواجب علينا إنّنا نكون احرص منهم على النقطه هذي .. خصوصا ان تأثير صدقاتنا راح يكوناقوى على هالمساكين .. كون إنه يجمعنا( دين واحد ) .. وهنا نكون وصلنا معكم لنهاية الموضوع .. مانزلناه إلا لأننا نحب لكم اللي نحبه لأنفسنا .. ماننسى نشكر ماجد وعسيرية .. شكرًا ماتكفي والله .. أرجع أعيد وأقول .. ( نتمنى اللي حاب يشارك في اعداد سله لأسره محتاجه ماعندها أي امكانيه لشراء مقاضي رمضان وهو عنده المقدره بأنه يكتب هنا " مشارك " وبعدين راح نوضح الأمور اكثر واي استفسار حنا حاضرين ) واحنا أولكم وهذي أسامينا .. فجر الرياض : مشارك 1 فتاه هلاليه : مشارك2 , لا تنسون قوله تعالى : (( ويطعمون الطعام على حبه مسكيناً ويتيماًَ وأسيراً إنما نطعمكم لوجه الله لا نريد منكم جزاءً ولا شكوراً )). وقول الرسول صلى الله عليه وسلّم (( اتّقوا النّار ولو بشق تمرة ))

الله يجزاكم كل خير

( بس انا اذا بتبرع للمحتاجين , ماراح اكتب اني مشارك )

والف شكر لكم

إقتباس المهم قبل ماتوصلها نبي(( تصورها لنا )) وبعدين بنقول ليه ؟! <- نسمع بأسلوب التشويق بسضروريتتصور اثناء اعدادها وبعد الانتهاء منها وتنرسل لنا .. شهر رمضان شهر له خصوصيته خصوصاً في مسألة الأجور كونها فيه مضاعفه وطرقها كثير اولها هذا الطريق ؛ الصدقه ؛ وان شاء الله نكون من السالكين له والصدقة ستر من النار

موضُوع هآيل أوي ’

//

باكَ

في البدآيه كل عآم وأنتم بخِير ، والله قلبي يدء يدء عشآن رمضَآن قرّب
كنّي أول مرّه أعيش آخر شعبَان ..!
الله يحيينَا فيه حياةَ طيبّة ويجعَلنا ممن يصُومه ويقُومه إيماناً واحتساباً ..

وفكرَة السلّة الرمضَآنية رآقَت لي كِثير ..
وذكرّتني ببرنآمج يجي على القنآة الإخبَاريه
وينقلَ حآل بيوتَ بالرياض يمكن أقدر أقول إن حآلها [ مأسآوي ]
وهالوَقت مُنآسب جدّاً لتقدِيم يدّ العونُ لهآ ..
وماقصّرتمَ يآ فجَر وفت فتَ سفلّتوا الطِريق - يعني سهلّتوا الموضوع -
وإن شآءَ الله موضوعكم يلقى له صدَى وأجزِم لكم إنه بيلقى بإذن الله
وش يبيَ الوآحد غير دعَوة مُحتآج بظهَر الغيبْ
وأنا ما أقدَر أضمن لكم مُشآرَكتي ، لكن بحَآول قدَر المُستطَاع
وإن الله قدّرني رآح أصوّر المشآركة وأنزلهآ ..
والله أعلم بالنوآيا ...
بإذن الله مآ راح تكون بنيّة غير الأجر من الله و تشجِيع البآقيين وإنجاحَ للفكرةَ
الله يعطِيكم العآفية ويسمنّكم ويوفقّكم يارب
ورمضآن كريمَ يآبهَوآت والله يجعَله بموآزين أعمالكم ..
شكراً لكم فجَر & فتآة هلالية

الله يجزاكم الف خير
إن شاء الله الجميع يستفيد منها
ألف شكر مرة أخرى
تقبلوا مودتي .. !

الفكرة جميلة ورائعة والصدقة تقي من النار

خواتي الف شكر لكم وجزاكم الله الف خير على طرح الموضوع

ياهلا فيكم ..
مرسال - بندر - عبد الله ..

إقتباس كل إنسان بيعمل خير - يبيه يكون بينه وبين ربه أما لو أظهره للناس - بيكون مدخل للشيطان.

ما اختلفنا .. احنا عارفين إن الواحد لاعمل عمل خير يبغاه بينه وبين ربّه ..
بس يمكن إنتم مافهمتوا قصدنا من التصوير ويمكن احنا مابينّا لكم ليه !
مع إننا كنّا متوقعين إنكم بتفهمون ليه .. لكن دام الدعوة كذا وفهمتوا غلط ..
فـ أعتقد إن الغلط منّنا من البداية ..
فكرة التصوير ياقدعان جت عشان نضمن إن فيه سلاّت راح تطلع من الأعضاء ..
يكتب لنا إنه راح يشارك معنا وينزل صورته ..
ويمكن البعض وده يذكر لنا تجربته أثناء الإعداد وإرسالها وفيها فائدة وحث على المساعده ..

لاتفكرون أبد بشيء ثاني .. بالعكس الفكرة مجرّد تذكير للأعضاء هنا .. وحث على الأجر ..

عن أبى هريرة-رضي الله عنه-قال: قال رسول الله -صلى الله عليه وسلم-: (من أصبح منكم اليوم صائمًا؟)، قال أبو بكر: أنا، قال: (فمن تبع منكم اليوم جنازة؟)، قال أبو بكر: أنا، قال: (فمن أطعم منكم اليوم مسكينًا؟)، قال أبو بكر: أنا، قال: (فمن عاد منكم اليوم مريضًا؟)، قال أبو بكر: أنا، فقال رسول الله –صلى الله عليه وسلم-: (ما اجتمعن فى امرئ إلا دخل الجنة). [رواه مسلم]

أستشهد العلماء بهذا الحديث على انه يجوز افشاء الصدقة من اجل حث الناس على الصدقة واعتقد ان هذا هو المغزى من هذا الموضوع .. لا شك ان صدقة السر لها فضل عظيم واجر جزيل لكن الانسان اذا كانت نيته حث غيره على الصدقة وجعلهم يقتدون به حين يفشي صدقته فله اجر عظيم والدال على الخير كفاعله .. والله تعالى اعلم ,,,

فجر الرياض & فتاة هلالية

شكرا لكم .. ولا حرمكم الله الاجر ,,,

فعالية رائعه ومميزة وتسابق جميل نحو عمل الخير

الناس تتسابق نحو العمل الطالح وتفاخر به .. والعمل الصالح اكتفى ان يكون صامتا !! حتى ظن الناس ان الخير لم يعد له وجود بيننا !!

( أنما الأعمال بالنيات ) أو كما قال عليه الصلاة والسلام




فجر الرياض & فتاة هلالية & عسيرية

جزاكن الله كل خير

وبارك الله جهدكن وعملكن

والله يعطيكن العافية ،،،

فجر الرياض & فتاة هلالية ( & )

بارك الله فيكم و جزاكم خير على التذكير بفضل الصدقة ...
{ و تعاونوا على البرِّ و التقوى ...}
جميل أن نشاهد هذا الموضوع الذي يحث على الصدقة و لعلّ من أحكام الصيام هو الشعور
بمعاناة الفقراء و المساكين و ما يعانونه من الجوع و شدته ...

لا أرى بأساً من التصوير بالعموم ...
و لكن إن كنت سأشارك فلن أقوم بالتصوير و لا أُفضّله


شكراً على هذا التميز ...
دمتم في حفظ الله و رعايته ...