شاشا شاشا.. شاشا شاشا.. والسعودي هو الباشا... ( هـنـا الـقـاهـرة ) - نادي الهلال السعودي - شبكة الزعيم

Fahad Al Sudais · #1 15/08/2009, 02:36 PM

حيـــــــاكم

حلو ان الواحد تحصل له فرصه ويسافر بالصيف

والاحلى انه ينبسط ويستانس ويغيّر جو

لأنه اذا سافر وتعكّر مزاجه بتكون الخساير مضاعفة

تذاكر + فندق + مصاريف اكل وشرب + تنقّلات + هدايا

وتخيّلوا عاد بعد كل هالخساير ترجع وانت ما استانست

وهذي هي نقطة الخلاف ومفترق الطرق دائماً عند اللي ينوي السفر.. ( وين اروح )

انا بصراحة صار لي فترة ماسافرت خارج المملكة

وهالصيفية بالذات كان الوضع صعب والدوام اصعب وتغيير الجو مطلوب

ومن قبل ست شهور وانا اجهّز نفسي لهالرحلة ( مادّياً ومعنوياً )

وعلشان اكون صادق معكم

اقسم بالله ماقد سافرت لأي بلد عربي بحياتي.. ( باستثناء دول الخليج طبعاً )

وانا متعود اذا بغيت اغيّر جو على اوروبّا الشرقية

دول فقيرة... ولعبت الاشتراكية بحسبة الشعب فيها

والرحلة هناك ماتكلفك شي... اللهم قيمة التذكرة تتراوح بين الفين والفين وخمس

لكن تعيش عشر ايام من اجمل مايكون ... راحة واستجمام وجبال وشواطيء

وماتتعرض لأي موقف محرج او لاتحسد عليه

وطبعاً هالكلام مو استعراض او شوفوني تراي ( كاش )

ترى السالفة بسيطة

أي موظف راتبة بين 3 او 4 الاف يقدر يسافر هناك كل سنة ونص

ماعليك الا انك ترفع من راتبك 200 ريال شهرياً

نرجع حق محور حديثنا

هالسنة جانا انفلونزا الخنازير وخرّب كل شي

وانا بسبب هالوباء متابع للدول اللي سجّلت اقل حالات اصابة ووفاة

ولسوء حظي كانت مصر هي الاقل على الاطلاق

ثلاثمائة حالة اصابة... وحالة وفاة واحدة

وهذا شي صراحة يرفع الضغط والسكر ويجيب الصمرقع

وشلون عندهم الوباء بهالنسبة المتدنّية

رغم انها بلد يغص بالاجانب والسيّاح... وسكانها ستين مليون... وفيها خنازير

وحنا بالمقابل

بلد مايتعدى سكانه عشرين مليون.. وماعندنا الا خرفان وحواشي وتيوس

وصار عندنا اكثر من سبعمائة وخمسين اصابة... وثلاثطعش حالة وفاة

الموهييم

انا مسوّي فاهم

رحت ادوّر حجز تذاكر

وبطلعة الروح لقيت حجز لمدة اسبوع.. من الخميس الى الخميس

ولما ارتحت من سالفة الحجوزات

دخلت موقع ( travgate ) علشان اشوف لي فندق مناسب واحجز فيه

وهذا للمعلومية افضل موقع مضمون

تدخله وتحط أي دولة تبيها.. ويعطيك قائمة بالفنادق اللي هم متعاملين معها

وكلها فنادق ممتازة... اربع وخمس نجوم... وعروض الاسعار ممتازة ومخفضة

انا اخترت منتجع خمس نجوم عند الاهرامات

وكانت التكلفة لسبع ليالي مع الافطار 2013 ريال

يعني 287 ريال باليوم... لاحظوا منتجع خمس نجوم مع الافطار

ترسل لهم ايميل او تتصل بهم بعد ماتختار الفندق وتحدد عدد الليالي اللي راح تسكنها

وبعد خمس دقايق يردون عليك ويرسلون لك رقم حسابهم

وتطلع من البيت لأقرب مكينة صراف وتحول لهم المبلغ كامل

ترجع للبيت وتلقاهم ارسلوا لك فاتورة بالايميل... اطبعها وريّح راسك

وكل هالكلام ماياخذ اكثر من ربع ساعة

وهم على فكرة مكتبهم في جدة وموضح العنوان في موقعهم.. وحاطين ارقام التليفون والفاكس

وفعلاً والله

رحت لمصر واخذت تاكسي للفندق وانا ايدي على قلبي... خايف تكون الدعوى نصب

لكن يوم دخلت عند الاستقبال لقيت حجزي موجود ومدفوع التكاليف وكل شي تمام

والمنتجع بصراحة روعة الى ابعد درجة... اسمه ( كتراكت ريزورت الهرم )

كل شي الى هنا مية فل واربع طعشر

لكن عاد من بكرى بدينا بشغل المسخرة

.
.

يوم الجمعة

طلعت الصباح من الغرفة ابي اطلع آخذ لي تاكسي واروح للاهرامات

ابي اصوّر مع الاهرامات والواد ( سفنكس ).. عارفينه ؟؟ ابو الهول

طبعا من يوم تطلع من باب الفندق الا ويتجمعون عليك تقل ذبّان

( صباح الفل ياباشا... صباح الإشطة... ده إيه النور ده )

وكلهم عيونهم على مخباتك وبوكك السحري

كرشت ابوهم واخذت لي تاكسي ورحت للاهرامات

دخلني بمكتب... يقول تحجز للرحلة من هنا.. ممنوع تروح على رجليك

جاني واحد وقال الرحلة عندنا على الحنطور بتتكلّف 500 جنيه

قمت وقلت لحق التاكسي مشينا للفندق

قام يلحقني راعي المكتب ويقول علشانك بـ 400 جنيه

وانا معطيه ظهري ومتّجه للسيارة

وهو يلاحقني الييين ركبت السيارة

وهو ينزل بالسعر حتى وصل الى 200 جنيه

قلت له مامعي الا 100 جنيه... تبيها والا ارجع للفندق ؟؟

واتفقنا بالاخير على 120 جنيه

للمعلومية ( الريال السعودي = جنيه ونص مصري تقريباً )

رحت وركبت الحنطور ولفّيت على الاهرامات وابوالهول وصورت مع كل شي

رجعت للفندق

وبالليل رحت لمحل كباب وكفته ( تاكل صوابعك وراهـ )

اسمه ( كبابجي الفتوح )... بالجيزة قريب للاهرامات

يجون لمّي يسألون المصاريا : هو الباشا منين ؟؟

استلمهم فقش : انا من ( موريشيوس )

هم تطير عيونهم

لا مش معؤول... انت سعودي او كويتي

ارد عليهم : من ( موريشيوس )

يروحون ويتركوني بعد ماتطلع ارواحهم

تدرون لو قلت لهم بحسن نية انك سعودي او كويتي ؟؟ قسم بالله ان تكره عيشتك

يبدأ شغل الشحاذة اللي على اصول
.
.

يوم السبت

اخذت تاكسي ورحت القناطر الخيرية

وبكم ياحبيبي ؟؟ قال : 500 جنيه

وكالعادة.. عطيته ظهري ورحت راجع للتاكسي

ويلحقني وانا واياه شيل وحط حتى وصلنا الى 180 جنيه شاملة الغداء

وركبت القارب

( قارب تركبه ويلف بك على كم جزيرة بالنيل.. وتشوف بيوت عادل امام وليلي علوي واللمبي )

ويوقف بك عند جزيرة العسل وينزلك عندهم عشر دقايق

يكرّهونك بعيشتك علشان تشتري بالغصب... الكيلو بـ 300 جنيه

انا عطيتهم الخامس ورحت ركبت القارب

والله العظيم انه لاحقني ومنزل القيمة من 300 الى 70 جنيه

ومع ذلك قلت له ( لأ )

حقد علي وقام يخرطم وراح يجر اذيال الخيبة

رحنا للجزيرة الثانية.. قال لي السواق حق القارب :

بص... دي بئى جزيرة ليلى علوي

قلت انا :

وجع... ماكفاها البيت اللي ورى جنب بيت عادل امام... اشترت جزيرة كاملة ؟؟

قال :

هي كده... اشترت القزيرة من الحكومة... عاوز تنزل وتركب حنطور ؟؟

قلت له :

لا ياعم روّقنا الله يرحم والديك.. توّي راكب الحنطور امس وحايمة كبدي

ورحنا للجزيرة الثالثة اللي فيها المطعم

وجابوا لي وجبة ذاك السمك اللي يجيب العافية

... بصراحة لذيذ

ورجعت للتاكسي ثم الفندق
.
.

يوم الاحد

رحت للقرية الفرعونية

وهي جنب حديقة الحيوانات بالجيزة

تركب قارب ويلف بك لفة بسيطة ثم تدخل جزيرة وتشوف اثار الفراعنة

ومتاحف تحكي تاريخ وآثار مصر

ثم تتغدى وترجع

تكلفك الرحلة مع الغداء 200 جنيه
.
.

يوم الاثنين

حديقة الحيوان بالجيزة

اكبر حديقة حيوان بالشرق الاوسط

الدخول بمبلغ رمزي بسيط

تمشّيت فيها العصر وبصراحة وناسة وسعة صدر

وبالليل رحت السينما وشفت فيلم احمد حلمي الجديد ( الف مبروك )

هالآدمي مصرقع والفيلم حلو واحسن مافيه انه نظيف... تتفرج وانت مرتاح

مافيه حركات ( حارش مارش )

وعلى طاري ( حارش مارش )

... ركبت مع راعي تاكسي حقير

يقول لي : لو عاوز بنات زي العسل انا عندي حاقة محصلتش

قلت له : يا اخي خاف ربك... اذا انت ماتخاف انا اخاف من الحرام

عاد المصري والله مايفرط منه الزبون لو على رقبته.. وش قال الخسيس ؟

قال : لو عاوز حاقة شرعية انا عندي برضو زواج متعة

تلاقطت انا واياه ونزلت بنص المشوار
.
.

يوم الثلاثاء

ركبت باليخت اللي يلف بك لمدة ساعتين على النيل

تكلفته مع العشاء 150 جنيه

مكوّن من ثلاث طوابق... الطابق العلوي مكشوف وتستمتع بالهواء البارد

الطابق الثاني فيه المطعم... لك طاولة محجوزة تنزل وتتعشى فيها

الطابق الاول اللي تحت فيه زي الفرقة... اغاني ورقص

... وهذا مالنا دخل فيه ولله الحمد

نمشي ونباري الساس

.
.

يوم الاربعاء

رحت خان الخليلي واخذت فيه لفّه وتفرجت على السوق

انفقع راسي من قراصنة العصر... نصب على اعلى مستوى

اقسم بالله حتى الحمّام ( تكرمون ) اذا جيت تدخل تلقى واحد يقول لك ( ادفع )

ثم رجعت للجيزة وخليت راعي التاكسي يودّيني للاسواق الرخيصة

واشتريت شوية هدايا ( ملابس وقطنيات وتحف )

واخذت لي شوية مانجا وفطير مشلتت

ورجعت للفندق علشان اجهّز اغراضي استعداداً للسفر صباح الخميس
.
.

متفرقات

طبعا طوال الايام اللي جلستها كان الفطور من الفندق مجاناً على حساب الغرفة

وتمسك معي الصباح بدري بعد الفطور اطلع واروح اجلس على قهوة شعبية

واطلب لي شاي كشري اسود يوزن الدماغ ( شاي بس بدون معسل )

وبعد ما اشرب لي كاسين اقوم اتمشى واحياناً آخذ لي ساندوتش فول او طعمية

الشعب هناك كل ابوهم يمدّون ايديهم بكل وساعة وجه طلباً للبخشيش

وين ماتروح ووين ماتجي تلقى بوجهك واحد يبي بخشيش

واذا عطيت واحد... اقرى على نفسك الفاتحة

ينتشر الخبر اسرع من الصاروخ

وهناك عندهم سؤال لازم يسألونك اياه : هوّا الباشا منين ؟؟

ومثل ماقلت لكم قبل... لو درى احد انك ( خليجي ) رحت فيها

علشان كذا حاول تمشّيها طول فترة اقامتك بأي دولة كويسة

قل انا مغربي.. او اردني.. او ليبي.. او مثلي قل انا من ( موريشيوس )

وبعدين لاتشيل معك فلوس سعودية

اول ماتوصل لمطار مصر شف الصرافين عند حقين الجوازات

رح وحوّل كل اللي معك بالجنيه المصري

واذا بغيت ترجع للسعودية نفس الطريقة تحوّل الفائض بالريال السعودي قبل تسافر

وطبعاً مايبي لها تأكيد انك هناك ماتلبس ثوب وشماغ الا اذا كنت بايع عمرك

.
.
.
.

موقف اخير قبل النهاية يلخّص كل الحكاية

وانا راجع في مطار القاهرة

حمّلت عفشي وقصّيت بطاقة صعود الطائرة وشلت اللاب توب ورحت اختم جوازي خروج

عسكري الجوازات اللي بالكابينة عطيته جوازي

واقسم بالله انه ماختمه لي الا بعد مادفعت له ( إكرامية )

قال لي بالحرف الواحد :

انت راقل طيب وشكلك مش بتاع مشاكل ومالكش في التأخير والبهدله

انا ممكن اعطلك شوية لحد ماتمشي الطيارة وما اختمش الجواز ( لأسباب أمنية )

انما بئى لو عاوزني امّشيك.... ريّحني واريّحك ( وعطاني غمزه بعينه )

طبعا عطيته المقسوم وختم لي الجواز وركبت الطيارة

يوم رجعت الرياض

عسكري الجوازات اللي اخذ جوازي علشان ختم الدخول

ملتحي ومتدين جداً كما يبدو على مظهره

ختم لي بكل حب ومودة

لكن بعد مادخلت شناطي بجهاز الكشف عن الممنوعات

شاف الجهاز وقال :

وش هالتمثال اللي بشنطتك

قلت له :

وش تمثاله

؟؟؟ مامعي تماثيل

قام وفتح الشنطة ولقى فيها تحفه صغيرة لـ( ابوالهول )

قال :

وهذا وشّو ؟؟ موب تمثال ؟؟

قلت :

هذا ابوالهول

... تحفه عادية جايبها معي ذكرى من مصر

قال :

الله يهديك بس... هذا صنم يعبد

... بلا ابوالهول بلا خرابيط

قلت :

الله يهدينا جميعاً.. بس اسألك بالله... انت جاي في بالك اني راح اعبد هالتحفه مثلاً ؟؟

.
.

بس اتركوا عنكم... والله يا انا ولهان على بخاري الشواية الذهبية اللي عندنا بالروابي