][ (¯`·._) صاحبة القلم المتميز \المحبره ..ضيفاً على -: يوم في ذاكرتي: -][ (¯`·._)
فكرة : القيصر رهيب إعداد وتنسيق : الهنوووف تصميم : القيصر رهيب
بكل الحب والمودة نرحب بأعضائنا وزوارنا الكرام في سلسلة جديدة من 
يوم في ذاكرتي في حياتنا أيام لا تنسى ..
حملت بين جوانبها أحداث ومواقف شتى ،،
تحكي لنا .. عن ذكريات ماضية
في سطور سوف تبقى خالدة
عبر
.. ( يوم في ذاكرتي ) ..
ضيفتنا \ صاحبة القلم المتميز «¤¶ 
المحبره ¶¤»
السلام عليكم و رحمة الله و بركاته ..,
ألف مليون مبروك الإجازة .. و أهني الناجحين و الناجحات .. أسعد الله أيامكم بكل خير 
يسعدني أكون بينكم في هذه الاستضافة في مجلسنا العامر .. أدامه الله علينا 
صراحة فكرت بأكثر من يوم ودي أتحفكم فيه و أعطيكم درس من دروس حياتي 
«¤¶ فرج بعد ضيق ¶¤» اليوم اللي اخترته لكم.. من أيامي الحافلة بالأحداث .. يوم صعب تعرضت فيه لصدمة و روعة قوية .. لكن و لله الحمد وحده حفظنا بعد حادثة مفجعة جداً !
قبل خمس سنوات كانت أمي تعاني من ( disc ) الإنزلاق الغضروفي في الظهر و تروح تعالج عند دكتور يعالج بالأجهزة و التدليك عشان تستغني عن العملية !
جاء يوم الأربعاء 29/4/2004 و عندها مراجعة ,, أنا تقريباً أروح معها كل المراجعات إلا إذا كان شي يمنعني من اختبارات الجامعة أو غيره !
ذاك اليوم ما لي رغبة أروح .. أخواتي عندنا و ودي أقعد معهم ,, بس ما سمح خاطري تروح لحالها و أنا ما عندي شي 
قلت بروح و إن شاء الله ما نطول هناك ! 
رحنا تقريباً على آذان العشاء .. وصلنا للعيادة على شارع العليا العام جهة الجنوب تقاطع وزارة الداخلية ,,
جلسنا أنا و أمي في غرفة انتظار النساء و أخوي في غرفة الرجال .. الغرفة فيها أعمار و جنسيات مختلفة .. لأنه يعالج معظم الأمراض – الله يحفظنا و إياكم –
بالتدليك و الشحنات و المغاطيس .. جلست مع أمي ننتظر أنا معي جوالي ألعب فيه .. أو أهوجس .. و قسم ما أذكر خلال دقائق الانتظار .. و مابين سوالف الحريم و إزعاج الأطفال .. فجعنا صوت ( بوووووم و بوووم ثاني ! ) أذكر إني التفت يمين جهة الشباك .. بعدين غمضت ,, فتحت , لقيتني فوق أمي .. أرفع راسي ,, وش أشوف ؟؟ اللمبات طاحت و الجدار تكسر و الناس تركض قمت و مسكت أمي و ركضنا برى الغرفة و كان صعب عليها المشي بسرعة لكن نست الألم .. العالم برى واقفة .. و الدكتور طالع من غرفة الكشف يهدي المرضى
يقول هذا تفجير في وزارة الداخلية لكن و لله الحمد أحبط و ما فيه شي بإذن الله !
سقف غرفة الدكتور كلها أسلاك نازلة .. المريضة اللي كانت ع السرير طاحت و كانت كبيرة بالسن مرًه !
ركضنا نطلع من المبنى .. العيادة شقة متواضعة شوي .. و الأدوار اللي تحتها شقق سكن .. لذلك لما وصلنا الدرج ما قدرنا نمشي .. السكان يركضون
.. حريم يصارخون و أطفال يصيحون و كل الناس تركض ( العمر غالي ) و طبعاً مستحيل أحد يستخدم المصعد !
أنا أشوف أمي و أخوي في آخر الدرج و أنا فوق ما قدرت أدخل بالزحمة .. و أسمع أمي تقول وين أختك و هو يقول هذاها ورانا .. وهو والله يتسذب منيب وراهم ..
صرنا بالشارع بعد مجهود و خوف و رعب .. ركبنا سيارة أخوي و انطلقنا للبيت بشرق الرياض و يابعد بيتنا ذاك اليوم ! وصلنا بالسلامة , خواتي يسولفون ماحسوا بشي الحمد لله .. دخلت أنا أول شي قالوا لي : وش في وجهك ؟؟؟!
قلت : ما سمعتوا صوت ؟؟
قالوا : إلا بس ماعرفنا وش صوته ؟
قلت : جانا تفجير .. و قعدت أصيح !
قاموا بسرعه و راحوا لأمي و سلموا عليها عند الباب و صاحوا شوي معها ,,
صاروا سامعين صوت تفجيرين في نفس اليوم .. الداخلية و قوات الطوارئ شرق الرياض..
هدًينا شوي .. و خففنا من الروعة ,, .. فتحنا ع العربية .. و أخواتها ,, تكلموا عن التفجير و إنه أُحبط .. سبحان الله!!
التفجير هذا ماتم حسب الترتيب لأن الداخلية جاها خبر قبل بأيام و أعطت خبر لكل المناطق القريبة .. لذلك الدكتور كان عنده علم !
طبعاً مايدري أي يوم .. لكن يعرف إنها مستهدفة قريباً ,, و إلا كان جمًد مواعيده لليوم نفسه !
السيارة المفخخة اُحتجزت تحت النفق .. وقفوها قبل تنفجر ..
أما الإنفجار اللي حصل .. هذا - حسب ماسمعنا - جزء بسيط من الانفجار المنظم ..
ذاك اليوم تعرضنا لروعة امتد أثرها لأيام .. أعصابنا تعبت كثير .. النوم صار مرهق .. و احتجنا وقت لحد ما تجاوزنا هالأزمة ,, لكن دائماً لمًة الناس و اهتمامهم تخفف علينا .. للأمانة ؛ خواتي دلعوني .. و فرحت بكثير اتصلوا يتطمنون علي .... صحيح عشت أيام صعبة ؛ لكن عرفت إن الدنيا لسًه بخير الحمد لله الذي بفضله تتم النعم ,, أن كتب الله لنا عمر جديد و أنقذنا من موت مُحقق ! و الحمد لله الذي لا يُحمد على مكروه سواه ,, على الفجيعة اللي حصلت و الرعب اللي دخل على قلوب كبار السن و الأطفال في العيادة و في منازلهم ,, و على مسلمين لا ذنب لهم !
اللهم اكفنا شر الأشرار و احفظنا يا رب بحفظك .. إنك على كل شي قدير !
\
/
أشكر الهنوووف على هذه الدعوة .. و أشكر مشرفي و استشاري المجلس العام .. بارك الله في جهودكم .. و صيفية سعيدة بإذن الله ..
شكراً لكم أحبتي و تقبلوا تحياتي .. المحبره
ونحن بدورنا نشكر العضوة المتميزة المحبره لقبولها دعوتنا
الحمد لله على سلامتكم 
وادام الله الامن والامان لبلاد المسلمين
\ /
نلقاكم مع عددٍ آخر وضيفٍ جديد في
( يوم في ذاكرتي ) 
مشرفوا و استشاريوا المجلس العام يقدمون لكم أرق التحايا وأطيبها
![][ (¯`·._) صاحبة القلم المتميز \المحبره ..ضيفاً على -: يوم في ذاكرتي: -][ (¯`·._)](iconimages/t797589_rtl.gif)
الوضع الشجري
