..


الســلآم عليكـُــم ..


صبحكم الله بالنور والسرور <~ انجزي = خلصي

والله اني بلشت بعمري مدري وش اسدح لكم طبخه

قلت الناس مايبون الكلآفه وشوله اتكلف واتعب نفسي

وماشاء الله الرز مدهر بالمشاركآت مو يقولون سعر خيشة الرز ارتفع ؟

ورآكم فسقتوآ




اليوم وبحمد لله وفضله دخلت المطبخ وفسرت ذرعاني = لغير الحآيليين شمرت عن ساعيدي

وادخل المطبخ واقول للشغالات يطلعون برى وامي الله يطولي بعمره تدعي لكم تقول الله يجزآكم

خير ع الفكره الي خلتني ادخل المطبخ <~ طبعآ امي تحب تمزح لآني ساكنه بالمطبخ عن الحلف ما انام فيه بس


المهم صلحت صينيه حلى قهوة [ نمشي دورية انا وخواتي] كل يوم ع وحده القهوة وتجيب معاه شي ينبلع

بما انو عاشقه الزعيم ع سن ورمح صلحت حلى اليكم الصور





المقآدير :

باكيت شعيريه احمد وفي روآيه اخرى شعيريه باكستانيه

اصبع زبده

حليب نسلته

جبن كيري

زبده الفول السودآني

وهيرشي للشخآبيط



الطريقه :

تكسرين الشعيريه بيدينك <~ آجل برجولك

المهم انك تكسرينها تكسير دقيق طلعي كل الي بقلبك وفشي خلقك فيه تخيلها منصور البلوي

وبعدين سيحي ع النآر الزبده لحد ماتموع

واضيفيها ع الشعيريه وحركيهآ وبعدين جيبي حليب النستله و ملعقه [ حسب الرغبه ] زبدة الفول السودآني

واخلطيهآ وبعدين كوريهآ كآنها فوت بول

وحطي بالخلآط الباقي من الحليب النستله وجبن كيري وصبيهم ع الكور يعني شخمطي بالخلطه

وبعدها خذي الهيرشي وشخمطي مره ثانيه <~ صارت حصه فنيه لاولى ابتدآئي

ويمدحونهآ مع فنيـجيل قهوه


طبعآ لو بتشوفون الصور تقولون اني مصورته بنآدي الهلآل

بس جد توني احس انو ترمس القهوة كشخه بشعآر الهلآل

ابي اقترح ع الوآلده تكشخ فيه باقرب عزيمه




صوتوا لي وابشروا بعزكم <~ داخله انتخابات


..