20/08/2002, 02:02 AM
|
| زعيــم مميــز | | تاريخ التسجيل: 10/06/2002 المكان: الرياض
مشاركات: 1,784
| |
|
تصرفات بعض اصحاب السيارات بالشوارع ترفع الضغط
السلام عليكم
فيه تصرفات بعض اصحاب السيارات بالشوارع ترفع الضغط منها مايلي :
*** بعض الناس الله يهديهم يفتح الباب عند الاشاره ويطالع على تحت شوي ثم ( ... ) يتفل - الله يكرمكم - بعدين يصك الباب خصوصا سواقين الليموزينات والاجانب
اذا احد له اي تعليق ارجو المشاركه به
الموضوع منقول
*** بعض الناس يمسك اليسار بالدائري ويمشي 60 كم !!
*** يجيك واحد يمشي 200 ماسك الخط الاصفر بالدائري ويطير الحصى الصغار والغبار الي جمب الصبه عليك !!
*** بعض الناس يمشي وراك وانت ماسك اليسار على الدائري وماشي بسرعه قانونيه ويلحّم موتره في موترك وخذ يا تكبيس بالنور والمشكلة انه يكون جمبك سيارات على المسار الاوسط على يمينك وماتقدر تبعد ومع كذا يكبس !!
مدري يبينا نطير ولا وش الحل برايه ؟
*** اللي يرفع الضغط اكثر عند الاشارات اذا جاك واحد يقعد يناظر فيكم وشوي يركب معكم !!
ويقعد يناظر ولا يستحي لا من الله ولا خلقه ويزيد الطين بله لو كان اهلك معك اف عينك ماتشوف الا النور يقز قز يوحش !!
*** واحد ماسك المسار الايمين وتكوون الاشارة حمراء ويسكر الطريق على الناس اللي بيلفوون يمين !!
*** اللي يرفع الضغط اكثر، اذا كنت واقف وراء سيارات تنتظر دورك باللفه ويجيك واحد من البزارين ويترك هالواقفين كلهم ويدخل عرض على صفة السيارات وبعضهم ( من باب الادب يستأذن على اللي بيسقط عليه )!!
*** واحد يكون واقف وراك وقبل ماتفتح الاشاره يبدا يكبس ويدق بوري
*** وكذلك بعضهم يكون وراك عند الاشاره وانت مقبل عليها وتكون ولعت حمراء وانت قبل خط المشاة ونيتك توقف خلاص ويكون وراك ويعلق البوري يبيك تمشي لان الاشاره توها مولعه حمراء !!
*** يجيك واحد ماسك الوسط بشارع عام ومهدي السرعة بشويش وقاعد يدور محل معين على اليمين ولا فكر بالناس الي وراه !!
*** اثنين يوقفون بسياراتهم واحد ماسك يمين وواحد بالوسط وجالسين يسولفون وكأن الشارع مافي الا هم وتكثر هذه الظاهرة عند فئة ابو طاقية وحقين الكابات !!
*** البعض يسكر المسار الايمن عند الاشارة بدون سبب .. واذا فتحت الاشارة تلقاه اخر واحد يمشي !!
*** والادهى منه واحد ثاني يسكر المسار الايمن عند الاشارة واذا سمع البواري والازعاج اللي وراه .. يلف شوي يسار ويعرض الموتر ويسكر على اللي جنبه بكل وقاحة !!
*** بعض الشباب الحقير الوضيع .. قليل الادب والمروة اللي ينزل من سيارته عند الاشارة .. ويروح للسيارة اللي فيها بنات ويعطيهم الرقم !!
لاحياء ولا دين، ويرجع ثانية للسيارة ولاعنده في احد!!
*** بعض الشباب تلقه يرفع الموسيقى لاعلى شي !!
والأدهى من ذلك ان بعضهم يركب سماعات قويه بالشنطه!!!!
ما أدري يعني لازم يجمع اكبر قدر من الذنوب؟؟؟
*** البعض معهم درادع سيارات وقرنبعات ويروح يمين ويسار ولا عليه من اللي حوله !!
*** البعض تلقاه يوقف في المواقف العامودية بالعرض وياخذ موقفين !!
*** اذا بغيت تديور مع تقاطع وواحد في الخط الثاني طاير وانت تنتظره يروح .. تلقاه بكل برود يلف مع المديور من غير اشارة و انت قاعد تنتظره تحسبه يبي يطول !!
*** البعض تلقاهم عند الاشارات يحشرون انفسهم بين سيارتين شوي وتصافق المرايا !!
*** البعض تلقاهم ينسون الاشاره تدق يايمين يايسار من مسافة كيلو ويوهقون اللي وراهم!!
*** احيانا تكون واقف نظامي عند احد المحلات لشراء غرض ما ويجيك واحد يسكر عليك ويروح!!
واذا جيت تبي تطلع دور ابوالشباب وينه!!
ومن زين الطبايع بعضهم يجي ويشغل موتره ويمشي ولا يعتذر ولاشيء !!!!
*** بعض الناس اذا صار معه سياره فخمه يعني (جخ) ينتفخ راسه ولا يشوف الا نفسه في هالشوارع ويقعد يصاقط على الناس بعنف ونفس شينه !!
*** ظاهرة السير ليلا بدون انوار والتي يمارسها مع الاسف الكثير من المراهقين وحتى بعض الكبار بمعنى اطفاء انوار السيارة ليلا والسير على النور الصغير ، هذه الظاهرة فيها الشيء الكثير من الخطورة على المارة والمشاة وعلى السيارات الاخرى وهي مع الاسف منتشرة بشكل كبير في شوارعنا !!
*** ظاهرة التسارع بالسيارة بسرعة عالية جدا عند رؤية نور الاشارة الاصفر بقصد اللحاق على الاشارة وعبورها وهذه من أخطر الظواهر وتكاد تكون اخطر من قطع الاشارة العادي |
الوضع العادي
