مع السلام عليكم

وش اسوي يا ربي انط من فوق السطح اكسر قزاز المكتب
وانط على الشارع انتحر واموت اشق هدومي ترى بصيح

لا احسن شي افقع ام وجهه بقس اخليه عيونه الثنتين يسار
اشطب وجهه لين افتح طريق خريص كامل فيه
اقوله يرحم امك لا عاد تفكر تسوي نفسك تمون

<=== ترى اللي فوق هذي اللي يسمونها مقدمه

مختصر الموضوع !!

مرات الواحد ربي يبليه بصاحب او زميل عمل او احد من عيلته !!
فيه فضول او يعني ثقل دم شي عجيب ما يحترم الخصوصيات ابد ابد

اللي يصير معي انا شخصيا ... واحد زميل لي بالعمل تقريبا حالته المبدأية
من اول ما شفته وشخصته طلع معه انفصام شخصيه حاد الرجال هادي
جدا وما يحب يكون علاقات تحسه ما عنده شخصية قوية !! غير انه لو مديره
يقوله نط من فوق السطح يروح ينط على طول ولو الله كتب له عمر وما مات
يرجع لمديره يقوله تبغى انط مرة ثانيه

المهم خوينا هذا هو بالشركة من قبل ما اجي ... من يوم جيت انا ويوم شافني
اني ماني تبع مشاكل واحب اذب او يعني بشكل عام عرف اني كويس

بدا يحتك بزياده ودايم يسوي انه تكفى صير صقيقي كله ينبلع وعادي
مع انه سوالفه غبية واصلا ما يسولف الا اذا عنده شغل لكن اللي خلاني اكتب
الموضوع هو انه ملقووووووووووووووووووف

جوالاتي احطها عادة على المكتب جنبي ... كل فترة يعني اسبوع اسبوعين
اذا جاء عندي ما القى ابو الشباب بسيوني الا ماسك الجوال ويقلب امه تقليب
رسايل ... صور ... مقاطع صوت وفيديو ... خدمات ومميزات الجهاز ...
احسه يغيب اسبوعين ويجي يقول خلني اشيك وش عنده شي جديد

اقسم بالله انه يطلع شغلات من الجوال انا ما اعرف عنها او وين موجوده
مرة فتح مقطع فيديو ... انا اسمع الصوت وقامط ام العافيه اقول وش هالصوت
ما قد سمعته الله يستر لا يصير احد من البزران مصور فيديو بالبيت او استهبال
وينكب عشانا كنت بقوله وقتها تكفى تعال ادخل بدفتر العيله بس لا تفضح
اخر شي طلع مقطع مدري من متى واحد مرسله لي وقالي شوفه حلو وانا نسيته
والله

والقلق مرات اخواني الصغار يلعبون بالجوال ويصورون صور نوعا ما فضيحه
انا ما ادري عنها طبعا هو يدري عنها قبلي ومرة اخذ الجوال طول وهو جنبي
واقف يلعب فيه بعد شوي جا حطه قدامي قالي : " بص حضرتك ده بيتنا في مصر "
الدب فاتح Google Earth وقاعد يدور ويطمن على حارتهم وبيتهم من زود الفضاوة !!

مصر مين والناس نايمين يقلع بليسك وين وصلت وش هالميانه اللي تجي كل
اسبوع تقلب جوالي وتطقطق عليه وتسوي انك اخوي بالرضاعه

الغباء بالموضوع ... بعد ما يخلص لقافته طال عمره يجي بكل برود يفتح الكاميرا
ويقولي اوف 8 ميغا بيكسيل يلعن بليسك عشرين مرة سالتني هالسؤال

يعني يحاول يقنعني انه كل هالوقت قاعد يجرب الكاميرا ويحاول يعرف دقتها
وما ادري ايش ... ياخي طفشت دور تصريفه غيرها ...

والله احس بعد كذا من طفش تصريفاته بيصير ياخذه يلعب فيه نص ساعه
بعدين يرجعه يقول اوف يا حرام شكله طاح منك الخدش هذا ما كان موجود المرة
الماضيه يا ابن الـ &*%$###** روقني فكني اكره هالنوعية ياخي احترم
خصوصية الناس

انا والله مرات جوال اختي او اخوي اتردد قبل ما ادخل واسالهم عادة هذا لو مسكت
جوالهم ... كيف واحد ما تمون عليه

اللي خلاني اكتب هالموضوع انه توه الحين مشى من عندي بعد ما فصفص ام الجهاز
وانا جنبه اقول يا رب الله يستر لا يصير شي خاص ... وكل شوي اقول متى بيرجعه
لا واحد يناديه يسولف معه ويروح له وهو يمشي بجهازي ويرجع جنبي يكمل
طقطقه عليه اخر شي بكل برود فتح الكام قالي ايه ده 8 ميغا بيكسل

كنت بقوله وانت خليت فيها بكسيل قولي ايه ده مش جايب حاجه جديده
من اسبوعين ... قولي ايه ده الموبايل بتاعك شكله وقع من يومين .. قولي
ايه ده رسايلك مش حلوه هاوشني ليش خلصت كل مراحل الالعاب بالجوال
وطفشت تبي مراحل جديده والقلق يوم حطه عندي لقيته مفتوح على صفحة
الجوجل ماب وربي طفشت منه ما ابي اكمل لاني لو اخذت راحتي
فيه بيتشفر موضوعي عارف مجلسكم زي نظام السعودية الاولى

<=== لازم يذب

ما يستفاد من الموضوع :

1- وش تنصحوني اسوي معه !!

2- فيه احد يعاني من ناس مثل هالعينات !!

3- لا احد يحط جوالاته قدام الناس للرايح والجاي <=== قول لنفسك

4- لا تخاوي دلوخ .

5- تحسون اني اسمع بشي اسمه ما يستفاد من الموضوع وما اعرف وش هو

شكرا لكم وربي كتبت عشان افضفض واطلع حرتي منه الغبي

سي يو