انا تراي ما جيت ... وترى كلمة ( جاب العيد ) حرام << علشان نقطع الشر من اولّها


ياهلا ومرحبا بكل من كان قلبه ( خضر )

من العنوان يتبيّن لكم احد اهم اسراري التي مستخبّيّه تحت جلباب مخدتي

انا ( واعوذ بالله من كلمة انا ) طبيب غير متوّج

دكتور مو أي كلام

وعندي وصفات علاجيّة تحط الهاشمي تحت ( إبطي )

وماعندي استعداد افضح سر المهنة واكشف لكم اوراقي ببلاش

لكن بما اننا الحين في فصل الصيف اللطيف والكويس

وكلّكم تقحنون ماء بارد وبيبسي وحمضيات وبيرة تفاح مثلّجة

وتسنترون كل عصريّة عند باسكن وكون زون وباقي محلات الآيس كريم

لذلك انا متأكد ان الانفلونزا عامله عمايلها مع الكل

وحبيت اعطيكم اسرع وصفة لعلاج الانفلونزا

بلا بنادول بلا فيفادول وكل هالخرابيط اللي مالها سنع

للمعلومية

كل هالاشياء والمسكنات تضعف المناعة مع الوقت وتخلي الانفلونزا تلعب بحسبتكم اكثر من خمس ايام

واللي أخس منها هذاك الفوار اللي اسمه ( فيتامين C )... وهو في الحقيقة ميرندا منتهية صلاحيتها

اتركوا عنكم كل هالخزعبلات وخذوا الحكمة من أفواهـ العاقلين << ايه هيّن

اذا جاك انفلونزا

ادخل غرفتك ولاتفتح المكيف

وخذ معك ( غضارة ) او طاسة شوربة جريش بدون لحم.. على ماجي

زي اللي يعطونك ايّاها حقّون الكبدة اللي بالحلّة وشارع الاحساء

وكثّر فيها من الفلفل الاسود ولاتكثّر الصلصة

ودردب من هالجريش

وامسح العرق من جبهتك

دردب من هالجريش

وامسح العرق من جبهتك

وهكذا دواليك.. دردب وامسح إلين تشوف شلالات نياجرا والشعبان تسيل من دميجتك

همّن قم.. وتروّش.. وكثّر الشامبو.. وذق طعم العافية

بلا دكاترة بلا شعوذه زايدة

انا بصراحة عدو لدود لكل اللي يروحون للمستشفيات عند كل صغيرة وكبيرة

بعض الحالات يا جماعة الخير يتم علاجها ذاتيّاً في البيت

مو عند كل صغيرة وكبيرة وأدناة الدون نطّيتوا للمستشفيات

قولوا لي بس وش تبون ؟؟

مضاد حيوي ؟؟ عندكم العويدي ( المسمار ) وحطّوا حيلكم فيه مع القهوة

فيتامين C ؟؟ عندكم هالبرتقال اللي فايض من الثلاجة اعصروا واشربوا

مطهّر للالتهابات والجروح ؟؟ انقعوا ( مرّه ) بماء ثم غطّوها بشاش ولفّوا بها الجرح

حروق ؟؟ الله يسلّم معجون كلوس أب.. ادهنوا به الحرق وماقدّامكم الا العافية

ورم بالجبهة بعد طيحة او صقعت جدار ؟؟ امرغوها بفيكس وخلّوها تلعلع

التهاب باللوَز ؟؟ تمضمضوا بماء وملح وتغرغروا

ضغط ؟؟ سلطة زبادي بالثوم كل ليلة تقوم بالواجب... او كوب كركديه ( غجر )

سكّر ؟؟ عندكم الملفوف... اضربوا منه مع السلطة بكميات كويسة


اخيراً وليس آخراً


فنجال قهوة تركية كل صباح... ينظّم دقات القلب ويخلّيها آخر روقان